ᐳᕕᕐᓂᑐᖅ ᐱᕗᑦ ᐃᓕᓯᒪᐃᓐᓇᕐᓂᐊᖅᑐᒥ ᐱᓂᕐᓗᒃᓯᒪᔪᓂ ᖃᐅᔨᓴᐃᓂᐅᔪᒥ ᑲᑎᙵᓂᐅᔪᒥ

For English version, see Nunavik police to station permanent investigation team in Puvirnituq

ᓄᓇᕕᖕᒥ ᐸᓖᓯᒃᑯᑦ ᐱᔨᑦᑎᕋᕐᓂᕐᒥ ᐱᓕᕆᕙᓪᓕᐊᕗᑦ ᓴᖅᑭᑎᑦᑎᓂᕐᒥ ᓄᑖᖑᔪᒥ ᑲᑎᙵᓂᐅᔪᓂ ᖃᐅᔨᓴᖅᑎᐅᔪᓂ ᑕᓯᐅᔭᕐᔪᐊᑉ ᓯᒡᔭᖅᐸᓯᖓᓂ.

ᐸᓖᓯᒃᑯᑦ ᐊᖓᔪᖅᑳᖅ ᔮᓐ−ᐱᐊᕐ ᓚᕉᔅ ᐅᖃᐅᓯᒃᓴᓕᐅᓚᐅᖅᐳᖅ ᓯᑎᐱᕆ 10−ᒥ ᑕᐃᑲᓂ ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᐅᔪᓂ ᑲᑎᒪᔨᒃᑯᓐᓂ ᑲᑎᒪᓂᐅᔪᒥ ᑲᑎᙵᓂᐅᔪᑦ ᐃᓕᓯᒪᐃᓐᓇᕐᓂᐊᓕᕐᓂᖏᓐᓂ ᐳᕕᕐᓂᖅᑐᒥ.

ᐊᑐᓂ ᓄᓇᕕᖕᒥ ᓄᓇᓕᖓ ᒪᕐᕉᖕᓂ ᐸᓖᓯᖃᖅᐳᑦ ᐃᓂᖃᖅᑐᓂ ᖃᖓᓕᒫᑦᑎᐊᖅ, ᑭᓯᐊᓂ ᓯᕗᓂᐊᓂ ᐱᓂᕐᓗᒃᓯᒪᔪᓂ ᖃᐅᔨᓴᖅᑎᐅᔪᓂ ᐃᓂᖃᓚᐅᖅᐳᑦ ᑰᔾᔪᐊᕐᒥ.

ᓄᑖᖑᔪᑦ ᐳᕕᕐᓂᑐᒥ ᑲᑎᙵᓂᐅᔪᑦ ᐊᐅᓪᓛᕈᓐᓇᕐᓂᐊᖅᐳᑦ ᑕᑉᐸᐅᖓ ᐊᒻᒪ ᑕᐅᓄᖓ ᑕᓯᐅᔭᕐᔪᐊᑉ ᓯᒡᔭᖅᐸᓯᖓᓂ ᖃᖓᑕᙱᖔᕐᓗᑎᒃ ᑰᔾᔪᐊᕐᒥ ᐱᓂᕐᓗᒃᓯᒪᔪᓂ ᖃᐅᔨᓴᐃᓂᐅᔪᓄᑦ.

“ᓱᒃᑲᓂᖅᓴᒥ ᐊᑐᐃᓐᓇᖃᕐᓂᐊᖅᐳᑦ,” ᓚᕉᔅ ᐅᖃᓚᐅᖅᐳᖅ. “ᐱᔪᓐᓇᖅᓯᑎᑦᑎᓂᐊᖅᐳᖅ ᐊᒥᓱᐊᓗᖕᓂ.”

ᐅᖃᓚᐅᖅᐳᖅ ᓯᕗᓪᓕᖅᐸᐅᔪᒥ ᐱᓂᕐᓗᒃᓯᒪᔪᓂ ᖃᐅᔨᓴᖅᑎ ᑎᑭᑦᑐᒃᓴᐅᑕᐅᓚᐅᖅᐳᖅ ᐱᓇᓱᐊᕈᓯᐅᓚᐅᖅᑐᒥ, ᐊᒻᒪ ᐊᒥᐊᒃᑯᖏᑦ ᑲᑎᙵᓂᐅᔪᒥ ᑎᑭᑉᐸᓪᓕᐊᕋᔮᕐᓂᐊᖅᐳᑦ. ᑲᑎᙵᓂᐅᔫᑉ ᑎᑎᕋᕐᕕᖓ ᑎᑭᓚᐅᖅᐳᖅ ᑭᖑᓪᓕᖅᐹᒥ ᐅᒥᐊᕐᔪᐊᒃᑯᑦ.

ᐸᓖᓯᒃᑯᑦ ᑐᓂᓯᓚᐅᖅᐳᑦ ᐸᓖᓯᒃᑯᑦ ᐱᔨᑦᑎᕋᕐᓂᕐᒥ ᐱᕋᔭᖕᓂᕐᒧᑦ ᐊᒻᒪ ᐱᖁᑎᒋᔭᒥ ᐊᖅᓵᖅᓯᓂᕐᒥ ᑭᓪᓕᓯᓂᐊᕐᓂᖓ ᔭᓄᐊᕆᓯ ᔪᓚᐃ 31−ᒧᑦ ᑕᒪᑐᒪᓂ ᐊᕐᕌᒎᔪᒥ ᑕᐃᑲᓂ ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᐅᔪᓂ ᑲᑎᒪᓂᐅᔪᒥ.

ᐅᖃᐅᓯᐅᓪᓗᓂ ᑕᑯᒃᓴᐅᑎᑕᐅᓂᐅᔪᒥ, ᐸᓖᓯᒃᑯᑦ ᐱᖁᑎᒋᔭᒥ ᐊᖅᓵᖅᓯᓚᐅᖅᐳᑦ ᐅᓄᕐᓂᖅᓴᐅᔪᒥ $3 ᒥᓕᐊᓐᑐᓪᓗᐊᖅᑐᒥ ᓱᐴᖅᑐᒐᕐᓂ ᐋᖓᔮᕐᓇᖅᑐᓂ ᐊᕕᒃᑐᖅᓯᒪᓂᐅᔪᒥ. ᑕᐃᑲᓂᑦᑕᐃᓐᓇᖅ ᐱᓕᕆᓂᐅᔪᒥ ᐊᕐᕌᓂᒪ ᐱᖁᑎᒋᔭᐅᔪᒥ ᐊᖅᓵᖅᓯᓚᐅᖅᐳᑦ $750,000−ᑐᓪᓗᐊᖅᑐᓂ ᓱᐴᖅᑐᒐᕐᓂ ᐋᖓᔮᕐᓇᖅᑐᓂ.

ᐅᓇ ᐊᖏᓂᖃᖅᐳᖅ ᐅᓄᕐᓂᖅᓴᐅᔪᒥ 82,000 ᒍᕌᒻᓂᑦ ᓱᐴᖅᑐᒐᕐᓂ ᐋᖓᔮᕐᓇᖅᑐᓂ. ᐅᖓᑎᓪᓗᐊᖓᓂ 97 ᐳᓴᓐᑎᒥ ᐱᖁᑎᒋᔭᒥ ᐊᖅᓵᖅᓯᓂᕐᓂ ᐃᓚᖃᓚᐅᖅᐳᖅ marijuana, hashish ᐅᕝᕙᓘᓐᓃᑦ ᓂᕆᔭᒃᓴᐅᔪᓂ.

“ᐃᓂᑐᐊᖅ ᒪᓕᒐᒥ ᓱᕋᐃᙱᓪᓗᓂ ᓂᐅᕕᕈᓐᓇᕐᓂᖏᓐᓂ ᓱᐴᖅᑐᒐᕐᓂ ᐋᖓᔮᕐᓇᖅᑐᓂ ᑯᐸᐃᖕᒥ SQDC−ᑯᓐᓂᐅᕗᖅ,” ᐅᖃᓚᐅᖅᐳᖅ ᐊᖓᔪᖅᑳᑉ ᑐᖏᓕᐊ ᔮᓐ-ᕗᕌᓐᓱᐊ ᒧᐊᕆᓐ.

“ᐊᒥᓱᓂ ᐃᓄᖕᓂ ᓱᓕ ᐃᖅᑲᖅᑐᒐᒃᓴᙳᓲᖑᕗᑦ ᑎᑭᓴᐃᕙᖕᒪᑕ ᕚᓐᑰᕙᒥ ᐅᕝᕙᓘᓐᓃᑦ ᐊᓯᖏᓐᓂ ᐊᔾᔨᒌᙱᑦᑐᓂ ᐃᓂᐅᔪᓂᑦ.”

ᓚᕉᔅ ᐅᔾᔨᕆᓚᐅᖅᐳᖅ ᐃᓚᐅᖃᑕᐅᓕᖅᑎᓪᓗᒍ ᓄᓇᕕᖕᒥ ᐸᓖᓯᒃᑯᓐᓂ 2018−ᒥ, “ᐊᑕᐅᓯᕐᒥᓪᓘᓐᓃᑦ ᐱᖁᑎᒋᔭᒥ ᐊᖅᓵᖅᓯᓚᐅᙱᓚᒍᑦ, ᒫᓐᓇ ᐊᑕᐅᓯᕐᒥ ᐊᖅᓵᖅᓯᕗᒍᑦ ᐱᓇᓱᐊᕈᓯᑕᒫᒥ.”

“ᐊᒥᓱᐊᓗᖕᓂ ᓴᙱᔪᐊᓗᖕᓂ ᓱᐳᖅᑐᒐᕐᓂ ᐋᖓᔮᕐᓇᖅᑐᓂ ᑎᑭᑦᑐᖃᖃᑦᑕᖅᐳᖅ,” ᐅᖃᓚᐅᖅᐳᖅ. “ᐊᒃᓱᕈᕐᔪᐊᕐᓇᐃᓐᓇᐅᔭᖅᐳᖅ, ᑭᓯᐊᓂ ᐅᓇᑕᖅᐳᒍᑦ, ᖃᓄᐃᓕᐅᕈᓐᓇᕐᓂᓕᒫᑦᑎᓐᓂ ᐱᓕᕆᓂᐊᖅᐳᒍᑦ.”

ᑕᒪᐃᑎᒍᑦ, ᐱᕋᔭᖕᓂᖅ ᖁᕝᕙᕆᐊᖅᐳᖅ ᓄᓇᕕᖕᒥ ᑕᐅᑐᒃᖢᒍ 2023−ᒥ, ᐸᓖᓯᒃᑯᑦ ᑭᐅᓪᓗᑎᒃ 6,285−ᓄᑦ ᐱᕋᔭᒃᑐᓂ ᖃᓄᐃᓐᓂᐅᔪᓂ ᒫᓐᓇᒧᑦ ᑎᑭᖦᖢᒍ ᑕᒪᑐᒪᓂ ᐊᕐᕌᒎᔪᒥ.

ᑕᒪᐅᖓ ᑎᑭᖦᖢᒍ ᐊᕐᕌᓂᐅᓚᐅᖅᑐᒥ, 3,875−ᓂ ᐱᕋᔭᖕᓂᕐᒧᑦ ᖃᓄᐃᓐᓂᖃᓚᐅᖅᐳᖅ, ᐊᒻᒪ 2022−ᒥ 7,000 ᐅᖓᑖᓂ ᐱᕋᔭᖕᓂᕐᒧᑦ ᖃᓄᐃᓐᓂᖃᓚᐅᖅᐳᖅ ᑕᐃᑲᓂᑦᑕᐃᓐᓇᖅ ᐱᓕᕆᓂᐅᔪᒥ.

ᐸᓖᓯᒃᑯᑦ ᐅᓂᒃᑳᕆᓚᐅᖅᐳᑦ ᑕᒪᐃᑎᒍᑦ ᒥᒃᖠᒋᐊᕐᓂᖓᓂ ᐃᓄᐊᖅᓯᓂᕐᒥ ᐊᒻᒪ ᐃᓄᐊᖅᓯᓇᓱᐊᕐᓂᐅᔪᓂ ᑕᒪᑐᒪᓂ ᐊᕐᕌᒎᔪᒥ, ᑭᓯᐊᓂ ᐊᖏᒡᓕᒋᐊᕐᓂᐅᔪᓂ ᐋᓐᓂᖅᓯᕆᓂᐅᔪᓂ.