ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓᑦ ᐊᓇᐅᔭᐅᕗᖅ ᖃᕋᓴᐅᔭᒃᑯᑦ ᐱᒋᐊᖅᑕᐅᓂᐅᔪᒥ

For English version, see Billing database compromised in QEC cyberattack, says VP

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓᑦ ᖃᐅᔨᓴᖅᐳᑦ ᒫᓐᓇᓕᓴᐅᔪᒥ ᖃᕋᓴᐅᔭᒃᑯᑦ ᐱᒋᐊᖅᑕᐅᓂᐅᔪᒥ ᖃᕋᓴᐅᔭᑎᒍᑦ ᐱᓕᕆᔾᔪᓯᐅᔪᓂ ᐊᑦᑕᕐᓇᖅᑐᒦᑎᑦᑎᑐᐃᓐᓇᕆᐊᖃᕐᓂᖓᓂ ᑮᓇᐅᔭᒃᑯᕕᐅᑉ ᑐᓴᖅᑕᐅᔪᒃᓴᓂ ᓇᓕᐊᓱᐃᓐᓇᓂ ᓂᐅᕕᖅᐸᒃᑐᓂ.

ᓄᓇᕘᑉ ᐆᒻᒪᖅᑯᑎᓕᕆᓂᕐᒧᑦ ᑐᓂᓯᔨᐅᔪᑦ ᐅᖃᐅᓯᖃᓚᐅᖅᐳᑦ ᔭᓄᐊᕆ 19−ᒥ ᑲᓱᖃᑎᒌᒃᓯᒪᔪᒥ ᓱᕋᖅᑕᐅᓚᐅᕐᓂᖓᓂ ᔭᓄᐊᕆ 15−ᒥ. ᐱᒋᐊᖅᑕᐅᓂᐅᔪᒥ ᓄᖅᑲᖅᑎᑦᑎᓚᐅᖅᐳᖅ ᑎᒥᖁᑕᐅᔫᑉ ᓂᐅᕕᖅᐸᒃᑐᓂ ᐸᖅᑭᓂᐅᔪᒥ ᐊᒻᒪ ᐊᓪᓚᕝᕕᓕᕆᓂᕐᒥ ᖃᕋᓴᐅᔭᑎᒍᑦ ᐱᓕᕆᔾᔪᓯᖓᓐᓂ.

ᐃᑭᐊᖅᑭᕕᖓᒍᑦ ᔭᓄᐊᕆ 20−ᒥ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓᑦ ᐅᓂᒃᑳᕆᓚᐅᖅᐳᑦ ᐅᑯᐊ ᐱᔨᑦᑎᕋᕐᓂᐅᔪᑦ ᓱᓕ ᐊᑐᐃᓐᓇᐅᓚᐅᙱᓚᑦ.

ᐊᐅᓚᐅᑎᖃᕐᕖᑦ ᐊᒃᑐᖅᑕᐅᓯᒪᙱᓚᑦ ᓱᕋᐃᓂᐅᔪᒥ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓᑦ ᓇᓗᓇᐃᖅᓯᓚᐅᖅᐳᖅ ᑎᑭᑎᑦᑎᓯᒪᓂᖏᓐᓂ ᖃᕋᓴᐅᔭᑎᒍᑦ ᒥᐊᓂᖅᓯᓂᕐᒧᑦ ᖃᐅᔨᒪᕐᔪᐊᖅᑐᓂ ᐊᒻᒪ ᓄᓇᕗᒻᒥ ᒐᕙᒪᒃᑯᑦ ᖃᕋᓴᐅᔭᓃᑦᑐᓂ ᓄᑖᙳᖅᐸᓪᓕᐊᓂᐅᔪᒥ ᑲᑎᙵᓂᐅᔪᓂ ᐃᓱᒪᓕᐅᕆᓂᕐᒥ ᐊᖏᓂᖓᓂ ᐱᒋᐊᖅᑕᐅᓂᐅᔪᒥ.

“ᖃᐅᔨᑐᐊᕋᑦᑕ ᐊᑲᐅᙱᓕᐅᕈᑎᖃᑐᐃᓐᓇᕆᐊᖃᕐᓂᖓᓂ, ᐱᒋᐊᖅᑎᑦᑎᓚᐅᖅᐳᒍᑦ ᑐᐊᕕᕐᓇᖅᑐᒥ ᑭᐅᓂᕐᒧᑦ ᐸᕐᓇᐅᑎᒥ ᐊᐅᓚᑦᑎᓂᕐᒧᑦ ᖃᓄᐃᓐᓂᐅᔪᒥ,” ᐅᖃᓚᐅᖅᐳᖅ ᕆᒃ ᕼᐊᓐᑦ, ᐊᖓᔪᖅᑳᖅ ᐊᒻᒪ ᐊᐅᓚᑦᑎᔨᒻᒪᕆᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓᓐᓂᑦ, ᑐᓴᒐᒃᓴᓕᐊᖑᔪᒥ.

“ᑕᐅᑐᒃᑕᑐᐊᖃᑲᐃᓐᓇᕐᓂᑦᑎᓐᓂ ᐅᑎᕐᓂᕐᒧᑦ ᑕᐃᒪᐃᒐᔪᒃᑐᒥ ᐊᐅᓚᑦᑎᓂᐅᔪᒧᑦ ᐃᓱᒪᓕᐅᕆᓂᑦᑎᓐᓂ ᑭᓱᓂ ᑐᓴᖅᑕᐅᔪᒃᓴᓂ ᐊᒃᑐᖅᑕᐅᓯᒪᑐᐃᓐᓇᕆᐊᖃᕐᓂᖏᓐᓂ.”

ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓᑦ ᐊᔭᐅᕆᕗᑦ ᓂᐅᕕᖅᐸᒃᑐᓂ ᓇᐅᑦᑎᖅᓱᑦᑎᐊᕐᓂᕐᒥ ᑮᓴᐅᔭᒃᑯᕕᖕᒥ ᐊᒻᒪ ᐊᑭᓕᒃᓴᓂᒍᒻᒥ ᐊᐅᒃᑕᔫᖓᓂ ᓱᖏᐅᓐᓇᙱᑦᑐᒥ ᖃᓄᐃᓕᐅᕐᓂᐅᔪᓂ ᐊᒻᒪ ᐃᓱᒪᒃᓴᖅᓯᐅᕆᓗᑎᒃ ᓄᑖᙳᕆᐊᖅᑎᑦᑎᓂᖏᓐᓂ ᓇᑭᑦᑕᕆᐊᓕᖕᒥ ᐃᓯᕈᓐᓇᐅᑎᖓᓐᓂᒃ.

ᓄᓇᕗᒻᒥ ᓯᕗᓕᖅᑎ P.J. ᐊᕿᐊᕈᖅ ᑐᓴᒐᒃᓴᓕᐅᓚᐅᖅᐳᖅ ᔭᓄᐊᕆ 19−ᒥ ᑕᐃᓯᓪᓗᓂ ᐱᒋᐊᕈᑕᐅᔪᒥ ᐱᕋᔭᖕᓇᐅᓂᖓᓂ.

“ᖃᐅᔨᒪᕐᔪᐊᖅᑐᓂ ᖃᕋᓴᐅᔭᑎᒍᑦ ᒥᐊᓂᖅᓯᓂᕐᒧᑦ ᐊᒻᒪ ᒪᓕᒐᓕᕆᔨᒃᑯᑦ ᐅᖃᐅᔾᔨᓂᐅᔪᒥ ᐱᔭᐅᓯᒪᕗᑦ ᐊᒻᒪ ᑲᓇᑕᒥ ᐸᓖᓯᒃᑯᑦ ᐃᑲᔪᖅᓱᐃᕗᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓᑦᑕ ᖃᐅᔨᓴᖅᑕᐅᖏᓐᓇᖅᑐᒥ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᓄᓇᕗᒻᒥ ᒐᕙᒪᒃᑯᑦ ᐅᐸᒃᑎᑦᑎᓚᐅᕆᕗᑦ ᐃᖅᑲᓇᐃᔭᖅᑎᓂ ᐱᓕᕆᕝᕕᐅᔪᓂ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓂ, ᒪᓕᒐᓕᕆᔨᒃᑯᓐᓂ, ᑮᓇᐅᔭᓕᕆᔨᒃᑯᓐᓂ, ᐊᒻᒪ ᒐᕙᒪᓕᕆᔨᒃᑯᓐᓂ ᐃᑲᔪᕐᓂᕐᒧᑦ ᑎᒥᖁᑕᐅᔪᒥ ᑭᐅᓂᖓᓂ ᐱᒋᐊᖅᑕᐅᓂᐅᔪᒥ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓᑦ ᐱᔪᒪᙱᓚᑦ ᐊᑭᓕᒃᓴᓂᒍᒻᒥ ᐊᐅᒃᑕᔫᖑᔪᓂ ᐊᑭᓖᓂᐅᔪᓂ, ᑭᓯᐊᓂ ᓂᐅᕕᖅᐸᒃᑐᑦ ᓱᓕ ᐊᑭᓖᔪᓐᓇᖅᐳᑦ ᐊᑭᓕᒃᓴᖏᓐᓂ ᑮᓇᐅᔭᓪᓚᕆᖕᒥ ᐊᑐᕐᓗᑎᒃ ᐅᐸᒃᓯᒪᓗᑎᒃ ᓂᐅᕕᖅᐸᒃᑐᓂ ᐸᖅᑭᕕᐅᔪᓂ ᑎᑎᕋᕐᕕᐅᔪᓂ ᐃᖃᓗᖕᓂ ᐊᒻᒪ ᖃᒪᓂᑦᑐᐊᕐᒥ, ᓂᐅᕕᖅᑎᒃᑯᑎᒍᑦ, ᑯᐊᐸᒃᑯᓐᓂ ᓂᐅᕕᕐᕕᖕᓂ, ᐊᒻᒪ ᑮᓇᐅᔭᒃᑯᕕᖕᓂ ᐅᕝᕙᓘᓐᓃᑦ ᑮᓇᐅᔭᒃᑯᕕᒃᑯᑦ ᓇᒃᓯᐅᔾᔨᓂᐅᔪᒥ ᐅᖃᓘᑎᒃᑯᑦ ᖃᕋᓴᐅᔭᑎᒍᓪᓘᓐᓃᑦ.