ᐸᕐᓇᐅᑎᒥ ᐃᓄᒃᑐᑦ ᒐᕙᒪᑐᖃᒃᑯᑦ ᓂᕈᐊᕐᓂᓕᕆᓂᕐᒥ ᓅᑉᐳᖅ ᑲᓇᑕᒥ ᒪᓕᒐᓕᐅᕆᔨᐅᔪᓂ ᖃᐅᔨᓴᖅᑎᓄᑦ

For English version, see Plan for Inuit languages on federal ballot in Nunavut moves to Senate

ᑲᓇᑕᐅᑉ ᒪᓕᒐᓕᐅᕐᕕᖓᑕ ᑲᑎᒪᕝᕕᖓᑕ ᑲᑎᒪᔨᕋᓛᖑᔪᓂ ᐃᒪᐃᖁᔨᕗᑦ ᑲᓇᑕᐅᑉ ᓂᕈᐊᖅᑐᓕᕆᓂᕐᒧᑦ ᐊᖓᔪᖅᑳᖓ ᓅᓐᓂᖓᓂ ᓯᕗᓪᓕᖅᐹᒥ ᐱᓕᕆᐊᕆᔭᐅᔪᒥ ᐆᒃᑐᕋᕐᓂᕐᒥ ᐊᑐᖅᑕᐅᓂᐅᔪᒥ ᐃᓄᐃᑦ ᐅᖃᐅᓯᖓᓐᓂ ᒐᕙᒪᑐᖃᒃᑯᑦ ᓂᕈᐊᕐᓂᕐᒥ ᓂᕈᐊᕐᓂᓕᕆᓂᕐᓂᑦ ᓄᓇᕗᒻᒥ.

ᑐᑭᓯᓇᑦᑎᐊᙱᓚᖅ ᓱᓕ, ᑭᓯᐊᓂ, ᐃᓕᓯᒪᓂᐊᕐᓂᖓᓂ ᓈᒻᒪᖅᑯᑦᑐᒥ ᒪᓕᒃᑐᒥ ᒐᕙᒪᑐᖃᒃᑯᑦ ᓂᕈᐊᕐᓂᕆᔭᖓᓂ, ᐱᓕᕆᐊᖑᓇᔭᖅᑐᒥ ᐅᕙᓂ ᑐᖔᓂᓘᓐᓃᑦ ᐅᒃᑐᐱᕆ 25, 2025−ᒥ.

ᐱᓕᕆᔾᔪᓯᐅᔪᖅ ᐊᒻᒪ ᑲᓇᑕᐅᑉ ᒪᓕᒐᓕᐅᕐᕕᖓᑕ ᑲᑎᒪᕝᕕᖓᑕ ᐱᓕᕆᓂᐅᔪᒥ ᑲᑎᒪᔨᕋᓛᑦ ᑐᓂᓯᓚᐅᖅᐳᑦ ᐊᑐᖁᓇᔭᖅᑕᖏᓐᓂ ᑕᖅᑭᐅᑉ ᐱᒋᐊᕐᓂᐸᓗᐊᓂ ᓂᕈᐊᖅᑐᓕᕆᔨᒧᑦ ᐊᖓᔪᖅᑳᖓ ᔅᑕᕚᓐ ᐱᕉᓪ ᐊᐱᕆᓚᐅᖅᑎᓪᓗᒍ ᑲᑎᒪᔨᕋᓛᓄᑦ ᐊᖏᖅᑕᐅᓂᕐᒥ ᓯᕗᓪᓕᖅᐹᒥ ᐱᓕᕆᐊᕆᔭᐅᔪᒥ ᓯᑎᐱᕆᒥ.

“ᑲᑎᒪᔨᕋᓛᑦ ᐃᓱᒪᒋᔭᖃᖅᐳᑦ ᐅᓇ ᑐᒃᓯᕋᐅᑎ ᐱᔪᓐᓇᖅᑎᑦᑎᓇᔭᕐᓂᖓᓂ ᐅᓄᕐᓂᖅᓴᐅᔪᓂ ᓂᕈᐊᖅᑎᐅᔪᓂ ᓄᓇᕗᒻᒥ ᐊᑐᕐᓂᖏᓐᓂ ᑲᓇᑕᐅᑉ ᐱᖁᔭᕐᔪᐊᖓᑕ ᐱᔪᓐᓇᕐᓂᕆᔭᖏᓐᓂ ᓂᕈᐊᕈᓐᓇᕐᓂᕐᒧᑦ, ᐊᑐᐃᓐᓇᖃᖅᑎᑦᑎᐅᔮᕐᔪᒃᑎᓪᓗᒋᑦ ᓈᒻᒪᒃᑐᓂ ᓱᓕᓪᓚᕆᖕᓂᕋᕈᖕᓂ ᐸᐸᑦᑎᓂᕐᒥ ᓱᓕᓂᐅᔪᒥ ᓂᕈᐊᕐᓂᐅᔪᒥ,” ᑲᑎᒪᔨᕋᓛᑦ ᐅᓂᒃᑳᓕᐊᖓ ᐅᖃᓚᐅᖅᐳᖅ.

ᑐᒃᓯᕋᖅᑕᐅᔪᒥ ᕿᓚᒻᒥᐅᔪᒥ ᐊᔾᔨᒌᙱᓐᓂᐅᔪᓂ ᑲᓇᑕᒥ ᓂᕈᐊᕐᓂᕐᒧᑦ ᒪᓕᒐᕐᒥ ᓄᓇᕗᒻᒧᑦ ᐃᓚᖃᖅᐳᖅ:

• ᐱᔪᓐᓇᖅᑎᑦᑎᔪᒥ ᐃᓄᒃᑎᑐᑦ ᐅᕝᕙᓘᓐᓃᑦ ᐃᓄᐃᓐᓇᖅᑐᓐ ᐊᑐᖅᑕᐅᓂᖓᓂ ᓂᕈᐊᒐᒃᓴᐅᔪᓂ ᐊᑎᖏᓐᓂ ᓂᕈᐊᒐᒃᓴᙳᖅᑎᑦᑎᓂᕐᒥ ᐸᐃᑉᐹᓂ ᐊᒻᒪ ᓂᕈᐊᕐᓂᓕᕆᓂᕐᓂ;
• ᐱᔪᓐᓇᖅᑎᑦᑎᔪᒥ ᓂᕈᐊᖅᑎᐅᔪᓂ ᑎᑎᕋᕐᓂᖏᓐᓂ ᐊᑎᖓᓂ ᓂᕈᐊᖅᓯᒪᔭᖓᓂ ᓂᕈᐊᒐᒃᓴᐅᔪᒥ ᐃᓄᐃᑦ ᐅᖃᐅᓯᖓᓐᓂ;
• ᐱᔪᓐᓇᖅᑎᑦᑎᔪᒥ ᑲᑎᒪᔨᕐᔪᐊᖑᔪᓂ ᐱᓕᕆᔨᐅᔪᓂ ᐃᓚᓯᓂᕐᒥ ᐃᓄᒃᑎᑐᑦ ᐅᕝᕙᓘᓐᓃᑦ ᐃᓄᐃᓐᓇᖅᑐᓐ ᐊᑎᖓᓂ ᐱᓕᕆᓂᕆᔭᖓᓂ.

“ᐃᓚᖏᑦ ᐱᔾᔪᑕᐅᔪᑦ ᐱᑕᖃᑐᐃᓐᓇᕆᐊᖃᕐᓂᖓᓂ ᑕᐃᒪᐃᑦᑐᒥ ᓯᕗᓪᓕᖅᐹᒥ ᐱᓕᕆᐊᕆᔭᐅᔪᒥ ᐊᔪᕐᓇᙱᑐᐃᓐᓇᕆᐊᖃᕐᓂᖓᓂ ᓂᕈᐊᕐᓂᕐᒧᑦ ᑲᓇᑕᒥ,” ᐅᖃᓚᐅᖅᐳᖅ ᒫᑎᐅ ᒪᑭᓇ, ᐅᖃᖅᑎᐅᔪᖅ ᓂᕈᐊᕐᓂᕐᒧᑦ ᑲᓇᑕᒥ, ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

“ᑕᒪᓐᓇ ᐃᓚᖃᖅᐳᖅ ᓱᓕᓂᐅᔪᓂ ᐃᓄᒃᑐᑦ ᐃᓕᓴᕆᔭᐅᓯᒪᓪᓚᕆᖕᓂᖃᕐᓂᖓᓂ ᓄᓇᕗᒻᒥ, ᑕᒪᒃᑭᒐᓚᐃᑦ ᐃᓄᒋᐊᖕᓂᐅᔪᓂ ᐅᖃᓪᓚᓲᖑᕗᑦ ᐃᓄᒃᑐᒻᒥ ᐅᖃᐅᓯᕐᓂ, ᐊᒻᒪ ᓄᓇᕗᒻᒥ ᑭᒡᒐᖅᑐᖅᑕᐅᕗᖅ ᐊᑕᐅᓯᑐᐊᒥᒃ ᒐᕙᒪᑐᖃᒃᑯᑦ ᓂᕈᐊᕐᓂᐅᔪᒥ ᐊᕕᒃᑐᖅᓯᒪᓂᐅᔪᒥ.”

2022−ᒥ ᐅᓂᒃᑳᓕᐊᒥ, ᑲᑎᒪᔨᕋᓛᑦ ᐃᒪᐃᖁᔨᓚᐅᖅᐳᑦ ᓂᕈᐊᕐᓂᕐᒧᑦ ᑲᓇᑕᒥ ᐱᓕᕆᓂᖏᓐᓂ ᓯᕗᓪᓕᖅᐹᒥ ᐱᓕᕆᐊᕆᔭᐅᔪᒥ ᓄᓇᕗᒻᒥ.

ᓄᓇᕗᒻᒥ NDP−ᑯᑦ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᓗᐊᕆ ᐃᓪᓚᐅᑦ ᓴᖅᑭᑎᑦᑎᓚᐅᖅᐳᖅ ᐱᖁᔭᒃᓴᒥ ᐅᓂᒃᑳᓕᐊᖅ ᓴᖅᑭᑎᑕᐅᓚᐅᖅᑎᓪᓗᒍ, ᖃᐃᖁᔨᓂᐅᔪᒥ ᓂᕈᐊᕐᓂᓕᕆᓂᕐᓂ ᐊᑐᐃᓐᓇᐅᓂᖓᓂ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓄᑦ.

ᑲᑎᒪᔨᕋᓛᑦ ᐊᐱᕆᓚᐅᕆᕗᑦ ᐱᕉᓪᒥ ᐃᓱᒪᒃᓴᖅᓯᐅᕆᓂᕐᒥ ᐱᖓᔪᖓᓂ ᐊᑐᖁᔭᐅᓇᔭᖅᑐᒥ 2022−ᒥ ᐅᓂᒃᑳᓕᐊᖓᓐᓂ ᓯᕗᓪᓕᖅᐹᒥ ᐱᓕᕆᐊᕆᔭᐅᔪᒥ, ᐊᐱᕆᔪᒥ ᓂᕈᐊᕐᓂᕐᒧᑦ ᑲᓇᑕᒥ ᑐᓂᓯᓂᕐᒥ ᐊᔾᔨᖏᓐᓂ ᓂᕈᐊᕐᓂᓕᕆᓪᓚᕆᒃᑐᒥ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓂᑦ ᐊᔪᕆᖅᓱᐃᓂᐅᓗᓂ ᓂᕈᐊᖅᑎᓄᑦ ᓂᕈᐊᕐᕕᐅᔪᓂ ᐊᒻᒪ ᓂᕈᐊᕐᓂᕐᒧᑦ ᐃᓂᖓᓂᑦ.

ᐃᓪᓚᐅᑦ ᐅᖃᓚᐅᖅᐳᖅ ᑐᙵᓱᒃᑎᑦᑎᕗᖅ ᐊᑐᓕᖁᔭᐅᔪᒥ ᑲᑎᒪᔨᕋᓛᓂᑦ ᐊᒻᒪ ᑕᐃᓪᓗᓂᐅᒃ “ᐊᑯᓂᐊᓗᒃ ᑭᖑᕙᕐᔪᐊᖅᓯᒪᔪᒥ ᐃᓱᒪᓕᐅᖑᓂᐅᔪᒥ.”

“ᑕᒪᒃᑭᓂ ᖃᔅᓯᒐᓚᖕᓂ ᓴᖅᑭᓐᓂᐅᔪᓂ ᑲᑎᒪᔨᕋᓛᓂᑦ ᐊᒻᒪ ᖁᙱᐊᖅᑎᐅᓪᓗᖓ, ᓇᓗᓇᐃᖅᓯᓚᐅᖅᐳᖓ ᐱᒻᒪᕆᐅᓂᖓᓂ ᑕᑯᒃᓴᐅᑎᑦᑎᓂᕐᒥ ᐅᖃᐅᓯᕐᓂ ᐅᖃᓪᓚᒃᐸᒃᑕᑦᑎᓐᓂ ᓄᓇᑦᑎᓐᓂ ᐊᒻᒪ ᐱᐅᓯᒋᐊᖅᑎᑦᑎᓂᕐᒥ ᐊᑐᐃᓐᓇᖃᕐᓂᕐᒥ ᐃᓄᖕᓄᑦ,” ᐅᖃᓚᐅᖅᐳᖅ.

“ᐅᓇᑕᐃᓐᓇᕐᓂᐊᖅᐳᖓ ᒐᕙᒪᒃᑯᓐᓄᑦ ᓈᒻᒪᒍᓱᖕᓂᕐᒥ ᐆᒥᖓ ᐊᑐᓕᖁᔭᐅᔪᒥ ᐊᒻᒪᓗ ᓯᕗᒻᒧᒃᖃᓐᓂᖅ ᐱᓱᖕᓂᕐᒧᑦ ᐃᓚᓕᐅᔾᔨᓂᕐᒥ ᓄᓇᖃᖅᑳᖅᓯᒪᔪᓂ ᐅᖃᐅᓯᕐᓂ ᑕᒪᒃᑭᓂ ᐃᓂᐅᔪᓂ ᑲᓇᑕᒥ ᓄᓇᖃᖅᑳᖅᓯᒪᔪᓂ ᐅᖃᐅᓯᑦ ᐅᖃᓪᓚᒃᑕᐅᕙᖏᓐᓂᖏᓐᓂ.”

ᒪᑭᓇ ᐅᖃᓚᐅᖅᐳᖅ ᓯᕗᓪᓕᖅᐹᒥ ᐱᓕᕆᐊᕆᔭᐅᔪᒥ ᐊᖏᖅᑕᐅᔭᕆᐊᖃᖅᐳᖅ ᑲᓇᑕᒥ ᒪᓕᒐᓕᐅᕆᔨᐅᔪᓂ ᖃᐅᔨᓴᖅᑎᓄᑦ ᓯᕗᓂᐊᓂ ᓂᕈᐊᕐᓂᕐᒧᑦ ᑲᓇᑕᒥ ᑲᔪᓯᔪᓐᓇᕐᓂᖓᓂ.

ᐊᑐᓕᖅᑎᑕᐅᔪᓐᓇᕐᓂᐊᕐᓂᖓᓂ ᒪᓕᒃᑐᒧᑦ ᒐᕙᒪᑐᖃᒃᑯᑦ ᓂᕈᐊᕐᓂᕐᒥ ᒪᓕᖕᓂᖃᖅᐳᖅ ᖃᖓᐅᓂᐊᕐᓂᖓᓂ ᓂᕈᐊᕐᓂᐅᔪᒥ.

“ᑕᑯᓪᓗᒍ ᐅᓄᙱᓐᓂᖅᓴᐅᓂᐅᔪᓂ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᑎᑎᕋᖅᓯᒪᓂᐅᔪᒥ, ᓂᕈᐊᕐᓂᖅ ᐱᓕᕆᐊᖑᔪᓐᓇᖅᐳᖅ ᖃᖓᑐᐃᓐᓇᑦᑎᐊᖅ,” ᒪᑭᓇ ᐅᖃᓚᐅᖅᐳᖅ.

ᑕᐃᒪᐃᑦᑐᓂ ᖃᓄᐃᓐᓂᐅᔪᓂ, ᓂᕈᐊᕐᓂᕐᒧᑦ ᑲᓇᑕᒥ ᑐᓂᓯᓲᖑᕗᖅ ᐱᔨᑦᑎᕋᕐᓂᐅᔪᒥ ᐸᕐᓇᒃᓯᒪᕙᒌᖅᑐᓂ ᑕᐃᑲᓂ ᑎᑎᕋᖅᓯᒪᔪᒥ ᑎᓕᐅᕈᑕᐅᔪᒥ ᑐᓂᔭᐅᓂᖓᓂ.”

2021−ᒥ ᒐᕙᒪᑐᖃᒃᑯᑦ ᓂᕈᐊᕐᓂᐅᔪᒥ, 34 ᐳᓴᓐᑎᒥ ᓂᕈᐊᕈᓐᓇᖅᑐᓂ ᓄᓇᕗᒻᒥ ᓂᕈᐊᓚᐅᖅᐳᑦ ᓂᕈᐊᕐᓂᓕᕆᓂᕐᒥ ᑕᐅᑐᒃᖢᒍ 62 ᐳᓴᓐᑎᒥ ᑲᓇᑕᓕᒫᒥ, ᐅᖃᐅᓯᐅᓪᓗᓂ ᓂᕈᐊᕐᓂᕐᒧᑦ ᑲᓇᑕᒥ.