ᖃᐅᔨᓴᖅᑎᑦ ᑯᕕᖅᑕᖅᕕᒃᒥ ᖃᐅᔨᓇᓱᖕᓂᐊᖅᑐᑦ ᐳᕙᒡᓗᖕᓇᖅᑐᖅᑕᖃᕆᐊᒃᓴᖓᓂ ᐃᖃᓗᖕᓂ

For English version, see Researchers look to wastewater for early TB detection in Iqaluit

ᖃᐅᔨᓴᖅᐸᓪᓕᐊᓂᕐᒥᒃ ᓄᓇᓖᑦ ᑯᕕᖅᑕᖅᕕᖓᓂ ᖃᐅᔨᓵᓕᒍᔪᑎᐅᔪᓐᓇᖅᐸ ᐳᕙᒡᓗᖕᓇᕐᒥ? ᖃᐅᔨᓴᖅᑎᒐᓚᐃᑦ ᑕᒪᑐᒥᖓ ᖃᐅᔨᓇᓱᓕᕐᑐᑦ.

ᐃᖃᓗᖕᓃᓚᐅᕐᒪᑕ ᔭᓄᐊᕆ 16-ᒥ ᑐᓴᖅᑎᑦᑎᔭᖅᑐᖅᖢᑎᒃ $3.5 ᒥᓕᐊᓐ ᑖᓚᑐᖅᑐᒥ ᐊᕋᒍᓂ ᖃᐅᔨᓴᕈᑎᒃᓴᒥ ᐱᐅᓯᕚᓪᓕᕈᑎᐅᔪᓐᓇᖅᑐᒥ ᓄᓇᕗᒥᑦ ᐳᕙᒡᓗᖕᓇᕐᒥ ᖃᐅᔨᓴᖃᑦᑕᕐᓂᕐᒧᑦ ᖃᓄᐃᓕᐅᕈᑎᓂᒃ.

“ᑐᑭᓯᑎᑦᑎᔪᒪᔪᖓ ᐅᓇ ᖃᐅᔨᓴᕈᑎᐅᔪᒪᔪᖅ ᐱᑕᖃᕈᓐᓃᖅᑎᑦᑎᑲᐅᑎᒋᔾᔮᙱᑦᑐᖅ ᐳᕙᒡᓗᖕᓇᕐᒥ ᓄᓇᕗᒥᑦ, ᑭᓯᐊᓂᓕ ᑕᐃᒪᓐᓇ ᑐᕌᒐᖃᕋᓱᒃᑐᒍᑦ,” ᐅᖃᕐᑐᖅ ᓘᒃᑖᖅ ᒐᓐᔮᓗ ᐋᕗᕋᔾ, ᐋᑐᕚᒦᖢᓂ ᐊᖓᔪᖅᑳᕆᔭᐅᔪᖅ ᖃᐅᔨᓴᖅᑐᓂᒃ.

ᐋᕗᕋᔾ ᖃᐅᔨᓴᖅᑎᖃᑎᖃᕐᑐᖅ ᓯᓚᒃᑐᖅᓴᕐᕕᐊᓗᒃᒥ ᐋᑐᕚᒥ ᐊᒻᒪ ᓯᓚᒃᑐᖅᓴᕐᕕᐊᓗᒃᒥ ᐳᕆᑎᔅ ᑲᓚᒻᐱᐊᒥ ᐊᒻᒪ ᐱᓕᕆᖃᑎᖃᖅᖢᑎᒃ ᓄᓇᕗᑦ ᑐᙵᕕᒃᑯᓐᓂ.

ᐳᕙᒡᓗᖕᓇᖅ ᐋᓐᓂᐊᖑᕙᒃᑐᖅ ᐳᕙᓂ ᐊᒃᑐᐃᓯᒪᓛᖑᕙᒃᖢᓂ. ᐊᐃᑦᑑᑎᐅᔭᖢᓂ ᓯᓚᐃᓐᓇᒃᑯᑦ ᑖᓐᓇ ᐊᐃᑦᑐᖅᑕᐅᓯᒪᔪᖅ ᐃᒡᓚᕌᖓᑦ, ᖁᐃᕐᓱᕌᖓᑦ ᐅᕝᕙᓘᓐᓃᑦ ᐃᙱᖅᖢᓂ. ᐅᓇ ᐳᕙᒡᓗᖕᓇᖅ ᑲᒪᒋᔭᒃᓴᐅᒐᓗᐊᖅᖢᓂ ᐃᓛᓐᓂᒃᑯᑦ ᖁᐊᕐᓵᕐᓇᒻᒪᕆᖃᑦᑕᖅᑐᖅ ᐃᓅᓕᓴᖅᑕᐅᙱᒃᑯᓂ.

ᖃᐅᔨᓴᖅᑏᑦ ᐃᓱᒪᖕᒪᑕ ᖃᐅᔨᓴᖃᑦᑕᕈᒪᓪᓗᑎᒃ ᑎᕝᕗᐊᖅᑕᐅᔪᓂᒃ, ᖁᐃᔭᐃᔪᓂᒃ , ᐊᓇᖅᑕᐅᔪᓂᒃ ᐊᒻᒪᓗ ᑯᕕᖅᑕᖅᕕᒋᔭᐅᔪᓂᒃ ᐳᕙᒡᓗᖕᓂᕋᖅᑕᐅᔪᓂᒃ ᖃᓄᖅ ᑖᓐᓇ ᐋᓐᓂᐊᖅᑖᕆᔭᐅᔭᑦᑐᖅ ᓴᖅᑭᖃᑦᑕᕐᒪᖔᑦ ᑯᕕᖅᑕᖅᕕᒃᒥ.

ᖃᐅᔨᓴᓕᕐᓂᐊᖅᖢᑎᒃ ᑯᕕᖅᑕᖅᕕᐅᔪᓂᒃ ᓂᕈᐊᕆᔭᐅᓯᒪᔪᓂᒃ ᓲᕐᓗ ᐅᑯᓇᓂ ᐃᖃᓗᐃᑦ ᐊᖑᑎᓄᑦ ᐊᖏᕐᕋᖃᙱᑦᑐᒃᑯᕕᒃᒥ ᐊᒻᒪᓗ ᓄᓇᓕᐸᐅᔭᐃᑦ ᐃᒥᖅᑕᕐᕕᓕᕆᕝᕕᖓᒥᒃ. ᐅᑯᐊ ᖃᐅᔨᓴᖅᑕᐅᔪᒃᓴᑦ ᖃᐅᔨᓴᖅᑕᐅᓂᐊᖅᑐᑦ ᐋᑐᕚᒥ.

ᐅᓇ ᖃᐅᔨᓴᖅᑕᐅᓕᕐᓂᐊᖅᑐᖅ ᑕᒪᑐᒪᓂ ᐊᕐᕌᒍᒥ ᐊᒻᒪ ᐊᕐᕌᒍᓕᒫᖅ ᐱᓕᕆᐊᖑᓂᐊᖅᖢᓂ.

ᐅᓇ ᐃᑲᔫᑎᖃᖅᑎᑕᐅᔪᖅ $3 ᒥᓕᐊᓐ ᑖᓚᓂ ᑲᓇᑕᒥ ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᕐᕕᓕᕆᔨᒃᑯᓐᓂᒃ ᐊᒻᒪᓗ $500,000 ᐅᑯᓇᙵᑦ ᓄᓇᕗᑦ ᑐᙵᕕᒃ ᑎᒥᖓᓂ.

ᐅᓇ ᖃᐅᔨᓴᕐᓂᖅ ᐅᑯᓇᙵᑦ ᑐᑭᒧᐊᖅᑕᐅᓂᐊᖅᑐᖅ ᑕᐃᒪ ᐳᕙᒡᓗᓇᖅᒧᑦ ᑲᑎᒪᔨᕋᓛᓂᑦ, ᐱᒋᐊᖅᑎᑕᐅᓂᑯᑦ 2011-ᒥ ᓄᓇᕗᑦ ᑐᙵᕕᒃᑯᓐᓂᒃ, ᓄᓇᕗᒥᑦ ᒐᕙᒪᒃᑯᓐᓂ ᐊᒻᒪᓗ ᐋᑐᕚᒥ ᐋᓐᓂᐊᕕᐊᓗᒃᒥ ᖃᐅᔨᓴᖅᑐᓕᕆᔨᒃᑯᑦ ᐳᕙᒡᓗᓕᖅᑎᑦᑎᑦᑕᐃᓕᓂᕐᒧᑦ, ᖃᐅᔨᓇᓱᖕᓂᕐᒧᑦ ᐊᒻᒪ ᐃᓅᓕᓴᖃᑦᑕᕐᓂᕐᒥᒃ ᐳᕙᒡᓗᖕᓇᕐᒥ ᓄᓇᕗᒥᑦ.

ᐋᕗᕋᔾ ᐅᖃᓚᐅᕐᑐᖅ ᑐᕌᒐᖃᕐᓂᕋᖅᖢᓂ ᖃᐅᔨᓴᕐᓂᒃᑯᑦ ᑲᑎᕐᓱᐃᓗᓂ ᑯᕕᖅᑕᖅᕕᖕᒥᙶᖅᑐᓂᒃ ᖃᐅᔨᓴᖅᑕᐅᔪᒃᓴᓂ ᐳᕙᒡᓗᖕᓇᖅᑐᖅᑕᖃᕆᐊᒃᓴᖏᓐᓂᒃ.

ᑕᐃᒪᐃᑉᐸᑦ ᐅᓇ ᑯᕕᖅᑕᖅᕕᒃᓂ ᖃᐅᔨᓴᖅᐸᓪᓕᐊᓂᖅ  “ᐃᓚᒋᔭᐅᓇᔭᖅᑐᖅ ᖃᐅᔨᓵᓕᔾᔪᑎᓄᑦ” ᐳᕙᒡᓗᖕᓇᕐᒥ ᐊᒻᒪᓗ ᐃᑲᔫᑎᐅᓗᓂ ᖃᐅᔨᓴᕈᑎᐅᕙᒃᑐᓄᑦ ᐊᑐᖅᑕᐅᔪᓄᑦ, ᐃᓚᖃᖅᑐᓂᒃ ᐅᕕᓂᒃᒥ ᖃᐅᔨᓴᕈᑎᓂᒃ, ᓄᕙᖕᓂ ᐊᒻᒪ ᐳᕙᒃᑯᑦ ᐊᔾᔨᓕᐅᖅᑕᐅᔾᔪᑎᓂᒃ, ᐅᑯᐊ ᓄᓇᕗᑦ ᑐᙵᕕᒃᑯᑦ ᑐᓴᒐᒃᓴᖏ ᐅᖃᕐᓯᒪᓚᐅᕐᑐᑦ.

ᓘᒃᑖᖅ ᓵᓐ ᕗᐊᑦᑐᓪ, ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓ ᐅᖃᓚᐅᕐᑐᖅ ᑯᕕᖅᑕᖅᕕᒃᒥ ᖃᐅᔨᓴᖅᑕᐅᓯᒪᔪᑦ ᐃᑲᔪᕈᑎᐅᓯᒪᓂᖏᓐᓂᒃ ᖃᐅᔨᓵᓕᔾᔪᑎᐅᕙᒃᖢᑎᒃ ᓄᕙᒡᔪᐊᕐᓇᖅ-19ᒥ ᐊᒻᒪ ᐅᖃᖅᖢᓂ ᐅᒃᐱᕈᓱᖕᓂᕋᖅᖢᓂ ᐅᓇ ᖃᐅᔨᓴᕐᓂᖅ ᐃᑲᔪᕈᓐᓇᓂᐊᕐᓂᕋᖅᖢᓂᐅᒃ ᒐᕙᒪᑐᖃᒃᑯᑦ ᓄᖃᖅᑎᑉᐹᓪᓕᖅᑎᑦᑎᓇᓱᖕᓂᖏᓐᓂᒃ ᐳᕙᒡᓗᖕᓇᕐᒥ ᓄᓇᕗᒥ ᑎᑭᓚᐅᕐᑐᓐᓇᒍ 2030.

ᐳᕙᒡᓗᖕᓇᖅ ᐅᑭᐅᕐᑕᖅᑐᕐᒥ 100-ᖏᕐᓱᖅᑐᖅᖢᓂ ᖁᕝᕙᓯᖕᓂᕐᓴᖅ ᐊᓯᖏᓐᓃᑦᑐᓕᒫᓂᒃ. ᓱᓕ ᐳᕙᒡᓗᓕᑲᑕᖕᒪᑕ ᐸᖕᓂᕐᑑᒥ, ᓇᐅᔮᓂ ᐊᒻᒪ ᒥᑦᑎᒪᑕᓕᒃᒥ.

“ᐅᓇ ᖃᓄᐃᓕᐅᕐᓇᖅ ᐱᒋᐊᓕᕈᑎᑦᑎᐊᕙᒃ,” ᕗᐊᑦᑐᓪ ᐅᖃᕐᑐᖅ.