ᕿᑭᖅᑕᖅᔪᐊᑉ ᑐᓚᒃᑕᕐᕕᖓᓂ ᐃᑲᔪᕐᑐᐃᔪᑦ ᒐᕙᒪᑐᖃᒃᑯᓐᓄ ᐃᑲᔪᖅᑕᐅᔪᒪᔪᑦ

For the English version of this story, please see Qikiqtarjuaq port backers seek federal funding in Ottawa.

ᐃᓱᒪᒋᔭᐅᓂᑯ ᖃᔅᓯᑐᕋᔭᕐᓂᖓ ᓴᓇᓗᑎᒃ ᐃᑎᔪᒥᒃ ᑐᓚᒃᑕᕐᕕᒃᒥ ᕿᑭᖅᑕᖅᔪᐊᕐᒥ ᑎᑭᐅᑎᔪᖅ $350 ᒥᓕᐊᓐ ᐅᖓᑖᓄᑦ, ᐱᓕᕆᐊᒥ ᑲᒪᔨᐅᔪᑦ ᐅᖃᓚᐅᕐᑐᑦ ᑎᓯᐱᕆ 2-ᖑᑎᓪᓗᒍ ᒐᕙᒪᑐᖃᒃᑯᓐᓂᓪᓗ ᐃᑲᔪᖅᑕᐅᔪᒪᓪᓗᑎ ᐱᕙᓪᓕᐊᑎᑦᑎᒃᑲᓐᓂᕈᑎᒃᓴᓂ ᑕᐃᔭᖓᓄᑦ ᑲᓇᑕᒥ “ᐳᐊᕐᕆᔭᑐᐃᓐᓇᕆᐊᖃᖅᑐᒥ” ᐅᑭᐅᕐᑕᖅᑐᕐᒥ ᓄᓇᖃᕐᓂᕐᒧᑦ ᐱᓇᓱᐊᒐᕆᔭᐅᔪᒥᑦ.

“ᐊᑕᐅᓯᕐᒥ ᐱᓕᕆᐊᕐᒥ ᐱᑕᖃᕐᒪᑦ ᐊᕙᑎᓕᕆᔨᒃᑯᓐᓄᑦ ᐊᖏᕐᑕᐅᓯᒪᑦᑎᐊᕐᑐᒥ, ᐃᑲᔪᖅᑕᐅᓪᓗᑎᒡᓗ ᓄᓇᓕᖕᓂ, ᑕᐃᒪᓐᓇᓗ ᓴᓇᔭᐅᓯᑲᐅᑎᒋᔪᓐᓇᖅᖢᓂ. ᐅᓇ ᕿᑭᖅᑕᖅᔪᐊᕐᒥ ᑐᓚᒃᑕᕐᕕᒃᒥ,” ᐅᖃᕐᑐᖅ ᔮᓐ ᕆᔅᓕ, ᐃᒃᓯᕙᐅᑕᖅ ᐅᑭᐅᕐᑕᖅᑐᕐᒥ ᐱᕙᓪᓕᐊᔪᓕᕆᔨᒃᑯᓐᓄᑦ, ᑖᒃᑯᐊᓗ ᐱᓕᕆᐊᖃᖃᑕᐅᓪᓗᑎᒃ ᑖᔅᓱᒥᖓ.

ᐱᓕᕆᐊᕆᔭᐅᔪᒪᔪᖅ ᐃᓱᒪᒋᔭᐅᓚᐅᕐᓯᒪᔫᒐᓗᐊᖅ ᐊᑭᖃᕋᔭᕐᓂᖓᓂᒃ $200 ᒥᓕᐊᓐ ᐅᖓᑎᑦᑎᐊᖓᓂ.

ᒫᓐᓇᒧᓪᓕ, $53.4 ᒥᓕᐊᓐ ᐱᔭᐅᓯᒪᓪᓚᕆᓕᕐᑐᖅ — $13.3 ᒥᓕᐊᓐ ᑖᓚᐃ ᓄᓇᕗᒥᑦ ᒐᕙᒪᒃᑯᓐᓂ ᐊᒻᒪ $40.1 ᒥᓕᐊᓐ ᒐᕙᒪᑐᖃᒃᑯᓐᓂᙶᖅᖢᓂ.

ᑐᓴᒐᒃᓴᓕᐅᕐᑎᓪᓗᒋᑦ ᐋᑐᕚᒥ ᑲᑎᒪᕕᒡᔪᐊᕐᕕᒃᒥ, ᕿᑭᖅᑖᓗᒃ ᑯᐊᐳᕇᓴᓐᑯᓐᓂ ᑭᒡᒐᖅᑐᐃᔪᑦ, ᐅᑯᓄᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐱᓕᕆᐊᓕᕆᔨᖏᑦ, ᐊᒻᒪ ᐅᑭᐅᕐᑕᖅᑐᕐᒥ ᐱᕙᓪᓕᐊᔪᓕᕆᔨᒃᑯᓐᓄᑦ, ᐅᖃᓚᐅᕐᑐᑦ ᐅᓇ ᐃᓄᖕᓄᑦ ᐊᐅᓚᑕᐅᔪᑦ ᑲᒻᐸᓃᑦ ᓴᓇᑐᐃᓐᓇᕆᐊᖃᓕᕐᓂᕋᖅᖢᒋᑦ ᐅᐱᙶᖑᓕᕐᐸᑦ.

ᐅᓇᓕ ᐅᖃᐅᓯᐅᓚᐅᕐᑐᒥ ᐱᒋᐊᕐᕕᐅᓂᐊᕐᓂᕋᖅᑕᐅᓂᑯᒥ 2026 ᐊᐅᔭᖓᓂ ᑐᖓᐅᑦᑎᓯᒪᓂᕐᓴᖅ. ᓴᓇᔭᐅᓂᐊᕋᓱᒋᔭᐅᔪᖅ 2029 ᑎᑭᓪᓗᒍ, ᐊᒻᒪ ᐊᑐᕐᑕᐅᓕᕐᓗᓂ 2030-ᒥ.

“ᖃᓄᐃᓕᐅᕐᑐᖃᕆᐊᖃᕐᒪᑦ, ᐊᒻᒪᓗ ᐃᓱᒪᓪᓗᑕ ᐱᓕᕆᖃᑎᒌᒍᑎᐅᓇᔭᕐᓂᖓᓂ ᓇᖕᒥᓂᖅ ᐱᓕᕆᐊᖃᖅᑐᓂᒃ, ᐃᓄᐃᑦ ᓄᓇᖓᓃᑦᑐᓂᒃ ᐊᒻᒪ ᒐᕙᒪᒃᑯᓐᓂ,” ᕆᔅᓕ ᐅᖃᕐᑐᖅ.

ᓄᑖᙳᕆᐊᖅᑕᐅᓯᒪᔪᑦ ᖃᓄᐃᓕᐅᕈᑎᒃᓴᐃ ᐊᑭᓕᐅᑎᐅᓂᐊᕐᑐᓂ ᑎᑭᑎᑦᑎᓯᒪᔪᑦ $350 ᒥᓕᐊᓐ ᑖᓚᓄᑦ, ᐊᔾᔨᒌᙱᑦᑐᓂ ᓴᓇᔭᐅᕙᓪᓕᐊᓂᐊᕐᓗᑎ ᐊᑐᖃᑦᑕᕐᓂᐊᖅᑐᓄᑦ ᒪᑯᓄᖓ ᐃᖃᓗᒐᓱᓕᕆᔨᓄᑦ, ᓴᐳᓐᓂᐊᖅᑎᓄᑦ ᑲᓇᑕᒥ, ᑭᓱᓕᕆᓂᕐᒧᑦ ᑐᓚᖃᑦᑕᕋᔭᕐᑐᓄᑦ ᐊᒻᒪᓗ ᑲᓇᑕᐅᑉ ᓯᒡᔭᖏᓐᓄᑦ ᓴᐳᓐᓂᐊᖅᑎᓄᑦ, ᐅᖃᒃᑲᓐᓂᖅᑐᖅ.

ᕆᔅᓕ, ᐱᓕᕆᐊᖃᓕᖃᑕᐅᓯᒪᔪᖅ ᓅᕙ ᓯᑰᓯᐊᒥ ᑕᕆᐅᕐᒥᐅᑕᓕᕆᔨᓄᑦ ᑭᓕᐅᕗᐊᑐ ᑕᕆᐅᕐᒥᐅᑕᓂᒃ (Clearwater Seafoods Inc.) ᑭᓯᐊᓂᓕ ᑖᒃᑯᐊ ᐱᒋᔭᐅᓕᕐᑐᑦ ᐊᓪᓚᓄᑦ ᑲᑐᔾᔨᖃᑎᒌᓄᑦ ᒥᒃ’ᒫᒃ ᓄᓇᖃᖅᑳᖅᑐᓄᑦ, ᖃᐅᔨᓕᓚᐅᕐᒪᑕ 56,000 ᑕᓐᔅᓂ ᑕᕆᐅᕐᒥᐅᑕᕐᓂ ᐱᔭᐅᔪᓂᒃ ᐅᕙᓂ ᕿᑭᖅᑖᓘᑉ ᐃᑭᖓᓂ ᐊᐅᓪᓚᖅᑎᑕᐅᓚᐅᕐᓂ ᓅᒃ ᖃᓛᖡᑦ ᓄᓇᓄᒃ ᐱᓕᕆᐊᖑᓂᐊᕐᒪᑕ 2024-ᖑᑎᓪᓗᒍ.

“ᐃᓱᒪᒐᑦᑕ ᖃᓄᐃᓕᐅᕈᑎᐅᔪᓄᑦ ᐃᓚᐅᓕᕈᒪᓪᓗᑕ,” ᐅᖃᕐᑐᖅ.

ᕿᑭᖅᑖᓗᒃ ᑯᐊᐳᕇᓴᓐᑯ ᐊᖓᔪᖅᑳᖓ ᕼᐃᐅᕆ ᕕᓕᐅᕋᑎ ᐅᖃᓚᐅᕐᑐᖅ ᐅᓇ ᑐᓚᒃᑕᕐᕕᒃ ᐃᑲᔪᕈᑎᐅᓇᔭᕐᓂᖓᓂ ᓄᓇᕗᒥᑦ ᐱᕙᓪᓕᐊᔪᓕᕆᓂᒃᑯᑦ ᑮᓇᐅᔭᓕᐅᕈᑎᖃᒃᑲᓐᓂᕐᓂᕐᓴᐅᓗᑎ ᑕᕆᐅᖏᓐᓂ.

“ᐊᐃᑦᑖᖑᒐᓗᐊᖅ, ᐅᐊᖕᓇᖅ, ᐅᑭᐅᕐᑕᖅᑐᖅ ᖃᐅᔨᒪᔭᐅᙱᓗᐊᕐᒪᑦ. ᒫᓐᓇᐅᓕᕐᑐᕐᓕ ᒐᕙᒪᑐᖃᒃᑯᑦ ᐅᑭᐅᕐᑕᖅᑐᕐᒥ ᐱᓕᕆᐊᖃᕐᓂᕐᓴᐅᓕᕆᐊᓖᑦ,” ᐅᖃᕐᑐᖅ.

ᐅᑭᐅᕐᑕᖅᑐᕐᒥ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᓐᑯᓐᓄᑦ ᑐᑭᒧᐊᖅᑎᑦᑎᔨ ᓵᓐ ᓖᑦ ᐅᖃᓚᐅᕐᑐᖅ ᐱᓕᕆᕝᕕᐅᑉ ᐃᓂᖓ ᕿᑭᖅᑕᖅᔪᐊᕐᒥ, ᐊᖅᑯᓵᕐᕕᐅᓂᖓᓂ ᐅᕗᙵᐅᔪᓄᑦ ᓱᓪᓗᐊᓗᒃ ᐅᐊᓕᓂᖅᒥ ᕿᑭᖅᑖᓗᒃᒧ ᑕᕆᐅᒃᑯᑦ ᐊᖅᑯᑎᒃᑯᑦ, ᑕᐃᒪᓐᓇᓗ ᐅᒥᐊᕐᔪᐊᕐᓂ ᐅᓴᒡᕕᐅᕙᒡᓗᓂ, ᐊᒃᑕᑯᓂ ᐅᓯᓖᔭᕐᕕᐅᓗᓂ ᐊᒻᒪᓗ ᐃᒥᕐᑕᕐᕕᐅᕙᒡᓗᓂ ᑕᕆᐅᖑᙱᑦᑐᒥ.

“ᐅᓇ ᐊᖅᑯᓵᕐᕕᐅᖃᑦᑕᕋᔭᕐᒪᑦ ᐅᒥᐊᕐᓄᑦ,” ᐅᖃᕐᑐᖅ, ᑕᐃᓪᓗᓂᐅᒃ “ᐊᔾᔨᒌᙱᑦᑐᓄᑦ ᐊᑐᕐᑕᐅᔪᓐᓇᕐᓗᓂ” ᐊᑐᕐᑕᐅᖃᑦᑕᕐᒥᓗᓂ ᑲᓇᑕᒥ ᓴᐳᓐᓂᐊᖅᑎᓄᑦ, ᑐᐊᕕᕐᓇᖅᑐᓕᕆᔨᓄᓪᓗ, ᐊᒻᒪ ᐃᓄᒋᐊᓂ ᐅᒥᐊᕐᑐᕐᕕᐅᕙᒃᑐᓄᑦ ᐳᓚᕋᖅᑐᓕᕆᓂᒃᑯᑦ ᑖᒃᑯᐊ ᐊᑐᐃᓐᓇᖃᕐᓂᕐᓴᐅᓕᕐᓗᑎ ᐊᐅᔪᐃᑦᑐᖅ ᒥᕐᖑᐃᕐᓯᕕᒃᒧᙵᐅᔭᕆᐊᒃᓴᖅ.

ᓖᑦ ᐅᖃᓚᐅᕐᑐ ᐱᑕᖃᓕᕇᕐᓂᖓᓂ 3,800 ᕖᑦᓂ ᑕᑭᓂᓕᖕᒥ, ᐅᕝᕙᓘᓐᓃᑦ 1,150 ᒦᑕᔅ, ᖃᖓᑕᓲᕐᒧᑦ ᒥᕝᕕᒃᒥ ᑐᓚᒃᑕᕐᕕᐅᑉ ᓴᓂᐊᓃᑦᑐᒥ ᐊᒻᒪᓗ “ᐊᑐᕐᑕᐅᔪᓐᓇᖅᖢᑎ ᑕᒃᖠᒋᐊᖅᑕᐅᒃᑲᓐᓂᕐᓗᓂ ᐅᓇᑕᖅᑐᒃᓴᓄᑦ,” ᐅᖃᕐᑐᖅ ᐅᖃᖅᖢᓂ ᐅᑭᐅᕐᑕᖅᑐᕐᒥ ᐱᕙᓪᓕᐊᔪᓕᕆᔨᒃᑯᑦ ᐅᖃᖃᑎᖃᕐᓯᒪᓕᕐᓂᖏᓐᓂᒃ ᑲᓇᑕᒥ ᓴᐳᓐᓂᐊᖅᑎᓂᒃ ᓴᓇᔪᒪᓂᕋᖅᖢᑎ ᐱᓕᕆᕝᕕᒃᓴᒥ ᑕᐃᑲᓂ.

ᓯᕗᓪᓕᖅᐹᕐᓕ ᐊᕕᒃᑐᕐᓯᒪᓂᒃᑯᑦ ᐱᓕᕆᓂᐊᕐᑐᑦ ᐋᖅᑭᒃᓱᐃᓗᓂ ᑕᕆᐊᒥ 10 ᒦᑕᓂ ᐃᑎᑎᒋᓇᔭᕐᑐᒥ ᓴᓂᐊᓂ ᐅᒥᐊᕐᔪᐊᓄᑦ ᑐᓚᒃᓯᒪᕝᕕᐅᔪᓐᓇᕐᓂᐊᕐᒪᑦ. ᑭᖑᓂᐊᒍᓪᓕ ᐱᓕᕆᐊᒃᓴᐃᑦ ᒪᐅᓇ 12 ᐊᒻᒪ 14 ᒦᑕᓂ ᐃᑎᑎᒋᔪᓂ ᓴᓇᓗᑎ “ᐊᖏᓛᓄᑦ ᐅᒥᐊᕐᔪᐊᓄᑦ ᑲᓇᑕᒥ ᑐᓚᒃᓯᒪᔪᓐᓇᕐᓂᐊᕐᒪᑕ ᐱᓕᕆᕝᕕᑦᑎᓐᓂ.”

ᑕᐃᒪᓐᓇᑎᒋ ᐃᑎᔪᒦᑦᑐᒥ ᑐᓚᒃᑕᕐᕕᒃᑕᖃᙱᒻᒪᑦ ᑕᒫᓂ, ᓖᑦ ᐅᖃᕐᑐᖅ.

ᐸᕐᓇᐅᑎᒋᔭᐅᔪᑦ ᐃᓚᖃᕐᒥᔪᖅ 75 ᒦᑕᓂ ᑕᑭᓂᓕᖕᒥ ᐃᒃᓴᕐᕕᒃᒥᑦ, ᑭᕕᒃᓯᔾᔪᑎᒥ ᐅᓯᖐᔮᕐᑐᓄᑦ, ᓴᐳᓐᓂᐊᖅᑎᓄᑦ ᐊᒻᒪ ᐊᐅᓚᑦᑎᔨᓄᑦ ᑎᑎᕋᕐᕕᒃᓂᑦ ᐊᒻᒪ 275 ᒦᑕᓂ ᑕᑭᓂᓕᒃᒥ ᐊᖅᑯᑎᓕᐅᕐᓗᑎᒃ.

ᕕᓕᐅᕋᑎ ᐅᖃᓚᐅᕐᑐᖅ ᐱᔾᔪᑎᒋᔭᐅᔪᕐᓕ ᖃᓄᐃᓕᐅᕐᓂᖏᓐᓂ ᐋᑐᕚᒥ ᐅᑯᐊ ᕿᑭᖅᑕᖅᔪᐊᕐᒥ ᐱᓕᕆᐊᖑᔪᒪᔪᖅ ᒐᕙᒪᑐᖃᒃᑯᑦ ᐱᓕᕆᔨᖏᓐᓄᓪᓚᕆᒃ ᖃᐅᔨᒪᔭᐅᓗᑎᒃ, ᒪᑯᐊ ᐊᕙᑎᓕᕆᓂᕐᒧᑦ ᐊᒻᒪ ᐱᖁᔭᓕᕆᓂᒧᑦ ᐱᓕᕆᐊᒃᓴᐃᑦ ᐱᐊᓂᒃᑕᐅᓯᒪᓕᖅᖢᑎᒃ.

“ᐱᓕᕆᐊᖃᕐᓯᒪᒐᑦᑕ ᑖᔅᓱᒥᖓ ᐊᕐᕌᒎᓕᕐᑐᓂ 15-ᓂ, ᑕᐃᒪᓕ ᒫᓐᓇ ᑕᕝᕗᙵᕈᑦᑕ ᓈᒻᒪᑐᐃᓐᓇᓕᕐᑐᖅ ᐅᖃᕈᓐᓇᕐᓗᑕᓗ, “ᑲᓇᑖ ᐱᓕᕆᑐᐃᓐᓇᕆᐊᖃᓕᕐᑐᒍᑦ,” ᕕᓕᐅᕋᑎ ᐅᖃᕐᑐᖅ.