ᓴᖅᑭᑎᑦᑎᓂᖅ ᓱᓕᕆᕐᒥ ᐊᒻᒪ ᐋᖅᑭᒋᐊᒃᑲᓐᓂᕐᓂᕐᒥ ᓄᑖᒃᑯᑦ ᑕᐅᑐᒍᓯᒃᑯ

For English version, see Kuujjuaq painter portrays truth and reconciliation through new eyes

ᑰᔾᔪᐊᖅᒥᐅᑕᖅ ᑎᑎᕋᐅᔭᒐᖅᑎ ᕼᐋᓇ ᑐᒃᑐ ᐅᖃᕐᑐᖅ ᑎᑎᕋᐅᔭᒐᕈᒪᓚᐅᕐᓂᖓᓂ ᑕᐅᑐᙳᐊᖅᑕᖓᓂ ᓱᓕᓂᕐᒥ ᐊᒻᒪ ᐋᖅᑭᒋᐊᒃᑲᓐᓂᕐᓂᕐᒥ, ᑭᓯᐊᓂᓕ ᓴᖅᑭᑎᑦᑎᓯᒪᙱᓪᓗᓂ ᖁᕕᐊᓇᙱᑦᑐᕕᓂᐊᓗᖕᓂ.

“ᐊᖏᕐᕋᕐᓗᑎ, ᖃᐅᔨᒪᓗᑎᒡᓗ ᑐᙵᓱᒃᑎᑕᐅᔪᑦ ᐊᒻᒪ ᓇᒡᓕᒋᔭᐅᔪᑦ, ᑖᔅᓱᒥᖓᓕ ᓴᖅᑭᑎᑦᑎᔪᒪᓚᐅᕐᐳᖓ,” ᑎᑎᕋᐅᔭᒐᖓᓂ ᐅᖃᐅᓯᖃᖅᖢᓂ, ᑕᐃᒎᓯᖃᖅᖢᓂ ᐊᓂᕐᕌᓂᔪᖅ.

ᑎᑎᕋᐅᔭᒐᖅ, ᐱᓕᕆᐊᕆᓚᐅᕐᑕᖓ ᐱᓇᓱᐊᕈᓯᕐᓂ ᐱᖓᓱᓂ, ᓴᖅᑭᑎᑦᑎᓯᒪᔪᖅ ᐱᖓᓱᓂᒃ ᓱᕈᓯᕐᓂ ᐊᖏᕐᕋᓕᕐᑐᓂ ᐃᓕᓐᓂᐊᕆᐊᕐᕕᒋᓚᐅᖅᑕᖓᓂ. ᐅᓇ ᐊᑭᓐᓇᕐᒥᐅᑕᐅᓕᕐᓂᐊᖅᑐᖅ ᐃᓱᐊᕐᓯᕕᒃ ᒪᒥᓴᕐᕕᒃᒥ ᑰᔾᔪᐊᖅᒥ ᐊᕙᓗᓕᐅᖅᑕᐅᓚᐅᖅᑎᓪᓗᒍ.

150,000 ᐅᖓᑖᓃᑦᑐᑦ ᓄᓇᖃᖅᑳᖅᑐᑦ ᑲᓇᑕᒥ ᐃᓚᖏᓐᓂ ᓄᓇᖏᓐᓂᓪᓗ ᕿᒪᐃᑎᑕᐅᓚᐅᕐᓯᒪᖕᒪᑕ ᐊᒻᒪᓗ ᒐᕙᒪᒃᑯᑦ ᐃᑲᔫᑎᖃᖅᑎᑕᖏᓐᓄᑦ ᐃᓕᓐᓂᐊᕆᐊᖅᑎᑕᐅᓪᓗᑎᒃ, ᑕᐃᒪᓐᓇ ᐃᓕᖅᑯᓯᖏᓐᓂ ᐅᖃᐅᓯᖏᓐᓂᒡᓗ ᐊᑐᕈᓐᓃᖅᑎᑕᐅᓇᓱᒃᖢᑎᒃ. ᑲᓇᑕᒥ ᑭᖑᓪᓕᖅᐹᖅ ᐃᓕᓐᓂᐊᕆᐊᕐᕕᕕᓂᖅ ᒪᑐᓕᐅᕐᓯᒪᔪ 1990-ᖏᓐᓃᓕᕐᑎᓪᓗᒍ ᒫᓂ 1995-ᕈᔪᖕᒥ.

“ᐊᕐᓇᐅᖕᒪᖔᑕ ᐊᖑᑎᐅᖕᒪᖔᑕᓪᓘᓐᓃᑦ ᓇᓗᓇᖅᑎᑕᐅᔪᑦ, ᑕᐃᒪᓕ ᑭᓇᑐᐃᓐᓇᖅ ᑕᐃᑯᙵᕈᓐᓇᓚᐅᖅᑐᖅ,” ᑐᒃᑐ ᐅᖃᐅᓯᖃᖅᖢᓂ ᓱᕈᓯᕐᓂ ᑎᑎᕋᐅᔭᕐᓯᒪᔭᖓᓂ.

ᑕᐃᒃᑯᐊᖑᑐᐃᓐᓇᕆᐊᓖᓪᓘᓐᓃᑦ “ᑐᖁᑕᐅᓚᐅᕐᑐᑦ, ᕿᒫᓪᓗᑎᒃ ᐃᓅᔪᓐᓃᕐᓯᒪᔪᓪᓘᓐᓃᑦ, ᖃᓄᐃᑦᑐᕕᓃᓪᓘᓐᓃᑦ.”

ᐅᓇ ᑎᑎᕋᐅᔭᒐᖅ, ᑐᒃᑐ ᐅᖃᕐᑐᖅ, ᐅᓪᓗᒥᑦᑕᐅᖅ ᓱᕈᓯᕐᓅᖓᔪᖅ ᓇᖕᒥᓂᖅ ᐃᓱᒪᒋᔭᖏᓐᓂ ᐋᖅᑭᒃᓯᒪᑎᓪᓗᓂᔾᔪᒃ ᐊᖏᕐᕋᓕᖅᑐᐃᑦ ᐃᓱᒪᒋᓗᒋᑦ.

ᐊᓃᕐᕌᓂᔪᖅ, ᐃᓄᒃᑎᑐᑦ “ᐊᖏᕐᕋᓕᕐᑐᑦ ᐊᑯᓂᕈᓗ ᐊᐅᓪᓚᕐᓯᒪᓚᐅᖅᖢᑎᒃ,” ᑎᑎᕋᐅᔭᒐᖅ ᓱᕈᓯᙳᐊᑦ ᐊᖏᕐᕋᓕᕐᑐᑦ ᐃᓚᖏᓐᓄᑦ ᓄᓇᕕᒃᒥ ᐃᓕᓐᓂᐊᕆᐊᕐᓯᒫᓪᓚᓚᐅᖅᖢᑎᒃ. ᑎᑎᕋᐅᔭᒐᖅᑕᖓ ᕼᐋᓇ ᑐᒃᑑ. (ᐊᔾᔨᓕᐅᕆᔨ ᓯᑐᕆᒃ ᒑᓚᓐᑦ)

ᑖᓐᓇ ᓴᖅᑭᔮᖅᑐᖅ ᖁᕕᐊᓱᙳᐊᕋᓗᐊᖅᑎᓪᓗᒋᑦ, ᓱᕈᓰᑦ ᑮᓇᖏ ᐊᐅᐸᕐᑐᒥ ᖃᐅᒪᔮᓂᖃᕐᑐᑦ ᐱᔾᔪᑎᖃᖅᖢᓂ ᐊᔾᔨᒌᙱᑦᑑᑎᓂ ᖁᕕᐊᓇᙱᑦᑐᖅᓯᐅᕈᑎᖏᓐᓂ ᐋᓐᓂᕈᑎᒋᓯᒪᔭᖏᓐᓄᓪᓘᓐᓃᑦ ᐃᓕᓐᓂᐊᕆᐊᖅᖢᑎ ᐊᑐᖅᑕᕕᓂᖏᓐᓄᑦ, ᐅᖃᕐᑐᖅ.

ᐅᓇ ᑲᑐᔾᔨᖃᑎᒌᖕᓂᒃᑯᑦ ᐃᓱᐊᕐᓯᕕᒃᒥ ᐃᖅᑲᓇᐃᔭᖅᑎᓄᑦ, ᐃᓚᖃᖅᖢᑎᒃ ᐃᓐᓇᑐᖃᕐᒥ ᐊᒻᒪ ᑐᓵᒥᔨ, ᐊᑎᖃᓕᖅᑎᑦᑎᓚᐅᕐᑐᑦ ᐆᒥᖓ ᐊᓂᕐᕌᓂᔪᖅ, ᑐᑭᖃᖅᖢᓂ “ᐊᖏᕐᕋᓕᕐᑐᑦ ᐊᑯᓂᕈᓗᒃ ᐊᐅᓪᓚᖅᓯᒪᓚᐅᖅᖢᑎᒃ.”

ᑐᒃᑐ ᐅᖃᓚᐅᕐᑐᖅ ᖃᓄᖅ ᐊᑎᖃᕐᓂᐊᕆᐊᒃᓴᖓᓂ ᓇᓗᓕᓚᐅᕐᓂᕋᖅᑐᖅ, ᓲᖃᐃᒻᒪ ᑕᒪᑐᒥᖓ ᐊᒃᑐᐊᓂᖃᓗᐊᕋᒥ.

ᐅᓇ ᐊᐅᓪᓚᖅᓯᒪᓂᐅᓚᐅᖅᑐᖅ ᐅᖃᕐᓯᒪᓂᖓᑎᑑᖓᔪᖅ. ᐅᓄᕐᑐᑦ ᐃᓄᐃᑦ ᐊᐅᓪᓚᖅᑎᑕᐅᓚᐅᕐᓯᒪᖕᒪᑕ ᑰᔾᔪᐊᕌᐱᒃ, ᒫᓂᑑᐸᒧ, ᐃᓚᖏᓪᓗ ᐅᓪᓗᒐᓴᖕᓂ ᑕᐃᑯᙵᕋᓱᒃᖢᑎᒃ, ᐅᖃᕐᑐᖅ ᑐᒃᑐ.

ᓴᖅᑭᑎᑦᑎᓯᒪᖕᒥᔪᖅ ᖃᓄᐃᑉᐸᓪᓕᐊᔾᔪᑎᐅᓚᐅᕐᑐᓂ ᐃᓕᓐᓂᐊᕆᐊᕐᕕᐅᔪᓂ ᓱᕈᓯᐅᓪᓗᓂ, ᖁᕕᐊᓇᙱᑦᑐᖃᐅᖅᑎᓪᓗᒍ ᐊᒻᒪᓗ ᐋᓐᓂᓯᕆᓂᖅᑕᖃᖅᖢᓂ.

“ᐅᓇ ᐊᑎᖓ ᓈᒻᒪᑦᑎᐊᕐᑐᖅ ᑎᑎᕋᐅᔭᕋᕐᒧᑦ,” ᐅᖃᕐᑐᖅ ᑐᒃᑐ.

ᐅᖃᖅᖢᓂ ᑖᓐᓇ ᑎᑎᕋᐅᔭᒐᖅᑕᖏᑦ ᐊᑐᓚᐅᕐᓯᒪᔭᖓᓂ ᐊᖓᔪᖅᑳᖏᓪᓗ ᐃᖅᑲᐅᒪᓪᓗᓂᒋᑦ, ᐊᖓᔪᖅᑳᖏ ᐃᓕᓐᓂᐊᕆᐊᖅᑎᑕᐅᕙᓚᐅᕐᒪᑎ. ᑖᔅᓱᒥᖓᓕ ᐅᖃᐅᓯᖃᕐᑐᖅ “ᒥᑭᑦᑑᒐᓗᐊᒃᑯᑦ ᐃᖅᑲᐅᒪᔾᔪᑎ” ᑖᒃᑯᓂᖓ.

“ᖃᐅᔨᒫᓂᙱᒃᑲᓗᐊᖅᑐᖓ ᖃᓄᐃᓪᓚᕆᓚᐅᕐᓂᖏᓐᓂ,” ᐅᖃᕐᑐᖅ. “ᑭᓯᐊᓂᓕ ᓂᐱᖃᙱᓐᓂᖏᑦ ᓂᐱᖁᖅᑐᔪᐊᓘᓚᐅᕐᑐᖅ.

“ᐅᓇ ᑎᑎᕋᐅᔭᒐᖅᑕᖓ ᓴᖅᑭᑎᑦᑎᓯᒪᖁᓚᐅᙱᓐᓇᒃᑯᑦ ᑯᕕᐊᓇᙱᑦᑐᕕᓂᐊᓗᖕᓂ, ᑕᐃᒪᓕ ᑐᙵᓇᕐᑎᓐᓇᓱᓚᐅᕐᑕᕋ.”

ᑐᒃᑐ ᐅᖃᓚᐅᕐᑐᖅ ᐅᓇ ᓱᓕᕆᓂᖅ ᐊᒻᒪ ᐋᖅᑭᒋᐊᕐᓂᖅ ᐅᖃᐅᓯᐅᓗᐊᔭᒻᒪᑦ ᖁᕕᐊᓇᙱᑦᑐᕕᓂᐊᓗᖕᓂ, ᑕᐃᒪᓐᓇᓗ ᖁᕕᐊᓇᙱᑦᑐᖅ ᐅᑎᑐᐃᓐᓇᓕᖅᐸᒃᖢᓂ.

“ᐅᑯᐊ ᐊᑐᕐᑕᐅᓪᓚᕆᖕᓂᑯᐃ ᐊᒻᒪᓗ ᐊᑐᕆᐊᖃᙱᖢᑎᒍᑦ ᖁᕕᐊᓇᙱᑦᑐᐊᓘᓗᓂ ᖁᓄᔪᕐᓂᐊᕈᔪᖕᓇᐅᓗᓂ,” ᐅᖃᕐᑐᖅ.

“ᑎᑎᕋᐅᔭᒐᕋ ᖁᕕᐊᓱᙳᐊᕐᑐᑦ … ᓴᖅᑭᑎᑦᑎᔪᒪᓚᐅᕋᒪ ᐅᓗᕆᐊᓇᙱᑦᑐᒦᓐᓇᕐᓗᓂ.”