ᓯᑮᖅᑎᐅᕙᒃᑐᖅ ᐋᓐᓂᐊᕕᖕᒥ ᐊᓂᑎᑕᐅᔪᖅ ᓇᓄᕐᒧᑦ ᐅᒋᐊᖅᑕᐅᓚᐅᖅᑎᓪᓗᒍ

For the English version of this story, please see Skier released from health centre after polar bear attack.

ᓯᑮᖅᑎ ᐱᓇᓱᐊᕈᓯᐅᕐᑐᒥ ᓇᓄᕐᒧᑦ ᐅᒋᐊᖅᑕᐅᓚᐅᕐᑐᖅ ᐊᐅᔪᐃᑦᑐᖅ ᒥᕐᖑᐃᖅᓯᕕᒃᒥ ᐋᓐᓂᖅᑕᐅᓗᐊᓚᐅᙱᑦᑐᖅ.

ᐊᓯᖏᓐᓂᑦᑕᐅᖅ ᒥᕐᖑᐃᖅᓯᕐᕕᓕᐊᕐᓯᒪᔪᓂ ᐱᑕᖃᓚᐅᕐᒥᒻᒪᑦ ᐊᐃᕆᓕ 24 ᐅᓪᓛᖓᓂ ᑖᓐᓇ ᐅᑭᐊᖅᑕᐅᓕᖅᑎᓪᓗᒍ, ᐅᖃᕐᑐᖅ ᒫᒍᕆᑦ ᕗᕇᓴᓐ, ᒥᕐᖑᐃᖅᓯᕐᕕᓕᕆᔨᒃᑯᓐᓂ ᑲᓇᑕᒥ ᐅᖃᖅᑎᒋᔭᐅᔪᖅ ᑎᑎᕋᖅᖢᓂ ᖃᕋᓴᐅᔭᒃᑯᑦ.

ᑖᓐᓇ ᑲᒪᒋᔭᐅᓚᐅᕐᑐᖅ ᐋᓐᓂᖅᑕᐅᔪᖅ ᑖᒃᑯᓄᖓ ᐊᒻᒪᓗ ᖃᐅᔨᑎᑦᑎᓪᓗᑎᒃ ᒥᕐᖑᐃᖅᓯᕐᕕᓕᕆᔨᓕᒃ, ᑖᒃᑯᐊᓗ ᑎᑭᖢᑎᒃ 8:30-ᒥ ᐅᓪᓛᒃᑯᑦ ᓇᓄᕐᒧᑦ ᐅᒋᐊᖅᑕᐅᔪᖃᖅᑎᓪᓗᒍ. ᖁᓕᒥᒎᓕᖕᒥ ᑎᑭᑦᑐᖃᕈᓐᓇᓚᐅᙱᑦᑐᖅ ᓯᓚᒧᑦ, ᑕᐃᒪᓕ ᐃᖅᑲᓇᐃᔭᖅᑎᒋᔭᐅᔪᑦ ᖃᒧᑕᐅᔭᒃᑯᑦ ᐃᖏᕐᕋᔾᔪᔾᔨᓕᓚᐅᕐᑐᖅ ᐅᕙᙵᑦ ᓴᒥᑦ ᑕᓯᖅ ᑐᐊᕕᓐᓇᖅᑐᓄᑦ ᐅᖅᑯᐊᖃᕐᕕᒃᒥ 50 ᑭᓛᒥᑕᓂ ᐅᖓᓯᖕᓂᓕᖕᒥ ᐸᓐᓂᕐᑑᒧᑦ.

“ᑖᓐᓇ ᖃᐅᔨᓴᖅᑕᐅᓚᐅᕐᑐᖅ ᐋᓐᓂᐊᖅᑐᓕᕆᔨᓄᑦ ᐊᒻᒪᓗ ᑲᒪᒋᔭᐅᒃᑲᓐᓂᕆᐊᖃᕈᓐᓃᖅᖢᓂ,” ᕗᕇᓴᓐ ᐅᖃᕐᑐᖅ.

ᓇᓗᓇᕐᑐᖅ ᖃᓄᖅ ᑖᒃᑯᐊ ᐅᐸᒍᑎᓯᒪᓚᐅᕐᑐᖅ ᓄᖅᑲᖅᑎᑦᑎᓚᐅᕐᒪᖔᑦ ᐅᕝᕙᓘᓐᓃᑦ ᖃᓄᑎᒋ ᐋᓐᓂᕐᓂᑰᒻᒪᖔᑦ ᑖᓐᓇ ᓇᓄᕐᒧᑦ ᐅᒋᐊᖅᑕᐅᓕᓚᐅᕐᑑᒐᓗᐊᖅ.

ᒥᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᐃᖅᑲᓇᐃᔭᖅᑎᖏᑦ ᑐᖂᑦᑎᓕᓚᐅᕐᑐᑦ ᐊᒻᒪ ᓂᕿᖓ ᐸᓐᓂᕐᑑᒥ ᐊᖑᓇᓱᒃᑐᓕᕆᔨᓄᑦ ᑐᓂᔭᐅᓪᓗᓂ.

ᐊᐅᔪᐃᑦᑐᖅ ᒥᕐᖑᐃᖅᓯᕕᒃ ᕿᑭᖅᑖᓗᖕᒦᑦᑐᖅ ᐸᓐᓂᕐᑑᓪᓗ ᕿᑭᖅᑕᖅᔪᐊᖅᓗ ᐊᑯᓐᓂᖓᓃ

ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᐅᔾᔨᕈᓱᑦᑎᐊᖁᔨᔪᑦ ᑕᐃᑯᙵᐅᓯᒪᔪᓂᒃ ᓇᓄᕐᒥ ᒫᔅᓯᐅᓂᖓᓂ ᐊᒻᒪ ᐊᐃᕆᓕᒻᒥ, ᑕᒪᒃᑯᐊ ᐊᕐᓇᕐᓗᐃᑦ ᐊᑎᕐᑕᓛᖃᓕᖅᖢᑎᒃ ᐊᓂᕙᓪᓕᐊᓕᕐᑎᓪᓗᒋᑦ ᐃᓗᑦᑐᖅᓯᒪᔪᓂᑦ ᓄᓇᐅᑉ ᐃᓗᐊᓂ.

ᒪᑯᐊ ᐃᓅᙱᑦᑐᑦ ᖁᑭᐅᑎᖃᕆᐊᖃᙱᖢᑎᒃ ᒥᕐᖑᐃᖅᓯᕕᖕᓂ, ᐊᑐᕈᓐᓇᖅᑎᑕᐅᕙᒃᑐᑦ ᐊᓯᖏᓐᓂ ᓇᓄᕐᓂ ᕿᒫᑎᑦᑎᔾᔪᑎᓂᒃ ᒪᑯᑎᑐᓇᖅ ᑎᖕᒥᑳᓲᓂᒃ ᓇᓄᕐᓂ ᕿᒫᓕᖅᑎᑦᑎᔾᔪᑎᓂᒃ, ᓂᐱᖃᕈᓘᔭᕈᑎᓂᒃ ᐊᒻᒪᓗ ᐅᐊᔭᓖᖕᓂ ᓴᐴᓕᑕᕐᓂᒃ.