ᐃᖃᓗᖕᓂ ᐊᕐᓇᖅ ᐱᑐᐃᓐᓇᕆᐊᖃᓕᕐᑐᖅ ᓄᓇᓯᐅᑎᓂ ᓱᕋᒃᓯᒪᔪᓂ ᐱᓕᕆᐊᖃᕐᓂᕐᒥᒃ

For English version, see Iqaluit woman ready to put her mechanical skills to work

ᐅᓄᕐᓂᕐᓴᓄᑦ ᐃᖃᓗᖕᓂ, ᑕᒪᑐᒪᓂ ᐊᕐᕌᒍᒥ ᒫᔅᓯᒥ ᐱᕐᓯᑲᑕᖕᓂᖓ ᐃᒡᓘ ᐃᓗᐊᓃᑦᑕᕆᐊᖃᕐᓇᓚᐅᕐᑐᖅ.

ᑭᓯᐊᓂᓕ ᒫᑕᓕᓐ ᒧᐊ ᐋᓐᓄᕌᑦᑎᐊᑲᑕᖕᓇᓚᐅᕐᑐᖅ ᓯᓚᒧᐊᕐᓂᐊᓵᒃᓂᐊᓂ ᓂᒡᓚᓱᒃᑐᒧᑦ.

ᐅᖄᓚᕝᕕᐅᔭᕌᖓᑦ ᑭᓇᑐᐃᓐᓇᕐᒥ ᐅᖃᕐᑐᓂ ᓄᓇᓯᐅᑎᖏᑦ ᐃᖏᕐᕋᔪᓐᓇᙱᓐᓂᖏᓐᓂ ᓲᖃᐃᒻᒪ ᐹᑕᓖᖏᑦ ᓴᙱᒃᑎᓴᕆᐊᖃᕐᓂᖏᓐᓄᑦ, ᒧᐊ ᓯᓚᐹᖅᖢᓂ ᐹᑕᓖᒧᑦ ᓴᙱᒃᑎᑕᐅᑎᖓ ᐸᕐᓇᖃᑦᑕᖅᑕᖓ ᐊᖅᑯᑎᒧᑦ.

“ᐅᓇ ᖃᓄᐃᕈᓘᔭᕐᓇᖅᑐᖅ,” ᐅᖃᕐᑐᖅ.

ᓯᓚᐅᑉ ᓂᒡᓚᓱᖕᓂᖓ -50 ᓯᐊᓯᐊᔅᒦᑎᓪᓗᒍ ᐊᓄᕆᒧᓪᓗ ᓂᒡᓚᓱᖕᓂᕐᓴᐅᖂᔨᓪᓗᓂ ᐊᒻᒪ ᑕᑯᒃᓴᐅᑦᑎᐊᑲᑕᖕᓇᙱᖢᓂ, ᐅᓇ ᒧᐊ ᐃᖏᕐᕋᖃᑦᑕᖅᑐᖅ 10 ᑭᓛᒥᑕᓂ ᐃᑲᕐᕋᒧᑦ ᐅᓗᕆᐊᓇᙱᑦᑐᒦᓐᓇᓱᖕᓂᕐᒧᑦ. ᐊᒻᒪᓗ ᓂᐅᖏ ᕿᐅᓪᓚᕆᒃᖢᑎᒃ ᐊᒡᒐᐃᔭᖅᖢᓂᓗ, ᐱᓕᕆᐊᖃᖃᑦᑕᖅᑐᖅ 10 ᒥᓂᑦᔅᓂ ᐹᑕᓖᕆᔭᐅᔪᓂ ᐆᒻᒪᖅᑎᑦᑎᓇᓱᒃᖢᓂ.

“ᖁᔭᓕᑦᑎᐊᓚᐅᕐᑐᖅ ᐊᖑᑎ,” ᐅᖃᕐᑐᖅ ᐅᖄᓚᔪᒥ ᐃᑲᔪᖅᑕᐅᔪᒪᔪᒥᑦ. “ᐅᓇ ᐅᖄᓚᔾᔪᑎᖓ ᐃᒪᓐᓇᐅᓇᕐᒪᑕ ‘ᐊᐃᑦᑖ, ᐅᓇ ᓈᒻᒪᙱᑦᑐᐊᓗᒃ.’”

“ᑭᓯᐊᓂᓕ ᑕᐃᒪᓐᓇ ᐅᖄᓚᔪᑦ ᐃᑲᔪᕈᒥᓇᖃᑦᑕᕐᒪᑕ ᐱᕐᓯᕋᓗᐊᖅᑎᓪᓗᒍ, ᓲᖃᐃᒻᒪ ᐃᓄᐃᑦ ᓇᒧᙵᐅᑲᑕᒋᐊᖃᕐᒪᑕ.”

ᑕᐃᒪᙵᑦ ᕕᕝᕗᐊᕆᐅᓚᐅᕐᑐᒥ, ᒧᐊ ᐹᑕᓖᓂ ᒫᓂ 60-ᖏᓐᓂ ᐊᔪᕈᓐᓃᖅᑎᑦᑎᓯᒪᔪᖅ — ᐹᑕᓖᖏᓐᓂ ᐱᒋᐊᖅᑎᑦᑎᓇᓱᒃᐸᒃᖢᓂ ᓴᙲᓗᐊᓕᕐᓯᒪᔪᓂ — ᐊᒻᒪᓗ ᐅᓪᓗᖅ ᐊᓂᒍᕌᖓᑦ ᕙᐃᔅᐳᒃᑯᑦ ᑎᑎᕋᖅᐸᒃᖢᓂ ᖃᐅᔨᒪᑎᑦᑎᓇᓱᒃᖢᓂ ᐃᓄᐃᑦ ᐃᑲᔪᖅᑕᐅᔭᕆᐊᖃᕐᐸᑕ ᐃᑲᔪᕈᓐᓇᕐᓂᖓᓂ.

“ᓄᓇᓯᐅᑎᓄ ᐹᑕᓖᓂ ᐆᒻᒪᖅᑯᑎᖃᕋᒪ ᐊᒻᒪᓗ ᒑᓴᓖᒥ ᐊᑐᓗᐊᕆᐊᖃᕐᓇᙱᖢᓂ ᓄᓇᓯᐅᑎᒋᔭᐅᔪᒥ ᐱᓕᕆᐊᖃᕆᐊᒃᓴᖅ.”

ᐅᑭᐅᖅ ᐃᓱᓕᓕᕐᑎᓪᓗᒍ ᒧᐊ ᐃᓱᒪᔪᖅ ᓄᓇᓯᐅᑎᓂ ᐱᓕᕆᐊᖃᖅᖢᓂ ᖁᕕᐊᒋᓂᖓ ᐱᓕᕆᐊᕆᓪᓚᕆᓕᕈᒪᓪᓗᓂᐅᒃ.

ᐃᓱᒪᔪᖅ ᐱᒋᐊᖅᑎᑦᑎᓂᐊᕈᒪᓪᓚᕆᒃᖢᓂ ᐅᑭᐅᕐᑕᖅᑐᕐᒥ ᓄᓇᓯᐅᑎᓄᑦ ᓱᕋᒃᓯᒪᔪᓕᕆᓂᐅᕐᓂᕐᒧᑦ (Arctic Driveway Doctor Moore’s Mobile Vehicle Service) ᒪᐃ 1-ᖑᓕᕐᐸᑦ, ᐱᓕᕆᐊᖃᕐᓂᕐᒧᑦ ᓚᐃᓴᓐᓯᖓ ᐊᖏᖅᑕᐅᓚᐅᖅᑎᓪᓗᒍ ᐃᖃᓗᐃᑦ ᓄᓇᓕᐸᐅᔭᓄᑦ ᑲᑎᒪᔨᓄᑦ.

ᓚᐃᓴᓐᓯᖃᙱᖢᓂ ᓄᓇᓯᐅᑎᓂ ᓱᕋᒃᓯᒪᔪᓕᕆᔨᐅᓂᕐᒧᑦ, ᑲᒻᐸᓂᖓ ᐱᓕᕆᐊᖃᖃᑦᑕᕋᔭᖅᑐᑦ ᓱᕋᒃᓯᒪᔪᓂᒃ ᐱᔨᑦᑎᕋᖅᑕᐅᔪᒪᔫᑉ ᓄᓇᓯᐅᑎᖃᕐᕕᐊᓂ, ᓲᕐᓗ ᐅᑯᓂᖓ ᐅᕐᓱᖏᑦ ᐊᓯᔾᔨᖅᐸᒡᓗᒋᑦ, ᓄᖃᕈᓐᓇᐅᑎᖏᓐᓂᒃ ᐊᒻᒪᓗ ᖃᐅᒻᒪᖅᑯᑎᖏᓐᓂ, ᐃᒐᓛᓄᓪᓗ ᐊᐳᑕᐃᔭᐅᔾᔪᑎᖏᓐᓂ ᐊᒻᒪ ᓱᕈᔾᔭᐃᒃᑯᑎᒋᔭᐅᔪᓂᒃ.

“ᐃᓱᒫᓗᒋᐊᖃᙱᑦᑐᓯ ᐅᐸᒍᑎᒋᐊᖃᕆᐊᒃᓴᔅᓯᓐᓂ ᐊᒻᒪ ᓄᓇᓯᐅᑎᔅᓯᓐᓂ ᐅᑕᖅᑭᓗᓯ ᐃᑲᕐᕋᓂ 6-ᓂ,” ᐅᖃᕐᑐᖅ. “ᐱᓕᕆᐊᖃᖃᑦᑕᕋᔭᖅᑐᖓ ᐅᐸᒍᑎᑦᑎᐊᒻᒪᕆᒡᓗᖓ ᓄᓇᓯᐅᑎᔅᓯᓐᓄ ᐃᒡᓗᓯ ᖃᓂᒋᔮᓃᑦᑐᓂᒃ — ᐅᑕᕿᑐᐃᓐᓇᖅᐸᒡᓗᓯ 45 ᒥᓂᑦᔅᓂ ᐃᑲᕐᕋᒧᑦ ᐊᔪᕈᓐᓃᖅᑎᑦᑎᓇᓱᖕᓂᓐᓂ.”

ᒧᐊ ᐃᓱᒪᔪᖅ ᐊᐅᓚᐅᑎᓂ ᓱᕋᒃᓯᒪᔪᓕᕆᕙᒡᓗᓂ ᐱᓇᓱᐊᕈᓯᐅᑉ ᓄᙳᐊᓂ ᐊᒻᒪ ᐱᓇᓱᐊᕈᓯᕐᒥ 4:00 ᐊᓂᒍᕌᖓᑦ, ᑖᓐᓇᓗ ᐱᓕᕆᐊᕆᕙᒡᓗᓂᐅᒃ ᐃᓚᒋᔭᐅᓗᓂ ᓂᕿᓕᐅᖅᑎᐅᕙᖕᓂᖓᓂ ᐃᓅᓯᕐᕕᒃ ᐸᐱᕆᕝᕕᒃᒥᑦ.

ᐃᓱᒪᖕᒥᔪᖅ ᐱᔨᑦᑎᕋᐅᑎᖃᕈᒪᓪᓗᓂ ᐊᑭᑭᓐᓂᕐᓴᐅᓗᓂ ᐊᓯᖏᓐᓂ ᓄᓇᓯᐅᑎᓂ ᓱᕋᒃᓯᒪᔪᓕᕆᔨᓂᒃ ᓲᖃᐃᒻᒪ ᐊᑐᖅᑐᐊᕆᐊᖃᕐᓂᕐᒥᒃ ᐊᑐᕋᔭᙱᒻᒪᑦ ᐊᓯᖏᓐᓂᒡᓗ.

“ᐅᓇ ᐃᓚᒋᔭᐅᔪᖅ ᓈᒻᒪᙱᓕᐅᕈᑎᓂ ᐋᖅᑭᒃᓱᐃᕙᖕᓂᕐᒧᑦ,” ᐅᖃᕐᑐᖅ ᖁᕕᐊᒋᒐᒥᐅᒃ ᓱᕋᒃᓯᒪᔪᓂ ᓄᓇᓯᐅᑎᓂ ᓴᓇᔭᕆᐊᒃᓴᖅ.

ᒧᐊ ᐊᔪᕈᓃᕐᓯᒪᔪᖅ ᓄᓇᓯᐅᑎᖓᓂ ᓴᓇᕙᒃᖢᓂ ᐆᒥᖓ ᑐᐊᐃᔫᑕ ᑯᕉᓚᖓᓂ “ᐊᔪᕐᓴᕐᓂᕐᒧᑦ ᓯᓚᑦᑐᖅᓴᕐᕕᐊᓗᖕᒥᑦ ᐃᓕᓐᓂᐊᖅᑎᐅᓂᕐᒧᑦ” ᓅᕙ ᓯᑰᓯᐊᒥ.

ᑭᑎᐊᒥᓂ ᐊᕐᕌᒍᒐᓴᐅᓗᐊᙱᑦᑐᖅ, 300,000 ᑭᓛᒥᑕᓂ ᐃᖏᕐᕋᓯᒪᓪᓗᓂ ᓂᐅ ᐳᕋᓐᔅᕗᐃᒃᒥ ᐅᕗᖓ ᐳᕆᑎᔅ ᑲᓚᒻᐱᐊᒧᑦ ᐊᖅᑯᑎᒃᑯ ᑖᓐᓇ ᓄᓇᓯᐅᑎ ᓱᕋᑦᑎᐊᒻᒪᕆᓚᐅᕐᑐᖅ. ᒧᐊ ᐅᖃᓚᐅᕐᑐᖅ ᐊᑯᓂᕈᓗᒃ ᐃᖏᕐᕋᑲᑕᒍᓐᓇᓚᐅᕐᓂᖓᓂ ᓇᖕᒥᓂᖅ ᓴᓇᕙᒃᖢᓂᐅᒃ.

“ᓄᓇᓯᐅᑎᓂ ᑕᐅᑐᙱᓐᓇᒪ ᐊᐅᓚᐅᑎᑐᐃᓐᓇᖅᑎᑐᑦ,” ᐅᖃᕐᑐᖅ.

“ᓄᓇᓯᐅᑎᓯ ᑲᒪᒋᑦᑎᐊᕈᔅᓯᐅᑦ ᐃᓕᔅᓯᓐᓂ ᑲᒪᒋᔭᖃᕈᓐᓇᕐᒥᔪᑦ. ᑖᓐᓇᓗ ᐅᕙᓐᓄᑦ ᐱᒻᒪᕆᐊᓘᓪᓗᓂ — ᐃᓄᐃᑦ ᓄᓇᓯᐅᑎᖏᓐᓂ ᑲᒪᒋᔭᖃᕐᓂᖅ ᐊᔪᕐᓇᙱᓐᓂᕐᓴᐅᖁᒐᒃᑯ ᐊᒻᒪ ᐊᑭᓕᒐᕐᓂᖅᓴᐅᓗᑎᒃ.”