ᕿᓐᓂᕐᕕᒃ ᓂᕿᓪᓚᑦᑖᓂ ᓂᐅᕕᕐᕕᒃ ᒪᑐᐃᓪᓚᕆᒃᐳᖅ

For the English version of this story, please see Qinnirvik Country Food and Bulk Store opens in Iqaluit.

ᕿᓐᓂᕐᕕᒃ ᓂᕿᓪᓚᑦᑖᓄᑦ ᐊᒻᒪ ᐃᓗᐃᑦᑐᓂ ᓂᐅᕕᕐᕕᒃ ᐃᖃᓗᖕᓂ ᒪᑐᐃᓪᓚᕆᒃᐳᖅ ᐊᐅᓚᑕᐅᓂᖓᓂ.

ᐊᖓᔪᖅᑳᖓᓂ ᑲᑐᔾᔨᖃᑎᒌᖓ, ᖃᔪᖅᑐᕐᕕᒃ ᓄᓇᓕᖕᓂ ᓂᕿᑖᕐᕕᖓ, ᖁᕕᐊᓱᒍᑎᖃᓚᐅᖅᐳᖅ  ᓂᐅᕕᕐᕕᐅᑉ ᒪᑐᐃᓪᓚᕆᖕᓂᖓᓂ ᕕᕗᐊᕆ 28−ᒥ. ᕿᓐᓂᕐᕕᒃ ᐊᑭᓖᕌᓂᒃᓯᒪᕗᑦ $140,000−ᓂ 21−ᓄᑦ ᐊᖑᓇᓱᒃᑎᓄᑦ 6−ᖑᔪᓂ ᓄᓇᓕᐅᔪᓂ ᓂᕿᓪᓚᑦᑖᓄᑦ ᖁᓕᕈᐊᖏᓐᓄᑦ ᐊᒻᒪ ᖁᐊᖃᐅᑎᖏᓐᓄᑦ.

ᐃᓂᖃᖅᑐᒥ ᓴᓂᓕᐊᓂ ᓂᕿᑖᕐᕕᖕᒥ 655 ᒪᑦᑖᖅ ᐊᖅᑯᑎᖓᓂ, ᒥᑭᑦᑐᖅ ᑭᓯᐊᓂ ᐋᖅᑭᒃᓱᑦᑎᐊᖅᑕᐅᓯᒪᔪᒥ ᓂᕿᓄᑦ ᓂᐅᕕᕐᕕᒃ ᐋᖅᑭᒋᐊᑦᑎᐊᖅᓯᒪᕗᖅ ᑕᐃᒪᙵᓂ ᖃᐅᔨᓴᕈᑕᐅᓪᓗᓂ ᐊᐅᓚᓂᖓᓂ ᑎᓯᐱᕆᒥ ᐊᒻᒪ ᓂᐱᑭᑦᑐᒥ ᐊᕿᑦᑐᒥ ᒪᑐᐃᖅᑕᐅᓂᖓᓂ ᔭᓄᐊᕆᒥ, ᐅᖃᓚᐅᖅᐳᖅ ᕗᕌᓐᓰᓐ ᑑᓴᑦ, ᓂᕿᑖᕐᕕᐅᑉ ᐃᓱᒻᒥᖅᑐᐃᔨᐅᖃᑕᐅᔪᒥ.

ᕗᕌᓐᓰᓐ ᑑᓴᑦ, ᓂᕿᑖᕐᕕᖕᒥ ᐃᓱᒻᒥᖅᑐᐃᔨᐅᖃᑕᐅᔪᖅ ᕿᓐᓂᕐᕕᒃ ᓂᕿᓪᓚᑦᑖᓄᑦ ᐊᒻᒪ ᐃᓗᐃᑦᑐᓂ ᓂᐅᕕᕐᕕᖓᓂ, ᑕᑯᒃᓴᐅᑎᑦᑎᕗᖅ ᓄᑖᓂ ᐃᖃᓗᖕᓂ ᓂᐅᕕᐊᒃᓴᐅᔪᓂ ᕕᕗᐊᕆ 28−ᒥ ᓂᐅᕕᕐᕕᖕᒥ. (ᑎᐊᕆᓐ ᓕᐊᑦᔅ ᐊᔾᔨᖁᑎᖓ)

“ᓂᕿᓪᓚᑦᑖᓂ ᐊᑐᐃᓐᓇᖃᖅᖢᓂ ᓂᐅᕕᕐᕕᖕᒥ ᑐᑭᖃᖅᐳᖅ ᐅᑎᖅᑎᕆᓂᕐᒥ ᐊᔪᙱᓐᓂᑦᑎᓐᓂ ᓂᕿᓄᑦ ᐱᓕᕆᔾᔪᓯᐅᔪᓄᑦ,” ᐅᖃᓚᐅᖅᐳᖅ.

“ᑐᑭᖃᖅᐳᖅ ᑲᑎᙵᓂᖃᕐᓂᕐᒥ ᓄᓇᑦᑎᓐᓄᑦ, ᐃᓕᖅᑯᓯᒧᑦ ᐊᒻᒪ ᐃᒻᒥᖕᓄᑦ. ᓴᓇᓂᕐᒧᑦ ᓯᕗᓂᒃᓴᐅᔪᒥ ᑕᐅᕘᓇ ᓂᕿᓪᓚᑦᑖᓂ ᐃᑲᔪᖅᓱᐃᓂᐅᕗᖅ ᐋᓐᓂᐊᖃᕐᓇᙱᓐᓂᑦᑎᓐᓄᑦ ᐊᒻᒪ ᖃᓄᐃᙱᑦᑎᐊᕐᓂᑦᑎᓐᓄᑦ.”

ᓂᐅᕕᕐᕕᒃ ᐊᑐᐃᓐᓇᖃᖅᑎᑦᑎᕗᖅ ᐃᖃᓗᖕᓂ ᕿᑭᖅᑕᕐᔪᐊᕐᒥ, ᑕᓗᕐᔪᐊᖅ, ᐃᒃᐱᐊᕐᔪᒃ ᐊᒻᒪ ᑲᖏᖅᖢᒑᐱᖕᒥ ᐊᒻᒪ ᓇᐅᔮᓂ; ᑐᒃᑐᒥ ᓇᐅᔮᓂᑦ ᐊᒻᒪ ᐊᕐᕕᐊᓂᑦ, ᒪᒃᑖᖅ ᑕᓗᕐᔪᐊᓂ, ᐃᒃᐱᐊᕐᔪᒃ ᐊᒻᒪ ᕿᑭᖅᑕᕐᔪᐊᕐᒥ; ᐊᒻᒪ ᐅᒥᖕᒪᖕᓂ ᑕᓗᕐᔪᐊᕐᒥ.

ᐊᖑᓇᓱᒃᑏᑦ ᐋᖅᑭᒃᓱᖅᑕᐅᓲᖑᕗᑦ ᐊᑕᐅᓯᐅᔪᒥ ᓂᕿᑖᕐᕕᐅᑉ ᐱᓕᕆᖃᑎᒋᔭᖏᓐᓂ, ᐱᓕᕆᐊᒃᓴᖅ ᓄᓇᕗᒻᒥ ᐃᖃᓗᖕᓂ−ᑐᙵᕕᓕᖕᒥ ᑲᑐᔾᔨᖃᑎᒌᖑᔪᒥ.

ᒪᑐᐃᖅᑕᐅᓪᓚᕆᖕᓂᖓ ᐃᓱᓕᓐᓂᐅᔪᒥ ᐅᓄᕐᓂᖅᓴᐅᔪᒥ ᐊᕐᕌᒍᓂ ᒪᕐᕉᖕᓂ ᐱᓕᕆᓂᐅᔪᓂ ᐱᓇᓱᐊᕐᓂᕐᒥ ᑮᓇᐅᔭᖃᖅᑎᑕᐅᓂᕐᒥ, ᓄᑖᙳᕆᐊᖅᑎᑦᑎᓂᕐᒥ ᐃᓂᒃᓴᖓᓂ ᐊᒻᒪ ᓴᓇᓂᕐᒥ ᐱᓕᕆᖃᑎᖃᕐᓂᐅᔪᓂ ᐱᓕᕆᖃᑎᒋᔭᐅᔪᓂ ᐊᒻᒪ ᐊᖑᓇᓱᒃᑎᓂ, ᐅᖃᓚᐅᖅᐳᖅ ᑑᓴᑦ.

ᐃᓄᒃᑎᑐᑦ, ᕿᓐᓂᕐᕕᒃ ᑐᑭᖃᖅᐳᖅ “ᐃᓂᐅᔪᒥ ᐱᕈᔭᓄᑦ.”

ᐱᒋᐊᕈᑕᐅᔪᖅ ᐅᕙᙶᖅᐳᖅ ᓂᕿᑖᕐᕕᐅᑉ ᓂᕿᓂ ᐴᖅᑲᖅᓯᒪᔪᓂ ᐱᓕᕆᐊᖑᔪᒥ. ᐱᒋᐊᖅᑎᑕᐅᓪᓗᓂ ᔪᓚᐃᒥ, ᐱᓕᕆᐊᖑᔪᖅ ᑐᕌᕋᓱᐊᖅᐳᖅ ᑐᓂᓯᓂᕐᒥ ᐃᓄᖕᓂ ᐋᓐᓂᐊᖃᕐᓇᙱᑦᑐᓂ ᐊᒻᒪ ᐊᑭᑐᓗᐊᙱᑦᑐᓂ ᓂᕿᓂᑦ, ᐃᓚᖃᖅᑐᒥ ᓂᕿᓪᓚᑦᑖᓂ.

ᓂᐅᕕᐊᒃᓴᖃᓲᖑᒋᕗᖅ ᐱᕈᖅᑐᕕᓂᕐᓂ, ᐃᒐᔪᖅᓯᐅᑎᓂ, ᖃᔪᕐᓂ ᐊᒻᒪ ᐃᓚᒃᓴᖓᓂ ᑐᙵᕕᐅᔪᓂ, ᐊᒻᒪᓗ ᐊᕙᑎᒧᑦ ᑐᙵᓇᖅᑐᓂ ᓴᓗᒻᒪᖅᓴᐅᑎᓂᓪᓘᓐᓃᑦ.

ᐊᑭᖏᑦ ᐊᑐᐃᓐᓇᐅᕗᑦ ᑎᓱᕙᓪᓕᐊᔪᒥ ᐊᖏᒡᓕᕙᓪᓕᐊᔪᒥ, ᓂᕿᑖᕐᕕᒃ ᑐᑭᓕᐅᕆᓂᖓᓐᓂ “ᓂᐅᕕᐊᒃᓴᖃᕐᓂᕐᒥ ᐊᖏᔫᑕᐅᓂᐅᔪᓂ ᐊᑭᖏᓐᓂ, ᕿᑎᖅᐸᓯᐊᓂ ᐊᑭᖏᓐᓂ, ᐊᒻᒪ ᐊᑦᑎᓛᖑᔪᒥ ᐊᑭᖏᓐᓂ,” ᐅᖃᓚᐅᖅᐳᖅ ᑑᓴᑦ.

ᕼᐋᓕ ᐸᐃᑕᓐ ᓂᕿᓪᓚᑦᑖᓄᑦ ᐊᑐᐃᓐᓇᖃᕐᓂᕐᒥ ᐃᑲᔪᖅᑎᐅᔪᖅ ᖃᔪᖅᑐᕐᕕᒃ ᓄᓇᓕᖕᓂ ᓂᕿᑖᕐᕕᖕᒥ, ᐸᕐᓇᒃᐳᖅ ᐃᕆᓴᐃᓂᕐᒥ ᓂᕐᓕᕐᒥ ᕕᕗᐊᕆ 28−ᒥ ᑐᓐᓂᖅᑯᑕᐅᔪᒥ ᐃᖃᓗᖕᓂ ᐊᖑᓇᓱᒃᑐᓕᕆᔨᒃᑯᓐᓂ ᒥᑭᒋᐊᕐᓂᐊᖅᑎᒃᑯᓪᓗ ᑲᑐᔾᔨᖃᑎᒌᖑᔪᓂ. (ᑎᐊᕆᓐ ᓕᐊᑦᔅ ᐊᔾᔨᖁᑎᖓ)

ᐊᑭᖏᑦ ᑕᐅᑦᑐᒧᑦ ᐅᖃᐅᓯᐅᕗᑦ ᑲᓚᓕᖕᓂ-ᓇᓗᓇᐃᒃᑯᓯᖅᓯᒪᔪᓂ “ᐃᖃᓗᑦ, ᓇᓄᖅ ᐊᒻᒪ ᐊᓪᓚᙳᐊᖅ ᕿᓚᓗᒐᖅ” ᑎᑎᕋᐅᔭᖅᓯᒪᓂᐅᔪᓂ ᑭᒡᒐᖅᑐᐃᓂᕐᒥ ᐊᑭᖏᓐᓂ ᓇᓗᓇᐃᒃᑯᑕᖏᓐᓂ. ᓂᐅᕕᖅᑐᑦ ᐅᔾᔨᕐᓇᙱᑦᑐᒥ ᐊᒻᒪ ᓂᐱᖃᙱᓪᓗᑎᒃ ᑎᒃᑯᐊᕆᔪᓐᓇᖅᐳᑦ ᑎᑎᕋᐅᔭᒐᐅᔪᒧᑦ ᒪᓕᒃᑐᒥ ᓂᕈᐊᕐᓂᖓᓂ ᐊᑭᖓᓂ ᑎᒃᑯᐊᕆᓂᖏᓐᓂ ᐊᑭᓖᕝᕕᖓᓂ.

ᐊᑭᖏᑦ ᐊᑦᑎᖕᓂᖅᓴᐅᑎᑕᐅᕗᑦ ᑕᐃᒃᑯᓇᙵᑦ ᐊᓯᖏᓐᓂ ᓄᓇᓕᖕᓂ ᓂᕿᑖᕐᕕᓂ ᓂᐅᕕᕐᕕᐅᔪᓂ. ᓂᕿᑖᕐᕕᒃ ᐆᒃᑐᕋᕋᓱᐊᕆᕗᖅ ᐊᑭᑭᓐᓂᖅᓴᐅᑎᑦᑎᓇᓱᐊᖅᐳᑦ ᐋᒪᓵᓐᒥ ᐊᒃᓱᕈᕐᓂᐅᔪᒥ ᐱᐅᓯᒋᐊᖅᑎᑦᑎᓂᕐᒧᑦ ᓂᕿᒃᓴᖃᑦᑎᐊᕐᓂᕐᒥ ᓄᓇᓕᖕᓂ, ᑑᓴᑦ ᐅᖃᓚᐅᖅᐳᖅ.

ᓂᕿᑖᕐᕕᒃ ᕿᒥᕐᕈᒋᕗᖅ ᐱᓕᕆᓂᐅᔪᓂ ᓴᖅᑭᑎᑦᑎᓂᕐᒥ ᑕᐃᒪᐃᒐᔪᒃᑐᓂ ᑮᓇᐅᔾᔭᒃᓴᓂᐅᔪᓂ ᐊᖑᓇᓱᒃᑎᓄᑦ ᐃᓗᓪᓕᖅᓱᐃᓲᓂ ᖁᐊᖃᐅᑎᖏᓐᓂ ᓂᕿᓪᓚᑦᑖᓂ, ᐅᖃᓚᐅᖅᐳᖅ ᑑᓴᑦ.

ᕿᓐᓂᕐᕕᒃ ᑮᓇᐅᔭᖃᖅᑎᑕᐅᕗᖅ Citi ᑐᙵᕕᐅᔪᒥ, ᑲᓇᑕᒥ ᒐᕙᒪᒃᑯᓐᓂ ᐅᕘᓇ ᓄᓇᓕᖕᓂ ᐱᔨᑦᑎᕋᕐᓂᕐᒧᑦ ᐅᑎᖅᑎᕆᓂᐅᔪᒥ ᑮᓇᐅᔭᖃᖅᑎᑕᐅᓂᕐᒥ ᐊᒻᒪ ᑲᓇᑕᒥ ᐅᑭᐅᖅᑕᖅᑐᒥ ᑮᓇᐅᔾᔭᒃᓴᓂᕐᒧᑦ ᐱᕙᓪᓕᐊᑎᑕᐅᓂᕐᒥ ᐱᒡᒍᔾᔨᔨᓂ, ᐊᒻᒪᓗᑦᑕᐅᖅ ᑲᓇᑕᒥ ᐸᕐᓇᐃᓂᕐᒧᑦ ᐊᒻᒪ ᐊᑐᕐᓂᕐᒥ ᓄᓇᒥ ᐱᕈᖅᑐᕕᓂᓕᐅᕐᓂᕐᒧᑦ ᑐᙵᕕᐅᔪᒥ, ᓄᓇᓕᐸᐅᔭᒥ ᐃᖃᓗᖕᓂ ᐊᒻᒪ ᓄᓇᕗᒻᒥ ᒐᕙᒪᒃᑯᑦ ᐃᓕᖅᑯᓯᓕᕆᔨᒃᑯᓐᓂ ᐊᒻᒪ ᐃᑦᑕᕐᓂᓴᓕᕆᓂᕐᒥ.