ᖁᑭᐅᑎᓂ ‘ᐊᑐᑦᑎᐊᙱᓐᓂᖅ’ ᐱᖓᓱᓂ ᐃᓅᓯᖃᕈᓐᓃᕈᑎᐅᕗᖅ: ᖁᑭᐅᑎᓕᕆᔨ

For English version, see Pond Inlet firearm ‘misuse’ took 3 young lives: Chief firearms officer

ᖁᑭᐅᑎᓂ ᐃᓂᖃᖅᑎᑦᑎᑦᑎᐊᙱᓐᓂᖅ ᓈᒻᒪᙱᓕᐅᕈᑎᐅᓂᕋᖅᑕᐅᓚᐅᕐᑐᖅ ᒥᑦᑎᒪᑕᓕᒃᒥ ᐱᖓᓱᑦ ᐃᓅᔪᓐᓃᖅᑎᓪᓗᒋᑦ, ᐅᖃᕐᑐᖅ ᓄᓇᕗᒥᑦ ᐊᖓᔪᖅᑳᖅ ᖁᑭᐅᑎᓕᕆᔨ, ᑖᓐᓇᓗ ᖁᑭᐅᑎᓂ ᑲᒪᒋᔭᖃᖅᑎᐊᕆᐊᖃᕐᓂᕐᒥ ᑐᓴᖅᑕᐅᑎᒃᑲᓐᓂᕈᑎᒋᓪᓗᓂᐅᒃ.

“ᐊᐃᑦᑖᖑᒐᓗᐊᖅ, ᑕᒪᑐᒥᖓ ᐅᖃᐅᓯᖃᕋᑦᑕᑦ ᖃᓄᐃᓕᐅᕈᑎᖃᕈᓘᔭᓚᐅᕐᑎᓪᓗᒍ ᐊᒻᒪᓗ ᐊᒃᑐᐃᓂᖃᒻᒪᕆᓂᐊᖅᖢᓂ ᐃᓚᒌᓄᑦ ᒥᑦᑎᒪᑕᓕᒃᒥ ᑭᓯᐊᓂᓕᑦᑕᐅᖅ ᓄᓇᕗᓕᒫᒥᑦ,” ᐅᖃᕐᑐᖅ ᑭᐊᕋᓐ ᒨᕙᑦ, ᓄᓇᕗᒥᑦ ᐊᖓᔪᖅᑳᖅ ᖁᑭᐅᑎᓕᕆᓂᕐᒧᑦ ᔪᓚᐃ 22-ᒥ ᐊᐱᕐᓱᖅᑕᐅᑎᓪᓗᒍ.

ᐅᓇ “ᐱᕐᕈᓗᐊᕿᔾᔪᑎᒻᒪᕆᐊᓗ” ᑕᒪᓐᓇ ᑕᖅᑭ ᐱᒋᐊᕐᓯᒪᓕᕐᑎᓪᓗᒍ ᓱᓕ ᖃᐅᔨᓴᖅᑕᐅᔪᖅ, ᑭᓯᐊᓂᓕ “ᖁᑭᐅᑎᒥ ᐊᑐᑦᑎᐊᙱᓐᓂᕐᒨᖓᓚᐅᕐᑐᖅ,” ᒨᕙᑦ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᑖᒃᑯᐊ ᖁᑭᐅᑎᑦ ᐃᓂᖃᖅᑎᑕᐅᑦᑎᐊᓚᐅᒋᓐᓂᖏᓐᓅᓂᕋᕐᖢᓂᐅᒃ.

ᒨᕙᑦ ᐅᖃᓚᐅᕐᑐᖅ ᑖᒃᑯᐊ ᓄᑕᕋᐅᓚᐅᕐᓂᖏᓐᓂ ᐊᒻᒪ ᐅᖃᖅᖢᓂ ᐊᑕᐅᓯᕐᒥ ᖁᑭᐅᑎᒥ ᐊᑐᕐᓂᕋᖅᖢᓂᒋ ᐊᒻᒪ ᐅᖃᒃᑲᓐᓂᕈᒪᔪᓐᓃᖅᖢᓂ ᐅᖃᖅᖢᓂ ᐸᓖᓯᒃᑯᑦ ᓱᓕ ᑕᒪᑐᒥᖓ ᖃᐅᔨᓴᕐᓂᕋᖅᖢᓂᒋᑦ.

ᒨᕙᑦ ᑎᑎᕋᕕᖓ ᖁᑭᐅᑎᓄ ᖃᓄᐃᓕᕈᑎᓂ ᑎᑎᕋᐅᓯᖃᖅᐸᓪᓕᐊᒋᓐᓂᕋᖅᑕᖏ ᑭᓯᐊᓂᓕ ᒫᓐᓇ 3,501 ᓄᓇᕗᒻᒥᐅᑕᑦ ᖁᑭᐅᑎᑖᕈᓐᓇᐅᑎᖃᕐᓂᕋᖅᑕᖏᑦ — ᖁᑭᐅᑎᖃᕈᓐᓇᐅᑎᓖᓪᓗ ᖁᑭᐅᑎᖃᖅᑐᐃᓐᓇᐅᓇᓱᒋᓪᓗᓂᖏᑦ ᐊᑕᐅᓯᐅᒐᓗᐊᕐᒥ.

ᓄᓇᕗᒥᑦ ᐊᖓᔪᖅᑳᖅ ᖁᑭᐅᑎᓕᕆᓂᕐᒧᑦ ᑭᐅᕋᓐ ᒨᕙᑦ ᖁᑭᐅᑎᓂ ᐊᔪᕈᓐᓃᕐᓴᕈᑎᐅᕙᒃᑐᓂ ᖁᑭᐅᑎᓕᕆᓂᕐᒧᑦ. (ᐊᔾᔨᙳᐊᖅ ᐅᕙᙵᑦ ᓄᓇᕗᒥᑦ ᐊᖓᔪᖅᑳᖅᒥ ᖁᑭᐅᑎᓕᕆᓂᕐᒧᑦ)

“ᖁᑭᐅᑎᑦ ᑭᒃᑯᑐᐃᓐᓇᕐᓄᑦ ᑲᒪᒋᔭᐅᔭᕆᐊᓖᑦ,” ᒨᕙᑦ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᑎᑎᕋᕐᕕᖓ ᐱᓇᓱᐊᒐᖃᕐᓂᖓᓂ ᖁᑭᐅᑎᓂ ᐅᓗᕆᐊᓇᙱᑦᑐᒦᑎᑦᑎᔭᕆᐊᖃᕐᓂᕐᒥ ᐃᓂᖃᖅᑎᑦᑎᑦᑎᐊᖅᑎᑦᑎᓂᕐᒥᒃ.

ᐃᓛᓐᓂ, ᐅᖃᕐᑐᖅ, ᓄᓇᕗᒥᑦ ᐸᓖᓯᒃᑯᑦ ᖁᑭᐅᑎᓂ ᑕᑯᖃᑦᑕᖅᑐᑦ ᖁᑭᕆᐊᖅᑕᐃᓕᔾᔪᑎᖃᙱᑦᑐᓂ ᐃᒡᓕᐅᑉ ᐊᑖᓂ ᐅᕝᕙᓘᓐᓃᑦ ᕿᒪᒃᑕᐅᓯᒪᔪᓂᒃ ᐅᒥᐊᕐᓂ ᐅᕝᕙᓘᓐᓃᑦ ᖃᒧᑕᐅᔭᕐᓂ.

ᖁᑭᕆᐊᖅᑕᐃᓕᔾᔪᑎ ᒥᑭᑦᑐᕈᓗ ᐋᖅᑭᒃᓯᒪᔪᒃᓴᖅ ᖁᑭᕆᐊᕈᑎᒥ ᐊᔪᓕᖅᑎᑦᑎᓯᒪᔾᔪᑎᐅᓪᓗᓂ. ᐸᓖᓯᒃᑯᑦ ᐊᑭᖃᙱᑦᑐᓂᒃ ᑐᓂᓯᑲᑕᒃᐸᒃᑐᑦ ᓄᓇᓕᖕᓂ ᐸᓖᓯᒃᑯᓐᓂ.

ᒨᕙᑦ ᖃᐅᔨᒪᔪᖅ ᖁᑭᐅᑎᖃᕆᐊᖃᕐᓂᕐᒥ ᐊᖑᓇᓱᖕᓂᐊᕐᓗᓂ ᑭᓯᐊᓂᓕ ᐅᖃᕐᑐᖅ ᖁᑭᐅᑎᑦ ᐅᓗᕆᐊᓇᙱᑦᑐᒦᑦᑕᕆᐊᖃᕐᒪᑕ ᓄᓇᓕᖕᓃᓕᕌᖓᑕ ᐊᒻᒪ ᐊᑐᖅᑕᐅᙱᑎᓪᓗᒋᑦ.

ᖁᑭᐅᑎ ᐃᓂᖃᑦᑎᑕᐅᑦᑎᐊᕐᑐᖅ ᒪᑐᓯᒪᑦᑎᐊᕐᑐᒦᓪᓗᑎᒃ ᐴᒃᓴᕐᒥ ᐅᕝᕙᓘᓐᓃᑦ ᐃᒡᓗᕈᓯᕐᒥ, ᒨᕙᑦ ᐅᖃᕐᑐᖅ. ᓱᓇᒐᖃᕆᐊᖃᕐᖏᖢᑎᒃ ᐊᒻᒪᓗ ᖁᑭᕆᐊᖅᑕᐃᓕᒪᔾᔪᑎᖃᕐᓗᓂ.

ᓱᓇᒐᐃᑦ ᐃᓂᖃᖅᑎᑕᐅᑦᑎᐊᕆᐊᓖᑦ ᐊᓯᐊᓂ, ᐅᖃᕐᑐᖅ ᓲᖃᐃᒻᒪ ᐊᑕᐅᓯᑦᑕᐃᓐᓇᒦᙱᑉᐸᑕ ᐱᔭᐅᓇᓱᖕᓂᖏᓐᓂ “ᐃᓱᒪᒃᓴᖅᓯᐅᕈᑎᐅᔪᓐᓇᖅᑐᑦ’ ᐅᓗᕆᐊᓇᕐᑐᒥ ᖃᓄᐃᓕᐅᕐᓂᐊᕈᒪᔪᓂᒃ.

ᐊᓯᖏ ᑲᒪᒋᔭᖃᑦᑎᐊᕐᓂᕐᒨᖓᔪᑦ ᐊᒻᒪ ᐃᓂᖃᖅᑎᑦᑎᑦᑎᐊᕐᓂᕐᒧᑦ, ᒨᕙᑦ ᑎᑎᕋᕐᕕᖓ ᓚᐃᓴᓐᓯᑖᕐᑎᑦᑎᔨᐅᕙᒃᑐᑦ, ᖃᐅᔨᓴᖅᐸᒃᖢᑎᒃ ᖁᑭᕐᓴᕐᕕᐅᕙᒃᑐᓂᒃ ᐊᒻᒪ ᓚᐃᓴᓐᓯᖃᖅᑐᓂ ᖃᐅᔨᓴᕐᐸᒃᖢᑎᒃ ᐱᕋᔭᒍᑎᐅᓐᓂᖅᐸᑦ ᐸᓯᔭᒃᓴᐅᔾᔪᑎᐅᓗᓂᓗ ᐅᕝᕙᓘᓐᓃᑦ ᐃᓱᒪᒃᑯᑦ ᓈᒻᒪᙱᓕᐅᕈᑎᖃᕐᓯᒪᔪᓂᒃ.

ᒨᕙᑦ, ᐅᐃᓂᐱᒡᒦᑦᑐᖅ, ᐊᖓᔪᖅᑳᕆᔭᐅᔪᖅ ᖁᑭᐅᑎᓕᕆᓂᕐᒧᑦ ᒫᓂᑑᐸᒧᑦ ᐊᒻᒪ ᓄᓇᕗᒧᑦ ᐱᓕᕆᐊᖃᕐᓯᒪᓕᕐᑐᖅ ᐊᕐᕌᒍᓂ 16-ᓂ. ᑖᓐᓇ ᑭᒡᒐᖅᑐᐃᔨᖏᓪᓗ ᑎᑎᕋᕐᕕᐊᓂ ᓄᓇᕗᒧᙵᐅᖃᑦᑕᕐᒪᑕ ᑭᓯᐊᓂᓕ ᐊᕐᕌᒎᓕᖅᑑᖕᓂ ᒪᕐᕉᖕᓂ ᐱᓕᕆᐊᖃᖅᐸᓪᓕᐊᖕᒪᑕ ᐊᓯᐊᓂ ᐊᖓᔪᖅᑳᖃᕐᕕᖃᕐᓂᐊᕐᓗᑎᒃ ᓄᓇᕗᒦᓐᓂᐊᖅᑐᒥ.

ᑕᐃᒪᓕ ᑖᓐᓇ ᑎᑎᕋᕐᕕᒃ ᐃᒡᓗᒋᔭᐅᓂᐊᕐᑐᓂ ᓇᓂᓯᔪᓐᓇᐃᓪᓕᑲᑕᖕᒪᑕ ᒪᕐᕉᖕᓄ ᐃᖃᓗᖕᓂ, ᐊᒻᒪᓗ ᑖᓐᓇ ᓄᑖᖅ ᐃᖅᑲᓇᐃᔭᕐᕕᐅᓂᐊᕐᑐᖅ ᐃᑲᔫᑎᑖᕈᑎᒃᓴᖅᑖᕆᐊᖃᖅᖢᑎᒃ ᒐᕙᒪᑐᖃᒃᑯᑦ ᑭᒃᑯᓕᒫᓂ ᐊᑦᑕᓇᖅᑐᒦᑎᑦᑎᑦᑕᐃᓕᔨᒃᑯᓐᓂ.