ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ (QEC) ᓄᑖᓂ ᔭᓄᕇᑕᓂ ᐱᔪᒪᔪᑦ ᓄᑕᐅᔪᓐᓃᓗᐊᕐᓂᖏᓐᓄᑦ ᐆᒻᒪᖅᑯᖃᕐᕕᖏᑦ ᑕᓪᓕᒪᓂ ᓄᓇᓕᖕᓂ
ᓄᓇᕗᒥᑦ ᐆᒻᒪᖅᑯᑎᓕᕆᔨᒃᑯᑦ ᐸᕐᓇᐅᑎᖓ ᐆᒧᖓ $32.4 ᒥᓕᐊᓐ ᑖᓚᑐᕋᔭᖅᑐᖅ ᔭᓄᕇᑕᑐᖃᐅᓕᕐᑐᓂᒃ ᐊᓯᔾᔩᕈᑎᒃᓴᓄᑦ ᒪᑯᓂᖓ ᐊᑭᓕᐅᑎᐅᕙᒃᑐᓂᒃ ᖁᕝᕙᖅᐹᓪᓕᕈᑕᐅᓇᔭᖅᖢᓂ
ᖁᓪᓕᒃᑯᑦ ᐆᒻᒪᖅᑯᑎᓕᕆᔨᖏᑦᑕ ᑎᒥᖁᑖ ᐊᐱᕆᔪᑦ ᓄᓇᕗᒥᑦ ᒐᕙᒪᒃᑯᓐᓂ ᐊᖏᖅᑕᐅᔪᓐᓇᕐᒪᖔᑕ ᓄᑕᐅᔪᓐᓃᖅᑐᓂ ᐆᒻᒪᖅᑯᑎᒋᔭᐅᔪᓂ ᑕᓪᓕᒪᓂ ᓄᓇᓕᖕᓂ. ᐅᕙᓂ ᐊᔾᔨᙳᐊᖁᑎᒋᔭᐅᔪᒥᒃ, ᔭᓄᕇᑕ ᖃᖓᑕᓲᒃᑯᑦ ᐸᖕᓂᖅᑑᓕᐊᕈᔾᔭᐅᔪᖅ 2015-ᖑᑎᓪᓗᒍ. (ᐊᔾᔨᙳᐊᖁᑎᒋᔭᐅᔪᖅ)
For English version, see QEC wants new generators to replace aging stock in 5 communities
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ (QEC) ᐊᖏᖅᑕᐅᔪᒪᔪᑦ ᓄᓇᕗᒥᑦ ᒐᕙᒪᒃᑯᓐᓂ ᐊᓯᔾᔨᖅᓯᔪᒪᓂᖏᑦ ᔭᓄᕇᑕᓂ ᑕᓪᓕᒪᓂᒃ ᕼᐋᒻᒪᓚᓂ ᐊᒻᒪᓗ ᐆᒻᒪᖅᑯᑎᓄᑦ ᐊᑭᓕᐅᑎᓂᒃ ᕿᒥᕐᕈᐊᖅᑎᑦ ᑲᑎᒪᔨᖏᑦ ᓄᓇᕗᒥᑦ ᐃᓄᖕᓂ ᑐᓴᖅᑎᑕᐅᑲᑕᒍᒪᓪᓗᑎᒃ ᑐᒃᓯᕋᐅᑎᒋᔭᐅᔪᓂᒃ ᐊᑭᑦᑐᕆᐊᕈᑎᐅᓕᕋᔭᖅᑐᓂᒃ ᐊᑭᓕᐅᑎᐅᕙᒃᑐᓂᒃ.
ᔭᓄᕇᑕᐃᑦ ᐃᒡᓗᓕᒑᕐᔪᒃᒥ, ᓴᓪᓕᓂᑦ, ᑰᒑᕐᔪᒃᒥ, ᒥᑦᑎᒪᑕᓕᒃᒥ ᐊᒻᒪᓗ ᑎᑭᕋᕐᔪᐊᓂ ᐊᓯᔾᔨᖅᑕᐅᓂᐊᕐᒪᑕ ᐆᒻᒪᖅᑯᑎᓕᕆᓂᕐᒧᑦ ᐊᑭᖃᕋᔭᕐᑐᖅ $32.4 ᒥᓕᐊᓐ ᑖᓚᓂ ᐱᓕᕆᐊᒃᓴᖅ ᐊᖏᖅᑕᐅᒃᐸᑕ ᓄᓇᕗᒥᑦ ᒐᕙᒪᒃᑯᓐᓄᑦ.
ᑐᒃᓯᕋᐅᑎᒋᔭᐅᖕᒪᑕ ᓄᑕᐅᔪᓐᓃᓗᐊᖅᑐᓂᒃ ᔭᓄᕇᑕᓂ ᐊᓯᔾᔨᖅᓯᔪᒪᓪᓗᑎᒃ ᑖᒃᑯᓇᓂ ᓄᓇᓕᖕᓂ ᑖᒃᑯᐊᓗ ᓄᓇᓖᑦ ᐱᕈᖅᐹᓪᓕᖅᐸᓪᓕᐊᓂᐊᕋᓱᒋᔭᐅᓪᓗᑎᒃ.
“ᓄᓇᓖᑦ ᐱᕈᖅᐸᓪᓕᐊᖏᓐᓇᕐᒪᑕ ᐊᒻᒪᓗ ᒫᓐᓇ ᔭᓄᕇᑕᕆᔭᐅᔪᑦ ᓈᒻᒪᙱᓗᐊᓕᖅᖢᑎ ᐊᑐᖅᑕᐅᔭᕆᐊᖃᕐᓂᖏᑦᑎᒍᑦ ᓄᓇᓕᖕᓄᑦ.” ᔪᐃᓕ ᖃᐃᕐᓂᖅ, ᒥᓂᔅᑕ ᑲᒪᒋᔭᖃᕐᑐᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂᒃ ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ ᐅᖄᓚᐅᑎᒃᑯᑦ.
ᐊᓯᔾᔨᖅᑕᐅᔪᑦ ᓴᓪᓕᓂ, ᑰᒑᕐᔪᒃᒥ, ᒥᑦᑎᒪᑕᓕᒃᒥ ᐊᒻᒪ ᑎᑭᕋᕐᔪᐊᖅᒥ ᐆᒻᒪᖅᑯᑎᖃᕈᑎᖏᑦ ᓴᙱᒃᑎᑉᐹᓪᓕᕋᔭᕐᑐᑦ.
ᓴᓪᓕᓂᒃ, ᓲᕐᓗ, ᐸᕐᓇᐅᓯᐅᖅᓯᒪᖕᒪᑕ ᐊᓯᔾᔨᖅᓯᔪᒪᓪᓗᑎᒃ ᐆᒥᖓ 420 ᑭᓗᕗᐊᑦ ᔭᓄᕇᑕᒥ ᓴᙱᓂᕐᓴᒧᑦ 720 ᑭᓗᕗᐊᑦᓕᖕᒥ. ᐃᒡᓗᓕᒑᕐᔪᒃᒥ ᐃᓱᒪᔪᑦ ᒫᓐᓇ 320 ᑭᓗᕗᐊᑦ ᔭᓄᕇᑕᖓ ᐊᓯᔾᔨᖅᑕᐅᑐᐃᓐᓇᕐᓗᓂ ᑕᐃᒪᐃᑦᑐᒃᑲᓐᓂᕐᒥ ᓴᖏᓂᓕᖕᒥ 320 ᑭᓗᕗᐊᑦᓂ.
ᐃᒡᓗᓕᒑᕐᔪᒃᒥ ᔭᓄᕇᑕ ᐊᓯᔾᔨᖅᑕᐅᓇᔭᕐᑐᖅ ᐊᕐᕌᒍᖃᓕᕐᒪᑦ 48-ᓂ ᐊᒻᒪᓗ ᑰᒑᕐᔪᒃᒥ ᐊᕐᕌᒍᖃᓕᖅᖢᓂ 49-ᓂ, ᖃᐃᕐᓂᖅ ᐅᖃᓚᐅᕐᑐᖅ.
ᑕᒪᒃᑯᐊ ᐊᓯᔾᔨᖅᓯᔪᒪᓂᐅᔪᑦ ᑲᔪᓯᑉᐸᑕ, ᐱᓕᕆᔨᒃᓴᓂ ᓄᓇᓕᖕᓄᐊᖅᑎᑦᑎᓇᔭᖅᑐᑦ ᓴᓇᔭᖅᑐᖅᑐᓂᒃ, ᐊᑕᐅᓯᐅᓈᖅᑕᐅᕙᒡᓗᑎᒃ ᐊᒻᒪᓗ ᑕᒪᓐᓇ ᐱᓕᕆᐊᒃᓴᖅ 2026 ᐅᐱᕐᖔᖓᓂ ᐱᐊᓂᒃᑕᐅᓇᔭᖅᖢᓂ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑐᒃᓯᕋᐅᑎᖓ ᐅᖃᕐᓯᒪᓚᐅᕐᑐᖅ.
ᐊᑭᓕᐅᑎᐅᓇᔭᕐᑐᖅ ᓄᑖᙳᕆᐊᖅᑎᑦᑎᓂᕐᒧᑦ ᐆᒻᒪᖅᑯᑎᓕᕆᓂᕐᒧᑦ ᑲᒪᒋᔭᐅᓂᐊᖅᑐᖅ, ᖃᐃᕐᓂᖅ ᐅᖃᕐᑐᖅ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐃᓱᒪᔪᑦ ᐊᓯᔾᔩᖅᓯᓂᖅ ᑕᓪᓕᒪᓂ ᔭᓄᕇᑕᓂ ᐃᓚᖃᒃᑲᓐᓂᕆᐊᖃᕐᓂᐊᕐᓂᖓᓂᒃ $2.8 ᒥᓕᐊᓐ ᑖᓚᓂ ᐊᕐᕌᒍᒧᑦ ᑮᓇᐅᔭᓕᐅᕈᑎᖏᓐᓂ. ᑕᒪᓐᓇᓕ ᐊᑭᑦᑐᕆᐊᕈᑎᐅᓕᕋᔭᕐᑐᖅ ᐊᑭᓕᐅᑎᐅᕙᒃᑐᓂᒃ 1.47 ᓴᓐᔅ ᑭᓗᕗᐊᑦ ᐃᑲᕐᕋᒧᑦ, ᑕᐃᒪᓐᓇ ᑐᓴᖅᑎᑦᑎᓚᐅᕐᑐᑦ ᐅᑯᐊ ᐆᒻᒪᖅᑯᑎᓄᑦ ᐊᑭᓕᐅᑎᓂᒃ ᕿᒥᕐᕈᐊᖅᑎᑦ ᑲᑎᒪᔨᖏᑦ ᓄᓇᕗᒥᑦ.
ᐅᑯᐊ ᐆᒻᒪᖅᑯᑎᓄᑦ ᐊᑭᓕᐅᑎᓂᒃ ᕿᒥᕐᕈᐊᖅᑎᑦ ᑲᑎᒪᔨᖏᑦ ᖃᐅᔨᖁᔨᓚᐅᕐᑐᑦ ᒥᓂᔅᑕᒥ ᑲᒪᒋᔭᖃᖅᑐᒥᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᐊᓯᔾᔨᖅᑕᐅᓂᐊᖅᑐᓂᒃ ᐊᑭᓕᐅᑎᐅᕙᒃᑐᓂᒃ ᐆᒻᒪᖁᑎᓄᑦ, ᑭᓯᐊᓂᓕ ᑖᓐᓇ ᐊᑭᑦᑐᕆᐊᕈᑎᐅᔪᒪᔪᓂᒃ ᐊᖏᖃᑦᑕᐃᓐᓇᕐᒪᑦ.
ᐊᑭᓕᐅᑎᒃᓴᓄᑦ ᐊᓯᔾᔨᕈᑎᐅᔪᑦ ᐱᒋᐊᕋᔭᕐᑐᑦ 2026-27 ᐊᕐᕌᒍᒥ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐅᖃᓚᐅᕐᑐᑦ ᐱᓇᓱᒍᑎᖏᓐᓂᒃ ᐅᑯᓄᖓ ᐆᒻᒪᖅᑯᑎᓄᑦ ᐊᑭᓕᐅᑎᓂᒃ ᕿᒥᕐᕈᐊᖅᑎᑦ ᑲᑎᒪᔨᖏᓄᑦ.
ᐊᕐᕌᒍᒐᓴᐅᓕᕐᑐᓪᓕ ᖁᓪᓕᒃᑯᑦ ᓄᑖᙳᕆᐊᖅᑎᑦᑎᑲᑕᖕᒪᑕ ᓄᑖᐅᔪᓐᓃᖅᐸᓪᓕᐊᔪᓂᒃ ᐆᒻᒪᖅᑯᑎᖃᕐᕕᖕᓂ ᐊᒻᒪ ᔭᓄᕇᑕᓂᒃ.
2015-ᒥ ᓴᓇᑦᑯᓐᓂ ᐅᓂᒃᑳᓕᐊᓂ ᓄᓇᕗᒥᑦ 25-ᓂ ᓄᓇᓕᖕᓂ 14 ᐆᒻᒪᖅᑯᑎᖃᕐᕕᐅᔪᑦ ᐊᑐᖅᑕᐅᔾᔪᑎᒋᓪᓗᐊᖅᑕᖏᓐᓂ ᖄᖏᐅᑎᓯᒪᓗᐊᕐᓂᐊᕐᒪᑕ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐸᕐᓇᐅᑎᖏᓐᓂᒃ ᓄᖅᑲᖅᑎᑦᑎᔪᒪᙱᒻᒪᑕ, ᖃᐃᕐᓂᖅ ᐅᖃᕐᑐᖅ.
“ᐊᕐᕌᒍᓂ ᐊᒡᒋᖅᑐᓂᒃ ᐅᓄᕐᓂᕐᓴᐃᑦ ᓄᓇᓖᑦ ᖃᐅᔨᒋᐊᕐᓂᐊᕐᒥᔭᕗᑦ … ᓄᑖᓂ ᐆᒻᒪᖅᑯᑎᖃᕐᕕᒃᑖᕐᓗᑎᒃ ᐅᕝᕙᓘᓐᓃᑦ ᔭᓄᕇᑕᖏᑦ ᐊᓯᔾᔨᖅᑕᐅᕙᒡᓗᑎᒃ,” ᐅᖃᕐᑐᖅ.
ᑕᒪᒃᑯᐊ ᔭᓄᕇᑕᐃ ᐊᓯᔾᔨᖅᑕᐅᓚᐅᖅᑎᓪᓗᒋ ᑖᒃᑯᓇᓂ ᑕᓪᓕᒪᓂ ᓄᓇᓕᖕᓂ, ᖃᐅᔨᓴᓕᕐᓂᐊᕐᑐᑦ ᐊᓯᖏᓐᓂ ᓄᓇᓕᖕᓂ ᓇᓕᐊᒃ ᓯᕗᓪᓕᐅᑎᑦᑕᕆᐊᖃᕐᒪᖔᑕ ᓄᑖᙳᕆᐊᖅᑕᐅᓂᒃᑯᑦ ᐊᒻᒪ ᐊᓯᔾᔨᖅᑕᐅᔭᕆᐊᖃᕐᓂᒃᑯᑦ, ᐅᖃᕐᒥᔪᖅ.
ᐅᑯᐊ ᐆᒻᒪᖅᑯᑎᓄᑦ ᐊᑭᓕᐅᑎᓂᒃ ᕿᒥᕐᕈᐊᖅᑎᑦ ᑲᑎᒪᔨᖏᑦ ᓄᓇᕗᒻᒥᐅᓂᒃ ᑭᐅᓂᐊᖁᔨᓪᓗᑎᒃ ᕕᕝᕗᐊᕆ 5 ᐊᓂᒍᓚᐅᖅᑎᓐᓇᒍ ᐆᒥᖓ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐱᔪᓐᓇᐅᑎᑖᕋᓲᑎᖏᓐᓂᒃ.
(0) Comments