ᒍᓛᔾᔪᓕᐅᕐᕕᐅᔪᒪᔪᖅ ᖃᐅᓱᐃᑦᑐᕐᒥ ᐊᓇᐅᓕᒑᕐᕕᒃᒧᑦ ᓈᒻᒪᙱᓕᐅᕈᑎ

For English version, see Proposed garage extension could relocate Resolute Bay baseball field

ᐸᕐᓇᐅᑎᑦ ᐊᖏᒡᓕᒋᐊᖅᑎᑦᑎᓂᕐᒥ ᖃᐅᓱᐃᑦᑑᑉ ᕼᐋᒻᒪᓚᖓ ᓄᓇᓯᐅᑎᖃᕐᕕᒃᓴᖓᓂ ᓄᒃᑎᖅᑎᔪᒪᓂᕐᒧ ᓄᓇᓖᑦ ᐊᓇᐅᓕᒑᕐᕕᖓᓂ ᓈᒻᒪᒋᔭᐅᓯᒪᙱᓚᖅ ᐊᑕᐅᓯᐅᒐᓗᐊᕐᒧᑦ ᓄᓇᖃᖅᑐᒧᑦ.

ᐅᑭᐅᕐᑕᖅᑑᑉ ᖁᑦᑎᒃᑐᐊᓂ ᕼᐋᒻᓚᒃᑯᑦ ᐃᓄᖃᖅᑐᖅ ᒫᓂ 200-ᓂ ᐊᖏᖅᑕᐅᓚᐅᕐᓯᒪᖕᒪᑕ $520,000-ᓂ ᓄᓇᕗᒥᑦ ᒐᕙᒪᒃᑯᓐᓂ ᐃᑲᔫᑎᐅᓗᓂ ᐸᕐᓇᐅᓯᐅᖅᐸᓪᓕᐊᓂᕐᒧᑦ ᑎᓴᒪᓂ ᐹᖃᕐᓂᐊᖅᑐᒥ ᐊᖏᒡᓕᒋᐊᕈᑎᒃᓴᒧᑦ ᒫᓐᓇ ᒪᕐᕉᖕᓂ ᐹᖃᖅᑐᒥᑦ ᓄᓇᓯᐅᑎᒃᑯᕕᒃᒥ, ᐅᖃᓚᐅᕐᑐᖅ ᐊᐅᓚᑦᑎᔨᒋᔭᐅᔪᖅ ᐃᐊᓐ ᑕᑦᓚ.

ᐸᕐᓇᐅᑎᑦ ᓴᓇᓂᐊᕈᒪᓂᕐᒧᑦ ᓄᓇᓯᐅᑎᒃᑯᕕᒃᓴᒥ ᐊᒻᒪ ᐅᖅᑰᓴᐅᑎᓕᒃᒥ ᐱᖁᑎᒃᑯᕕᒃᓴᒥ ᕼᐋᒻᒪᓚᒃᑯᑦ ᓄᓇᓯᐅᑎᖏᓐᓄᑦ ᒪᑯᓂᖓ ᐃᒥᖅᑕᐅᑎᓄᑦ ᐊᒻᒪ ᑯᕕᖅᑕᐅᑎᓄᓪᓗ ᓄᓇᓯᐅᑎᓄᑦ.

ᐊᖏᒡᓕᒋᐊᖅᑕᐅᔪᒪᓕᓚᐅᕐᓯᒪᔪᖅ 2021-ᒥ, ᐋᖅᑭᒃᑕᐅᓯᒪᓪᓗᓂ ᖃᐅᓱᐃᑦᑑᑉ 2021-22 ᐊᕐᕌᒍᒧᑦ ᐱᖁᑎᒃᓴᓄᑦ ᐸᕐᓇᐅᑎᓂᒃ. ᐅᓂᒃᑳᑦ ᐅᖃᐅᓯᖃᓚᐅᕐᑐᑦ “ᐃᓵᖅᑕᐅᖃᑦᑕᑐᐃᓐᓇᕆᐊᖃᕐᓂᖓᓂᒃ” ᐊᒻᒪᓗ “ᓄᓇᓯᐅᑎᑦ ᕿᓚᒻᒥᐅᓂᕐᓴᖅ ᐊᑐᖅᑕᐅᖃᑦᑕᕋᔭᖅᖢᑎᒃ” ᕼᐋᒻᒪᓚᒃᑯᑦ ᓄᓇᓯᐅᑎᖏ ᓯᓚᒦᑎᑕᐅᑐᐃᓐᓇᖅᐸᒃᑐᓂ ᐃᓂᖃᑦᑎᐊᙱᓗᐊᒧᑦ.

ᐊᖏᒡᓕᒋᐊᖅᑕᐅᓂᐊᕈᒪᓂᖓᓄᑦ, ᖃᐅᓱᐃᑦᑐᕐᒥ ᑲᑎᒪᔨᒃᑯᑦ ᐋᖅᑭᒃᓱᐃᕙᓪᓕᐊᓕᕐᑐᑦ ᐋᖅᑭᒋᐊᕈᑎᒃᓴᒥ ᐃᓂᒃᓴᓄᑦ ᒪᓕᒐᕋᓛᒥ ᑖᓐᓇ ᓄᓇᓯᐅᑎᖃᕐᕕᒃᓴᖅ ᐊᓇᐅᓕᒑᕐᕕᐅᑉ ᐃᓚᖓᑕ ᐃᓚᖓᓃᓕᕐᓗᓂ.

ᓄᓇᖃᖅᑐᖅ ᔫ ᐊᒪᕈᐊᓕᒃ ᓈᒻᒪᒃᓴᖅᓯᒪᙱᑦᑐᖅ ᓄᑖᙳᕆᐊᖅᑎᑦᑎᔾᔪᑎᐅᔪᒪᔪᒥᒃ, ᑖᓐᓇᓗ ᐊᐃᑉᐸᖓᓂ ᑭᒃᑯᓕᒫᓂ ᑲᑎᒪᔾᔪᑎᐅᓚᐅᖅᖢᓂ ᐊᐃᕆᓕᐅᓚᐅᕐᑐᒥ.

“ᖃᓄᐃᒻᒪᓪᓕ ᒫᓐᓇ ᑲᑎᒪᔨᒋᔭᕗᑦ ᐊᑐᕈᓐᓇᙱᓚᒃ ᓴᓇᕝᕕᒃᓴᐅᑎᑕᐅᔪᓂ ᖃᐅᔨᓴᖅᑕᐅᕌᓂᒃᓯᒪᔪᓂ? ᖃᓄᐃᒻᒪᒃᑭᐊ ᐊᖏᒡᓕᒋᐊᖅᑕᐅᔪᒪᕙ ᑭᓱᖃᙱᑐᐃᓐᓇᖅᑐᒧᑦ?” ᐅᖃᕐᑐᖅ.

ᐅᓇ ᐱᓕᕆᕝᕕᖕᓄᑦ ᐃᓂᓕᐊᖑᓯᒪᔪᖅ ᐊᒪᕈᐊᓕᐅᑉ ᐅᖃᐅᓯᕆᔭᖏ ᐅᓇ ᓴᕕᕋᔭᖕᓄᑦ ᐊᒃᑕᖅᕕᐅᓂᑯ ᑭᓛᒥᑕᐅᑉ ᓇᑉᐸᖓᓂ ᖃᐅᓱᐃᑦᑑᑉ ᓯᓚᑖᓃᑦᑐᖅ.

ᑭᓯᐊᓂᓕ, ᐱᓕᕆᕝᕕᖕᓄᑦ ᐃᓂᒃᓴᕆᓯᒪᔪᖅ ᐃᓱᒪᒋᔭᐅᓚᐅᕐᒪᑦ “ᓈᒻᒪᙱᑦᑕᕆᐊᒃᓴᖓᓂ” ᐊᑐᕐᑕᐅᓂᐊᕐᓗᓂ ᓄᓇᓯᐅᑎᒃᑯᕕᒃᒧ. ᑎᑎᕋᕐᓯᒪᓚᐅᕐᑐᑦ ᑲᑎᒪᔨᓄᑦ ᐅᓂᒃᑳᓕᐊ ᑐᓂᔭᐅᓂᒃᑯᑦ ᕕᕝᕗᐊᕆᐅᑎᓪᓗᒍ.

ᐱᓕᕆᕝᕕᖕᓄᑦ ᐃᓂᒃᓴᕆᑎᑕᐅᒧᖅ ᐊᖅᑯᓵᕐᕕᐅᓯᒪᔪᖅ ᐱᖓᓱᓄᑦ ᐊᑐᕐᕕᒃᓴᓄᑦ ᐊᖅᑯᑎᒧᑦ ᐊᒻᒪᓗ ᐋᖅᑭᒃᓯᒪᓪᓗᓂ ᓄᓇᓕᖕᓂ ᐊᓯᐊᒎᖓᓇᓱᒃᖢᓂ ᐊᒻᒪᓗ ᐃᒡᓗᓕᐅᕐᕕᖕᓄᑦ ᓂᐱᖃᓗᐊᔭᔾᔮᙱᒻᒪ ᐊᒻᒪ ᐳᔫᙱᓐᓂᕐᓴᐅᓗᑎ ᐊᖅᑯᑎᖏᑦ.

ᓄᓇᓖᑦ ᕿᑎᐸᓗᐊᓂ ᐃᑲᔪᕐᓂᕐᓴᐅᓇᔭᖅᑐᑦ ᓄᓇᓕᖕᓄᑦ ᐱᔨᑦᑎᕋᐅᑎᓕᕆᓂᕐᒧᑦ, ᐅᓂᒃᑳᑦ ᐅᖃᕐᓯᒪᔪᑦ.

ᑭᓯᐊᓂᓕᑦᑕᐅᖅ ᐊᓇᐅᓕᒑᕐᕕᒃ ᓄᓇᓖᑦ ᕿᑎᐊᓃᐸᓗᒃᐸᑦ ᐃᑲᔫᑎᖃᕐᖕᒪᑦ, ᐊᒪᕈᐊᓕᒃ ᐅᖃᕐᑐᖅ.

“ᖃᓂᒋᓛᕗᓪᓕ ᑭᓱᖃᙱᑦᑐᓕᒃ ᐊᓇᐅᓕᒑᕐᕕᐅᔪᓐᓇᕐᑐᖅ ᐊᓯᖏᓐᓄᓪᓘᓐᓃᑦ ᐱᙳᐊᕈᑎᓄᑦ ᑐᐊᐸᐃᓐᓇᐅᓗᐊᕐᒪᑦ,” ᐅᖃᕐᑐᖅ.

“ᐃᓱᒪᒐᑦᑕ ᐱᙳᐊᕕᒋᖃᑦᑕᖅᑕᕗᑦ ᐱᙳᐊᕕᑐᐃᓐᓇᐅᕙᒡᓗᓂ.”

ᐊᐱᕆᓚᐅᕐᑐᖅ ᕼᐋᒻᒪᓚᒃᑯᑦ ᐊᓇᐅᓕᒑᕐᕕᒃ ᓇᒧᙵᖅᑕᐅᓂᐊᕆᐊᒃᓴᖓᓂ ᐊᒻᒪᓗ ᖃᔅᓯᑐᕋᔭᕐᒪᖔᑦ.

ᑕᑦᓚ, ᕼᐋᒪᓚᒃᑯᓐᓃᑦᑐᖅ, ᓄᓇᖃᖅᑐᓄᑦ ᐅᖃᓚᐅᕐᑐᖅ ᑖᓐᓇ ᐊᓇᐅᓕᒑᕐᕕᒃ ᐅᖓᓯᒃᑐᒧᐊᖅᑕᐅᔮᙱᓐᓂᕋᖅᖢᓂᐅᒃ.

“ᖃᐅᔨᒪᒐᑦᑕ ᐅᓇ ᐊᓇᐅᓕᒑᕐᕕᒃ ᓄᓇᑦᑎᓐᓄᑦ ᐱᖁᑎᒋᔭᐅᒻᒪᕆᖕᒪᑦ ᐊᒻᒪᓗ ᐊᓯᐅᔨᑐᐃᓐᓇᕈᒪᙱᖢᑎᒍᑦ,” ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᖃᕋᓴᐅᔭᒃᑯᑦ.

“ᑕᐃᒪᓐᓇ ᐸᕐᓇᐅᑎᖃᖅᑐᒍᑦ ᑖᓐᓇ ᐃᓂᑐᖃᖓᑕ ᖃᓂᒋᔭᖓᓃᓐᓂᐊᕐᓂᖓᓂᒃ.”

ᑕᑦᓚ ᐅᖃᓚᐅᕐᑐᖅ ᐊᒪᕈᐊᓕᐅᑉ ᐃᓱᒫᓘᑎᖓ ᐊᐃᕆᓕᒥ ᐃᓄᖕᓂ ᑲᑎᒪᕕᒡᔪᐊᖅᑎᑦᑎᑎᓪᓗᒋ ᐅᖃᐅᓯᕆᓚᐅᕐᓯᒪᙱᓐᓂᕋᖅᖢᓂᐅᒃ ᐊᒻᒪᓗ ᕼᐋᒻᒪᓚᒃᑯᑦ ᑎᑎᕋᖅᓯᒪᔪᑦ ᐱᓚᐅᙱᖢᑎᒃ ᑖᔅᓱᒪ ᖃᓄᐃᓕᐊᕆᔭᐅᔪᒪᔫᑉ ᒥᒃᓵᓄᑦ ᑕᐃᒪᙵᓂ.

ᐱᖓᔪᖓᓐᓂ ᐅᖃᓕᒫᖅᑕᐅᓂᐊᕐᓂᖓ ᐋᖅᑭᒋᐊᕈᑎ ᐊᒻᒪ ᑭᒃᑯᓕᒫᓂ ᑲᑎᒪᑎᑦᑎᒃᑲᓐᓂᕐᓂᒃᓴ ᓱᓕ ᐋᖅᑭᒃᑕᐅᓚᐅᙱᑦᑐᑦ.

ᑭᖑᓂᐊᒍᓪᓕ ᑕᒪᓐᓇ ᓄᓇᓕᖕᓄ ᒐᕙᒪᒃᑯᓐᓄᓪᓗ ᐱᔨᑦᑎᕋᖅᑎᓄᑦ ᒥᓂᔅᑕᒧᐊᖅᑕᐅᓂᐊᖅᖢᓂ ᐊᖏᕆᐊᖃᕐᓂᖓᓄᑦ ᑭᖑᓪᓕᖅᐹᒥ.