ᐃᓄᖕᓄᑦ ᐃᒡᓗᒃᓴᐃᑦ ᐊᒥᒐᕐᓂᖅᓴᐅᕙᓪᓕᐊᔪᑦ ᐅᓄᕐᓂᕐᓴᓂ ᓄᓇᓕᖕᓂ

ᐊᕐᕌᒎᓕᕐᑐᑦ ᑎᓴᒪᑦ ᑕᐃᒪᙵᑦ ᓄᓇᕗᑦ ᒐᕙᒪᖓᑦ ᐱᒋᐊᖅᑎᑦᑎᓚᐅᕐᓯᒪᖕᒪᑕ ᓄᓇᕗᑦ 3000-ᒥ, ᑭᓯᐊᓂᓕ ᐃᒡᓗᒃᓴᐃᑦ ᓱᓕ ᐊᒥᒐᖅᐸᓪᓕᐊᖕᒪᑕ.

ᑲᖏᖅᖠᓂᖅ ᐃᒡᓗᑭᒃᓴᓛᖑᔪᑦ ᐅᑯᑎᒎᓇᕐᓕ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ 2024-25 ᐊᕐᕌᒍᒧᑦ ᐅᓂᒃᑳᖏᑦ, ᓴᖅᑭᑕᐅᓚᐅᕐᑐᑦ ᓄᓇᕗᒥᑦ ᑲᑎᒪᔨᕐᔪᐊᓄᑦ ᔫᓂ 8-ᖑᑎᓪᓗᒍ. ᑖᒃᑯᐊ ᓄᓇᓖᑦ ᐊᒥᒐᕐᓯᓛᖑᔪᑦ 28-ᓂ ᓄᓇᓕᖕᓂ ᐃᒡᓗᑖᕆᐊᖃᕐᓯᒪᔪᓂᒃ ᐊᕐᕌᓂᐅᓚᐅᕐᑐᒥ, ᐅᓂᒃᑳᑦ ᐅᖃᕐᓯᒪᖕᒥᔪᑦ.

ᑲᖏᖅᖠᓂᖅᒥ ᐃᒡᓗᐃᑦ ᐅᓄᕐᓯᕚᓪᓕᕆᐊᖃᕐᑐᑦ ᒪᕐᕈᐃᕐᓗᑎᒃ ᓄᓇᖃᖅᑐᑦ ᑕᒪᐃᓐᓂ ᐃᒡᓗᖃᕈᓐᓇᕐᓯᖁᓪᓗᒋᑦ ᐅᑕᕿᑎᑕᐅᔪᑦ ᐃᒡᓗᒃᓴᓂᒃ, ᐅᓂᒃᑳᑦ ᐅᖃᕐᓯᒪᔪᑦ.

ᑖᒃᑯᐊ ᓄᓇᓖᑦ ᑭᖑᓂᑦᑎᐊᖓᓃᖢᓂ ᑭᙵᐃᑦ, ᑖᒃᑯᐊᓕ ᐊᕐᕌᓂ ᐅᓄᓛᖑᓚᐅᕐᑐᑦ ᐃᒡᓗᑖᕆᐊᖃᕐᑐᑦ. ᑕᐃᑲᓂᓕ ᓄᓇᓕᖕᓂ ᐃᒡᓗᒃᓴᐃᑦ ᐅᓄᕐᓯᕚᓪᓕᕆᐊᖃᖅᑐᑦ 87 ᐳᓴᓐᑎᒥ.

ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᓇᓗᓇᐃᕐᓯᓯᒪᔪᑦ 20 ᓄᓇᕗᒥᑦ ᓄᓇᓖᑦ “ᐊᒃᓱᕈᕐᓇᖅᑐᒦᓛᖑᔪᑦ” ᐃᓄᐃᑦ ᐃᒡᓗᒃᓴᖏᓐᓂ.

2022-ᒥ ᓄᓇᕗᒥᑦ ᒐᕙᒪᒃᑯᑦ ᐱᒋᐊᖅᑎᑦᑎᓚᐅᕐᓯᒪᖕᒪᑕ ᓄᓇᕗᑦ 3000-ᒥ. $2.6 ᐱᓕᐊᓐᑖᓚᒥ ᐊᑐᕐᓗᑎᒃ ᓴᓇᔪᒪᔪᑦ 3,000-ᓂ ᐃᒡᓗᒃᓴᓂ ᓄᓇᕗᒥᑦ 2030 ᑎᑭᑉᐸᓪᓕᐊᓂᖓᓂ.

ᑖᒃᑯᓇᙵᓪᓕ ᐅᓄᕐᓂᕆᔭᐅᔪᓂᒃ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᐊᒻᒪ ᐊᓐᓰᓰ ᐱᕙᓪᓕᐊᔪᓕᕆᔨᒃᑯᑦ (NCC Development Ltd.) ᓴᓇᔭᕆᐊᖃᕐᓯᒪᔪᑦ ᒫᓂ 1,400-ᓂ ᐃᒡᓗᒃᓴᓂ ᑖᒃᑯᐊᓗ ᐊᑭᖃᕋᔭᖅᖢᑎᒃ $1.2 ᐱᓕᐊᓐ ᒥᒃᓵᓂᑦ.

ᑕᐃᒪᙵᑦ 2022-ᒥ, 313 ᐃᒡᓗᒃᓴᐃᑦ ᐱᐊᓂᒃᑕᐅᓯᒪᓕᕐᑐᑦ. ᐊᒻᒪᓗ 352-ᓂ ᒫᓐᓇ ᓴᓇᕙᓪᓕᐊᓪᓗᑎᒃ ᐅᖃᕐᓯᒪᔪᑦ ᐱᕙᓪᓕᐊᓂᕐᒧᑦ ᐅᓂᒃᑳᓕᐊᑦ ᓴᖅᑭᑕᐅᓂᑯᑦ ᔪᓂ 15-ᒥ.

“ᐊᔾᔨᒌᙱᑦᑑᑎᐅᖕᒪᑕ ᐃᒡᓗᑖᕆᐊᖃᕐᓂᕐᒨᖓᓂᐅᔪᑦ, ᐃᓚᖃᖅᖢᓂ ᐅᓄᕐᓯᕙᓪᓕᐊᓂᕐᒧᑦ,” ᐅᖃᕐᑐᖅ ᐋᑕᒻ ᓚᐃᑦᓯᑑᓐ, ᐅᖃᖅᑎᒋᔭᐅᔪᖅ ᓄᓇᕗᒥᑦ ᐃᒡᓗᓕᕆᔨᕐᔪᐊᓄᑦ ᖃᕋᓴᐅᔭᒃᑯᑦ ᑎᑎᕋᓚᐅᕐᑐᖅ ᔫᓂ 18-ᖑᑎᓪᓗᒍ.

“ᓄᓇᕗᒥᑦ ᐃᓅᓱᒃᑐᑦ ᐃᓐᓇᕈᖅᐸᓪᓕᐊᑎᓪᓗᒋᑦ ᐅᓄᕐᓂᕐᓴᐃᑦ ᐃᓄᐃᑦ ᐃᒡᓗᑖᕈᓐᓇᕐᓯᓯᒪᖕᒪᑕ ᐅᑕᕿᑎᑕᐅᔪᑦ ᐃᒡᓗᒃᓴᓂᒃ.”

ᐅᑯᓇᙵᑦ 25-ᓂ ᓄᓇᓕᖕᓂ, ᐱᖓᓱᑦ ᐃᒡᓗᑭᒃᓴᐃᓐᓇᖃᑕᐅᖏᓐᓇᕐᒪᑕ ᑕᐃᒪᙱᓂ 2023-24-ᒥ: ᐃᒡᓗᓕᒑᕐᔪᑦ, ᐃᒃᐱᐊᕐᔪᒃ ᐊᒻᒪ ᑭᙵᐃᑦ.

ᐃᒡᓗᓕᕆᔨᕐᔪᐊᒃᑯᑦ ᐊᐅᓚᑦᑎᕙᒃᑐᑦ 6,135 ᐃᓄᐃᑦ ᐃᒡᓗᒃᓴᖏᓐᓂ. 60 ᐳᓴᓐᑎᐅᑉ ᐅᖓᑖᓂ ᓄᓇᕗᒥᐅᑦ ᐃᒡᓗᓕᕆᔨᒃᑯᑦ ᐃᒡᓗᖁᑎᖏᓐᓅᕆᐊᖃᕐᒪᑕ, ᐊᒻᒪᓗ 45-ᐳᓴᓐᑎᖏᑦ ᐃᓄᒋᐊᓗᐊᕐᓂᕋᖅᑕᐅᓯᒪᓪᓗᑎᒃ.

ᐃᒡᓗᒃᓴᒥ ᐅᑕᕿᔪᑦ 3,348-ᖑᖕᒪᑕ ᒫᔅᓯ 2025-ᖑᑎᓪᓗᒍ. ᑕᐃᒪᙵᓪᓕ ᒫᔅᓯ 31, 2026-ᒥ ᑖᒃᑯᐊ ᑎᑭᐅᑎᔪᑦ ᒪᐅᖓ 3,713 ᐅᖃᕐᑐᖅ ᓚᐃᑦᓯᑑᓐ.

ᐃᒡᓗᒃᓴᖃᙱᓐᓂᖅ ᓄᓇᕗᒥᑦ ᖁᐊᕐᓵᓇᖅᑐᒦᓐᓂᕋᖅᑕᐅᔪᖅ.

ᐊᐅᔭᐅᔪᕐᓕ ᐃᒡᓗᓕᕆᔨᕐᔪᐊᒃᑯᑦ ᐋᖅᑭᒃᓯᓂᐊᕈᒪᔪᑦ ᐅᓂᒃᑳᓂ ᑕᐃᔭᐃᓯᒪᔪᒥᑦ “ᐊᖏᓂᖅᐹᖅ ᑐᑭᒧᐊᖅᑕᐅᕙᓪᓕᐊᓗᓂ ᐃᒡᓗᓕᐅᕐᓂᖅ ᓄᓇᕗᒥᑦ” — 157 ᐃᒡᓗᒃᓴᐃᑦ ᐊᒻᒪ 10 ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑐᓄᑦ ᐃᒡᓗᒃᓴᐃ 16-ᓂ ᓄᓇᓕᖕᓂ ᓄᓇᕗᒥᑦ.

58 ᑖᒃᑯᓇᙵ ᐃᖃᓗᖕᓂ ᓴᓇᔭᐅᓂᐊᕐᑐᑦ, ᑭᖑᓂᐊᒍᑦ ᐸᓐᓂᕐᑑᒥ ᐊᒻᒪ ᑰᒑᕐᔪᒃᒥᑦ ᑖᒃᑯᐊᓕ ᐊᑐᓂ 14-ᓂ ᐃᒡᓗᓕᐅᕐᕕᐅᓂᐊᖅᖢᑎᒃ.