ᓄᓇᖃᖅᑎᐅᔪᑦ ᓈᒻᒪᒃᓴᙱᓐᓂᕐᒥᓂ ᑕᑯᒃᓴᐅᑎᑦᑎᕗᑦ, ᐸᓖᓯᒃᑯᓐᓂ ᓇᐅᑦᑎᖅᓱᖅᑎᑦ ᖃᐅᔨᓴᖅᐳᑦ ᓴᓪᓗᓂ ᖁᑭᖅᓯᓂᐅᔪᒥ ᑐᖂᑦᑎᓂᐅᔪᒥ ᐃᓚᖃᖅᑐᒥ ᐸᓖᓯᒃᑯᓐᓂ

For English version, see Residents protest, police watchdog investigates Salluit shooting death involving police

ᑯᐸᐃᖕᒥ ᐃᒻᒥᒃᑰᖅᑐᓂ ᐸᓖᓯᒃᑯᑦ ᓇᐅᑦᑎᖅᓱᖅᑎᖓ ᖃᐅᔨᓴᖅᐳᖅ ᖁᑎᒃᓯᔪᒥ ᑐᖁᓂᐅᔪᒥ ᓴᓪᓗᓂ ᓄᕕᐱᕆ 4−ᒥ ᖃᓄᐃᓐᓂᐅᔪᒥ ᐃᓚᖃᖅᑐᒥ ᓄᓇᕕᖕᒥ ᐸᓖᓯᒃᑯᑦ, Bureau des enquêtes indépendantes ᐅᖃᓚᐅᖅᐳᖅ.

ᖃᓄᐃᓐᓂᐅᔪᖅ, ᕿᒪᐃᓚᐅᖅᑐᒥ ᒪᕐᕈᖓᓂ ᐃᓄᖕᒥ ᐋᓐᓂᖅᑐᒥ, ᐱᓚᐅᖅᐳᖅ ᐅᓪᓚᕐᔪᐊᒥ ᓄᕕᐱᕆ 4−ᒥ,  ᓄᓇᕕᖕᒥ ᐸᓖᓯᒃᑯᓐᓂ ᐱᔨᑦᑎᕋᖅᑎᐅᔪᓂ ᐅᖃᐅᓯᒃᓴᓕᐊᖑᔪᒥ ᐅᖃᓚᐅᖅᐳᖅ.

ᐅᓐᓄᓴᖓᓂ, 50−ᒐᓚᖕᓂ ᐃᓄᖕᓂ ᑲᑎᓚᐅᖅᐳᑦ ᓯᓚᑖᓂ ᓴᓪᓗᓂ ᐸᓖᓯᒃᑯᑦ ᑎᑎᕋᕐᕕᖓᓂ, ᐃᓚᖏᑦ ᐊᒡᔭᖅᓯᓪᓗᑎᒃ ᓴᓇᔭᒥᓂᑦ ᓇᓗᓇᐃᒃᑯᑕᓂ ᐅᕝᕙᓘᓐᓃᑦ ᐅᖃᖅᖢᑎᒃ “ᐃᖅᑲᖅᑐᐃᓂᖃᕐᓕᑦ ᔮᓱᐊᒧᑦ” ᐅᕝᕙᓘᓐᓃᑦ “ᐃᖅᑲᖅᑐᐃᓂᖃᕐᓕᑦ ᒪᕐᕈᓕᐊᓄᑦ” ᐊᒻᒪ ᖄᖏᖅᑐᓂ ᐊᖁᑎᐅᔪᓂ ᖁᖁᐊᓚᐅᖅᐳᑦ ᓄᓇᓯᐅᑎᖓᓐᓂ ᐃᑲᔪᖅᓱᐃᓂᕐᒧᑦ.

ᓄᓇᕕᖕᒥ ᐸᓖᓯᒃᑯᓐᓂ ᐱᔨᑦᑎᕋᖅᑎᐅᔪᓂ ᐸᓖᓯᓂ ᑭᐅᓚᐅᖅᐳᑦ ᐅᖃᓗᖕᓂᐅᔪᒥ 4 ᐅᓪᓛᐸᓗᒃᑯᑦ ᐸᓖᓯᒃᑯᑦ ᐅᖃᐅᓯᒃᓴᓕᐊᖓ ᐅᖃᓚᐅᖅᐳᖅ.

ᑕᐃᑲᓂ ᖃᓄᐃᓐᐅᓂᔪᒥ, “ᐸᓖᓯᒥᒃ ᖁᑭᕆᐊᓚᐅᖅᐳᖅ ᐱᔨᑦᑎᕋᕐᓂᕐᒧᑦ ᖁᑭᐅᓯᑎᖓᓂ,” ᐅᖃᓚᐅᖅᐳᖅ.

“ᒪᕐᕉᖕᓂ ᐃᓄᖕᓂ ᐋᓐᓂᖅᑐᖃᓚᐅᖅᐳᖅ: ᐊᑕᐅᓯᖅ ᐃᓄᒃ ᑐᖁᓚᐅᖅᐳᖅ ᐋᓐᓂᕐᓂᖏᓐᓄᑦ, ᒪᕐᕈᖓ ᐃᓄᒃ ᐱᓚᐅᖅᐳᖅ ᑐᐊᕕᕐᓇᖅᑐᒥ ᐃᓅᓕᓴᖅᑕᐅᓂᐅᔪᒥ ᐱᓕᕆᐊᖑᓂᕐᒥ ᐊᒻᒪ ᐊᐅᓪᓚᖅᑎᑕᐅᓚᐅᖅᐳᖅ ᑐᐊᕕᕐᓇᖅᑐᒃᑯᑦ.”

ᐅᖃᐅᓯᒃᓴᓕᐊᖅ ᓇᓗᓇᐃᖅᓯᓂᖃᓚᐅᙱᓚᖅ ᓇᓕᐊᑐᐃᓐᓇᓂ ᐃᓄᖕᒥ ᐃᓚᐅᖃᑕᐅᔪᓂ, ᐅᑭᐅᖏᓐᓂ ᐅᕝᕙᓘᓐᓃᑦ ᐊᖑᑕᐅᓂᖓᓂ ᐊᕐᓇᐅᓂᖓᓂ.

ᑕᕐᕆᔭᓕᐊᖑᔪᒥ ᑐᓐᓂᖅᓴᖅᑕᐅᓚᐅᖅᐳᖅ ᕙᐃᔅᐳᒃᑯᑦ ᓱᓕᓂᕋᖅᑕᐅᓪᓗᓂ ᓴᓪᓗᓂ ᖃᓄᐃᓐᓂᐅᔪᒥ ᖁᙱᐊᖅᑕᐅᓚᐅᖅᐳᖅ ᐅᓄᕐᓂᖅᓴᐅᔪᒥ 200,000−ᖑᖅᓱᖅᑐᒥ ᓇᒡᒐᔾᔭᐅᒥ ᐅᓐᓄᓕᓵᖅᑐᒥ.

ᑕᑯᒃᓴᐅᑎᑦᑎᔫᔮᖅᐳᖅ ᐊᑕᐅᓯᕐᒥ ᐃᓄᖕᒥ ᐅᓇᑕᖃᑎᖃᖅᑐᒥ ᐊᓯᐊᓂ, ᐊᓱᐃᓛᒃ ᐅᑎᕐᔭᖅᖢᓂ ᖁᑭᖅᑕᐅᓚᐅᖅᑎᓪᓗᒍ. ᑕᕐᕆᔭᓕᐊᖑᔪᒥ, ᒪᕐᕉᖕᓂ ᖁᑭᕆᐊᕐᓂᐅᔪᓂ ᑐᓴᖅᑕᐅᔪᓐᓇᖅᐳᑦ.

ᓴᓪᓗᓂ ᓄᓇᓕᖕᒥᐅᑕᐃᑦ ᓈᒻᒪᒃᓴᙱᓐᓂᕐᒥᓂ ᑕᑯᒃᓴᐅᑎᑦᑎᔪᓂᒃ ᓯᕗᓂᐊᓂ ᐸᓖᓯᒃᑯᑦ ᐃᒡᓗᖁᑎᖓᓐᓂ ᓄᕕᐱᕆ 4−ᒥ, ᐃᓚᖏ ᓇᓗᓇᐃᒃᑯᑕᖃᖅᑐᓂ ᐅᖃᖅᓯᒪᔪᒥ “ᐃᖅᑲᖅᑐᐃᓂᖃᕐᓕᑦ ᔮᓱᐊᒧᑦ” ᐅᕝᕙᓘᓐᓃᑦ “ᐃᖅᑲᖅᑐᐃᓂᖃᕐᓕᑦ ᒪᕐᕈᓕᐊᓄᑦ.” ᑯᐸᐃᖕᒥ ᐸᓖᓯᒃᑯᑦ ᓇᐅᑦᑎᖅᓱᖅᑎᖏᑦ ᖃᐅᔨᓴᖅᐳᑦ ᑐᖁᓂᐅᔪᒥ ᐹᖅᓯᓂᐅᔪᒥ ᐸᓖᓯᒃᑯᓐᓂ ᐊᒻᒪ ᒪᕐᕉᖕᓂ ᓄᓇᖃᖅᑎᐅᔪᓂ. (ᒨᓯᓯ ᑕᖅᑭᕐᒧᑦ ᐊᔾᔨᓕᐅᖅᑕᐅᔪᖅ)

ᐊᓯᐊᓂ ᕙᐃᔅᐳᒃᑯᑦ ᑕᕐᕆᔭᓕᐊᖑᔪᒥ ᑕᑯᒃᓴᐅᑎᑦᑎᔫᔮᖅᐳᖅ ᐊᑕᐅᓯᕐᒥ ᐊᖑᒻᒥ ᐊᔭᒃᓯᔪᒥ ᒪᕐᕉᖕᓂ ᐸᓖᓯᓂᑦ ᑕᐅᓄᖓ ᒪᔪᕋᐅᑎᒃᑯᑦ ᐃᓘᑉ ᓯᕗᓂᐊᓂ. ᐱᖓᔪᖓᓐᓂ ᐸᓖᓯᒥᒃ ᒪᔭᕋᐅᑎᐅᑉ ᐊᑖᓂ ᑎᒍᒥᐊᖅᑑᔮᖅᐳᖅ ᖁᑭᐅᒻᒥ.

ᒨᓯᓯ ᑕᖅᑭᖅ,  ᓴᓪᓗᓂ ᓄᓇᖃᖅᑎᐅᔪᖅ, ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᒪᕐᕉᒃ ᐊᖑᑎᐅ)ᑦ ᐃᓚᐅᖃᑕᐅᓚᐅᖅᑐᓂ ᓱᕈᓯᐅᓂᓕᒫᖓᓐᓂ ᐱᖃᓐᓇᕆᓚᐅᖅᐸᖏᑦ, ᒪᕐᕈᓕᐊᑦ ᓄᑲᕇᒃ ᔮᓱᐊ ᐊᒻᒪ ᒑᓂᑦ ᐸᐱᒐᑐᒃ.

“ᑐᓴᒐᒃᓴᓕᐊᖅ ᐅᕙᓐᓂ ᖁᐊᖅᓵᖅᑎᑦᑎᓚᐅᖅᐳᖅ,” ᑕᖅᑭᖅ ᐅᖃᓚᐅᖅᐳᖅ ᐅᖃᓘᑎᒃᑯᑦ ᐊᐱᖅᓱᖅᑕᐅᓂᐅᔪᒥ ᐅᐃᕖᑎᑐᑦ.

“ᐃᓛᓐᓂᒃᑯᑦ ᑕᐅᑐᒃᑕᑐᐊᖃᑲᐃᓐᓇᕋᓱᒃᐸᒃᐳᖓ, ᑭᓯᐊᓂ ᐊᒥᓱᐊᖅᓱᖅᖢᖓ ᕿᐊᓕᖅᐸᒃᐳᖓ. ᐅᓇ ᐊᔪᕐᓇᕐᔪᐊᖅᐳᖅ.”

ᐅᖃᓚᐅᖅᐳᖅ ᔮᓱᐊ ᐸᐱᒐᑐᒃ ᑐᖁᓚᐅᕐᓂᖓᓂ ᖃᓄᐃᓐᓂᐅᔪᒥ, ᐊᒻᒪ ᒑᓂᑦ ᑐᐊᕕᕐᓇᖅᑐᒃᑯᑦ ᖃᖓᑕᓲᒃᑯᑦ ᐊᐅᓪᓚᖅᑎᑕᐅᓚᐅᖅᐳᖅ ᐋᓐᓂᐊᕕᖕᒧᑦ ᐋᓐᓂᕐᓂᖃᖅᖢᓂ.

“ᑭᒃᑯᓕᒫᑦ, ᐅᕙᖓ ᐃᓚᐅᖃᑕᐅᓪᓗᖓ ᐅᓗᕆᐊᓇᖅᑐᒦᔮᖅ ᐸᓖᓯᒃᑯᓐᓂᑦ,” ᐅᖃᓚᐅᖅᐳᖅ.

ᑕᖅᑭᖅ ᐅᖃᓚᐅᖅᐳᖅ ᖃᐅᔨᔪᒪᕐᔪᐊᖅᐳᖅ ᖃᓄᖅ “ᑕᐃᒪᐃᒐᔪᒃᑐᒥ ᓄᖅᑲᖅᑎᑦᑎᓂᐅᔪᒥ” ᐃᓚᖃᖅᑐᒥ ᐸᓖᓯᒃᑯᓐᓂᑦ ᑐᕌᖅᑎᑦᑎᓇᔭᕐᓂᖓᓂ ᐃᓄᖕᒥ ᑐᖁᓂᕐᒥ.

ᔨᐊᕆᒻ ᑳᒻᑑᔅ, ᐋᔩᖃᑎᒌᒃᑎᐅᔪᒥ ᑯᐸᐃᖕᒧᑦ ᐸᓖᓯᒃᑯᑦ ᓇᐅᑦᑎᖅᓱᖅᑎᖓᓂ, ᐅᖃᓚᐅᖅᐳᖅ ᑕᓪᓕᒪᓂ ᖃᐅᔨᓴᖅᑎᐅᔪᓂ ᑎᓕᐅᕆᔭᐅᓯᒪᕗᑦ ᕿᒥᕐᕈᓇᖕᓂᕐᒧᑦ ᖃᓄᐃᓐᓂᐅᔪᒧᑦ. ᐱᕋᔭᖕᓂᕐᒥ ᖃᐅᔨᓴᖅᑎᓂ ᑲᑎᙵᓂᐅᔪᓂ ᑯᐸᐃᖕᒥ ᑲᓇᑕᒥ ᐊᕕᒃᑐᖅᓯᒪᓂᐅᔪᒥ ᐸᓖᓯᒃᑯᓐᓂᑦ ᐱᓕᕆᖃᑎᖃᖅᐳᑦ ᖃᐅᔨᓴᖅᑎᐅᔪᓂ ᑲᑎᙵᓂᐅᔪᓂ.

ᐅᖃᐅᓯᐅᓪᓗᓂ ᐅᐃᕖᑎᑐᑦ ᑐᓴᒐᒃᓴᓕᐊᖑᔪᒥ ᑐᓂᔭᐅᔪᒥ ᑭᖑᓂᐊᒍᑦ ᓇᒡᒐᔾᔭᐅᒥ, ᑯᐸᐃᖕᒥ ᐃᒻᒥᒃᑰᖅᑐᓂ ᖃᐅᔨᓴᕐᓂᕐᒧᑦ ᐱᓕᕆᕝᕕᐅᔪᓂ, ᐅᖃᓚᐅᖅᐳᖅ ᐃᖅᑲᓇᐃᔭᖅᑎᖏᒃ ᓇᒃᓯᐅᔾᔭᐅᓚᐅᖅᐳᑦ “ᕿᓚᒻᒥᐅᓛᖑᔪᒥ ᐱᓕᕆᓂᕐᒥ ᖃᐅᔨᓴᕐᓂᕐᒧᑦ ᐱᓕᕆᓂᐅᔪᓂ, ᐃᓚᖃᖅᑐᒥ ᐃᓂᖓᓂ, ᑲᑎᒪᖃᑎᖃᕐᓂᕐᒥ ᖁᙱᐊᓚᐅᖅᑐᓂ ᐊᒻᒪ ᐃᓚᒋᔭᐅᔪᓂ ᐃᓚᐅᔪᓂ.”

ᑳᒻᑑᔅ ᐃᓚᒋᐊᖅᓯᓚᐅᖅᐳᖅ: “BEI ᐊᐱᕆᕗᑦ ᑭᓇᑐᐃᓐᓇᒥ ᖁᙱᐊᓚᐅᖅᑐᓂ ᐆᒥᖓ ᖃᓄᐃᓐᓂᐅᔪᒥ ᐅᖃᖃᑎᖃᕐᓂᕐᒥ ᐅᕙᑦᑎᓐᓂ ᐅᕘᓇ ᐃᑭᐊᖅᑭᕕᑦᑎᓐᓄᑦ.”

Bureau des enquêtes indépendantes ᖃᐃᖁᔭᐅᕙᒃᐳᑦ ᖃᐅᔨᓴᕐᓂᕐᒥ ᐱᓕᕆᓂᐅᔪᓂ ᐃᓄᖕᒥ ᐊᓯᖓᓂ  ᐸᓖᓯᒃᑯᓐᓂᑦ ᐱᓪᓚᕆᐅᔪᒥ ᐋᓐᓂᕐᓂᐅᔪᒧᑦ ᐅᕝᕙᓘᓐᓃᑦ ᑐᖁᒍᓂ ᐱᑎᑕᐅᓂᐅᔪᒥ ᖁᑭᐅᒻᒥ ᐊᑐᖅᑕᐅᔪᒥ ᐸᓖᓯᒧᑦ.

ᑐᕌᒐᕆᔭᖓ ᖃᐅᔨᓴᖅᑕᐅᓂᖓᓄᑦ ᓴᖅᑭᑎᑦᑎᓂᕐᒥ ᐱᓖᓯᐅᑉ ᖃᓄᐃᓕᐅᕐᓂᖏᓐᓂ ᐱᓕᕆᐊᖑᔪᓂ ᐸᓖᓯᒃᑯᑦ ᓄᖅᑲᖅᑎᑦᑎᓇᓱᐊᕐᓂᖓᓂ.

ᑯᐸᐃᖕᒥ ᑲᓇᑕᒥ ᐊᕕᒃᑐᖅᓯᒪᓂᐅᔪᒥ ᐸᓖᓯᒃᑯᑦ ᐅᖃᐅᓯᒃᓴᓕᐅᕈᒪᓚᐅᙱᓚᑦ ᐆᒧᖓ ᐅᓂᒃᑳᖅᑐᐊᖅᑕᐅᑎᐅᓂᐅᔪᒥ.