ᐸᐅᒃᑑᑎᑦ ‘ᖁᕕᐊᓱᙱᑦᑐᑦ’ ᐋᑐᕚᒥ ᕿᒫᕝᕕᐅᓇᔭᖅᑐᒥ ᐱᖁᔨᙱᑦᑐᓄᑦ

ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᐃᑲᔪᖅᑐᐃᓂᕋᖅᑐᑦ ᑐᒃᓯᕋᐅᑎᖏᒥ ᐃᓄᐃᑦ ᐊᕐᓇᐃᑦ ᕿᒫᕝᕕᒃᓴᖓᓂ ᐋᑐᕚᒥ ᑖᓐᓇᓗ ᓄᓇᖃᖅᑐᓂ ᖃᓂᒋᔭᖓᓂ ᐱᑕᖃᖁᔭᐅᙱᖢᓂ.

ᐅᖃᐅᓯᒃᓴᓕᐅᖅᑎᓪᓗᒋᑦ ᐊᐃᕆᓕ 24-ᒥ, ᑲᓇᑕᒥ ᐃᓄᐃᑦ ᐊᕐᓇᐃᑦ ᑲᑐᔾᔨᖃᑎᒌᖏᑦ ᐅᖃᓚᐅᕐᑐᑦ “ᐱᔾᔪᑎᒋᓪᓗᒍ ᖃᖓᑦᑎᐊᓵᖅ ᐅᓂᒃᑳᓕᐅᖑᓂᑯᑦ ᐊᕐᓇᓄᑦ ᕿᒫᕕᒃᓴᐅᑉ ᒥᒃᓵᓄᑦ ᐋᑐᕚᒥ ᓂᒋᖅᐸᓯᐊᓂ,” ᐃᑲᔪᖅᑐᐃᓂᕋᓚᐅᕐᑐᑦ ᐋᑐᕚᒥ ᓄᓇᖃᖅᑳᖅᑐᑦ ᑲᑐᔾᔨᖃᑎᒌᑦ ᐃᒡᓗᓕᐅᕈᒪᔾᔪᑎᖏᓐᓂᒃ.

ᐋᑐᕚᒥ ᒐᓛᓴᔅᑐ-ᓴᐅᑦᒌᑦᒧᑦ ᑲᑎᒪᔨ ᔭᓯᑲ ᐳᕌᑦᓕ ᑲᑎᒪᑎᑦᑎᓚᐅᕐᓯᒪᖕᒪᑦ ᓄᓇᖃᖅᑐᓂ ᑖᒫᓂ ᐊᐃᕆᓕ 23-ᒥ ᑐᒃᓯᕋᐅᑎᒋᔭᐅᔫᑉ ᒥᒃᓵᓄᑦ ᓄᓇᒥ ᑐᓂᔭᐅᔪᒪᔪᓂᒃ ᓄᓇᓕᐸᐅᔭᐃᑦ ᓄᓇᖁᑎᖓᓂ ᕼᐊᓐᑦ ᑲᓚᑉ ᓄᓇᖏᓐᓂ ᑲᑐᔾᔨᖃᑎᒌᓄᑦ.

ᐅᓇ ᓄᓇ ᓴᓇᕝᕕᐅᓇᔭᕐᑐᖅ ᓄᑖᒥ ᕿᒫᕝᕕᒃᓴᒥ ᐃᓄᐃᑦ ᐊᕐᓇᓄᑦ ᕿᑐᕐᖓᖏᓐᓄᓪᓗ ᕿᒫᔪᓂ ᐋᓐᓂᖅᓱᖅᑕᐅᕙᖕᓂᕐᒧᑦ.

“ᐅᓇ ᐃᓂᒋᔭᐅᓇᔭᕐᑐᖅ ᐃᓄᖕᓄ ᐊᕐᓇᓄᑦ ᕿᑐᕐᖓᖏᓐᓄᓪᓗ ᐅᓗᕆᐊᓇᙱᓪᓗᓂ, ᐃᓅᑦᑎᐊᕐᓇᕐᓗᓂ, ᐊᒻᒪᓗ ᐃᓕᖅᑯᓯᒃᑰᖓᓂᕐᓴᐅᓗᓂ ᐊᖏᕐᕋᕆᔭᐅᓗᓂ ᐊᒻᒪ ᒪᒥᓴᕐᕕᐅᓗᓂ ᓄᓇᖃᑎᒌᑦᑎᐊᖅᑐᓂ ᐃᓕᓐᓂᐊᕐᕕᖃᑦᑎᐊᕐᓇᕐᓗᓂ, ᐅᐸᒐᒃᓴᕐᕕᖃᕐᓗᓂ ᐊᒻᒪ ᐃᒡᓗᖃᓗᐊᙱᑦᑐᒦᓐᓇᖅᖢᓂ.” ᐳᕌᑦᓕ ᐅᖃᓚᐅᕐᑐᖅ ᑐᓴᒐᒃᓴᓕᐅᑎᒍ ᖃᕋᓴᐅᔭᒃᑯᑦ ᓴᖅᑭᔮᒐᖓᒍᑦ.

ᑭᓯᐊᓂᓕ, ᐅᓂᒃᑳᑎᒍᑦ ᐅᑯᓇᙵᑦ ᓰᑏᕖ ᑐᓴᒐᒃᓴᓂ ᐋᑐᕚᒥ ᐊᐃᕆᓕ 24-ᒥ ᐅᖃᓚᐅᕐᑐᑦ ᑲᑎᒪᓂᐅᔪᖅ ᐅᖃᕈᓘᔭᕈᑎᐅᑲᑕᓚᐅᕐᓂᕋᖅᑕᐅᓪᓗᓂ ᓄᓇᖃᖅᑐᓂ ᑖᔅᓱᒥᖓ ᓈᒻᒪᒃᓴᙱᑦᑐᓂᒃ ᕿᒫᕝᕕᒃᓴᒥ, ᐅᖃᖅᖢᑎ ᓴᐳᔾᔭᐅᓯᒪᓂᕐᒥ ᐃᓱᒫᓘᑎᖃᕐᓂᖏᓐᓂᒃ ᐊᒻᒪᓗ ᐅᖃᐅᓯᐅᓯᒪᙱᓗᐊᕐᓂᖓᓂ ᓄᓇᖃᖅᑐᓄᑦ.

ᐸᐅᒃᑑᑎᒃ ᐅᖃᐅᓯᖏᑦᑎᒍᑦ ᐅᖃᓚᐅᕐᑐᑦ ᑲᑐᔾᔨᖃᑎᒌᖑᔪᑦ “ᖁᕕᐊᓱᙱᑦᑐᑦ ᓈᒻᒪᙱᓗᐊᖅᑐᓂᒃ ᐊᒻᒪ ᐃᓱᒪᒋᔭᖃᙱᓗᐊᖅᑐᓂᒃ ᑐᓗᒃᑕᕐᕕᒋᔭᐅᔪᓂ ᐅᓗᕆᐊᓇᙱᑦᑐᒥ ᐃᓂᒃᓴᓕᐅᕋᓱᒃᑐᓂ ᐃᓄᐃᑦ ᐊᕐᓇᓄᑦ ᕿᑐᕐᖓᖏᓐᓄᓪᓗ ᕿᒫᕝᕕᒃᑖᕆᐊᖃᖅᑎᓪᓗᒋᑦ.”

ᐅᖃᐅᓯᖃᓚᐅᕐᑐᑦ ᖃᐅᔨᓴᓚᐅᕐᓂᖏᑦᓂ ᓴᕿᑎᑦᑎᓯᒪᔪᓂ ᐃᓄᐃᑦ ᐊᕐᓇᐃᑦ ᓈᒻᒪᙱᓕᐅᕈᑎᖃᓛᖑᕙᖕᓂᖏᓐᓄ ᐋᓐᓂᖅᓱᖅᑕᐅᕙᖕᓂᒃᑯᑦ ᑲᓇᑕᒥ “ᐊᒻᒪᓗ ᐊᑐᐃᓐᓇᖃᙱᓛᖑᓪᓗᑎᒃ ᕿᒫᕝᕕᖕᓂ.”

“60 ᐳᓴᓐᑎᐅᑉ ᐅᖓᑖᓂ ᐃᓄᐃᑦ ᓄᓇᓕᖏᓐᓂ ᕿᒫᕝᕕᓕᕆᓂᕐᒧᑦ ᐱᔨᑦᑎᕋᐅᑎᖃᙱᒻᒪᑕ; ᑕᐃᒪᓕ ᑐᑭᖃᖅᑐᖅ ᐊᒥᓱᑦ ᐊᕐᓇᐃᑦ ᓄᓇᖏᓐᓂ ᕿᒫᔭᕆᐊᖃᓕᖅᐸᒃᖢᑎᒃ, ᐅᖃᐅᓯᖏᓐᓂ, ᐃᓕᖅᑯᓯᖏᓐᓂ ᐊᒻᒪ ᓄᓇᖓᓂ ᐅᓗᕆᐊᓇᙱᑦᑐᒦᓐᓇᓱᒃᖢᑎᒃ.”

ᐋᑐᕚᒥ ᓄᓇᖃᖅᑳᖅᑐᑦ ᑲᑐᔾᔨᖃᑎᒌᖏᑦ ᑲᑐᔾᔨᖃᑎᒌᖑᖅᓯᒪᔪᑦ ᖁᓕᓂ ᓄᓇᓕᐸᐅᔭᓂ ᓄᓇᖃᖅᑳᖅᑐᑦ ᑲᑐᔾᔨᖃᑎᒌᙱᓐᓂᙶᖅᑐᓂᒃ ᐱᓕᕆᐊᒃᓴᓕᕆᔨᐅᓪᓗᑎᒃ ᐊᒻᒪ ᐱᔨᑦᑎᕋᐅᑎᓕᕆᔨᐅᓪᓗᑎ ᓄᓇᖃᖅᑳᖅᑐᓄᑦ ᑲᓇᑕᐅᑉ ᐊᖓᔪᖅᑳᖃᕐᕕᖓᑕ ᒥᒃᓵᓃᑦᑐᓄᑦ.

ᐃᓚᒋᔭᐅᔪᑦ ᐅᑯᓇᙶᖅᓯᒪᔪᑦ ᐃᓄᐃᑦ ᑮᓇᐅᔭᓕᐅᕋᓱᒐᑎ ᐃᒡᓗᓕᕆᔨᒃᑯᓐᓂ, ᑐᙵᓱᕝᕕᖓ ᐃᓄᐃᑦ ᐊᒻᒪᓗ ᐃᓅᖃᑎᒌᑦ ᑲᑐᔾᔨᖃᑎᒌᖏᑦ ᐃᓄᐃᑦ ᓱᕈᓯᖏᓐᓄᑦ, ᐃᓅᓱᒃᑐᓄᑦ ᐊᒻᒪ ᐃᓚᒌᓄᑦ.

ᐅᓇ ᓄᓇᒥ ᑐᓂᔭᐅᔪᒪᓂ ᑲᑎᒪᔾᔪᑎᓃᓛᕋᓱᒋᔭᐅᔪᖅ ᓄᓇᓕᐸᐅᔭᐃᑦ ᑮᓇᐅᔭᓕᕆᔨᖏᑦ ᐊᒻᒪ ᐱᓕᕆᕝᕕᖕᓄᑦ ᐃᔨᑦᑎᕋᐅᑎᓕᕆᔨᒃᑯᑦ ᑲᑎᒪᓕᖅᐸᑕ ᒪᐃ 7-ᒥ ᐊᒻᒪᓗ ᐋᑐᕚᒥ ᓄᓇᓕᐸᐅᔭᐃᑦ ᑲᑎᒪᓕᖅᐸᑕ ᒪᐃ 15-ᒥ.

ᕿᒃᑯᑐᐃᓐᓇᐃᑦ ᐃᓱᒫᓘᑎᖏᓐᓂ ᐅᖃᓪᓚᓛᕈᒪᔪᑦ ᓄᓇᐅᑉ ᒥᒃᓵᓅᖓᔪᓂ ᐊᑎᓕᐅᕈᓐᓇᖅᑐᑦ ᐅᖃᓪᓚᒍᒪᓗᑎ ᒪᐃ 7-ᒥ ᑲᑎᒪᓕᖅᐸᑕ ᐅᕘᓇ ᐳᕌᑦᓕᐅᑉ ᖃᕋᓴᐅᔭᒃᑯᑦ ᓴᖅᑭᔮᒐᖓᒍᑦ.

ᐅᓂ ᓄᓇ 250 ᕘᕋᒌᓖ ᑯᕋᓴᓐᒥ ᑕᒫᓂᑦᑕᐃᓐᓇᖅ ᓄᓇᖁᑎᒋᔭᐅᔪᒦᑦᑐᖅ ᓄᑖᒥ ᓛᒐ ᐹᕕᓐᒥ ᓴᓇᕝᕕᐅᓛᕈᒪᔭᖓᓂ ᐋᓐᓂᐊᕐᕕᓕᐊᖅᑐᓄᑦ, ᒫᓂ 4 ᑭᓛᒥᑕ ᐅᖓᓯᖕᓂᖃᖅᖢᓂ ᕼᐊᓐᑦ ᑲᓚᑉ ᐊᖅᑯᑎᒥ ᐊᒻᒪᓗ ᓰᕗᕋᐃᑦ ᐋᕕᓂᐅᒥ.