ᐊᖓᔪᖅᑳᖑᔪᑦ ᑲᑉᐱᐊᓱᓕᖅᐳᑦ ᕿᑐᕐᙵᒥᓂ ᐃᓕᓐᓂᐊᕐᕕᓕᐊᖅᑎᑦᑎᓂᕐᒥ: ᐊᐃᕕᓕᖕᒥ ᒪᓕᒐᓕᐅᖅᑎ

ᓄᓇᕗᒻᒥ ᒪᓕᒐᓕᐅᖅᑎ ᐅᖃᖅᐳᖅ ᐃᓚᖏᓐᓂ ᐊᖓᔪᖅᑳᖑᔪᓂ ᓂᕈᐊᖅᑕᐅᕝᕕᖓᓂ ᑲᑉᐱᐊᓱᖕᓂᖏᓐᓂ ᕿᑐᕐᙵᒥᓂᒃ ᐃᓕᓐᓂᐊᕆᐊᖅᑎᑦᑎᓂᕐᒥ ᐃᓕᓐᓂᐊᖅᑎᒥ ᐋᓪᓂᖅᓯᖅᑕᐅᕐᔪᐊᓚᐅᖅᑎᓪᓗᒍ ᐃᓕᓐᓂᐊᖃᑎᒥᓂᒃ.

ᐊᐃᕕᓕᖕᒥ ᒪᓕᒐᓕᐅᖅᑎ ᓵᓚᒪᓐ ᒪᓕᑭ ᓴᖅᑭᑎᑦᑎᓚᐅᖅᐳᖅ ᐊᑲᐅᙱᓕᐅᕈᑕᐅᔪᒥ ᒪᓕᒐᓕᐅᕐᕕᖕᒥ ᐅᒃᑐᐱᕆ 23−ᒥ.

“ᐊᒃᓱᕈᕐᓇᖅᑐᐊᓗᒃ ᐊᖓᔪᖅᑳᒥ ᐃᓕᖕᓄᑦ ᐅᖃᐅᔾᔨᓪᓗᓂ ᐊᔾᔨᖁᑎᒥᒃ 12−ᓂ−ᐅᑭᐅᓕᖕᒥ ᐃᓕᓐᓂᐊᖅᑎᖁᑎᒥᓂ ᐋᓐᓂᖅᓯᖅᑕᐅᓚᐅᒧᑦ ᐃᓕᓐᓂᐊᖃᑎᒥᓂᑦ ᐃᓅᓕᓴᖅᑕᐅᓂᕐᒧᑦ ᖃᖓᑕᓲᒃᑯᑦ ᐊᐅᓪᓚᖅᑎᑕᐅᔭᕆᐊᖃᖅᖢᓂ ᓄᓇᓕᖕᓂ,” ᐅᖃᓚᐅᖅᐳᖅ.

“ᓄᒫᓇᖅᐳᖅ ᑐᓴᖅᖢᓂ ᐊᖓᔪᖅᑳᖑᔪᑦ ᕿᑐᕐᙵᒥᓂᒃ ᐃᓕᓐᓂᐊᕆᐊᖅᑎᑦᑎᑲᑕᙱᓐᓂᖏᓐᓂ ᐃᓱᒫᓗᖕᒪᑕ ᐊᑦᑕᓇᔾᔭᐃᖅᓯᓯᒪᓂᖏᓐᓂ. ᓄᒫᓇᕐᓂᖅᓴᐅᕗᖅ ᑐᓴᖅᖢᓂ ᒪᒃᑯᒃᑐᖁᑎᕗᑦ ᑲᑉᐱᐊᓱᖕᓂᖏᓐᓂ ᐃᓕᓐᓂᐊᕆᐊᕆᐊᒃᓴᖅ ᐋᓐᓂᖅᓯᕆᓂᐅᔪᓂ ᑕᑯᕙᒃᑕᖏᓐᓂ.”

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᖃᐅᔨᒋᐊᓚᐅᖅᐳᑦ ᑲᓇᑕᒥ ᐸᓖᓯᒃᑯᓐᓂ ᐅᓂᒃᑳᕆᓂᐅᔪᒥ ᐸᓴᒋᔭᐅᔪᒥ ᖃᓄᐃᓐᓂᐅᓚᐅᖅᑐᒥ. ᑲᓇᑕᒥ ᐸᓖᓯᒃᑯᑦ ᐅᖃᖅᑎᐅᔪᖅ ᓵᔾᔭᓐᑦ ᐹᓖᓐ ᒥᓛᓐᓯᓐ ᓇᓗᓇᐃᖅᓯᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᐃᓄᖕᒥ ᐃᓅᓕᓴᖅᑕᐅᓂᕐᒧᑦ ᖃᖓᑕᓲᒃᑯᑦ ᐊᐅᓪᓚᖅᑎᑕᐅᔭᕆᐊᖃᕐᓂᖓᓂ ᓇᐅᔮᓂ.

ᐅᒃᑐᐱᕆ 26−ᒥ, ᖃᓄᐃᓐᓂᐅᔪᖅ ᓱᓕ ᖃᐅᔨᓴᖅᑕᐅᓚᐅᖅᐳᖅ.

ᒪᓕᑭ ᐊᐱᕆᓚᐅᖅᐳᖅ ᐃᓕᓐᓂᐊᖅᑐᓕᕆᔨᒃᑯᑦ ᒥᓂᔅᑕᖓᓂ ᐹᒥᓚ ᒍᕉᔅᒥ ᑭᓱᓂ  ᐃᓕᓐᓂᐊᖅᑐᓕᕆᔨᒃᑯᑦ ᐱᓕᕆᓂᖏᓐᓂ ᓇᓗᓇᐃᖅᓯᓂᕐᒧᑦ ᐊᑦᑕᓇᔾᔭᐃᖅᓯᓯᒪᓂᖓᓂ ᐊᒻᒪ ᓇᐅᑦᑎᖅᓱᖅᑎᐅᔪᓂ ᐃᓕᓐᓂᐊᖅᑎᓂᑦ ᐃᓕᓐᓂᐊᕐᕕᖕᒥ.

ᒍᕉᔅ ᐅᖃᓚᐅᖅᐳᖅ ᕿᑲᕐᓂᖃᓚᐅᕐᓂᖓᓂ ᑕᐃᔅᓱᒪᓂ ᐸᓂᖕᒥᓂᒃ ᐃᕐᓂᔭᖅᑐᖅᖢᓂ, ᑭᓯᐊᓂ ᖃᐅᔨᒪᓚᐅᖅᐳᖅ ᖃᓄᐃᓐᓂᐅᔪᒥ ᐊᒻᒪ ᖃᐅᔨᒪᓚᐅᖅᐳᖅ ᒪᓕᑭ ᑎᑎᖅᑲᒥᒃ ᓇᒃᓯᐅᔾᔨᓚᐅᕐᓂᖓᓂ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᑖᔅᓱᒪ ᒥᒃᓵᓄᑦ.

ᐃᓕᓐᓂᐊᖅᑐᓕᕆᔨᒃᑯᑦ ᑭᐅᓚᐅᖅᐳᑦ ᑎᑎᖅᑲᑎᒍᑦ ᒪᓕᑭᒧᑦ ᐅᒃᑐᐱᕆ 12−ᒥ ᑭᐅᔪᒥ ᐃᓱᒫᓘᑕᐅᔪᓂ, ᒍᕉᔅ ᐅᖃᓚᐅᖅᐳᖅ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᖃᐅᔨᒋᐊᓚᐅᖅᐳᑦ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᐊᒻᒪ ᒪᓕᑭᒧᑦ ᐊᔾᔨᖓᓂ ᑎᑎᕋᖅᑕᐅᓂᑯᓂ. ᒪᓕᑭ ᐅᖃᓚᐅᖅᐳᖅ ᑎᑎᖅᑲᓕᐊᕆᓚᐅᖅᑕᖓ ᐃᓗᓕᖃᕐᓂᖓᓂ ᐊᓯᒧᑦ ᑐᓴᖅᑕᐅᔭᕆᐊᖃᙱᑦᑐᓂ ᐊᒻᒪ ᐊᖏᓚᐅᙱᓚᖅ ᑐᓂᓯᓂᕐᒥ. ᐃᓕᓐᓂᐊᖅᑐᓕᕆᔨᒃᑯᑦ ᑭᐅᓚᐅᙱᓚᑦ ᐆᒧᖓ ᑐᒃᓯᕋᐅᑕᐅᔪᒥ.

ᑭᐅᓂᖓᓂ ᒪᓕᑭᒧᑦ, ᒍᕉᔅ ᐅᔾᔨᕆᓚᐅᕐᓂᖓᓂ ᐃᓕᓐᓂᐊᖅᑐᓕᕆᔨᒃᑯᑦ ᐊᑐᓕᓚᐅᕐᓂᖏᓐᓂ ᐅᓂᒃᑳᕆᔭᖃᖃᑦᑕᕐᓂᕐᒥ ᐱᓕᕆᔾᔪᓯᐅᔪᒥ ᐅᒃᑐᐱᕆ 2022−ᒥ ᖃᐅᔨᓴᖅᐸᒃᑐᓂ ᖃᓄᐃᓐᓂᐅᔪᓂ ᐃᓕᓐᓂᐊᕐᕕᖕᒥ ᐋᓐᓂᖅᓯᕆᓂᐅᔪᓂ.

“ᐱᓕᕆᓂᐅᒋᕗᖅ ᐅᕙᑦᑎᓐᓄᑦ ᐊᑐᕐᓂᕐᒥ ᐱᑎᑦᑎᑦᑕᐃᓕᒪᓂᕐᒥ ᐱᓕᕆᔾᔪᑕᐅᓂᖓᓂ ᐱᓕᕆᔪᓐᓇᕐᓂᐊᕋᑦᑕ ᐋᖅᑭᒍᑎᒃᓴᐅᔪᓂ ᐊᒻᒪ ᓄᖅᑲᖅᑎᑦᑎᓯᒪᓂᕐᒥ ᖃᓄᐃᓕᐅᕈᑕᐅᔪᓂ ᐱᓕᕆᓂᕐᒧᑦ ᐊᔾᔨᐸᓗᐊᓂ ᖃᓄᐃᓐᓂᖃᒃᑲᓐᓂᖅᐸᑦ ᓯᕗᓂᒃᓴᒥ,” ᐅᖃᓚᐅᖅᐳᖅ.

ᒪᓕᑭ ᐊᐱᕆᓚᐅᖅᐳᖅ ᒍᕉᔅᒥ ᐊᖏᒡᓕᒋᐊᖅᑐᒥ ᐃᓕᓐᓂᐊᕐᕕᖕᒥ ᓇᐅᑦᑎᖅᓱᖅᑎᐅᔪᓂ ᐅᓇᐅᓚᐅᖅᑎᓪᓗᒍ ᖃᓄᐃᓐᓂᐅᔪᒥ ᐅᓂᒃᑳᕆᓚᐅᖅᑕᖓᓂ.

ᒍᕉᔅ ᑭᐅᓚᐅᖅᐳᖅ ᑕᒪᒃᑭᑦ ᐃᓕᓐᓂᐊᕐᕖᑦ ᓇᐅᑦᑎᖅᓱᕈᑎᓂ ᐊᔾᔨᓕᐅᕈᑎᖃᖅᐳᑦ ᕿᒥᕐᕈᔭᐅᔪᓐᓇᖅᑐᓂ ᓇᓗᓇᐃᖅᑕᐅᓯᒪᔪᓄᑦ ᖃᓄᐃᓐᓂᐅᔪᓄᑦ ᐊᒻᒪ ᖃᐃᖁᔨᓂᖃᓚᐅᖅᐳᑦ ᒪᓕᑭᒥ ᐅᖃᐅᓯᖃᕐᓂᖓᓂ ᐃᓱᒪᒋᔭᐅᓯᒪᓂᐅᔪᓂ ᐃᓕᓐᓂᐊᖅᑐᓕᕆᔨᒃᑯᓐᓄᑦ.

ᑲᑎᓪᓗᒍ 245−ᓂ ᐋᓐᓂᖅᓯᕆᕐᔪᐊᕐᓂᐅᔪᓂ ᐅᓂᒃᑳᕆᔭᐅᔪᓂ ᐃᓕᓐᓂᐊᕐᕕᓂᑦ ᓄᓇᕗᓕᒫᒥ ᕿᑎᐊᓂ ᐅᒃᑐᐱᕆ 2022−ᒥ ᐊᒻᒪ ᔫᓂ 2023−ᒧᑦ, ᐅᖃᐅᓯᐅᓪᓗᓂ ᑎᑎᕋᖅᓯᒪᔪᓂ ᖃᐅᔨᓴᖅᑕᐅᓂᑯᓂ ᑐᓂᔭᐅᔪᓂ ᐃᓕᓐᓂᐊᖅᑐᓕᕆᔨᒃᑯᓐᓂ.

ᑕᒪᓐᓇ ᐃᓚᖃᖅᐳᖅ 78−ᓂ ᐅᓂᒃᑳᓕᐊᖑᔪᓂ ᐃᓕᓐᓂᐊᖅᑎᒥ−ᐃᓕᓐᓂᐊᖅᑎᒧᑦ ᐱᑦᑎᐊᙱᓐᓂᐅᔪᒥ ᐋᓐᓂᖅᓯᕆᓂᕐᒥᓪᓘᓐᓃᑦ ᐊᒻᒪ 70−ᓂ ᐅᓂᒃᑳᓕᐊᓂ ᐃᓕᓐᓂᐊᖅᑎᒥ−ᐃᖅᑲᓇᐃᔭᖅᑎᓄᑦ ᐅᓂᒃᑳᕆᓂᐅᔪᓂ ᐱᑦᑎᐊᙱᓐᓂᐅᔪᒥ ᐋᓐᓂᖅᓯᕆᓂᕐᒥᓪᓘᓐᓃᑦ.

11−ᓂ ᐃᓕᓐᓂᐊᖅᑎᒥ−ᐃᓕᓐᓂᐊᖅᑎᒧᑦ ᖃᓄᐃᓂᖃᓚᐅᖅᐳᑦ ᐅᓂᒃᑳᕆᔭᐅᔪᓂ ᑲᑉᐱᐊᓵᕆᔭᐅᓂᕐᒥ ᐊᒻᒪ 34−ᓂ ᐃᓕᓐᓂᐊᖅᑎᒥ−ᐃᖅᑲᓇᐃᔭᖅᑎᓄᑦ ᖃᓄᐃᓐᓂᐅᔪᓂ ᑕᐃᒪᐃᑦᑐᑦᑕᐃᓐᓇᕐᒥ.

ᐊᒻᒪᓗᑦᑕᐅᖅ, 67 ᐳᓴᓐᑎᒥ ᓄᓇᕗᒻᒥ ᐃᓕᓐᓂᐊᕐᕕᓂ ᐅᓂᒃᑳᕆᓚᐅᖅᐳᑦ ᐊᑕᐅᓯᓪᓗᐊᒥ ᖃᓄᐃᓐᓂᐅᔪᒥ. 17 ᐳᓴᓐᑎᒥ ᐅᓂᒃᑳᕆᔭᐅᓯᒪᔪᓂ ᖃᓄᐃᓐᓂᐅᔪᓂ ᓇᖕᒥᓂᖅ ᐋᓐᓂᕐᓂᐅᔪᓂ, 12 ᐳᓴᓐᑎᒥ ᐱᑎᑦᑎᓂᖃᖅᖢᓂ ᐅᖃᓗᖕᓂᐅᔪᓂ ᑲᓇᑕᒥ ᐸᓖᓯᒃᑯᓐᓄᑦ.

ᐅᓂᒃᑳᕆᓂᕐᒥ ᐱᓕᕆᔾᔪᓯᐅᔪᖅ ᑎᑎᕋᖅᓯᑐᐃᓐᓇᓲᖑᕗᖅ ᐱᔪᒪᔪᓄᑦ ᐅᓂᒃᑳᕆᔭᐅᔪᓂ ᑎᑎᕋᖅᓯᒪᔪᓂ ᖃᐅᔨᓴᖅᑕᐅᓂᑯᓂ ᐊᒻᒪᓗ ᐃᓕᓐᓂᐊᖅᑐᓕᕆᔨᒃᑯᑦ ᐅᔾᔨᕆᕗᖅ ᒪᕐᕈᖏᓕᖓᑐᐃᓐᓇᕆᐊᖃᕐᓂᖓᓂ ᐱᓕᕆᔾᔪᓯᐅᔪᖅ ᓇᓗᓇᐃᖅᓯᔪᓐᓇᙱᒻᒪᑦ ᖃᔅᓯᒐᓚᖕᓂ ᐅᓂᒃᑳᓕᐊᖑᔪᓂ ᑕᐃᔅᓱᒧᖓᑦᑕᐃᓐᓇᖅ ᖃᓄᐃᓐᓂᐅᓚᐅᖅᑐᒥ.