ᐊᑎᓕᐅᖅᓯᒪᔪᑦ ᑐᒃᓯᕋᐅᑎᓂᑦ ᖃᐃᖁᔨᓂᖃᖅᐳᖅ ᐊᑭᑭᓐᓂᖅᓴᐅᔪᒥ ᐅᓯᑲᑦᑕᖅᑕᐅᓂᖓᓂ ᐅᖓᓯᒃᑐᓄᑦ ᓄᓇᕗᒻᒧᑦ

For the English version of this story, please see Petition calls on Amazon to reduce shipping costs to remote communities.

ᐃᖃᓗᒃᑑᑦᑎᐊᕐᒥᐅᑕᒥ ᐊᔭᐅᕆᕗᖅ ᐋᒪᓵᓐ ᑲᓇᑕᒥ ᐅᓯᑲᑦᑕᖅᑕᐅᓂᖓᓂ ᐊᑭᖃᙱᓐᓂᖓᓂ ᐃᓚᒋᔭᐅᔪᒥ Amazon Prime ᐃᓚᒋᔭᐅᓂᐅᔪᓂ ᐊᑐᐃᓐᓇᐅᓂᖓᓂ ᐃᓄᖕᓄᑦ ᓄᓇᖃᖅᑐᓂ ᐅᖓᓯᒃᑐᒥ ᓄᓇᓕᐅᔪᓂ.

ᑯᕆᔅᑕ ᒫᑎᐅᔅ ᐱᒋᐊᖅᑎᑦᑎᓚᐅᖅᐳᖅ Change.org ᐊᑎᓕᐅᖅᓯᒪᔪᑦ ᑐᒃᓯᕋᐅᑎᓂᑦ ᐊᑑᑎᖃᓕᕋᓱᐊᖅᑐᒥ ᐊᐃᑉᕆᓕ 26−ᒥ. ᓇᒡᒐᔾᔭᐅᒥ ᐅᓪᓛᖓᓂ, 2,424−ᓂ ᐊᑎᓕᐅᖅᑕᐅᓯᒪᓂᖃᓕᓚᐅᖅᐳᖅ.

ᐅᖃᓚᐅᖅᐳᖅ ᐊᒥᓱᓂ ᐃᓄᖕᓂ ᐅᑭᐅᖅᑕᖅᑐᒥ ᐊᑐᖅᐸᒃᐳᑦ Amazon Prime−ᒥ ᐱᔭᕆᐊᖃᖅᑕᒥᓂ ᐃᓚᖃᖅᑐᒥ ᓂᕿᓂᑦ, ᐊᓐᓄᕌᓂ, ᕙᐃᑕᒥᓐᓂ ᐊᒻᒪ ᐊᓯᖏᓐᓂ ᐱᖁᑎᓂ ᐊᑐᐃᓐᓇᐅᙱᑦᑐᓂ ᐅᕝᕙᓘᓐᓃᑦ ᐊᑭᑐᓗᐊᖅᑐᓂ ᓄᓇᓕᖕᓂ.

ᐋᒪᓵᓐ ᐊᑐᐃᓐᓇᖃᖅᑎᑦᑎᕗᖅ Prime ᐃᓚᒋᔭᐅᓂᐅᔪᓂ ᐃᓚᖃᖅᑐᒥ ᐊᑭᖃᙱᑦᑐᒥ ᐅᓯᑲᑦᑕᖅᑕᐅᓂᖓᓂ ᐱᔪᓐᓇᖅᑐᓄᑦ ᓂᐅᕕᖅᑕᐅᔪᓄᑦ.

“ᓂᖀᑦ ᐊᑭᖏᑦ ᐊᑭᑐᔪᕐᔪᐊᖑᕗᑦ ᐅᕙᓂ, ᐊᓐᓄᕌᑦ ᐊᒻᒪ ᐱᔭᐅᔭᕆᐊᖃᖅᑐᓂᑦᑕᐅᖅ,” ᐅᖃᓚᐅᖅᐳᖅ ᒫᑎᐅᔅ. “ᐃᓄᐃᑦ ᐊᑐᖅᐸᒃᐳᑦ ᐋᒪᓵᓐᒥ ᐱᖁᑎᓄᑦ ᐊᒻᒪ ᐊᑐᐃᓐᓇᖃᕈᓐᓇᙱᓚᑦ ᐊᑭᖃᖅᑎᓐᓇᓂ ᑕᓕᕐᒥ ᓂᐅᒥᓪᓅᓐᓃᑦ.”

ᐆᒃᑑᑎᖃᓚᐅᖅᐳᖅ ᐱᖃᓐᓇᕆᔭᖓᓂ ᑎᑭᓴᐃᓇᓱᐊᓚᐅᖅᑐᒥ ᐴᖑᔪᒥ $10−ᑐᖅᑐᒥ ᐊᒡᒐᒃᓯᐅᑎᒥ ᑭᓯᐊᓂ ᖃᐅᔨᓚᐅᖅᐳᖅ ᐊᑭᓖᓂᐊᓕᕋᒥ ᐅᓯᑲᑦᑕᖅᑕᐅᓂᖓ ᐊᑭᑲᕋᔭᕐᓂᖓᓂ $60−ᒥ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᖃᐅᔨᒋᐊᓚᐅᖅᐳᑦ ᐅᓯᑲᑦᑕᖅᑕᐅᓂᖓᓂ ᐊᑭᖏᓐᓂ  ᐃᖃᓗᒃᑑᑦᑎᐊᕐᒧᑦ ᖃᔅᓯᐊᕐᔪᖕᓂ ᐊᑐᖅᑕᐅᒐᔪᒃᑐᓂ ᐱᖁᑎᓂ ᐊᒻᒪ ᓇᓂᓯᓚᐅᖅᐳᑦ:

• $5.59 ᐴᖑᔪᒥ ᕙᐃᑕᒥᓐ D ᐊᑭᖃᖅᐳᖅ $36.09−ᒥ with ᐅᓯᑲᑦᑕᖅᑕᐅᓂᖓᓂ ᐊᒻᒪ ᑲᒪᒋᔭᐅᓂᖓᓂ ᐊᑭᐅᔪᓂ;
• 900-ᒍᕌᒻᒥ ᐴᖑᔪᒥ ᓄᑕᕋᓛᒧᑦ ᐃᒻᒧᒃᓴᖓᓂ ᑐᙵᕕᐅᔪᒥ ᐊᑭᓕᖕᒥ $36.99−ᑐᖅᑐᒥ $89.94−ᖑᓚᐅᖅᐳᖅ ᐅᓯᑲᑦᑕᖅᑕᐅᓂᖓᓂ ᐊᒻᒪ ᑲᒪᒋᔭᐅᓂᖓᓂ;
• ᑕᓪᓕᒪᓂ-ᐃᓗᓕᓕᖕᒥ ᐴᖑᔪᒥ ᒫᑲᓘᓂᒥ ᑐᙵᕕᐅᔪᒥ ᐊᑭᓕᖕᒥ $6.47−ᒥ ᐊᑭᖃᓚᐅᖅᐳᖅ $60.32−ᒥ ᐅᓯᑲᑦᑕᖅᑕᐅᓂᖓᓂ ᐊᒻᒪ ᑲᒪᒋᔭᐅᓂᖓᓂ.

ᐊᐱᕆᔭᐅᒐᒥᒃ ᐊᑎᓕᐅᖅᓯᒪᔪᑦ ᑐᒃᓯᕋᐅᑎᓂᑦ, ᐋᒪᓵᓐᒥ ᐅᖃᖅᑎᐅᔪᒥ ᐊᓖᓴ ᑭᐊᕈᓪ ᐅᖃᓚᐅᖅᐳᖅ ᑕᒪᕐᒥᒃ ᓂᐅᕕᖅᐸᒃᑐᑦ ᐱᔪᓐᓇᖅᐳᑦ Amazon Prime−ᒥ.

“Prime−ᒥ ᐃᓚᒋᔭᐅᔪᑦ ᑲᓇᑕᒥ ᐊᑭᖃᙱᑦᑐᒥ ᑎᑭᕝᕕᐅᔪᓐᓇᖅᐳᑦ ᑕᒪᒃᑭᑲᓴᖕᓄᑦ ᑐᕌᕈᑕᐅᔪᓄᑦ ᑲᓇᑕᒥ, ᑭᓯᐊᓂ ᐅᖓᓯᒃᑐᒥ ᐃᓂᐅᔪᓂ,” ᐅᖃᓚᐅᖅᐳᖅ.

ᐋᒪᓵᓐᒥ ᐃᑭᐊᖅᑭᕕᖓ ᑎᑎᕋᖅᓯᒪᓂᖃᙱᓚᖅ ᓇᓗᓇᐃᖅᑕᐅᓯᒪᔪᓂ ᓄᓇᓕᐅᔪᓂ “ᐅᖓᓯᖕᓂᐅᔪᓂ.”

ᐃᒪᓐᓇᖔᖅ, ᐃᑭᐊᖅᑭᕕᖓ ᐅᓂᒃᑳᕆᕗᖅ ᐅᖓᓯᒃᑐᓂ ᐃᓂᐅᔪᓂ ᑕᐃᒃᑯᓂᖓ “ᐅᖓᓯᖕᓂᖓᓂ ᐅᓯᑲᑦᑕᕐᓂᐅᔪᒥ ᐱᓕᕆᕝᕕᐅᔪᓂ, ᐃᓂᐅᔪᓂ ᐱᔨᑦᑎᕋᖅᑕᐅᒐᔪᙱᑦᑐᓂ ᐅᓯᑲᑦᑕᖅᑎᐅᔪᓂ, ᐊᒻᒪ ᑲᓇᑕᒥ ᑎᑎᖅᑲᒃᑯᕕᖓᓂ ᖃᖓᑕᓲᒃᑯᑦ ᐱᓕᕆᕝᕕᐅᔪᓂ ᐃᓂᐅᔪᓂ ᑎᑎᖅᑲᐅᓯᐊᖅᐸᒃᑐᓂ ᖃᖓᑕᓲᒃᑯᑦ ᓇᓗᓇᐃᖅᑕᐅᓯᒪᔪᓂ ᖃᖓᐅᓂᐅᔪᓂ ᐊᕐᕌᒍᒥ.”

ᓄᓇᕗᒻᒥ, ᐃᖃᓗᐃᑦ ᐱᔪᓐᓇᖅᑎᑕᐅᕗᖅ ᐊᑭᖃᙱᑦᑐᒥ ᐅᓯᑲᑦᑕᖅᑕᐅᓂᖓᓂ ᑭᓯᐊᓂ ᐊᒥᐊᒃᑯᖏᑦ ᐊᓯᖏᑦ 24−ᖑᔪᓂ ᓄᓇᓕᐅᔪᑦ ᐱᔪᓐᓇᙱᓚᑦ.

ᕿᓚᒻᒥᐅᔪᒥ, ᒫᑎᐅᔅ ᐅᖃᓚᐅᖅᐳᖅ, ᐃᓄᐃᑦ ᓄᓇᓕᖕᓂ ᐊᓯᔾᔨᖅᓯᑲᑕᓚᐅᖅᐳᑦ ᓄᓇᓕᖓᑕ ᑎᑎᖅᑲᕐᓂᐊᕐᕕᖓᑕ ᓇᓗᓇᐃᒃᑯᑕᖏᓐᓂ ᑎᑭᓴᖅᑕᖏᓐᓂ ᐱᓂᕐᒧᑦ ᐊᑐᐃᓐᓇᖃᕐᓂᖓᓂ ᐊᑭᖃᙱᑦᑐᒥ ᐅᓯᑲᑦᑕᖅᑕᐅᓂᖓᓂ.

ᐊᓯᔾᔨᖅᓯᓂᕐᒥ ᓈᓴᐅᒻᒥ ᑎᑎᖅᑲᕐᓂᐊᕐᕕᖓᑕ ᓇᓗᓇᐃᒃᑯᑕᖓᓐᓂ, ᐋᒪᓵᓐᑯᑦ ᐅᓯᑲᑦᑕᕐᕕᖓᑕ ᐱᓕᕆᕝᕕᖓ ᐊᖏᖃᑦᑕᓚᐅᖅᐳᑦ ᑐᔫᓯᐊᖑᔪᒥ ᑐᕌᖅᑐᒧᑦ ᐃᓂᐅᔪᒧᑦ ᐃᓚᒋᔭᐅᔪᒥ ᐊᑭᖃᙱᑦᑐᒥ ᐅᓯᖃᑦᑕᕈᓐᓇᕐᓂᖓᓂ ᐱᔨᑦᑎᕋᕐᓂᐅᔪᒥ. ᑐᔫᓯᐊᖅ ᑎᑭᐅᑎᓇᔭᖅᐳᖅ ᑐᕌᒐᕆᔭᖓᓄᑦ ᑐᕌᕈᑎᖓᓄᑦ, ᐃᓱᒪᒋᓇᒍ ᐊᓯᔾᔨᕐᓂᐅᔪᒥ.

ᒫᑎᐅᔅ ᐅᖃᓚᐅᖅᐳᖅ ᓄᓇᑦᓯᐊᕐᒥ ᐃᑭᓐᓂᐅᔪᓂ ᐊᐅᔭᐅᔪᒥ 2023−ᒥ, ᕿᓚᒻᒥᐅᔪᒥ ᓴᖑᑎᑦᑎᓚᐅᖅᐳᑦ ᑎᑎᖅᑲᐅᓯᐊᓂ ᑐᕌᓚᐅᖅᑐᓂ ᕿᑎᕐᒥᐅᓄᑦ ᐊᕕᒃᑐᖅᓯᒪᓂᐅᔪᒧᑦ, ᓴᖅᑭᑎᑦᑎᓚᐅᖅᐳᑦ ᐊᑲᐅᙱᓕᐅᕈᑕᐅᔪᒥ ᖃᐅᔨᑎᑦᑎᓪᓗᑎᒃ ᑎᑎᖅᑲᕐᓂᐊᕐᕕᓕᕆᔨᐅᔪᓄᑦ.

ᑲᓇᑕᒥ ᑎᑎᖅᑲᕐᓂᐊᕐᕕᒃ ᑐᓂᓯᓚᐅᖅᐳᑦ ᐅᖃᐅᔾᔨᓂᐅᔪᒥ ᐊᐃᑉᕆᓕ 10−ᒥ ᐃᖃᓗᒃᑑᑦᑎᐊᕐᒥᐅᑕᓄᑦ ᐊᔭᐅᕆᔪᒥ ᓂᐅᕕᖅᐸᒃᑐᓂ ᐊᑐᕐᓂᕐᒥ ᓇᓚᐅᑦᑐᒥ ᓄᓇᓕᖓᑕ ᑎᑎᖅᑲᕐᓂᐊᕐᕕᖓᑕ ᓇᓗᓇᐃᒃᑯᑕᖓᓐᓂ.

“ᐱᐅᓯᒋᐊᖅᑎᑦᑎᓇᓱᐊᖅᓯᒪᕗᒍᑦ ᐱᔨᑦᑎᕋᕐᓂᑦᑎᓐᓂ ᑐᓂᓯᔪᓐᓇᕐᓂᐊᕋᑦᑕ ᑐᙵᕕᖃᑦᑎᐊᖅᑐᒥ ᐊᒻᒪ ᐱᓕᕆᑦᑎᐊᖅᑐᒥ ᐱᔨᑦᑎᕋᕐᓂᐅᔪᒥ ᐃᓄᖕᓄᑦ ᓄᓇᕗᒻᒥ ᐃᓱᒪᒋᓇᒍ ᓇᒥᕐᒥᐅᑕᐅᓂᖏᓐᓂ,” ᔮᓐ ᕼᐋᒧᓪᑎᓐ, ᐅᖃᖅᑎᐅᔪᖅ ᑲᓇᑕᒥ ᑎᑎᖅᑲᕐᓂᐊᕐᕕᖓᓂ, ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᓂ.

“ᑐᓂᓯᔪᓐᓇᑦᑎᐊᕐᓂᖓᓂ ᐱᒋᐊᓲᖑᕗᖅ ᐊᒻᒪ ᐃᓱᓕᓲᖑᕗᖅ ᓈᒻᒪᒃᑐᒥ ᑐᕌᕈᑕᐅᔪᒥ, ᐃᓄᖕᓂ ᓇᓗᓇᐃᖅᓯᖁᔨᕗᒍᑦ ᑕᑕᑎᕆᓂᐊᕐᓂᖏᓐᓂ ᓈᒻᒪᒃᑐᒥ ᑐᕌᕈᑕᐅᔪᒥ ᑭᓱᑐᐃᓐᓇᒥᒃ ᑎᑭᓴᐃᑎᓪᓗᒋᑦ ᐅᕝᕙᓘᓐᓃᑦ ᐅᓯᑲᑦᑕᖅᑕᐅᔪᖃᖅᑎᓪᓗᒍ ᑲᓇᑕᒥ ᑎᑎᖅᑲᕐᓂᐊᕐᕕᖓᑎᒍᑦ.”

ᑲᓇᑕᒥ ᑎᑎᖅᑲᕐᓂᐊᕐᕕᖓ ᐅᖃᒃᑲᓐᓂᕈᒪᓚᐅᙱᓚᑦ ᐱᔾᔪᑕᐅᔪᒥ ᐅᖃᐅᔾᔨᓂᐅᔪᒥ, ᐊᐱᕆᔭᐅᖕᒪᑕ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ.

ᒫᑎᐅᔅ ᐅᖃᓚᐅᖅᐳᖅ ᐊᑎᓕᐅᖅᓯᒪᔪᑦ ᑐᒃᓯᕋᐅᑎᓂᑦ ᑎᑭᐅᑎᒍᓂ ᑐᕌᒐᕆᔭᖓᓂ 2,500−ᓂ ᐊᑎᓕᐅᖅᓯᒪᓂᐅᔪᓂ, ᖃᐅᔨᒋᐊᕐᓂᐊᖅᐳᖅ ᐋᒪᓵᓐᒥ ᐊᒻᒪ ᐊᐱᕆᓗᓂᒋᑦ ᑲᒻᐸᓂᐅᔪᒥ ᐊᓯᔾᔨᖅᓯᓂᖏᓐᓂ ᐅᓯᑲᑦᑕᕐᓂᕐᒥ ᐊᑐᐊᒐᖓᓐᓂ.