ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᑲᔪᖅᑐᐃᔾᔮᙱᑦᑐᑦ ᓄᓘᔮᖕᓂ ᐅᔭᕋᒃᓯᐅᕐᕕᖕᒥ ᐊᖏᒡᓕᒋᐊᖅᑕᐅᔪᒪᓂᖓᓂᒃ

“ᐃᓄᐃᑦ ᐃᓚᐅᑎᑕᐅᓚᐅᙱᒻᒪᑕ ᐋᖅᑭᒃᓱᐃᕙᓪᓕᐊᑎᓪᓗᒋᑦ ᐊᖏᒡᓕᒋᐊᖅᑎᑦᑎᔪᒪᓂᕐᒥᒃ,” ᐅᖃᖅᑐᖅ ᐊᖓᔪᖅᑳᖓᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᑲᑎᒪᔨᐅᔪᑦ ᐱᖁᔨᕗᖔᕈᑎᒥ ᐊᓂᒍᐃᑎᑦᑎᔪᑦ ᐅᖃᕐᓯᒪᔪᒥᒃ ᐃᑲᔪᖅᑐᐃᔾᔮᙱᓐᓂᖏᓐᓂᒃ ᓄᓘᔮᖕᓂᑦ ᓴᕕᕋᔭᒃᓴᒥᒃ ᐅᔭᕋᒃᓯᐅᕐᕕᒃᒥ ᐊᖏᒡᓕᒋᐊᖅᑎᑦᑎᔪᒪᓂᕐᒥᒃ. (ᐊᔾᔨᙳᐊᖅ ᐅᑯᓇᙵᑦ ᐹᕙᓐᓛᓐᑯᓐᓂᑦ)

By ᔨᒻ ᐱᐊᓪ

For an English version of this story, see Qikiqtani Inuit Association won’t support Mary River mine expansion

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᕐᑐᑦ ᐃᑲᔪᖅᑐᐃᙱᓐᓂᖏᓐᓂᒃ ᐹᕙᓐᓛᑦ ᓴᕕᕋᔭᒃᓴᒥᒃ ᐅᔭᕋᒃᓯᐅᕐᕕᒃᒥ.

ᑲᑐᔾᔨᖃᑎᒌᑦ ᑲᑎᒪᔨᖏᑦ ᑐᓴᖅᑎᑦᑎᓚᐅᕐᑐᑦ ᒫᔅᓯ 5-ᖑᑎᓪᓗᒍ, ᐊᓂᒍᐃᑎᑦᑎᓚᐅᕐᑎᓪᓗᒋᑦ ᐱᖁᔨᕗᖔᕈᑎᒥᒃ ᑲᑎᒪᔨᑐᐊᑦ ᑲᑎᒪᑎᓪᓗᒋ ᓯᕗᓂᑦᑎᐊᖓᓂᒃ.

ᑲᑎᒪᔩᑦ ᐅᖃᐅᓯᖃᓚᐅᕐᑐᑦ ᐊᖏᒡᓕᒋᐊᖅᑕᐅᓂᐅᑉ ᐊᒃᑐᐃᒍᑎᒋᓇᔭᖅᑕᖏᓐᓂᒃ ᐆᒪᔪᓂᒃ ᒪᑯᓂᖓ ᑐᒃᑐᓂᒃ, ᓇᑦᑎᕐᓂᒃ ᐊᒻᒪ ᐊᕐᕕᖕᓂᒃ, ᐊᒻᒪᓗ ᐳᔪᐊᓗᒃ ᓴᖅᑭᑉᐸᓪᓕᐊᔪᖅ ᐅᔭᕋᒃᓯᐅᕐᕕᒃᒥᙶᖅᐸᓪᓕᐊᔪᒥᒃ, ᑐᓴᒐᒃᓴᓕᐊᖏᑦ ᑲᑐᔾᔨᖃᑎᒌᑦ ᐅᖃᕐᓯᒪᓚᐅᕐᑐᑦ.

ᑐᒃᓯᕋᕈᑎᐅᔪᖅ ᐊᖏᒡᓕᒋᐊᖅᑎᑦᑎᔪᒪᓂᕐᒧᑦ, ᑕᐃᔭᐅᓯᒪᔪᖅ ᐱᒋᐊᕈᑎ 2, ᐊᖏᒡᓕᒋᐊᖅᑎᑦᑎᒍᒪᖕᒪᑦ ᐅᔭᕋᒃᓯᐅᕐᕕᒃᒥᑦ ᓴᖅᑭᑕᐅᕙᓪᓕᐊᔪᓂᒃ ᒫᙵᑦ 6 ᒥᓕᐊᓐ ᑕᓐᔅᓂᒃ ᐊᕐᕌᒍᒥᑦ ᒪᐅᖓ 12 ᑕᓐᔅᓂᒃ ᐊᕐᕋᒍᒧᑦ, ᐃᓚᖃᕐᓗᓂ ᓴᓇᓂᕐᒥᒃ 110 ᑭᓛᒥᑕᓂ ᑕᑭᓂᓕᖕᒥ ᓄᓇᓯᐅᑎᑯᑖᒧᑦ ᐊᖅᑯᑎᒃᓴᒥᒃ ᓄᓘᔮᖕᓂ ᕿᙳᐊᓄᑦ, ᐊᒻᒪᓗ ᐊᑐᕋᔭᖅᖢᑎᒃ 176-ᓂ ᐃᖏᕐᕋᔾᔪᑎᓂᒃ ᓴᕕᕋᔭᒃᓴᒥ ᐅᓯᖃᑦᑕᕋᔭᖅᑐᓂᒃ ᓂᐅᕕᐊᒃᓴᐅᕝᕕᒋᓂᐊᖅᑕᖏᓐᓄᑦ.

ᑲᑎᒪᔨᒃᑯᑦ ᐅᖃᐅᓯᖃᓚᐅᕐᒥᔪᑦ ᐃᓱᒪᒋᔭᖏᓐᓂᒃ ᐅᑯᐊ ᐹᕙᓐᓛᓐᑯᑦ ᐊᑐᓕᖅᑎᑦᑎᓂᕆᔭᖏᓐᓂᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑖᔅᓱᒪ ᑲᒻᐸᓂᐅᑉ ᐊᖏᒡᓕᒋᐊᖅᑎᑦᑎᓂᕐᒧᑦ ᐸᕐᓇᐅᑎᖏᑦᑎᒍᑦ, ᐊᒻᒪᓗ ᐱᑕᖃᙱᓐᓂᖓᓂᒃ ᑲᑐᔾᔨᖃᑎᒌᖕᓂᒃᑯᑦ ᐋᖅᑭᒃᑕᐅᓯᒪᔪᓂᒃ ᐊᑐᕈᓐᓇᕐᓯᒍᑎᓂᒃ ᐊᐅᓚᑦᑎᓂᕐᒧᑦ ᐸᕐᓇᐅᑎᓂᒃ ᐋᖅᑭᒋᐊᕈᑎᒃᓴᓄᑦ ᐱᓕᕆᐊᒃᓴᐅᑉ ᐊᒃᑐᐃᒍᑎᖏᓐᓂᒃ.

“ᐃᓄᐃᑦ ᐃᓚᐅᑎᑕᐅᓚᐅᙱᒻᒪᑕ ᑐᒃᓯᕋᕈᑎᐅᔪᖅ ᐋᖅᑭᒃᓱᖅᑕᐅᕙᓪᓕᐊᑎᓪᓗᒍ, ᐊᒻᒪᓗ ᐃᔾᔪᑎᒋᔭᐅᓪᓗᐊᕐᑐᑦ ᐱᓕᕆᐊᒧᑦ ᐊᒃᑐᐃᒍᑎᐅᔪᑦ ᓱᓕ ᓱᖅᑯᐃᓇᑦᑎᐊᙱᒻᒪᑕ,” ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓ ᐸᐅᓗᓯ ᐊᕿᐊᕈᖅ ᐅᖃᓚᐅᕐᑐᖅ ᐅᖃᐅᓯᒃᓴᖃᖅᑎᓪᓗᒋᑦ.

ᑕᒪᐅᓇᑦᑕᐃᓐᓇᕐᓕ, ᑲᑎᒪᔨᐅᔪᑦ “ᓱᓕ ᒪᑐᐃᖓᔪᑦ ᑮᓇᐅᔭᓕᐅᕈᑎᐅᔪᓐᓇᖅᑐᓂᒃ ᐱᕙᓪᓕᐊᓂᕐᒥᒃ” ᐊᒻᒪᓗ ᑐᙵᓱᒃᑎᑦᑎᓇᔭᖅᖢᑎᒃ ᐹᕙᓐᓛᓐᑯᑦ ᑐᒃᓯᕋᕈᑎᒋᔭᖏᓐᓂᒃ “ᓯᕗᓪᓕᐅᑎᑦᑎᓯᒪᔪᓂᒃ ᐃᓄᐃᑦ ᐃᓚᐅᑎᑕᐅᓂᖏᓐᓂᒃ ᐱᒋᐊᓕᓵᕐᓯᒪᓂᖓᓂᒃ,” ᑖᓐᓇ ᑐᓴᒐᒃᓴᓕᐊᕆᔭᐅᔪᖅ ᐅᖃᕐᓯᒪᓚᐅᕐᒥᔪᖅ.

ᑐᓴᒐᒃᓴᓕᐅᕐᑎᓪᓗᒋ ᖃᐅᒃᐸᙳᖅᑎᓪᓗᒍ, ᐹᕙᓐᓛᓐᑯᑦ ᐊᐅᓚᑦᑎᔨᖓᑦ ᐳᕋᐃᐊᓐ ᐱᐊᓂ ᐅᖃᓚᐅᕐᑐᖅ ᑖᒃᑯᐊ ᑲᒻᐸᓂᐊᔪᑦ ᐱᓇᓱᐊᒐᖃᕐᓂᖏᓐᓂᒃ ᑖᓐᓇ ᑐᒃᓯᕋᕈᑎᐅᔪᖅ ᐊᖏᒡᓕᒋᐊᖅᑎᑦᑎᓂᕐᒥᒃ ᐱᓕᕆᐊᖑᔪᓐᓇᑦᑎᐊᕐᓂᐊᕐᓂᖓᓂᒃ.

“ᑲᔪᓯᓂᐊᕐᑐᒍᑦ ᓄᓇᓕᖕᓂ ᐱᓕᕆᖃᑎᖃᕐᓂᕐᒥᒃ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐊᑐᖁᔭᐅᔪᓂᒃ ᒪᓕᒍᑎᒃᓴᕐᓯᐅᕐᓂᐊᖅᖢᑎᒃ ᐊᔪᕐᓇᕈᓐᓃᑐᐊᕐᐸᑦ ᐅᖃᓪᓚᖃᑎᒌᓗᑎᒃ ᐃᓱᒫᓘᑎᒋᔭᐅᔪᓂᒃ ᐅᖃᖃᑎᒌᒍᓐᓇᕐᓯᒃᐸᑕ ᑕᒪᓐᓇ ᐊᖏᖃᑎᒌᖕᓂᒃᑯᑦ ᑲᔪᓯᔪᓐᓇᕐᓂᐊᖁᓪᓗᒍ,” ᐅᖃᖅᑐᖅ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᓇᓗᓇᐃᕐᓯᒪᓪᓗᑎ ᐹᕙᓛᓐᑯᓐᓄᑦ ᐱᓕᕆᖃᑎᒋᔭᐅᓂᖏᓐᓂᒃ, ᓇᖕᒥᓂᖃᕐᑐᖅ ᓄᓘᔮᖕᓂ ᐱᓕᕆᕝᕕᐅᔫᑉ ᐃᓂᒋᔭᖓᓂᒃ ᐊᒻᒪᓗ ᑮᓇᐅᔭᖅᑖᖅᑎᑕᐅᕙᒃᖢᑎᒃ ᒥᓕᐊᓐᑲᓪᓛᓗᖕᓂ ᐊᕐᕌᒍᒥ ᑮᓇᐅᔭᓕᐅᕐᕕᒃᒥᑦ ᐊᑐᖅᑐᐊᕐᓂᖏᓐᓄᑦ ᐊᑭᓕᐅᑎᓂᒃ ᐊᒻᒪᓗ ᕿᑐᕐᖏᐅᕈᑎᓂᒃ ᐅᑯᑎᒎᓇᖅ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᑎᒍᑦ.

ᐅᓇ 2019-20 ᐊᕐᕌᒍ ᐃᓱᓕᑎᓪᓗᒍ, ᑲᑐᔾᔨᖃᑎᒌᖑᔪᑦ ᐃᑲᔫᑎᖃᕈᑎᖓ ᐱᓯᒪᓕᓚᐅᕐᓯᒪᔪᖅ $61.7 ᒥᓕᐊᓐ, ᐊᒻᒪᓗ ᑖᓐᓇ ᐹᕙᓐᓛᓐᑯᓐᓂ ᐃᓚᖓ ᐱᑖᕆᔭᐅᓯᒪᓪᓗᓂ.

ᑕᕝᕙᓂᓕ ᐊᕐᕌᒍᒥ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓂᐅᖃᐃᓚᐅᕐᓯᒪᔪᑦ $1.4 ᒥᓕᐊᓐᓂ ᐃᑲᔫᑎᖃᕈᑎᖏᓐᓄᑦ ᑮᓇᐅᔭᖅᑖᕆᕙᓪᓕᐊᔭᖏᓐᓂᒃ ᕿᑭᖅᑖᓘᑉ ᒥᒃᓵᓂ, ᐅᑯᓂᖓ ᐃᓚᖃᖅᖢᑎᒃ $500,000 ᐸᐃᕆᕝᕕᖕᓄᑦ ᐃᑲᔫᑎᒃᓴᓄᑦ ᐊᒻᒪᓗᒃ $594,410 ᐃᓕᖅᑯᓯᓕᕆᓂᕐᒧᑦ ᐱᓕᕆᐊᖑᔪᓄᑦ. ᐅᓇ ᐃᑲᔫᑎᖃᕈᑎᐅᔪᖅ ᐋᖅᑭᒃᑕᐅᓚᐅᕐᓯᒪᔪᖅ 2016-ᒥᑦ ᑮᓇᐅᔭᓂᒃ ᐊᑐᕈᑎᐅᓂᐊᕐᓗᓂ ᐱᑖᕆᔭᐅᕙᓪᓕᐊᔪᓂᒃ ᒪᑯᓇᙵᑦ ᖃᓄᐃᓕᐅᕈᑎᒋᔭᐅᔪᓄᑦ, ᐃᓚᖃᖅᖢᓂ ᐃᑲᔫᓯᐊᖅᑖᕈᓐᓇᐅᑎᒧᑦ ᐊᖏᕈᑎᓂᒃ ᐅᑯᐊᓗ ᐹᕙᓐᓛᓐᑯᑦ, ᐊᓯᖏᓐᓂ ᐅᔭᕋᒃᓯᐅᕐᕕᓕᕆᓂᕐᒧᑦ ᐱᓕᕆᐊᓄᑦ, ᐊᒻᒪᓗ ᑐᐊᐸᓕᕆᓂᕐᒧᑦ ᐱᓕᕆᐊᖑᔪᓂᑦ ᕿᑭᖅᑖᓗᖕᒥᑦ.

ᐃᓚᒋᔭᐅᓪᓗᓂ ᐆᒧᖓ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᓄᑦ, ᐅᑯᐊ ᑲᑐᔾᔨᖃᑎᒌᖑᔪ ᐋᔩᖃᑎᒌᒍᑎᖃᓚᐅᕐᒥᔪᑦ ᐊᓯᒃᑲᓐᓂᐊᓂᒃ ᐊᖏᕈᑎᒥᒃ ᔪᓚᐅᖑᓚᐅᕐᓯᒪᔪᒥᒃ, ᑖᓐᓇᓕ ᑐᕌᖓᒐᓱᒃᖢᓂ ᐊᖏᒡᓕᒋᐊᖅᑎᑦᑎᓂᕐᒧᑦ ᑐᒃᓯᕋᕈᑎᐅᔪᖅ ᐊᖏᖅᑕᐅᔪᓐᓇᕐᓂᕐᓴᐅᑎᓪᓗᒍ ᕿᑭᖅᑖᓘᑉ ᐅᐊᖕᓇᖓᓂᒃ ᓄᓇᖃᖅᑐᓄᑦ.

ᐅᓇ ᐊᖏᕈᑎ ᑕᐃᔭᐅᓪᓗᓂ ᐃᓄᐃᑦ ᖃᐅᔨᒪᓂᖏᑦᑎᒍᑦ ᐊᖏᕈᑎ (Inuit Certainty Agreement), ᐅᓇ ᐱᓕᕆᔾᔪᑎᐅᔪᖅ ᐃᑲᔫᑎᒃᓴᓂᒃ ᑐᕌᖓᑎᑦᑎᒍᑎᐅᓗᓂ ᖃᓂᒋᔭᖓᓃᑦᑐᓂᒃ ᓄᓇᓕᖕᓂ ᐊᒻᒪᓗ ᐃᓄᖕᓂ ᑲᒪᔨᐅᑎᑦᑎᓗᑎᒃ ᐊᖏᒡᓕᒋᐊᖅᑎᑦᑎᓂᕐᒧᑦ ᐱᓕᕆᐊᖃᓕᕐᐸᑕ.

“ᐅᓇ ᐃᓄᖕᓂᒃ ᐊᐅᓚᑎᑦᑎᔨᐅᒍᑎᐅᔪᖅ,” ᐊᕿᐊᕈᖅ ᐅᖃᓚᐅᕐᑐᖅ ᐱᔾᔪᑎᖃᖅᖢᓂ ᖃᐅᔨᒪᓂᖏᑦᑎᒍᑦ ᐊᖏᕈᑎᒥ ᔪᓚᐃᖑᓚᐅᕐᓯᒪᔪᒥᒃ. ᑖᓐᓇ ᐊᖏᕈᑎᐅᒐᓗᐊᖅᑎᓪᓗᒍ, ᐃᓄᐃᑦ ᐃᑲᔪᖅᑐᐃᓇᔭᕆᐊᒃᓴᖏᓐᓂᒃ ᐊᖏᒡᓕᒋᐊᖅᑎᑦᑎᓂᕐᒥᒃ ᓱᓕ ᓇᓗᓇᕐᑐᖅ.

ᕕᕝᕗᐊᕆ 9-ᖑᑎᓪᓗᒍ, ᐃᒃᐱᐊᕐᔪᒃᒥᐅᑕᐃᑦ ᐊᒻᒪ ᒥᑦᑎᒪᑕᓕᒃᒥᐅᑕᐃᑦ ᓈᒻᒪᒃᓴᙱᑦᑐᑦ ᓄᓘᔮᖕᓂ ᓄᖅᑲᖓᑎᑦᑎᓕᓚᐅᕐᓯᒪᕗᑦ ᐊᖅᑯᑎᒋᔭᐅᔪᒥᑦ ᐊᒻᒪᓗ ᒥᑦᑕᕐᕕᖕᒥᑦ. ᑖᓐᓇ ᐱᔾᔪᑎᒋᓪᓗᓂᐅᒃ ᓈᒻᒪᒃᓴᙱᓐᓂᐅᔪᖅ, ᐅᕿᐊᕈᖅ ᐅᖃᓕᓚᐅᕐᓯᒪᔪᖅ ᐊᖏᒡᓕᒋᐊᖅᑕᐅᓂᕐᒧᑦ ᑐᒃᓯᕋᕈᑎᒋᔭᐅᔪᖅ “ᓈᒻᒪᙱᓗᐊᕐᓂᖓᓂᒃ ᐋᖅᑭᒃᓱᖅᑕᐅᕙᓪᓕᐊᓂᖓᒍ5.”

ᐱᓇᓱᐊᕈᓯᓕᒫᖅ ᑖᒃᑯᐊ ᓄᖅᑲᖅᑎᑦᑎᓯᒪᓚᐅᕐᑐᑦ, ᐅᑯᐊ ᐹᕙᓐᓛᓐᑯᑦ ᓄᓇᕗᒥᑦ ᐃᖅᑲᖅᑐᐃᔨᒃᑯᓐᓂᑦ ᐃᑲᔪᖅᑕᐅᔾᔪᑎᑖᕋᓱᖕᓂᖏᓐᓂᒃ, ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑲᑎᒪᖃᑎᖃᕐᓂᐊᕐᓂᕋᓕᕐᑎᓪᓗᒋᑦ ᑖᒃᑯᓂᖓ ᓄᖅᑲᖅᑎᑦᑎᓯᒪᔪᕕᓂᕐᓂᒃ.

ᑭᒃᑯᓕᒫᓂᒃ ᑐᓴᖅᑎᑦᑎᓂᕐᒧᑦ ᑲᑎᒪᑎᑦᑎᑎᓪᓗᒋᑦ ᓄᓇᕗᒥᑦ ᐊᕙᑎᓕᕆᔨᒃᑯᓐᓂ ᑕᖅᑭᐅᓚᐅᕐᑐᒥᒃ, ᐃᓄᐃᑦ ᑭᒡᒐᖅᑐᐃᔨᒋᔭᐅᔪᑦ ᕿᑭᖅᑖᓘᑉ ᐅᐊᖕᓇᖓᓂᒃ — ᐱᓗᐊᕐᑐᒥᑦ ᒥᑦᑎᒪᑕᓕᒃᒥᑦ — ᐊᐱᕐᓱᑲᑕᓚᐅᕐᑐᑦ ᐱᓕᕆᐊᖑᔫᑉ ᒥᒃᓵᓄᑦ ᐅᒃᐱᕈᓱᓗᐊᙱᑦᑐᓂᒃ ᐊᒻᒪᓗ ᐃᓚᖏᑦ ᓈᒻᒪᒃᓴᙱᑦᑎᐊᒻᒪᕆᒃᖢᑎᒃ.

ᑖᒃᑯᐊ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᖃᐅᔨᓴᖅᐸᓪᓕᐊᑎᓪᓗᒋᑦ, ᐅᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓱᓕ ᐊᑎᓕᐅᕋᓱᓚᐅᙱᑦᑐ ᑲᔪᓯᑎᑦᑎᖁᔨᓂᕐᒥᒃ ᐱᓕᕆᐊᒃᓴᖅ ᐊᖏᒡᓕᒋᐊᖅᑕᐅᔪᒪᓂᖓᓂᒃ, ᑭᓯᐊᓂᓕ ᐱᓕᕆᐊᒃᓴᐅᔪᑦ ᑕᒪᐃᓐᓂᓕᒫᖅ ᐋᒃᑳᖅᑕᐅᓯᒪᙱᒻᒥᔪᑦ.

ᑭᒃᑯᓕᒫᓂᒃ ᑐᓴᖅᑎᑦᑎᓂᕐᒧᑦ ᑲᑎᒪᑎᑦᑎᓂᖅ ᑲᔪᓯᓂᐊᕐᑐᖅ ᐄᐳᕈᓪ 12-ᒥᑦ ᐄᐳᕈᓪ 21-ᒧᑦ.

Share This Story

(1) Comment:

  1. Posted by Mittimatalik on

    Suuqaimmaruluk Qikiqtaniikkut aakkaarulu&armata, aaqqittiaqsimatittingittullaaluungmata inuillu qaujimajanginniq qaujisarnikkuk imarmiutanik piliriaqalauqsimaqquungittit! Piniarningit inungni kiggaqtuiqquujinatik suurlu.

Join the Conversation

Your email address will not be published. Required fields are marked *

*