ᑰᔾᔪᐊᕐᒥ ᐊᕐᓇᖅ ᓇᓂᓯᕗᖅ ᐊᑖᑕᖓᑕ ᐃᓚᖏᓐᓂ ᖃᑕᙵᑎᒌᒃᑯᑦ ᐊᐅᖃᖃᑎᒌᖕᓂᒃᑯᑦ ᐃᓕᓴᖅᓯᔾᔪᑎᒥᒃ ᖃᐅᔨᓴᖅᑕᐅᓂᖓᓂ

For an English version of this article, please read: Kuujjuaq woman finds paternal family through DNA test.

ᓘᓯ ᐊᐃᑉᕋᕼᐊᒻ 16−ᓂ ᐅᑭᐅᖃᓚᐅᖅᐳᖅ ᓯᕗᓪᓕᖅᐹᒥ ᕿᓂᓕᕋᒥ ᐊᑖᑕᒥᓂ.

ᐃᒨᓪᓗᓂ ᐊᒻᒪ ᐱᕈᖅᓴᔭᐅᓪᓗᓂ ᑰᔾᔪᐊᕐᒥ ᐊᑖᑕᖃᕐᓇᓂ, ᐅᖃᖅᐳᖅ ᐊᐱᖅᓱᒡᒍᓚᐅᖅᐳᖅ ᐊᓈᓇᒥᓂ ᐊᑖᑕᖓᓂ.

“ᐊᓈᓇᒐ ᐱᓕᕆᑦᑎᐊᕐᔪᐊᓚᐅᖅᐳᖅ ᐅᕙᓐᓂ ᐱᕈᖅᓴᐃᓪᓗᓂ ᐃᓄᑑᓪᓗᓂ ᐊᒻᒪ ᖁᔭᓕᕐᔪᐊᖅᐳᖓ ᐊᓈᓇᓐᓄᑦ. ᑭᓯᐊᓂ ᓱᕈᓯᐅᑎᓪᓗᖓ, ᓯᖕᓇᐃᓐᓇᐅᔭᖅᐸᓚᐅᖅᐳᖓ ᐱᖃᓐᓇᕆᔭᓐᓂ ᐊᑖᑕᖃᖅᑐᓂ ᐊᒻᒪ ᐊᑖᑕᖃᙱᖦᖢᖓ,” ᐊᐃᑉᕋᕼᐊᒻ ᐃᖅᑲᐃᓚᐅᖅᐳᖅ ᑕᐃᔅᓱᒪᓂᐅᔪᒥ.

“ᐊᑖᑕᑦᑎᐊᖃᓚᐅᖅᐳᖓ ᐊᒻᒪ ᐊᑖᑕᐅᔫᔮᓚᐅᖅᐳᖅ. ᑕᐃᒫᒃ ᐸᖅᑭᔭᐅᑦᑎᐊᕐᔪᐊᓚᐅᖅᐳᖓ ᐊᑖᑕᑦᑎᐊᓐᓄᑦ — ᐊᑖᑕᑦᑎᐊᓐᓄᑦ ᐊᓈᓇᑦᑎᐊᓐᓄᓪᓗ.”

ᐃᓅᓱᒃᑑᓕᖅᑎᓪᓗᒍ, ᐊᐃᑉᕋᕼᐊᒻ ᐅᖃᓚᐅᖅᐳᖅ ᐊᑖᑕᖃᕈᒪᕐᔪᐊᓕᓚᐅᖅᐳᖅ. ᑕᐃᒫᒃ ᐊᐱᖅᓱᖅᐸᓪᓕᐊᑐᐃᓐᓇᓕᓚᐅᖅᐳᖅ.

ᐅᖃᓚᐅᖅᑎᓪᓗᒍ ᐅᔾᔨᕈᓱᓚᐅᕐᓂᖓᓂ ᐊᐱᖅᓱᕐᓂᕐᒥ ᐊᓈᓇᒥᓂᒃ ᐊᑖᑕᖓᑕ ᒥᒃᓵᓄᑦ ᐋᓐᓂᐊᖅᑎᑦᑎᔪᓐᓇᕐᓂᖓᓂ, ᐃᓱᐊᓂ, ᐊᐃᑉᕋᕼᐊᒻ ᐅᖃᓚᐅᖅᐳᖅ ᐱᔾᔪᑎᖃᓚᐅᖅᐳᖅ ᖃᐅᔨᒃᑲᓐᓂᕈᒪᓂᖓᓂ ᓇᑭᙶᕐᓂᖓᓂ.

“ᖃᑕᙳᑎᖃᕈᒪᓚᐅᖅᐳᖓ ᐃᓅᓱᒃᑑᑎᓪᓗᖓ. ᐊᐱᕆᕙᓕᓚᐅᖅᐸᕋ ᐊᓈᓇᒐ: ᓇᐅᒡᓕ ᐊᑖᑕᒐ? ᓇᒦᒻᒪᖔᑦ ᖃᐅᔨᒪᕕᐅᒃ? ᐊᑎᖓ ᖃᐅᔨᒪᕕᐅᒃ ᐊᒻᒪ ᐊᔾᔨᖁᑎᖃᖅᐲᑦ,” ᐅᖃᓚᐅᖅᐳᖅ.

ᐊᓈᓇᖓᑕ ᑐᓂᓚᐅᖅᐸᖓ ᐊᑎᕐᒥ: ᐄᕝ ᐅᐊᒡᓄᕐ.

ᐊᐃᑉᕋᕼᐊᒻ ᐱᒋᐊᓚᐅᖅᐳᖅ ᕿᓂᕐᓂᖓᓂ ᐊᑖᑕᒥᓂᒃ 2000−ᒥ ᐅᕘᓈᖅᖢᓂ 411 ᑎᑎᕋᖅᓯᒪᔪᓂᒃ ᑐᖅᑯᖅᑎᕆᓯᒪᔪᒥ.

ᓚᓂᓯᓂᖃᙱᓐᓇᒥ, ᓄᖅᑲᓚᐅᑲᓚᐅᖅᐳᖅ.

2016−ᒥ, ᐊᐃᑉᕋᕼᐊᒻ ᕿᓂᕆᐊᓪᓚᒃᑲᓐᓂᓕᓚᐅᖅᐳᖅ ᐊᑖᑕᒥᓂᒃ, ᑭᓯᐊᓂ ᒫᓐᓇᐅᔪᒥ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᒥ.

“ᓴᖅᑭᑎᑦᑎᓚᐅᖅᐳᖓ ᕙᐃᔅᐳᒃᑯᑦ ᑎᑎᕋᕐᓂᐅᔪᒥ ᐅᕙᓐᓂ ᑎᒍᒥᐊᖅᖢᖓ ᑭᖑᓪᓕᖅᐹᖑᔪᒥ ᖃᐅᔨᓴᔭᐅᓂᖓᓂ ᑐᓴᒐᒃᓴᐅᔪᒥ,” ᐅᖃᓚᐅᖅᐳᖅ.

ᑎᑎᕋᖅᑕᖓ ᑕᑯᒃᓴᐅᑎᑕᐅᒐᓗᐊᖅᑎᓪᓗᒍ ᐅᓄᕐᓂᖅᓴᐅᔪᒥ 1,000−ᖏᖅᓱᖅᑐᒥ, ᓯᕗᒻᒧᐊᖅᑐᖃᓚᐅᙱᓚᖅ ᓄᑖᓂ ᐃᑲᔪᕈᑎᒃᓴᓂ ᐄᕝ ᐅᐊᒡᓄᕐ ᓇᒦᓐᓂᖓᓂ.

ᑕᐃᒫᒃ 2018−ᒥ ᐊᐃᑉᕋᕼᐊᒻ ᐃᓱᒪᓕᐅᕆᓚᐅᖅᐳᖅ ᐱᓕᕆᓂᕐᒥ ᖃᑕᙵᑎᒌᒃᑯᑦ ᐊᐅᖃᖃᑎᒌᖕᓂᒃᑯᑦ ᐃᓕᓴᖅᓯᔾᔪᑎᒥᒃ ᖃᐅᔨᓴᖅᑕᐅᓂᖓᓂ.

ᐱᒋᐊᕈᑎᖃᓚᐅᖅᐳᖅ Ancestry.com−ᒥ ᑭᓯᐊᓂ ᐱᓕᕆᓂᖃᑦᑎᐊᓚᐅᙱᓚᖅ ᓇᓕᒧᓐᓂᖃᓚᐅᙱᓚᖅ ᐊᑖᑕᒥᓂᒃ.

ᑖᔅᓱᒥᖓ ᖃᐅᔨᒪᓪᓗᓂ, ᓇᓂᓯᔪᓐᓇᕈᓂ ᓇᓕᒧᓐᓂᖃᖅᑐᒥ, ᖃᑕᙵᑎᒌᒃᑯᑦ ᐊᐅᖃᖃᑎᒌᖕᓂᒃᑯᑦ ᐃᓕᓴᖅᓯᔾᔪᑎᒥᒃ ᖃᐅᔨᓴᖅᑕᐅᓂᕐᒥ ᐱᓕᕆᓂᑦᑎᐊᕙᐅᓇᔭᖅᐳᖅ ᓇᓂᓯᓂᖓᓂ ᐊᑖᑕᖓᓂ, ᐊᐃᑉᕋᕼᐊᒻ ᐆᒃᑐᒃᑲᓐᓂᓚᐅᖅᐳᖅ — ᑭᖑᓪᓕᕐᒥ, ᐱᓪᓗᓂ ᖃᑕᙵᑎᒌᒃᑯᑦ ᐊᐅᖃᖃᑎᒌᖕᓂᒃᑯᑦ ᐃᓕᓴᖅᓯᔾᔪᑎᒥᒃ ᖃᐅᔨᓴᖅᑕᐅᓂᕐᒥ 23andMe−ᒥ ᔫᓂ 2022−ᒥ.

ᓘᓯ ᐊᐃᑉᕋᕼᐊᒻ ᐊᒻᒪ ᐃᓪᓗᖓ ᐃᕚᓐ ᐅᐊᒡᓄᕐ ᐊᒪᐅᖓᑕ ᐊᒻᒪ ᐊᑖᑕᑦᑎᐊᖓᓂ ᐃᓗᕕᖓᓐᓂ ᒪᓐᑐᕆᐋᓪᒥ ᓯᑎᐱᕆ 2022−ᒥ. ᐃᓚᒌᑦ ᖃᐅᔨᔪᓐᓇᖅᐳᑦ ᓇᑭᙶᕐᓂᖏᓐᓂ ᕗᕌᓐᔅᒧᑦ ᐊᒻᒪ ᐱᐅᓪᔨᐊᒻᒧᑦ, ᐊᓴᐅᖓ ᓅᓚᐅᖅᑎᓪᓗᒍ ᑲᓇᑕᒧᑦ. (ᐊᔾᔨᖁᑎᒋᔭᐅᔪᖅ ᓘᓯ ᐊᐃᑉᕋᕼᐊᒻᒧᑦ)

23andMe ᐃᑭᐊᖅᑭᕕᒃ ᓂᐅᕕᐊᒃᓴᖃᓲᖑᕗᑦ ᖃᐅᔨᓴᕈᑎᓂ ᐴᖅᓯᒪᔪᓂ ᓂᐅᕕᖅᐸᒃᑐᑦ ᓇᒃᓯᐅᔾᔨᓪᓗᑎᒃ ᑲᒻᐸᓂᒧᑦ ᖃᑕᙵᑎᒌᒃᑯᑦ ᐊᐅᖃᖃᑎᒌᖕᓂᒃᑯᑦ ᐃᓕᓴᖅᓯᔾᔪᑎᒥᒃ ᖃᐅᔨᓴᖅᑕᐅᓂᖓᓄᑦ. ᑲᓱᖃᑎᖃᓲᖑᒋᕗᖅ ᐃᓄᖕᓂ ᓯᕗᓕᖅᓱᕈᑎᓂᒃ ᐃᓚᖏᓐᓂ ᐱᔨᑦᑎᕋᕐᓂᐅᑉ ᑎᑎᕋᖅᓯᒪᔪᓂᒃ ᑐᖅᑯᖅᑎᕆᓯᒪᔪᒥ

ᖃᓄᐃᓕᖓᓂᐅᔪᑦ ᐅᑎᓚᐅᖅᐳᑦ ᑕᖅᑭᖅ ᐊᓂᒍᕋᒥ, ᓇᓕᒧᑎᑦᑎᓪᓗᓂ ᐊᐃᑉᕋᕼᐊᒻᒥ ᐃᓄᖕᒥ ᐊᑖᑕᖏᑕ ᐊᔾᔨᒋᔭᖓᓂ ᐱᖏᐊᕐᓂᐅᔪᓂ ᐊᑎᖓᓐᓂ: Y.W.

ᐃᓱᒪᓚᐅᖅᐳᖅ ᓇᓕᒧᓐᓂᖃᕐᓂᖓᓂ ᐊᑖᑕᖓᓂ, ᖃᐅᔨᒋᐊᕋᒥ ᐃᓄᖕᒧᑦ ᑲᓱᖃᑎᒋᓚᐅᖅᑕᖓᓂ, ᐃᓕᑦᑎᓚᐅᖅᐳᖅ ᐃᓪᓗᕆᓂᖓᓂ ᐊᑎᓕᖕᒥ ᐃᕚᓐ ᐅᐊᒡᓄᕐᒥ ᓄᓇᖃᖅᑐᒥ ᐃᓚᒥᓂ ᒪᓐᑐᕆᐋᓪᒥ.

ᐊᕐᕌᓂ, Labour Day ᐱᓇᓱᐊᕈᓯᐅᑉ ᓄᙳᐊᓂ, ᐊᐃᑉᕋᕼᐊᒻ ᐊᒻᒪ ᐃᕐᓂᖓ ᖃᖓᑕᓲᒃᑯᑦ ᒪᓐᑐᕆᐋᓪᓕᐊᓚᐅᖅᐳᑦ ᑕᑯᔭᖅᑐᕐᓂᕐᒥ ᐃᕚᓐᒥ ᐊᒻᒪ ᐃᓚᖏᓐᓂ ᓯᕗᓪᓕᖅᐹᑦᑎᐊᒥ.

“ᐃᔨᖏᓐᓄᑦ ᕿᕕᐊᕋᒪ ᐊᒻᒪ ᐃᓱᒪᓚᐅᖅᐳᖓ, ‘ᐅᐊᑲᓪᓚᖔ! ᓲᕐᓗ ᐃᔨᓐᓄᑦ ᐃᔨᒋᑐᐃᓐᓇᖅᑐᖓ,’ ᐊᒻᒪ ᐃᒡᓚᖅᓯᓚᐅᖅᐳᖓ,” ᐊᐃᑉᕋᕼᐊᒻ ᐅᖃᓚᐅᖅᐳᖅ.

“ᓲᕐᓗ ᐊᑯᓂᒻᒪᕆᐊᓗᒃ ᖃᐅᔨᒪᖃᑦᑕᐅᑎᔪᒍᑦ.”

ᐃᕚᓐᑯᑎᒍᑦ, ᐊᐃᑉᕋᕼᐊᒻ ᐅᖃᓚᐅᖅᐳᖅ ᐃᓕᑦᑎᓯᒪᕐᔪᐊᕐᓂᖓᓂ ᐊᑖᑕᖓᑕ ᐃᓚᖏᓐᓂ. ᐊᑖᑕᖓ ᐃᓅᔪᓐᓃᓚᐅᖅᐳᖅ 2016−ᒥ, ᑭᓯᐊᓂ ᐃᓪᓗᖓᑕ ᐊᖁᓚᐅᖅᐸᖓ ᑕᖃᐃᖅᓯᕐᕕᒋᓕᖅᑕᖓᓄᑦ ᐊᒪᐅᖓᑕ ᓅᓚᐅᖅᓯᒪᔪᒥ ᑲᓇᑕᒧᑦ ᕗᕌᓐᔅᒥ.

ᐊᐃᑉᕋᕼᐊᒻ ᐅᖃᓚᐅᖅᐳᖅ ᐱᓕᕆᓂᐅᔪᒥ ᑲᑎᖃᑎᖃᒃᑲᓐᓂᕐᓂᕐᒥ ᐃᓚᖏᓐᓂ ᐱᒻᒪᕆᐅᓯᒪᒋᕗᖅ ᐃᕐᓂᖓᓄᑦᑕᐅᖅ.

“17−ᖑᓕᖅᐳᖅ ᒫᓐᓇ ᑕᐃᒫᒃ ᑐᑭᓯᑎᓚᐅᖅᐸᕋ ᐱᓕᕆᓂᐅᔪᒥ ᐊᒻᒪ ᐅᓂᒃᑲᐅᑎᓪᓗᒍ ᐊᑖᑕᖃᓚᐅᙱᓐᓂᓐᓂ ᐱᕈᖅᓴᑎᓪᓗᖓ,” ᐅᖃᓚᐅᖅᐳᖅ.

“ᓴᓂᓕᓐᓃᓚᐅᖅᐳᖅ … ᑲᑎᖃᑎᒋᑎᓪᓗᑎᒍᑦ.”

ᐊᐃᑉᕋᕼᐊᒻ ᐊᒻᒪ ᐃᕚᓐ ᑐᓴᐅᒪᖃᑎᒌᖏᓐᓇᖅᐳᑦ ᑕᐃᒪᙵᓂ ᓯᕗᓪᓕᖅᐹᒥ ᐹᖃᑦᑕᐅᑎᒐᒥᒃ ᑕᖅᑭᑲᓴᐃᑦ 6−ᖑᓕᖅᑐᓂ, ᐃᓚᓯᓪᓗᑎᒃ ᐃᒻᒥᓂᒃ ᐱᖃᓐᓇᕇᖕᓂᖏᓐᓂ ᕙᐃᔅᐳᒃᑯᑦ. ᐃᓚᒌᑦ ᐸᕐᓇᓕᖅᐳᑦ ᑲᑎᓐᓂᕐᒥ ᐊᐅᔭᒃᑯᑦ ᐊᒻᒪ ᐊᐃᑉᕋᕼᐊᒻ ᐅᖃᓚᐅᖅᐳᖅ ᖁᕕᐊᑉᐳᑦ ᑕᑯᔭᕆᐅᓛᕐᓂᖓᓂ ᐃᕚᓐ ᐸᓂᖏᓐᓂ ᑕᐃᑲᓂ.

“ᐱᐅᕐᔪᐊᖅᐳᖅ ᑐᓴᐅᒪᖃᑎᒌᓕᕐᓂᑦᑎᓐᓂ ᐊᒻᒪ ᐅᕙᓐᓂ ᖃᐅᔨᑎᑦᑎᕙᓪᓕᐊᖏᓐᓇᖅᐳᖅ ᐅᐊᒡᓄᔅᓂ.”

ᐊᐃᑉᕋᕼᐊᒻ ᐅᖃᓚᐅᖅᐳᖅ ᖃᐅᔨᒪᓪᓚᕆᓚᐅᙱᓚᖅ ᑲᑎᖃᑎᖃᕐᓂᐊᕐᓂᖓᓂ ᐊᑖᑕᖓᓂ ᐊᒻᒪ ᐃᓚᖏᓐᓂ, ᑭᓯᐊᓂ ᐊᔭᐅᕆᕗᖅ ᑕᒪᒃᑭᓂ ᕿᓂᖅᑐᓂ ᐃᓚᖏᓐᓂ “ᑭᒃᑯᑦ ᐃᓯᒐᐅᔭᓐᓃᑦᑐᓂ” ᓄᖅᑲᖅᑕᐃᓕᓂᕐᒥ ᕿᓂᕐᓂᕐᒧᑦ — ᐊᒻᒪ ᐆᒃᑐᕐᓗᑎᑦ ᖃᑕᙵᑎᒌᒃᑯᑦ ᐊᐅᖃᖃᑎᒌᖕᓂᒃᑯᑦ ᐃᓕᓴᖅᓯᔾᔪᑎᒥᒃ ᖃᐅᔨᓴᖅᑕᐅᓂᕐᒥ ᐱᔪᓐᓇᖅᐸᑕ.

“ᐅᐊᑲᓪᓚᐅᕗᖅ ᐊᒻᒪ ᖁᕕᐊᓱᑦᑎᐊᖅᐳᖓ ᐃᓚᒋᔭᐅᓂᓐᓂ [ᐃᓚᑦᑎᓐᓂ] ᒫᓐᓇᐅᔪᒥ.”