ᐳᕕᕐᓂᖅᑑᕐᒥᐅᑕᐅᔪᒥ ᐊᖑᒻᒥ ᑐᖁᓚᐅᖅᐳᖅ ᒪᓐᑐᕆᐆᓪᒥ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐋᓐᓂᐊᕕᖓᓂ

For English version, see Puvirnituq man dies after ‘manoeuvres’ at Montreal mental health institute

39-ᓂ-ᐅᑭᐅᓕᒃ ᐳᕕᕐᓂᖅᑑᕐᒥᐅᑕᐅᔪᒥ ᐊᖑᒻᒥ ᑐᖁᔪᖃᓚᐅᖅᑎᓪᓗᒍ ᒪᓐᑐᕆᐆᓪᒥ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᒡᓗᖁᑎᖓᓐᓂ ᐋᓐᓂᐊᕕᖕᒥ ᐃᖅᑲᓇᐃᔭᖅᑎᖏᑦ ᐱᓕᕆᓚᐅᖅᑎᓪᓗᒋᑦ ᐸᓖᓯᓂ ᑕᐃᔭᐅᔪᒥ “ᐊᐅᓚᑦᑎᓇᓱᐊᕐᓂᐅᔪᓂ” ᐅᓂᒃᓯᒪᔪᒧᑦ.

ᐊᖑᑦ ᐃᓅᔪᓐᓃᓚᐅᖅᑐᖅ ᐱᐊᕆ−ᓘᒃ ᓚᕉᔅ−ᖑᓚᐅᖅᐳᖅ, ᒪᓐᑐᕆᐆᓪᒥ ᐸᓖᓯᒃᑯᓐᓂ ᐅᖃᖅᑎᐅᔪᒥ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ. ᓄᓇᕕᖕᒥ ᐸᓖᓯᒃᑯᓐᓂ ᐱᔨᑦᑎᕋᖅᑏᑦ ᓇᓗᓇᐃᖅᓯᓕᓚᐅᖅᐳᑦ ᐳᕕᕐᓂᖅᑑᕐᒥᐅᑕᐅᓚᐅᕐᓂᖓᓂ.

ᐸᓖᓯᐅᔪᑦ ᐅᐸᒃᐳᑦ ᑕᒡᓕᔅ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓯᓚᑦᑐᖅᓴᕐᕕᒡᔪᐊᖅ ᐋᓐᓂᐊᕕᖓᓂ ᐅᒃᑐᐱᕆ 22−ᒥ 9:30 ᐅᓪᓛᒃᑯᐸᓗᖕᒥ.

“ᐸᓖᓯᒃᑯᑦ ᐅᐸᓚᐅᖅᐳᑦ, ᐊᒻᒪ ᐊᖑᒻᒥ ᒪᓂᕋᕐᒦᑦᑐᖃᓚᐅᖅᐳᖅ,” ᐅᖃᓚᐅᖅᐳᖅ ᒪᓐᑐᕆᐆᓪᒥ ᐸᓖᓯᒃᑯᓐᓂ ᐱᔨᑦᑎᕋᖅᑏᑦ ᐅᖃᖅᑎᐅᔪᖅ Const. ᔮᓐ−ᐱᐊᕆ ᐳᕋᐹᓐᑦ, ᐅᖃᓪᓚᒃᑐᒥ ᐅᐃᕖᑎᑐᑦ ᐊᐱᖅᓱᖅᑕᐅᓂᐅᔪᒥ.

ᐅᖃᓗᖕᓂᐅᔪᒥ, ᐅᖃᐅᓯᐅᓚᐅᖅᐳᖅ ᐸᓖᓯᒃᑯᓐᓄᑦ “ᐊᐅᓚᑦᑎᓇᓱᐊᕐᓂᐅᔪᓂ ᐱᓕᕆᐊᖑᓚᐅᕐᓂᖓᓂ ᐅᓂᒃᓯᒪᔪᒥ ᐋᓐᓂᐊᕕᖕᒥ,” ᐳᕋᐹᓐᑦ ᐅᖃᓚᐅᖅᐳᖅ ᐅᐃᕖᑎᑐᑦ.

“ᐃᓅᓕᓴᖅᑕᐅᓂᐅᔪᓂ ᐱᓕᕆᐊᖑᓚᐅᖅᐳᑦ ᐃᓅᔪᓐᓃᖅᑐᒥ, ᑭᓯᐊᓂ ᐊᐃᑦᑖᖑᒐᓗᐊᖅ, ᑐᖁᓂᖓ ᓇᓗᓇᐃᖅᑕᐅᓚᐅᖅᐳᖅ ᐃᓂᒋᔭᖓᓂ.”

“ᖃᐅᔨᓴᖅᑕᐅᓂᐅᔪᒥ ᒪᑐᐃᖅᑕᐅᔪᖃᖅᐳᖅ [ᒪᓐᑐᕆᐆᓪᒥ ᐸᓖᓯᒃᑯᓐᓂ ᐱᔨᑦᑎᕋᖅᑎᓂᑦ]. ᑎᑎᖅᑲᖁᑕᐅᔪᑦ ᐱᔭᐅᓚᐅᖅᐳᖅ ᐊᖏᔪᒥ ᐱᕋᔭᖕᓂᐅᔪᓂ ᐱᓕᕆᕝᕕᐅᔪᒥ,” ᐃᓚᒋᐊᖅᓯᓚᐅᖅᐳᖅ. “ᑐᖁᖓᔪᓕᕆᔨᒃᑯᓐᓂ ᑎᑎᕋᕐᕕᖓ ᐃᓚᐅᖃᑕᐅᕗᖅ ᐅᕙᓂ ᖃᐅᔨᓴᖅᑕᐅᓂᐅᔪᒥ.

“ᖃᐅᔨᓴᖅᑎᐅᔪᓂ, ᒫᓐᓇᐅᔪᒥ, ᖃᐅᔨᓇᓱᐊᕐᓂᐊᖅᐳᑦ ᖁᙱᐊᖅᑐᕕᓂᕐᓂ ᖃᐅᔨᓇᓱᖕᓂᕐᒥ ᐱᔾᔪᑕᐅᔪᒥ ᑐᖁᓂᐅᔪᒥ ᐊᖑᒻᒥ,” ᐳᕋᐹᓐᑦ ᐅᖃᓚᐅᖅᐳᖅ.

ᒪᓐᑐᕆᐆᓪᒥ ᐱᓇᖕᓇᒥ ᑲᑎᙵᓂᐅᔪᒥ ᓯᓚᑦᑐᖅᓴᕐᕕᒡᔪᐊᕐᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᒻᒪ ᐃᓄᓕᕆᔨᒃᑯᓐᓂ ᐱᓕᕆᕝᕕᖓ ᑯᐸᐃᒃ ᒥᓂᔅᑕᖃᕐᕕᐅᕗᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᕕᒃᑐᖅᓯᒪᒃᑲᓐᓂᖅᑐᒥ ᑲᒪᒋᔭᖃᖅᑐᒥ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐋᓐᓂᐊᕕᖓᓂ.

ᐅᖃᖅᑎᖓ ᕼᐊᓚᓐ ᐳᔾᔪᕌᓐ−ᒐᒫᔅ ᐅᖃᓚᐅᖅᐳᖅ ᐅᐃᕖᑎᑐᑦ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ “ᐊᑐᐃᓐᓇᖃᖅᑎᑦᑎᔪᒪᕗᒍᑦ ᐃᒃᐱᒍᓱᖕᓂᑦᑎᓐᓂ ᕿᒃᓵᕐᓇᖅᑐᒃᑰᖅᑎᓪᓗᒋᑦ ᐃᓚᖏᓐᓄᑦ ᐊᒻᒪ ᖃᓂᒋᔭᖏᓐᓄᑦ ᐃᓄᖕᒥ ᐃᓅᔪᓐᓃᓚᐅᖅᑐᒧᑦ.”

“ᐃᖅᑲᓇᐃᔭᖅᑎᒧᑦ ᐃᑲᔪᖅᓱᐃᓂᐅᔪᒥ ᐱᓕᕆᐊᖑᔪᖅ ᐱᒋᐊᖅᑕᐅᓚᐅᖅᐳᖅ ᐅᒃᑐᐱᕆ 22−ᒥ ᐃᓂᒋᔭᐅᔪᒥ ᑲᑎᙵᓂᐅᔪᓄᑦ ᐃᓚᐅᖃᑕᐅᔪᓄᑦ,” ᐃᓚᒋᐊᖅᓯᓚᐅᖅᐳᖅ. “ᐃᑲᔪᖅᓱᐃᓂᐅᔪᒥ ᐊᑐᐃᓐᓇᐅᑎᑕᐅᕗᑦ ᐃᓄᒃᓯᒪᔪᓄᑦ.”

“ᓇᐅᑦᑎᖅᓱᑦᑎᐊᕐᓂᐊᖅᐳᒍᑦ ᒪᓕᒃᑐᓄᑦ ᖃᔅᓯᐊᕐᔪᖕᓂ ᐅᓪᓗᓂ ᐊᑐᐃᓐᓇᖃᖅᑎᑦᑎᔪᓐᓇᕐᓂᐊᕋᑦᑕ ᐃᑲᔪᖅᓱᐃᓂᐅᔪᒥ ᐱᔭᕆᐊᖃᑐᐃᓐᓇᕆᐊᖃᖅᑕᒥᓂ.”

ᐳᔾᔪᕌᓐ−ᒐᒫᔅ ᓇᓗᓇᐃᖅᓯᓚᐅᖅᐳᖅ ᑲᑐᔾᔨᖃᑎᒌᖑᔪᖅ ᐱᓕᕆᖃᓯᐅᑎᓂᖏᓐᓂ ᐃᓗᐊᒍᑦ ᖃᐅᔨᓴᖅᑕᐅᓂᐅᔪᒥ “ᖃᐅᒻᒪᒃᑎᑦᑎᒋᐊᕐᓂᕐᒧᑦ ᖃᓄᐃᓐᓂᐅᔪᓂ.”