ᐸᓖᓯᒃᑯᑦ ᐅᖄᓚᐅᑎᒥ ᑭᐅᓯᕙᒃᑐᑦ ‘ᓂᐱᖏᑦ ᐃᑲᔫᑎᐅᔪᑦ’ ᑐᐊᕕᕐᓇᖅᑐᖃᖅᑎᓪᓗᒍ

For the English version of this story, please see RCMP call centre operators are ‘reassuring voice’ on people’s worst days.

ᓈᒻᒪᙱᓕᐅᕈᑎᑕᖃᕌᖓᑦ, ᐸᓖᓯᑦ ᓯᕗᓪᓕᐅᕙᙱᒻᒪᑕ ᑕᒪᒃᑯᓂᖓ ᑐᓴᖅᑐᓂᒃ. ᑭᓯᐊᓂᓕ ᐃᒪᓐᓇᐅᓂᕐᓴ, ᐅᑯᐊ ‘ᓂᐱᖏᑦ ᐃᑲᔫᑎᐅᔪᑦ’ ᐸᓖᓯᓄᑦ ᐅᖄᓚᔪᓄᑦ ᑖᒃᑯᐊ ᓴᐃᒻᒪᖅᓴᐃᓇᓱᒃᑎᐅᕙᖕᒪᑕ ᐃᓄᐃᑦ “ᐅᓪᓗᖃᑦᑎᐊᙱᓗᐊᖅᑎᓪᓗᒋᑦ”, ᐅᖃᕐᑐᖅ ᐸᓖᓯᓄᑦ ᖃᐅᔨᓴᖅᑎ ᕗᐃᐊᓪ ᒪᒃᒋᓐᔅ.

ᐊᕐᕌᓂ ᓄᓇᕗᒻᒥᐅᑕᑦ ᓄᓇᕗᑦ 25 ᓄᓇᓕᖏᑦ ᐅᖄᓚᓚᐅᕐᓯᒪᔪᑦ 35,000-ᖏᕐᓱᖅᖢᑎᒃ ᐃᑲᔪᖅᑕᐅᔪᒪᓪᓗᑎ ᐸᓖᓯᓄᑦ. ᐅᓇ ᓱᕐᓗ 96 ᐅᓪᓗᕐᒥ ᐅᖄᓚᓯᒪᔪᑦ, ᐅᕝᕙᓘᓐᓃᑦ ᐃᓄᐃᑦ ᓄᓇᕗᒥᑦ ᑕᒪᐃᓐᓂ ᐊᑕᐅᓰᖅᖢᑎᒃ ᐅᖄᓚᓯᒪᔪᑦ.

“ᐅᑯᐊ ᓴᖅᑭᔮᙱᑦᑐᒥ ᐱᓕᕆᒻᒪᕆᖃᑦᑕᖅᑐᑦ, ᑕᐃᒪᓐᓇᓗ ᐱᓕᕆᐊᑦᑎᓐᓂ ᐱᓕᕆᖃᑦᑕᕋᔭᙱᖢᑕ ᑖᒃᑯᐊᖑᙱᑉᐸᑕ,” ᒪᒃᒋᓐᔅ, ᐊᐅᓚᑦᑎᓂᕐᒧᑦ ᐊᒻᒪ ᐃᖅᑲᓇᐃᔭᖅᑐᓕᕆᔨ ᐸᓖᓯᒃᑯᓐᓄᑦ, ᐅᖃᓚᐅᕐᑐᖅ ᐱᔨᑦᑎᕋᖅᑎᓂᒃ ᐅᖄᓚᐅᑎᓂ ᑭᐅᔨᐅᕙᒃᑐᑦ.

ᕚᓪ ᕌᐱᓐᓴᓐ ᐅᖄᓚᐅᑎᓂᒃ ᑭᐅᔨᐅᖃᑦᑕᖅᓯᒪᔪᖅ ᐊᕐᕌᒎᓕᖅᑐᓂᒃ 25-ᓂ ᐊᔾᔨᒌᙱᑦᑐᓂᒃ ᐸᓖᓯᓂᒃ ᑲᓇᑕᒥ ᐅᑯᓂᖓ ᐃᓚᖃᖅᖢᑎᒃ ᔭᓗᓇᐃ, ᕗᐊᐃᑦᕼᐅᐊᔅ ᐊᒻᒪ ᐳᕆᑎᔅ ᑲᓚᒻᐱᐊᒥ. ᓄᓇᕗᒧᐊᓚᐅᕐᓯᒪᔪᖅ 2018-ᒥᑦ.

ᐃᖃᓗᖕᓂ ᐃᖅᑲᓇᐃᔭᓕᖅᖢᓂ ᐱᖓᓱᓂᒃ ᖃᕋᓴᐅᔭᓂ ᓵᒥᐅᑕᖃᖅᑐᖅ. ᓈᓚᐅᑎᒃᑯᑦ ᐸᓖᓯᑦ ᐃᒻᒥᖕᓄᑦ ᐅᖄᓚᑲᑕᒃᑎᓪᓗᒋᑦ ᑐᓵᖃᑦᑕᖅᑕᖏᑦ ᓄᓇᕗᒦᑦᑐᑦ, ᐅᖄᓚᐅᑎᓂᒃ ᑭᐅᔨᐅᕙᒃᖢᓂ 25-ᓂ ᓄᓇᓕᖕᓄᑦ, ᐊᒻᒪᓗ ᓄᓇᙳᐊᒃᑯᑦ ᑕᐅᑐᒃᖢᓂ ᐸᓖᓯᒃᑯᑦ ᖃᖓᑕᓲᖓ ᑭᙵᐃᑦ ᖁᓛᒍᑦ ᖃᖓᑕᔪᖅ.

“ᓇᓗᓇᐃᖃᑦᑕᖅᑕᕗᑦ ᓇᓂ ᓄᓇᙳᐊᑎᒍᑦ ᓇᓃᒻᒪᖔᑕ, ᖃᓄᐃᑦᑐᒧᓪᓗ ᑭᐅᔭᕆᐊᒃᓴᖏᓐᓂᒃ … ᐊᒻᒪ, ᐅᐊᑦᑎᐊᕈᐊᐃ” — ᕌᐱᓐᓴᓐ ᐅᖃᓪᓚᒃᑎᓪᓗᒍ ᐊᐅᐸᖅᑐᒥᒃ ᖃᐅᒻᒫᓪᓚᒃᑐᖃᖃᑕᓯᕗᑦ ᑭᐳᐊᓃᑦᑐᒥᒃ ᑖᓐᓇᓗ ᑭᐅᔭᕆᐊᖃᖅᖢᓂᐅᒃ.

“ᐸᓖᓯᒥᒡᒎᖅ ᖃᒪᓂᑦᑐᐊᕐᒥ,” ᐅᖃᕐᑐᖅ.

ᑕᒪᕐᒥᒃ ᐸᓖᓯᓄᑦ ᐅᖃᓘᓯᐅᔪᑦ ᓄᓇᕗᒥᑦ ᑐᕌᖓᑎᑕᐅᕙᒃᑐᑦ ᐅᕗᖓ ᐃᖃᓗᐃᑦ ᐸᓖᓯᒃᑯᑦ ᑎᑎᕋᕐᕕᖓᓄᑦ. (ᐊᔾᔨᓕᐅᕆᔨ ᐋᑎ ᓴᑭᓯᐊᓐ)

ᑕᒪᕐᒥ ᓄᓇᕗᒥ ᐅᖄᓚᔪᑦ ᐅᕗᖓ ᐃᖃᓗᐃᑦ ᐸᓖᓯᙱᓐᓄᐊᖃᑦᑕᖅᑐᑦ ᖁᓪᓕᕐᒥ ᓇᑎᕐᒦᑦᑐᓄᑦ. ᑕᐃᒪᙵᓕᒫᕐᓗ ᒪᕐᕉᖕᓂ ᐱᖓᓱᓄᑦ ᐅᖄᓚᐅᑎᓂ ᑭᐅᔨᑕᖃᐃᓐᓇᐅᔭᖅᖢᓂ ᐱᔨᑦᑎᕋᖅᑐᓂᒃ ᓄᓇᕗᒥᐅᓂᒃ.

“ᖃᔅᓯᐅᒻᒪᑕ ᐃᒡᓗᖃᖃᑕᐅᔪᑦ ᑕᐃᑲᓂ?” ᕌᐱᓐᓴᓐ ᐊᐱᕆᔪᖅ ᐃᓄᖕᒧᑦ ᑭᐅᓵᖅᑕᖓᓄᑦ, ᑎᑎᕋᖅᐸᓪᓕᐊᓪᓗᓂ ᐅᖃᐅᓯᐅᔪᓂᒃ ᖃᕋᓴᐅᔭᖓᓄᑦ.

“ᖃᐅᔨᒪᕕᑦ ᖁᑭᐅᑎᑕᖃᕆᐊᒃᓴᖓᓂ ᐃᒡᓗᒥ? ᖃᐅᔨᒪᕕᒃ ᐊᑎᕈᓯᖓ ᖃᓄᖅ ᑎᑎᕋᖅᑕᐅᓯᒪᖕᒪᖔᑦ?”

ᒫᓐᓇᓕ ᓄᓇᕗᒥᑦ ᐸᓖᓯᒃᑯᑦ ᐊᒥᒐᖅᓯᔪᑦ ᐅᖄᓚᐅᑎᓂ ᑭᐅᔨᐅᕙᒃᑐᓂᒃ 8-ᓂ ᐃᖅᑲᓇᐃᔭᖅᑎᖃᖅᖢᑎᒃ 12-ᓄ ᐃᖅᑲᓇᐃᔮᓄᑦ, ᐅᖃᕐᑐᖅ ᔨᐊᓪ ᐃᒻᕈᐃ, ᐊᐅᓚᑦᑎᔨᒋᔭᐅᔪᖅ ᐱᔨᑦᑎᕋᖅᑐᐃᑦ ᑐᓴᐅᒪᔾᔪᑎᓕᕆᕝᕕᐊᓂᒃ. ᐅᖄᓚᐅᑎᓂ ᑭᐅᔨᐅᔪᑦ ᐃᑲᕐᕋᓂᒃ 12-ᓂ ᐅᓪᓗᕐᒥ ᐃᖅᑲᓇᐃᔭᖅᐸᒃᑐᑦ ᐅᓪᓗᖅᓯᐅᑎᐅᕙᒃᖢᑎᒃ ᐊᒻᒪ ᐅᓐᓄᐊᖅᓯᐅᑎᐅᕙᒃᖢᑎᒃ.

ᕌᐱᓐᓴᓐ ᐅᖃᓚᐅᕐᑐᖅ ᐅᓄᕐᓂᕐᓴᓄ ᐅᓐᓄᒃᑯᑦ ᐅᖄᓚᕝᕕᐅᖃᑦᑕᕐᓂᖏᓐᓂᒃ ᐊᒻᒪᓗ ᐅᖄᓚᐅᓯᐅᔪᑦ ᐊᔾᔨᒋᕙᙱᖢᓂᒋᑦ ᓄᓇᓕᕐᔪᐊᓂ ᐅᖄᓚᒍᑎᐅᕙᒃᑐᓂᒃ.

“ᓲᕐᓗ ᐃᒪᓐᓇ ᒫᓂ ᐸᓖᓯᓂᒃ ᓱᒃᑲᓴᖅᑐᓂᒃ ᒪᓕᒃᑐᖃᖅᐸᙱᑦᑐᖅ, ᓲᖃᐃᒻᒪ 7 ᑭᓛᒥᑕᓂ ᑕᑭᓂᖃᑐᐃᓐᓇᕐᒪᑦ ᓇᒧᙵᐅᓇᓱᒃᖢᓂ ᐊᖅᑯᑎᒃᑯᑦ,” ᐅᖃᕐᑐᖅ.

ᐅᖄᓚᐅᓯᐅᓂᖅᐹᖑᕙᒃᑐᑦ ᓄᓇᕗᒥᑦ ᐃᒥᐊᓗᖕᒨᖓᓂᕐᓴᐅᕙᒃᑐᑦ. ᖃᔅᓯᐅᓂᖏᑦ “ᐊᔾᔨᒌᓂᖃᖅᐸᒃᑐᑦ ᐊᒻᒪ ᐊᐅᓚᔾᔪᓯᐅᕙᒃᑐᑦ” ᒪᓕᒃᖢᑎᒃ ᐃᖃᓗᐃᑦ ᐃᒥᐊᓗᒃᑖᕐᕕᖓᑕ ᒪᑐᐃᖓᓂᖓᓂᒃ, ᕌᐱᓐᓴᓐ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᓂᖓᖅᐸᒃᑐᑦᑕᐅᖅ ᐅᖃᐅᓯᐅᖃᑦᑕᓂᕋᖅᖢᓂᒋᑦ.

ᐅᖄᓚᐅᑎᓂ ᑭᐅᓯᕙᒃᑲᓗᐊᖅᖢᑎᒃ ᓄᓇᖃᖅᑐᓂᒃ, ᐅᖄᓚᐅᑎᓂ ᑭᐅᔨᐅᕙᒃᑐᑦ ᐅᖃᖃᑎᖃᐃᓐᓇᖅᐸᒃᑐᑦ ᐸᓖᓯᓂᒃ. ᖁᐊᕐᓵᕐᓇᖅᑐᖃᓗᐊᖅᑎᓪᓗᒍᓕ ᐅᖄᓚᐅᑎᓂ ᑭᐅᔨᐅᔪᑦ ᑐᓵᖃᑦᑕᖅᑐᑦ ᐸᓖᓯᑦ ᓈᓚᐅᑎᖏᓐᓂᒃ ᐊᒻᒪ ᐃᑲᔪᖅᑕᐅᔪᒪᔪᓂ ᑐᓴᓚᐅᖅᐸᒃᖢᑎᒃ.

ᕌᐱᓐᓴᓐ ᐅᖃᓚᐅᕐᑐᖅ ᖁᕕᐊᒋᑦᑎᐊᕐᓂᕋᖅᖢᓂᐅᒃ ᐃᖅᑲᓇᐃᔮᓂᒃ ᐊᒻᒪᓗ ᐊᐃᑦᑖᕈᓱᒃᖢᓂ 40-ᖏᓐᓂ ᑭᓯᐊᓂ ᐅᑭᐅᖃᓕᖅᑎᓪᓗᒍ ᐱᒋᐊᓚᐅᕐᓯᒪᓂᖓᓂᒃ, ᐅᖃᖅᖢᓂ “ᐊᒃᓱᐊᓗᒃ ᐃᑲᔪᕈᑎᐅᔪᖅ,” ᐅᖃᒃᑲᓐᓂᖅᖢᓂ ᐊᑯᓂᕈᓗᒃ ᐱᓕᕆᐊᕆᓇᔭᙱᓐᓂᕋᖅᖢᓂᐅᒃ ᖁᕕᐊᒋᙱᑉᐸᐅᒃ.

“ᐊᒻᒪᓗ ᓱᓕᓪᓗᖓ ᖃᔅᓰᓐᓇᐅᒐᓗᐊᑦ ᐅᖄᓚᐅᓯᐅᔪᑦ ᐃᖅᑲᐅᒪᐃᓐᓇᔭᑦᑕᒃᑲ,” ᐅᖃᕐᑐᖅ.

“ᑐᓴᕐᓇᖃᑦᑕᕐᐸᑦ ᐊᒃᓱᕈᒻᒪᕆᒃᑐᓂᒃ, ᑐᖅᖢᓛᖅᑐᓂᒃ ᓯᐅᑎᖕᓄᑦ, ᑖᓐᓇᓗ ᑐᓵᑦᑎᐊᕆᐊᒃᓴᖅ ᐊᔪᕐᓇᓚᐅᖅᐸᒃᖢᓂ. ᐅᐸᒍᑎᓗᑕ ᐃᑲᔪᕈᓐᓇᙱᓐᓇᑦᑎᒍᑦ ᐊᒻᒪᓗ ᑕᐃᒪᐃᑦᑐᒪᒐᓗᐊᖅᐸᒃᓗᑕ, ᐃᑲᔪᕐᓗᑎᒍᑦ.”