ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓴᖅᑭᑎᑦᑎᕗᑦ ᐃᓕᓐᓂᐊᕐᓂᕐᒧᑦ ᓱᓇᒃᑯᑖᓂ ᕿᒧᒃᓯᕐᓂᐅᔪᒥ ᑲᑎᒪᓂᐅᔪᒥ

For English version, see QIA producing educational materials from dogsled conference

ᐃᓄᐃᑦ ᕿᒧᒃᓯᖅᑎᐅᔪᑦ ᑲᑎᓚᐅᖅᐳᑦ ᐱᓇᓱᐊᕈᓯᐅᓚᐅᖅᑐᒥ ᐃᖃᓗᖕᓂ ᐅᖃᐅᓯᖃᕐᓂᕐᒧᑦ ᐃᓕᖅᑯᓯᒧᑦ ᐊᑐᖅᑕᐅᕙᒃᑐᒥ, ᐊᒻᒪ ᐅᖃᓚᐅᖅᐳᑦ ᐊᑐᖅᑕᐅᓂᐊᖅᐳᖅ ᓴᖅᑭᑎᑦᑎᓂᕐᒥ ᐃᓕᓐᓂᐊᕐᓂᕐᒧᑦ ᐃᑲᔪᕈᑎᒃᓴᓂ ᐊᓯᖏᓐᓄᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐋᖅᑭᒃᓱᐃᓚᐅᖅᐳᑦ ᕿᒧᒃᓯᖅᑏᑦ ᑲᑎᒪᓂᐅᔪᒥ, ᐊᐅᓚᓚᐅᖅᑐᒥ ᓄᕕᐱᕆ 21−ᒥ ᓄᕕᐱᕆ 23−ᒧᑦ ᐊᖅᓴᕐᓃᑦ ᑐᔪᕐᒥᕕᖓᓂ ᐊᒻᒪ ᑲᑎᒪᕝᕕᐅᔪᒥ.

ᑲᑎᒪᖃᑕᐅᔪᑦ ᐊᔭᐅᕆᓚᐅᖅᐳᑦ ᒪᒃᑯᒃᑐᓂ ᕿᒧᒃᓯᕐᓂᐅᔪᒥ ᐆᒪᑎᑦᑏᓐᓇᕐᓂᐅᔪᒥ.

ᐅᖃᓪᓚᒃᑎᒻᒪᕆᐅᔪᖅ ᑭᐊᕆᓐ ᓲᑦᓯᐅᓪ, ᕿᒧᒃᓯᒥ ᓇᖕᒥᓂᖃᖅᑎᐅᓚᐅᖅᑐᖅ ᐊᒻᒪ ᐃᑲᔪᖅᓱᐃᔨᐅᓪᓗᓂ ᕿᒧᒃᓯᕐᓂᐅᔪᒥ, ᐅᖃᓪᓚᑦᑎᐊᓚᐅᖅᐳᖅ ᐃᖏᕐᕋᓂᕆᔭᖓᓂ ᐊᒻᒪ ᐊᑐᕐᓂᑯᖏᓐᓂ ᓇᖕᒥᓂᖃᕐᓂᕐᒥ ᐃᓄᖕᓄᑦ ᕿᒧᒃᓯᖅᑎᐅᔪᓂ ᕿᒻᒥᓂ.

“ᐳᐃᒍᖅᑕᐃᓕᑕ ᐃᓅᓪᓗᑕ ᐱᖅᑯᓯᑐᖃᕐᒥ ᖃᐅᔨᒪᓂᑦᑎᓐᓂ,” ᐅᖃᓚᐅᖅᐳᖅ.

“ᐅᖃᕋᓱᐊᖅᐳᖓ ᒪᒃᑯᒃᑐᑦ ᐳᐃᒍᓪᓗᐊᙱᓐᓂᖏᓐᓂ ᖃᐅᔨᒪᓂᑦᑎᓐᓂ ᓇᖕᒥᓂᖃᕐᓂᕐᒥ ᕿᒧᒃᓯᖅᑎᐅᔪᓂ ᕿᒻᒥᓂᑦ,” ᐅᖃᓚᐅᖅᐳᖅ.

“ᐅᕙᒍᑦ ᒪᒃᑯᒃᑑᔪᑎᒍᑦ ᐃᓕᑦᑎᔭᕆᐊᖃᖅᐳᒍᑦ ᐱᓕᕆᓂᕐᒥ ᐊᒻᒪ ᐋᖅᑭᐅᒪᑎᑦᑎᓂᕐᒥ ᕿᒧᒃᓯᖅᑎᓂ ᕿᒻᒥᓂᑦ ᐃᓄᐃᑦ ᐱᖅᑯᓯᖓᓐᓂ. ᓂᕿᒃᓴᖅᓯᐅᕐᓂᕐᒥ ᐊᒻᒪ ᐋᒃᑐᐃᓂᕐᒥ ᐆᒪᔪᓂ ᐃᓚᖏᓐᓂ ᐱᓕᕆᐊᒃᓴᐅᕗᑦ, ᐊᒻᒪ ᐊᐱᕆᓚᐅᕐᓚᕗᑦ ᐃᓄᑐᖃᖅᐳᑦ ᖃᐅᔨᒪᓂᖏᓐᓂ ᐊᒻᒪ ᐊᔪᕆᖅᓱᐃᓂᐅᔪᓂ.”

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑐᓲᖑᕗᑦ ᑮᓇᐅᔭᖃᖅᑎᑕᐅᓂᐅᔪᓂ ᒐᕙᒪᑐᖃᒃᑯᑦ ᒪᒥᐊᓐᓂᓪᓚᕆᒋᔭᖓᓂ ᐊᒻᒪ ᓇᓗᓇᐃᖅᓯᓂᐅᔪᒥ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᓇᓂᓯᒪᔭᖏᓐᓂ ᓴᖅᑭᑎᑦᑎᓂᕐᒧᑦ ᐱᖅᑯᓯᑐᖃᕐᓂ ᐱᓕᕆᐊᖑᓂᐅᔪᓂ, ᓲᕐᓗ ᕿᒧᒃᓯᖅᑏᑦ ᖃᓄᐃᓐᓂᐅᔪᒥ .

ᐃᓚᐅᖃᑕᐅᔪᑦ ᓂᕆᐅᓚᐅᖅᐳᑦ ᐃᓅᖃᑎᒋᔭᖏᓐᓂ ᑲᓛᖦᖠᐅᑉ ᓄᓈᓐᓂ ᐃᓚᐅᖃᑕᐅᓂᐊᕐᓂᖏᓐᓂ ᑭᓯᐊᓂ ᐅᐸᒍᓐᓇᓚᐅᙱᓚᑦ ᓂᕆᐅᖕᓇᙱᑦᑐᓂ ᖃᓄᐃᓐᓂᐅᔪᓄᑦ.

“ᑐᓴᖅᓯᒪᕗᒍᑦ ᐅᖃᐅᓯᕆᓚᐅᖅᑕᔅᓯᓐᓂ ᐅᕙᓂ ᐊᒻᒪ ᑐᓴᕈᒪᕗᒍᑦ ᐅᖃᐅᓯᒃᓴᔅᓯᓐᓂ ᐊᒻᒪ ᑭᓱᓂᒃ ᐱᐅᓯᒋᐊᕈᓐᓇᖅᑐᓂ ᑕᑯᔪᒪᓇᔭᖅᑕᔅᓯᓐᓂ ᓯᕗᓂᒃᓴᒥ,” ᐅᖃᓚᐅᖅᐳᖅ ᓯᐴᓚ ᓅᐳᓪ, ᑐᑭᒧᐊᒃᑎᑦᑎᔨᐅᑉ ᐃᑲᔪᖅᑎᖓ ᐃᓄᖕᓄᑦ ᐱᓕᕆᐊᖑᔪᓄᑦ ᐊᒻᒪ ᐱᔨᑦᑎᕋᕐᓂᕐᒧᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᒪᑐᕙᓪᓕᐊᓂᐅᔪᒥ ᐅᖃᐅᓯᒃᓴᖏᓐᓂ.

“ᖃᐅᔨᓴᕐᓂᐊᖅᐳᒍᑦ ᑕᒪᒃᑭᓂ ᓂᐱᓕᐅᕆᓯᒪᔪᓂ ᓱᓇᒃᑯᑖᓂ ᐊᖅᒪ [ᐅᖃᐅᓯᒃᓴᓂ] ᓴᖅᑭᑎᑦᑎᓚᐅᙱᓐᓂᑦᑎᓐᓂ ᐃᓄᖕᓄᑦ ᕿᒧᒃᓯᕐᓂᕐᒧᑦ ᐃᓕᓐᓂᐊᕈᑎᒃᓴᓂ ᐃᑲᔪᕈᑎᒃᓴᓂ.”