ᐊᕐᓇᖅ ᐃᓅᔪᓐᓃᖅᑐᖅ ᐋᓐᓂᖅᓱᖅᑕᐅᔾᔪᑎᒋᓚᐅᖅᑕᖏᓐᓄᑦ ᐅᒃᑑᐱᕆᐅᓚᐅᕐᑐᒥ

For the English version of this story, please see Puvirnituq woman dies from injuries suffered in October assault.

ᐳᕕᕐᓂᑐᒥᑦ ᐊᕐᓇᖅ ᐃᓅᔪᓐᓃᓚᐅᕐᑐᖅ ᐋᓐᓂᖅᓱᖅᑕᐅᔾᔪᑎᖏᓐᓄᑦ ᑕᖅᑭᐅᓚᐅᕐᑐᒥ. ᑯᐸᐃᒃᒧᑦ ᐸᓖᓯᒃᑯᑦ ᖃᐅᔨᓇᓱᖔᓕᕐᑐᖅ ᐊᒻᒪᓗ 18-ᓂ ᐊᕐᕌᒍᓕ ᐊᖑᑎ ᑎᒍᔭᐅᓯᒪᓪᓗᓂ ᐋᓐᓂᖅᓱᖅᑕᐅᔪᒧᑦ ᐊᒃᑐᐊᓂᖃᕐᓂᖓᓄᑦ.

ᐅᒃᑑᐱᕆ 23-ᒥ 10:45 ᒥᑭᒃᓵᓂ ᐅᓐᓄᒃᑯᑦ, ᓄᓇᕕᒃᒥ ᐸᓖᓯᓕᕆᔨᒃᑯᑦ ᐅᐸᓚᐅᕐᓯᒪᔪᑦ ᐅᖃᐅᔾᔭᐅᑎᓪᓗᒋᑦ ᐊᕐᓇᕐᒥ ᐋᓐᓂᖅᓱᖅᑕᐅᔪᒥᒃ, ᐅᖃᕐᑐᖅ ᑯᐸᐃᒃᒧᑦ ᐸᓖᓯᓄᑦ (Sûreté du Québec) ᐅᖃᕐᑎᒋᔭᐅᔪᖅ ᓵᔾᔭᓐᑦ ᓈᓐᓯ ᕗᓂᐄ.

ᑖᓐᓇ ᐊᕐᓇᖅ, 60-ᖏᓐᓂ ᐊᕐᕌᒍᓕᒃ, ᓇᓂᔭᐅᓚᐅᕐᓯᒪᖕᒪᑦ ᖃᐅᔨᒪᙱᑦᑐᖅ ᐊᒻᒪ ᐋᓐᓂᖅᓱᖅᑕᐅᓯᒪᓪᓗᓂ. ᐋᓐᓂᐊᕕᒃᒧᙵᐅᔾᔭᐅᓚᐅᕐᓯᒪᔪᖅ ᑕᐃᑲᙵᓪᓗ ᒪᓐᑐᕆᐊᒧᑦ ᐊᐅᓪᓚᖅᑎᑕᐅᓪᓗᓂ ᑐᐊᕕᕐᓇᖅᑐᒃᑯᑦ ᑲᒪᒋᔭᐅᓂᐊᕐᒪᑦ.

ᐸᓴᒋᔭᐅᔪᖅ, 18-ᓂ ᐊᕐᕌᒍᓕᒃ ᐋᓕᒃᔅ ᐊᒥᑦᑐᖅ, ᑎᒍᔭᐅᓚᐅᕐᓯᒪᔪᖅ ᑕᐃᑲᓂ ᐊᒻᒪᓗ ᐸᓯᔭᒃᓴᙳᖅᑎᑕᐅᓪᓗᓂ ᐋᓐᓂᕐᓱᐃᕆᓂᖓᓄᑦ. ᒫᓐᓇ ᓱᓕ ᑎᒍᔭᐅᓯᒪᔪᖅ, ᕗᓂᐄ ᐅᖃᓚᐅᕐᑐᖅ.

ᐊᕐᓇᖅ ᐃᓅᔪᓐᓃᖅᑎᓪᓗᒍ ᐋᓐᓂᖅᓱᖅᑕᐅᔾᔪᑎᖏᓐᓄᑦ ᓄᕕᐱᕆ 8-ᒥ, ᖃᐅᔨᓇᓱᖔᓕᓚᐅᕐᑐᑦ ᑯᐸᐃᒃᒧᑦ ᐸᓖᓯᒃᑯᑦ.

ᐊᓯᖏᓐᓂ ᐸᓯᔭᒃᓴᐅᔾᔪᑎᖃᓚᐅᙱᑦᑐᖅ ᐊᒥᑦᑐᖅ ᓲᖃᐃᒻᒪ ᖃᐅᔨᓴᖅᐸᓪᓕᐊᖕᒪᑕ, ᕗᓂᐄ ᐅᖃᕐᑐᖅ.

ᖃᐅᔨᒪᓚᐅᙱᑦᑐᑦ ᖃᑯᒍ ᐃᖅᑲᖅᑐᐃᕕᒃᒥᒃ ᑲᒪᒋᔭᐅᓂᐊᕆᐊᒃᓴᖓᓂ

ᐅᑯᑎᒎᓇᕐᓕ ᑯᐸᒃᒥ ᑐᑭᒧᐊᖅᑎᑦᑎᔨ ᐱᕋᔭᒃᓯᒪᓂᕐᒧᑦ ᐊᒻᒪ ᐊᑐᖁᔭᐅᔪᓂᒃ ᓱᕋᐃᓯᒪᔪᓕᕆᓂᕐᒧᑦ, ᐊᓯᐊᒎᖓᔪᓂᒃ ᐊᒥᑦᑐᖅ ᐸᓯᔭᒃᓴᙳᖅᑎᑕᐅᓚᐅᕐᓯᒪᖕᒪᑦ ᖁᓄᔪᕐᓂᐊᕐᓂᖅᒧᑦ ᔪᓚᐃ 23-ᖑᑎᓪᓗᒍ ᐊᒻᒪ ᐋᓐᓂᖅᓱᐃᕆᓂᕐᒧᑦ ᓱᒋᐅᑎᖃᖅᖢᓂ ᔪᓚᐃᑦ 30-ᒥ.

ᐅᐃᕖᑐᑦ ᐊᐱᖅᓱᖅᑕᐅᓪᓗᓂ, ᓄᓇᕕᒃᒥ ᐸᓖᓯᓕᕆᔨᒃᑯᑦ ᑳᑉᑕᓐ ᐸᑐᕇᔅ ᐄᐳᓪ ᐅᖃᓚᐅᕐᑐᖅ ᐊᒥᑦᑐᖅ ᑎᒍᔭᐅᓯᒪᔪᓐᓃᓚᐅᕐᓯᒪᔪᖅ ᑖᒃᑯᓄᖓ ᐸᓯᔭᒃᓴᐅᔾᔪᑎᓄᑦ ᓯᕗᓂᐊᓂ ᐅᒃᑑᐱᕆ 23-ᒥ ᐋᓐᓂᖅᓱᐃᓂᐊᖅᑎᓪᓗᒍ ᐳᕕᕐᓂᑐᖅᒥᐅᑕᕐᒥ ᐊᕐᓇᒥ.

“ᐅᓇ ᐅᖃᐅᓯᖅ, ᐅᕙᓐᓄᓪᓕ, ᖃᓄᐃᓕᐅᕈᑎᐅᓯᒪᖕᒪᑦ ᐊᑐᖅᑕᐅᙱᑦᑐᓐᓇᓚᐅᕐᑐᓂᒃ,” ᐄᐳᓪ ᐅᖃᕐᑐᖅ.

“ᒪᓕᒐᓕᕆᓂᖅ ᓄᓇᕕᒃᒥ ᓱᒃᑲᐃᓐᓂᕐᓴᐅᖅᑰᔨᖕᒪᑦ ᖃᓪᓗᓈᓂᓪᓕ, ᐊᔪᕐᓯᐅᖃᓕᕋᑦᑕ ᐃᓂᖃᕈᓐᓇᙱᓐᓂᕐᒧᑦ ᓈᒻᒪᙱᓕᐅᕈᑎᓄᒃ.”

ᐄᐳᓪ ᐅᖃᒃᑲᓐᓂᖅᖢᓂ: “ᐃᓱᒪᒋᔭᒃᑯᓪᓕ, ᐊᓂᑎᑦᑎᑲᐅᖅᑐᓗᐊᖃᑦᑕᕋᑦᑕ ᐱᕋᔭᖕᓂᒃᑯᑦ ᖃᓄᐃᓕᐅᕈᓘᔭᕐᓂᑯᓂᒃ,” ᐅᖃᐅᓯᖃᖅᖢᓂ ᐃᖅᑲᖅᑐᐃᕕᒃᒥ, ᑐᑭᒧᐊᖅᑎᑦᑎᔨ ᐱᕋᔭᒃᓯᒪᓂᕐᒧᑦ ᐊᒻᒪ ᐊᑐᖁᔭᐅᔪᓂᒃ ᓱᕋᐃᓯᒪᔪᓕᕆᓂᕐᒧᑦ ᓈᒻᒪᒃᓴᓚᐅᕐᓯᒪᙱᑦᑐᖅ ᐊᒥᑦᑐᖅ ᐊᓂᑎᑕᐅᓂᖓᓂ ᔪᓚᐃᒥ ᐸᓯᔭᒃᓴᐅᔾᔪᑎᒋᓚᐅᖅᑕᖏᓐᓄᑦ.

ᑭᓇᒥ ᐱᒃᑲᖅᑎᑦᑎᙱᖢᓂ ᐄᐳᓪ ᐅᖃᐅᓯᖃᓚᐅᕐᑐᖅ ᐊᔾᔨᒌᙱᑦᑐᓂᒃ ᖃᓄᐃᓕᐅᕈᓯᕐᓂ ᒪᓕᒐᓕᕆᓂᕐᒥ ᓄᓇᕕᒃᒨᖓᔪᓂᒃ — ᐃᓂᖃᙱᓗᐊᕐᓂᖓᓂᒃ ᑎᒍᔭᐅᓯᒪᔪᓄᑦ, ᐊᒻᒪᓗ ᐊᑭᑐᓪᓗᓂ ᑎᒍᔭᐅᓯᒪᔪᓂᒃ ᑎᒍᔭᐅᕝᕕᒃᒧᙵᖅᑎᑦᑎᔭᕆᐊᒃᓴᖅ.

“ᐊᕐᕌᒍᒐᓴᑦ ᐊᓂᒍᕐᓯᒪᓕᕐᑐᑦ ᐊᐱᕆᕙᒃᖢᑕ ᑯᐸᐃᒃᒥ ᑭᒃᑯᓕᒫᓂ ᓴᐳᔾᔨᓯᒪᓂᕐᒧᑦ ᒥᓂᔅᑕᓕᕆᔨᒃᑯᑦ ᑎᒍᔭᐅᓯᒪᕝᕕᖕᓄᑦ ᐱᑕᖃᕆᐊᖃᕐᓂᖓᓂᒃ ᓄᓇᕕᒃᒥᐅᑕᓕᒫᓄᑦ ᑎᒍᔭᐅᓯᒪᕝᕕᒃᒥ,” ᐅᖃᕐᑐᖅ, ᐅᖃᒃᑲᓐᓂᖅᖢᓂ ᐊᐅᓪᓚᖅᑎᑦᑎᓇᓱᒃᖢᓂ ᑎᒍᔭᐅᓯᒪᔪᓂᒃ “ᐅᐊᑲᓪᓚᓗᐊᕌᓘᒻᒪᑦ.”

ᐄᐳᓪ ᐅᖃᓚᐅᕐᑐᖅ ᓄᓇᕕᒃᒥ ᑎᒍᔭᐅᓯᒪᔪᓕᕆᓂᖅ ᐱᓕᕆᐊᒃᓴᖃᓗᐊᕐᒪᑕ ᓇᐅᒃᑯᓕᒫᖅ.

“ᑕᒪᓐᓇᓘᓐᓃᑦ ᐅᖓᑖᓅᖓᔪᖅ; ᓈᒻᒪᙱᓕᐅᕈᑎ ᐅᕙᖓᐅᙱᑦᑐᖅ ᐅᖃᐅᓯᕆᔪᒪᓕᕋᒃᑯ, ᑕᒪᓐᓇ ᐅᑭᐅᕐᑕᖅᑐᕐᒥ ᓈᒻᒪᙱᓕᐅᕈᑎᐅᒻᒪᑦ ᐊᑯᓂᐊᓗᒃ,” ᐅᖃᕐᑐᖅ.

“ᓇᓂᓯᔪᓐᓇᖅᐱᑕ ᐋᖅᑭᒍᑎᐅᔪᓐᓇᖅᑐᓃ, ᑕᒪᑐᒧᖓ ᐱᓕᕆᓂᖃᕈᒪᓂᖃᖅᐱᑕ ᐋᖅᑭᒍᑎᒃᓴᓂ ᖃᐅᔨᓇᓱᒡᓗᑕ? ᐊᐃᑦᑖᖑᒐᓗᐊᖅ, ᒫᓐᓇᐅᓕᕐᑐᕐᓕ ᐅᕙᑦᑎᓐᓄ ᐅᖃᑐᐃᓐᓇᖃᑦᑕᓕᕋᑦᑕ ᐃᓄᒐᙳᐊᑦᑎᒍᑦ ᐊᑐᕐᓗᑕ ᑕᒪᓐᓇ ᐊᑐᖅᑕᐅᙱᓐᓂᕐᓴᐅᔪᓐᓇᖁᓪᓗᒍ.”