ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᐅᓯᓕᕆᓂᕐᒧᑦ ᐃᓕᓴᕆᔭᐅᔾᔪᑎᑖᖅᑎᑦᑎᔪᑦ 12ᓄ ᐃᓕᓐᓂᐊᖅᑐᓂᒃ ᐊᓂᒍᐃᔪᓂᒃ
ᐃᓕᓴᕆᔭᐅᔾᔪᑎᑦ ᑐᓂᔭᐅᔪᑦ ᐃᓕᓐᓂᐊᖅᑎᓄᑦ ᐃᓄᒃᑎᑐᑦ ᐅᖃᐅᓯᕐᒥ ᐊᓯᐅᑎᑦᑎᑦᑕᐃᓕᓂᖏᓐᓄᑦ
ᔭᐃᒥᓯ ᖃᐅᓐᓇᖅ, ᐊᓂᒍᐃᔪᖅ ᐃᓕᓐᓂᐊᖅᑎ ᐊᐅᓱᐃᑦᑐᕐᒥ ᐃᓕᓴᕆᔭᐅᔾᔪᑎᒥᓂᒃ ᑎᒍᒥᐊᕐᑐᖅ ᑐᓂᔭᐅᑎᓪᓗᒍ ᐱᒋᐊᓕᕈᑎᒥᒃ ᐆᒥᖓ ᔫ ᐊᑕᒍᑦᑖᓗᒃ ᐅᖃᐅᓯᕐᒧᑦ ᐃᓕᓴᕆᔭᐅᔾᔪᑎᒥᒃ. ᖃᐅᓐᓇᖅ ᐱᑖᓚᐅᕐᒥᔪᖅ $2,000ᓂ ᐃᓚᒋᔭᐅᓪᓗᓂ ᓯᕗᓪᓕᕐᐹᓂ 12 ᑐᓂᔭᐅᔪᓂᒃ ᐅᖃᐅᓯᓕᕆᓂᕐᒧᑦ ᐃᓕᓴᕆᔭᐅᔾᔪᑎᓂᒃ. (ᐊᔾᔨᙳᐊᖅ ᐅᑯᓇᙵᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ)
12 ᓄᓇᕗᒥᑦ ᐊᓂᒍᐃᔪᑦ ᑐᓂᔭᐅᓚᐅᕐᑐᑦ ᐱᒋᐊᓕᓵᖅᑕᐅᔪᒥᒃ ᕿᑭᖅᑕᓂ ᐃᓄᐃᑦ ᑲᑐᔾᓕᔨᖃᑎᒌᖏᑦ ᐃᓕᓴᕆᔭᐅᔾᔪᑎᖓᓂᒃ ᑐᕌᖓᓪᓗᓂ ᐃᓄᒃᑎᑐᑦ ᐅᖃᐅᓯᕐᒥ ᐊᓯᐅᑎᑦᑎᑦᑕᐃᓕᓂᕐᒧᑦ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓴᖅᑎᑦᑎᓚᐅᕐᑐᑦ ᓵᓚᒃᓴᖅᑐᓂᒃ ᔪᓚᐃ 6ᒥ ᑐᓴᒐᒃᓴᑎᒍᑦ.
ᓵᓚᒃᓴᖅᑐᑦ ᐃᓕᓐᓂᐊᕐᑏᑦ ᓂᕈᐊᕆᔭᐅᓚᐅᕐᑐᑦ ᐃᓕᓐᓂᐊᕐᕕᐊᓗᖕᓂ ᐊᖓᔪᖅᑳᓄᑦ ᐊᑐᓂ ᓄᓇᓕᖕᓂᒃ ᕿᑭᖅᑕᓃᑦᑐᓂᒃ, ᐅᖃᓚᐅᕐᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦᑕ ᐅᖃᓪᓚᒃᑎᖓ ᑭᐅᕋᓐ ᕕᓕᐅᕋᑎ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.
“ᑐᓂᔭᐅᓚᐅᕋᑦᑕ ᐃᓱᒪᓕᐅᕈᑎᐅᔪᓂᒃ ᐊᑐᓂ ᐃᓕᓐᓂᐊᕐᕕᖕᓂ ᑐᓂᔭᐅᖁᔭᖏᓐᓂᒃ ᐃᓕᓴᕆᔭᐅᔾᔪᑎᒥ ᐃᓕᓐᓂᐊᑦᑎᐊᖅᑐᓄᑦ ᐃᓄᒃᑎᑐᑦ ᐅᖃᕈᓐᓇᑦᑎᐊᖅᖢᑎᒃ ᐅᕝᕙᓘᓐᓃᑦ ᐃᓄᒃᑎᑐᑦ ᐊᔪᕈᓐᓃᒃᑲᓐᓂᕋᓱᒃᑐᓂᒃ,” ᑎᑎᕋᓚᐅᕐᑐᖅ ᖃᕋᓴᐅᔭᒃᑯᑦ.
13ᒋᔭᐅᔪᖅ ᐃᓕᓴᕆᔭᐅᔾᔪᑎᑖᕐᑐᖅ ᐅᖃᐅᓯᐅᓛᕐᑐᖅ ᑖᓐᓇ ᐃᓕᓐᓂᐊᕐᕕᒃᒧᑦ ᐊᖓᔪᖅᑳᖅ ᓂᕈᐊᓚᐅᕐᑎᓪᓗᒍ.
ᐃᓕᓴᕆᔭᐅᔾᔪᑎᑖᖅᑎᑕᐅᔪᑦ ᑐᓂᔭᐅᓚᐅᕐᒥᔪᑦ $2,000ᓂᒃ ᑮᓇᐅᔭᒃᓴᐅᓪᓗᑎᒃ ᐊᒻᒪᓗ ᐊᑭᓐᓇᕐᒥᐅᑕᒃᓴᖅ ᐃᓚᒋᔭᐅᓪᓗᑎᒃ ᐃᓕᓴᕆᔭᐅᔾᔪᑎᓂᒃ ᐊᓂᒍᐃᓂᕐᒧᑦ ᖁᕕᐊᓲᑎᖃᕐᑎᓪᓗᒋ ᒪᐃᒥ ᐊᒻᒪ ᔫᓂᒥ ᑕᒪᑐᒪᓂ ᐊᕐᕌᒍᒥ.
ᐅᑯᐊᖑᔪᐃᑦ:
- ᒐᐃᒥ ᐅᖄᓪᓚᒃ ᐃᒃᐱᐊᕐᔪᒃᒥ
- ᔭᐃᑦ ᐸᓂᓗ ᑲᖏᖅᑐᒑᐱᒃᒥ
- ᔭᐃᒻᔅ ᖁᐊᓇᖅ ᐊᐅᓱᐃᑦᑐᕐᒥ
- ᓵᓚᒃ ᐊᖑᒑᑦᓯᐊᖅ ᐃᒡᓗᓕᒃᒥ
- ᑭᐅᕈᓕᓐ ᐃᖃᓗᒃ ᐃᖃᓗᖕᓂ
- ᑯᕆᔅᑕᓐ ᑎᒦᓚ ᑭᒻᒥᕈᒻᒥ
- ᔮᓐ ᕼᐊᐃᕗᑦ ᑭᙵᓂ
- ᓅᓚᓐ ᑯᒡᓗᒍᖅᑐᖅ ᐸᖕᓂᕐᑑᒥ
- ᓲᓯ ᓴᐃᒨᓂ ᒥᑦᑎᒪᑕᓕᒃᒥ
- ᐋᔅᑕ ᐃᓪᓚᐅᖅ ᖃᐅᓱᐃᑦᑐᕐᒥ
- ᐊᐃᓚ ᒧᕇ ᑲᕕᒃ-ᒥᑭᔪᒃ ᓴᓂᑭᓗᐊᖅᒥ
- ᒍᓘᕆᐊ ᓇᖕᒪᓕᒃ ᓴᓂᕋᔭᒃᒥ
ᐃᓕᓐᓂᐊᕐᕕᐊᓗᒃ ᕿᑭᖅᑕᖅᔪᐊᖅᒥ ᓂᕈᐊᖅᑕᐅᖁᔭᖓᓂ ᑐᓂᓯᓛᕐᑐᑦ ᐃᓕᓐᓂᐊᕐᓇᐅᒃᑲᓐᓂᓕᕐᐸᑦ.
ᐅᓇ ᔫ ᐊᑕᒍᑦᑖᓗᒃ ᐃᓄᒃᑎᑐᑦ ᐅᖃᐅᓯᕐᒧᑦ ᐃᓕᓴᕆᔭᐅᔾᔪᑎ ᐊᑎᖃᖅᑎᑕᐅᔪᖅ ᐆᒧᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᑎᑎᕋᖅᑎ ᑮᓇᐅᔭᓕᕆᔨᒋᓚᐅᕐᓯᒪᔭᖓᓂᒃ ᐊᒻᒪ ᐃᒃᓯᕙᐅᑕᕆᔭᐅᓪᓗᓂ ᑲᑭᕙᒃ ᑲᑐᔾᔨᖃᑎᒌᓄᑦ, ᑖᒃᑯᐊᓕ ᓄᓇᓕᖕᓂ ᐱᓕᕆᐊᖃᖅᑎᑕᐅᕙᒃᑯᑦ ᐱᕙᓪᓕᐊᔪᓕᕆᓂᕐᒥᒃ. ᐅᓇ ᓯᕗᓪᓕᖅᐹᖑᓚᐅᕐᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓂᓯᓪᓗᑎᒃ ᐃᓕᓴᕆᔭᐅᔾᔪᑎᒥᒃ ᐃᓱᒪᒋᔭᐅᓪᓗᓂ ᐊᑕᒍᑦᑖᓗᒃ, ᑖᓐᓇᓕ ᐃᓅᔪᓐᓃᓚᐅᕐᓯᒪᔪᖅ ᐊᕐᕌᓂ.
(0) Comments