ᑎᑎᖃᖅ: ‘ᖃᐅᒻᒪᖅᑯᑎᓯ ᖃᒥᑎᑦᑕᐃᓕᓗᒍ’

ᑎᑎᖅᑲᖅ ᓄᓇᑦᓯᐊᖅ ᐱᕙᓪᓕᐊᔪᓕᕆᔨᓄᑦ

ᕿᒃᓵᖕᓂᖃᕐᔪᐊᖅᖢᓄᒃ ᑎᑎᕋᖅᐳᒍᒃ. ᓱᓕ ᐅᓪᓗᒥᒧᑦ ᐃᒃᐱᒋᔭᕗᑦ ᐊᒃᓱᕈᕐᓇᕐᓂᐊᓗᒃ, ᐋᓐᓂᕐᓇᖅᑐᐊᓗᒃ, ᓄᒫᓇᖅᑐᐊᓗᒃ ᐅᒡᒍᐊᕐᓇᖅᑐᐊᓗᒡᓗ ᐃᕐᓃᕐᓂᕆᓚᐅᖅᑕᕗᒃ. ᐃᕐᓂᖅᐳᒃ ᐃᒻᒥᓃᖅᖢᓂ ᐃᓅᔪᓐᓃᓚᐅᖅᑐᖅ ᓯᑎᐱᕆ 13, 2019-ᖑᑎᓪᓗᒍ. ᓲᕐᓗᓕ ᑕᐃᔅᓱᒪᓂ ᑭᓱᓕᒫᑦᑎᐊᖅ ᓄᖅᑲᓚᐅᖅᑐᑦ. ᓱᓕ ᐋᓐᓂᐊᕐᓂᖅ ᐅᓪᓗᒥ ᐃᒃᐱᒋᔭᕗᑦ.

ᐊᑎᕆᓚᐅᖅᑕᖓ ᓴᐃᒪᓐ ᐊᑕᒍᔪᒃ. ᐃᓅᓚᐅᖅᑐᖅ ᐃᖃᓗᖕᓂ ᔮᓄᐊᕆ 7, 1991-ᒥ. ᐊᑎᕆᓚᐅᕐᒥᔭᖏᑦ ᓇᓱᒃ, ᐃᓄᐊᕋᖅ, ᓴᒡᕕᐅᖅᑕᓕᒃ, ᑭᑦᑐᕆᐊᖅ, ᒥᓗᖅᑎᑦᑐᖅ, ᓰᐸᓗ.

ᐃᕐᓂᖅᐳᒃ ᐃᓂᖁᓇᖅᑑᓪᓗᓂ ᐱᐅᔪᐊᓘᓚᐅᖅᑐᖅ ᐃᓅᓯᒃᑯᑦ ᑕᕐᓂᒃᑯᓪᓗ. ᓂᔾᔭᐅᓯᔭᒃᑲᒻᒪᕆᐅᓪᓗᓂ. ᓂᑲᒍᓱᙱᑦᑑᔮᕋᓗᐊᖅᖢᓂ ᐃᓅᓯᖓ ᐊᒃᓱᐊᓗᒃ ᐃᑲᑦᑐᕆᓚᐅᖅᑐᖅ. ᓯᕗᓂᒃᓴᕐᒥᓂᒃ ᑕᐅᑐᙳᐊᒐᖃᓚᐅᖅᑐᖅ. ᓂᔾᔭᐅᓯᔭᖃᑎᑖᕈᒪᓪᓗᓂ. ᓇᒧᑐᐃᓐᓇ ᐊᐅᓪᓚᖃᑦᑕᕈᒪᓚᐅᖅᑐᖅ. ᐊᖓᔪᖅᑳᕐᒥᓂᒃ ᖃᑕᙳᑎᒥᓂᒡᓗ ᐃᒃᐱᒍᓱᑦᑎᐊᓚᐅᖅᑐᖅ. ᐱᖃᓐᓇᕆᔭᒥᓂᒃ ᓇᒡᓕᒍᓱᓚᐅᖅᑐᖅ.

ᓴᐃᒪᓐ ᐊᑕᒍᔪᒃ ᐃᓱᒪᖓᒍᑦ ᐋᓐᓂᐊᕈᑎᖃᓚᐅᕐᒪᓐ ᐃᒻᒥᓃᖅᑎᓪᓗᒍ ᓯᑎᐱᕆ 2020-ᒥᑦ. ᐊᖓᔪᖅᑳᖏ ᐃᓄᖕᓂ ᐅᔾᔨᕈᓱᒃᐹᓪᓕᖅᑎᑦᑎᓇᓱᖕᒪᑕ ᐃᓱᒪᖓᒍᑦ ᐋᓐᓂᐊᖃᕐᓂᖅᒧᑦ ᐃᑲᔪᕈᑎᑕᖃᕐᓂᖓᓂᒃ, ᑖᒃᑯᐊᒡᓗ ᑕᒪᑐᒧᖓ ᐊᒃᓱᕈᕈᑎᖃᕋᓗᐊᕆᓪᓗᑎᒃ. (ᐊᔾᔨᙳᐊᖅ ᐅᑯᓇᙵᑦ ᔩᓚ ᐊᒻᒪ ᓯᑕᕚᓐ ᐸᓪᓗᖅ-ᑯᓘᑎᐃᒥ)

ᓱᕈᓯᐅᓂᕆᓚᐅᖅᑕᒥᓂᙶᖅᑐᓂᒃ ᐊᒃᓱᕈᕈᑎᖃᓚᐅᖅᑐᖅ ᐃᒥᐊᓗᖕᒧᑦ ᓱᕐᕋᖕᓇᖅᑐᓄᓪᓗ ᐅᐃᕆᓯᒪᓕᓚᐅᖅᑐᖅ. ᐃᑲᔪᖅᑕᐅᔪᒪᓕᓚᐅᖅᑑᒐᓗᐊᖅ. ᐃᓱᒪᓕᕆᔨᒃᑯᓐᓄᐊᖃᑦᑕᓕᖅᖢᓂ. ᐃᓱᒪᓕᕆᔨᒥᒃ ᐅᖃᖃᑎᖃᖃᑦᑕᓕᓚᐅᖅᑐᖅ. ᖃᓄᐃᑦᑐᓐᓃᖅᐸᓪᓕᖅᑰᔨᓕᓚᐅᖅᑑᒐᓗᐊᖅ. 29-ᓂᒃ ᐅᑭᐅᖃᓕᓚᐅᖅᑐᖅ ᐃᓅᔪᒪᔪᓐᓃᖅᑎᓪᓗᒍ.

ᒪᑭᒃᑲᓐᓂᕋᓱᒃᐸᓪᓕᐊᓕᖅᑎᓪᓗᑕ ᐃᒻᒥᓃᖅᑐᒧᑦ ᐃᓚᙵᓚᐅᖅᑎᓪᓗᑕ, ᓱᓕ ᑐᓴᖃᑦᑕᖅᑐᒍᑦ ᐃᒻᒥᓃᖅᑐᕕᓂᐅᓂᕋᖅᑕᐅᔪᓂᒃ. ᐃᓱᒪᓇᖅᓯᓪᓗᓂ ᐃᒻᒥᓃᖃᑦᑕᖅᑐᑦ ᐅᓄᖅᓯᕚᓪᓕᕐᒪᖔᑕ ᒫᓐᓇ ᓄᕙᕐᓇᕐᔪᐊᓂᖃᓕᖅᑎᓪᓗᒍ. ᐃᕐᓂᖅᐳᒃ ᓈᓴᖅᑕᐅᖃᓯᐅᑎᓯᒪᑐᐃᓐᓇᖁᙱᑕᕗᒃ. ᑭᓯᐊᓂ ᐃᒻᒥᓃᖅᑐᖃᖃᑦᑕᒃᑲᓐᓂᑐᐃᓐᓇᕆᐊᖃᕐᒪᑦ ᐊᒃᓱᕈᕐᓇᖅᑐᒃᑰᖅᑎᓪᓗᑕ ᐃᓱᒪᖅᓱᕐᓇᙱᓕᖅᑎᓪᓗᒍ ᐊᓂᑦᑕᐃᓕᔭᕆᐊᖃᕐᓇᖃᑦᑕᖅᑎᓪᓗᒍᓗ.

ᐊᑭᖃᙱᑦᑐᓂᒃ ᐃᓱᒪᓕᕆᔨᓂᒃ ᐅᖃᖃᑎᖃᕐᕕᒃᓴᐅᔪᖅ ᐅᖄᓚᐅᑎᒃᑯᑦ ᐃᑭᐊᖅᑭᕕᒃᑯᓪᓗ. ᓄᓇᕗᑦ ᒐᕙᒪᖓᓐᓂ ᐃᖅᑲᓇᐃᔭᖅᑐᑦ ᐃᑲᔪᖅᑕᐅᔪᓐᓇᖅᑐᑦ ᐃᓅᓯᓕᕆᔨᓄᑦ ᐃᖅᑲᓇᐃᔭᖅᑎᓄᑦ ᐃᓚᖏᓐᓄᓪᓗ ᐃᑲᔪᖅᑕᐅᔾᔪᑎᑎᒍᑦ.  ᐅᐃᒐᓗ ᐊᑐᓚᐅᕋᑦᑎᒃᑯᒃ ᐃᑲᔫᑎᖃᑦᑎᐊᖅᑐᖅ.

ᖃᓄᐃᑦᑐᓐᓃᕋᓱᒃᐸᓪᓕᐊᑎᓪᓗᓄᒡᓗ ᖃᐅᔨᓕᓚᐅᖅᑐᒍᒃ ᖁᕕᐊᓇᖅᑐᒥᒃ, ᐃᖃᓗᖕᓂ ᐃᓱᒪᓕᕆᔨᒃᑯᓐᓂ ᐊᓯᔾᔨᖅᑕᐅᔪᒥᒃ. ᕕᕈᐊᕆᒥ ᐱᒋᐊᖅᖢᓂ, ᐅᓪᓗᐃᓐᓇᖅ ᐃᓂᒃᓴᓕᐅᕐᕕᒃᓴᐅᓕᖅᑐᖅ ᐃᓱᒪᓕᕆᔨᒥᒃ ᑕᑯᔪᒪᔪᓄᑦ ᓇᒡᒐᔾᔭᒃᑯᑦ, ᐱᖓᔪᐊᒃᑯᑦ, ᕿᑎᖅᑰᒃᑯᓪᓗ. ᐅᓪᓛᒃᑯᑦ ᐅᖄᓚᓚᐅᖅᓯᒪᔪᖓ ᐃᓂᒃᓴᓕᐅᖅᑕᐅᔪᒪᓪᓗᖓ. ᐅᓐᓄᒃᓴᖓᓐᓂᒡᓗ ᑕᑯᔭᐅᑲᐅᑎᒋᓪᓗᖓ.

ᖃᐅᔨᓕᓚᐅᕐᒥᔪᒍᒃ ᐃᑲᔪᖅᑕᐅᔪᓐᓇᕐᓂᑦᑎᓐᓂᒃ ᒐᕙᒪᑐᖃᒃᑯᓐᓄᑦ ᐊᑭᓕᖅᑕᐅᔪᓐᓇᖅᑐᓂᒃ. ᑕᒪᓐᓇ ᑐᓴᐅᒪᔭᐅᓗᐊᙱᑐᐃᓐᓇᕆᐊᓕᒃ, ᑕᒪᑐᒨᓇ ᐃᑲᕐᕋᓂᒃ 22-ᓂᒃ ᐊᕐᕌᒍᑕᒫᑦ ᐃᓄᓕᕆᔨᒥᒃ ᐅᖃᖃᑎᖃᕐᕕᒃᓴᐅᔪᓐᓇᖅᑐᖅ. ᖁᕕᐊᓱᓚᐅᖅᐳᒍᒃ ᓄᓇᕗᑦ ᒐᕙᒪᖓᑦ ᐃᑲᔪᕈᓐᓇᕐᓂᖏᓐᓂᒃ ᑕᒪᑐᒥᖓ ᐊᑐᕈᒪᔪᓂᒃ. ᐃᕐᖐᓐᓈᖅᑕᐅᑎᒃᑯᑦ ᑎᑎᕋᑐᐃᓐᓇᕐᓗᑎᑦ ᐅᕗᖓ healing@gov.nu.ca.

ᐊᒃᓱᕈᕐᓇᖅᑐᒻᒪᕆᐊᓗᒃ ᕿᑐᕐᖓᐃᕆᐊᒃᓴᖅ, ᓇᒡᓕᒋᔭᕐᒥᒡᓗ ᐃᓚᙵᕆᐊᒃᓴᖅ, ᐱᓗᐊᖅᑐᒥᒃ ᐃᒻᒥᓃᖅᑐᒧᑦ. ᐃᓅᓯᑦ ᐊᒃᓱᕈᕐᓇᓗᐊᓕᕋᓗᐊᖅᐸᑦ, ᖃᐅᒪᓃᑦ ᖃᒥᑦᑕᐃᓕᒍᒃ. ᐃᑲᔪᖅᑕᐅᒋᐊᕐᓗᑎᑦ. ᐊᖓᔪᖅᑳᖑᓪᓗᑕ ᐱᖃᓐᓇᕆᔭᐅᓪᓗᑕᓘᓐᓃᑦ ᓇᔪᖅᐸᑦᑎᒋᑦ ᖃᐅᔨᕙᓪᓕᐊᖃᑎᒌᒍᓐᓇᖅᖢᑕᓗ ᖃᓄᒃᑲᓐᓂᖅ ᐃᑲᔪᖅᑕᐅᔪᓐᓇᕐᒪᖔᑦᑕ.

ᓴᐃᒪᓐ ᐊᖓᔪᖅᑳᖏᒃ
ᔩᓚ ᐊᒻᒪ ᓯᑕᕚᓐ ᐸᓪᓗᖅ-ᑯᓘᑎᐊᐃ