ᐱᐅᒋᔭᐅᙱᑦᑐᒥ ᐃᒃᓯᕋᕐᔪᐊᖅ ᔪᕼᐋᓇᔅ ᕆᕗᐊᕐ ᑐᖁᕗᖅ 93−ᖑᓪᓗᓂ

For the English version of this story, please see Disgraced priest Rivoire dead at 93.

ᐃᒃᓯᕋᕐᔪᐊᖅ ᔪᕼᐋᓇᔅ ᕆᕗᐊᕐ, ᓄᓇᕗᒻᒥ ᐃᒃᓯᕋᕐᔪᐊᖑᓚᐅᖅᑐᖅ ᐸᓯᔭᒃᓴᐅᓯᒪᔪᒥ ᖁᓄᔪᓐᓂᐊᕐᓂᕐᒥ ᖃᔅᓯᒐᓚᖕᓂ ᐃᓄᖕᓂ ᓱᕈᓯᕐᓂ, ᐃᓅᔪᓐᓃᖅᓯᒪᕗᖅ.

ᕋᕗᕋᓐ ᑭᐊᓐ ᑐᐊᓴᓐ, ᐊᖓᔪᖅᑳᖑᔪᖅ Oblates of Mary Immaculate ᑎᓕᐅᕆᓂᐅᔪᒥ ᐊᖓᔪᖅᑳᖃᕐᕕᓕᖕᒥ ᐋᑐᕚᒥ, ᓇᓗᓇᐃᖅᑕᐅᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᕆᕗᐊᕐ, ᐃᒃᓯᕋᕐᔪᐊᒃᑯᑦ ᐃᒃᓯᕋᕐᔪᐊᖓᓂ, ᐃᓅᔪᓐᓃᓚᐅᕐᓂᖓᓂ ᐊᐃᑉᕆᓕ 11−ᒥ ᐊᑯᓂᐅᔪᒥ, ᓇᓗᓇᐃᖅᑕᐅᓯᒪᙱᑦᑐᒥ ᖃᓂᒪᓂᐅᔪᒥ.

93-ᓂ-ᐅᑭᐅᓕᒃ ᐅᓄᕐᓂᖅᓴᐅᔪᓂ ᐊᕐᕌᒍᓂ 30−ᓂ ᐃᖅᑲᓇᐃᔭᖅᖢᓂ ᐃᒃᓯᕋᕐᔪᐊᖑᓂᕐᒥ ᖃᔅᓯᒐᓚᖕᓂ ᓄᓇᕗᒻᒥ ᓄᓇᓕᐅᔪᓂ. ᐃᓚᒋᔭᐅᓚᐅᖅᐳᖅ ᐅᒃᐱᕐᓂᐅᔪᒥ ᑎᓕᐅᕈᑕᐅᔪᒥ, ᐅᒃᐱᖅᑐᓄᑦ ᑎᓕᐅᕈᑕᐅᔪᒥ ᐃᓗᐊᓂ ᐃᒃᓯᕋᕐᔪᐊᒃᑯᓐᓂ ᑐᒃᓯᐊᕐᕕᖓᓐᓂ.

ᕆᕗᐊᕐ ᕿᒪᒃᓯᓚᐅᖅᐳᖅ ᑲᓇᑕᒥ ᐊᖏᕐᕋᖓᓄᑦ ᓄᓇᖓᓄᑦ ᕗᕌᓐᔅᒧᑦ 1993−ᒥ, ᑕᐃᔅᓱᒪᓂᒐᓚᒃ ᑲᓇᑕᒥ ᐸᓖᓯᒃᑯᑦ ᖃᐅᔨᓴᖅᐸᓪᓕᐊᓕᖅᑎᓪᓗᒋᑦ ᐸᓯᔭᐅᔾᔪᑎᖏᓐᓂ.

ᓯᕗᓪᓕᖅᐸᐅᔪᓂ ᐃᖅᑲᖅᑐᒐᒃᓴᓂ ᐃᓕᔭᐅᓚᐅᖅᐳᑦ ᕆᕗᐊᕐᒧᑦ 1998−ᒥ. ᐊᒃᓱᕈᕐᓂᐅᔪᓂ ᑲᓇᑕᒧᐊᖅᑎᑕᐅᓇᓱᐊᕐᓂᖓᓂ ᑐᕌᖅᑎᑦᑎᓂᖃᓚᐅᖅᐳᖅ ᑭᖕ ᓴᐳᓐᓂᐊᖅᑎᖓᓂ ᖁᔭᓈᖅᑕᐅᓂᖏᓐᓂ ᑕᐃᒃᑯᓂᖓ ᐃᖅᑲᖅᑐᒐᒃᓴᐅᔪᓂ 2017−ᒥ.

ᐊᑕᐅᓯᐅᔪᒥ ᓄᑖᖑᔪᒥ ᐃᖅᑲᖅᑐᒐᒃᓴᒥ ᑕᐃᔅᓱᒪᓂᑐᖃᖅ ᖁᓄᔪᓐᓂᐊᕐᓂᕐᒥ ᐃᓕᔭᐅᓚᐅᖅᐳᖅ ᕆᕗᐊᕐᒧᑦ 2022−ᒥ.

ᐃᖅᑲᖅᑐᒐᒃᓴᐃᑦ ᖃᐅᔨᓴᖅᑕᐅᓚᐅᖅᓯᒪᙱᓚᑦ ᐃᖅᑲᖅᑐᐃᕕᖕᒥ.

ᐸᓯᔨᑎᒍᑦ, ᕆᕗᐊᕐ ᐸᓯᔭᒃᓴᐅᔪᓂ ᐱᙱᓐᓂᕋᓚᐅᖅᐳᖅ ᒫᓐᓇᓕᓴᐅᓛᖑᔪᒥ 2022−ᒥ.

ᕆᕗᐊᕐ ᐅᑎᒃᑲᓐᓂᓚᐅᙱᓚᖅ ᑲᓇᑕᒧᑦ, ᖃᔅᓰᖅᓱᒐᓚᖅᖢᑎᒃ ᖃᔅᓯᒐᓚᖕᓂ ᑲᑎᙵᓂᐅᔪᓂ ᐅᑎᖅᑎᑕᐅᓇᓱᐊᕋᓗᐊᖅᑎᓪᓗᒍ.

“ᐃᓕᓴᖅᓯᕗᒍᑦ ᐅᓇ ᑐᓴᒐᒃᓴᖅ ᐊᔪᕐᓇᕐᓂᐊᖅᐳᖅ ᐊᒥᓱᓄᑦ ᐱᔭᕆᐊᒃᓴᖅ, ᐱᓗᐊᖅᑐᒥ ᐆᒪᐃᓐᓇᖅᓯᒪᔪᓄᑦ ᐊᒻᒪ ᐃᓚᖏᓐᓂ ᐃᑲᔪᖅᓱᐃᓚᐅᖅᑐᓂ ᓵᙵᓂᕐᒧᑦ ᐃᖅᑲᖅᑐᖅᑕᐅᓂᖓᓂ ᑲᓇᑕᒥ,” ᑐᐊᓴᓐ ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

“ᐅᒡᒍᐊᕐᔪᐊᖅᐳᒍᑦ ᐃᓱᒪᒋᓇᒍ ᐊᒃᓱᕈᕐᓂᓕᒫᖏᓐᓂ, ᕆᕗᐊᕐ ᐃᒻᒥᓂᒃ ᐊᑐᐃᓐᓇᕈᖅᑎᑦᑎᓚᐅᙱᓚᖅ ᐊᒻᒪ ᓵᙵᓚᐅᖅᓯᒪᔾᔮᙱᓐᓂᖓᓂ ᐃᖅᑲᖅᑐᒐᒃᓴᐅᔪᓂ ᐃᓕᔭᐅᓚᐅᖅᑐᓂ ᑖᔅᓱᒧᖓ. ᐅᒡᒍᐊᒃᑲᓐᓂᖅᐳᒍᑦ ᐊᒃᓱᕈᕐᓂᐅᔪᓂ ᐲᖅᑕᐅᓪᓚᕆᖕᓂᖓᓂ ᐃᒃᓯᕋᕐᔪᐊᖑᓂᕐᒥ ᐱᑎᑕᐅᔪᓐᓇᓚᐅᙱᓐᓂᖏᓐᓂ.”

ᓯᑎᐱᕆ 2022−ᒥ ᐊᐅᓪᓛᕐᓂᐅᔪᒥ ᐋᖅᑭᒃᓱᖅᑕᐅᔪᒥ ᓄᓇᕗᒻᒥ ᑐᙵᕕᒃᑯᓐᓂ, ᑲᑎᙵᓂᐅᔪᓂ ᓄᓇᕗᒻᒥ ᐃᓄᖕᓂ ᐊᐅᓪᓛᓚᐅᖅᐳᑦ ᐱᐊᕆᔅ, ᕗᕌᓐᔅᒧᑦ, ᐅᑎᖅᑎᖁᔨᓪᓗᑎᒃ ᕆᕗᐊᕐᒥ ᓵᙵᓂᕐᒧᑦ ᐃᖅᑲᖅᑐᖅᑕᐅᓂᖓᓂ ᑲᓇᑕᒥ.

ᑲᑎᙵᓂᐅᔪᑦ ᐃᓚᖃᓚᐅᖅᐳᑦ ᓯᑏᕝ ᒪᑉᓴᓚᒃ, ᒪᓕᒐᓕᐅᖅᑎᐅᓚᐅᖅᓯᒪᔪᖅ ᕆᕗᐊᕐ ᐸᓯᒃᖠᕆᓚᐅᖅᑐᒥ ᐱᓕᕆᕙᖕᓂᖓᓂ ᓯᕗᓪᓕᖅᐸᐅᔪᓂ ᐃᖅᑲᖅᑐᒐᒃᓴᓂ ᐃᓕᔭᐅᓚᐅᖅᑐᓂ ᐃᒃᓯᕋᕐᔪᐊᖑᔪᒧᑦ, ᐊᒻᒪᓗᑦᑕᐅᖅ ᑖᓐᔭ ᐊᒻᒪ ᔭᓯ ᑐᖏᓕᒃ, ᕿᑐᕐᙵᕆᔭᐅᔪᑦ ᐃᓅᔪᓐᓃᖅᓯᒪᓕᖅᑐᒥ ᒥᐊᕆᐊᔅ ᑐᖏᓕᖕᒥ ᕆᕗᐊᕐ ᐃᖅᑲᖅᑐᒐᒃᓴᓕᐊᖑᓯᒪᔪᒥ ᖁᓄᔪᓐᓂᐊᕐᓂᕐᒧᑦ.

ᐃᓚᖏᑦ ᑲᑎᙵᓂᐅᔪᑦ ᑕᑯᔪᓐᓇᖅᓯᓚᐅᖅᐳᑦ ᕆᕗᐊᕐᒥ ᑕᐃᔅᓱᒪᓂ ᐊᐅᓪᓛᕐᓂᐅᔪᒥ. ᑲᑎᒪᖃᑎᖄᓂᒃᑎᓪᓗᒋᑦ ᒪᑉᓴᓚᒃ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᐃᒃᓯᕋᕐᔪᐊᖅ ᖁᓄᔪᓐᓂᐊᓚᐅᖅᓯᒪᙱᓐᓂᖓᓂ ᐃᒻᒥᓂᒃ ᐊᒻᒪ ᓄᑲᖓᓐᓂ.

“ᑭᐅᓚᐅᖅᐳᖓ, ‘ᓴᒡᓗᔪᑎᑦ, ᖃᐅᔨᒪᑦᑎᐊᖅᑐᑎᑦ ᐅᕙᓐᓄᑦ ᖃᓄᐃᓕᐅᓚᐅᕐᓂᕐᓂᑦ ᐊᒻᒪᓗ ᓄᑲᓐᓄᑦ,’” ᒪᑉᓴᓚᒃ ᐅᖃᓚᐅᖅᐳᖅ.

ᒪᑉᓴᓚᒃ ᐅᖃᕐᕕᐅᒧᓐᓇᓚᐅᙱᓚᖅ ᐊᐃᑉᕆᓕ 12−ᒥ ᐅᖃᐅᓯᒃᓴᓕᐅᕐᓂᕐᒧᑦ ᕆᕗᐊᕐ ᑐᖁᓂᖓᓂ.

ᑭᒡᒐᖅᑐᐃᔨᐅᔪᒥ ᓄᓇᕗᒻᒥ ᑐᙵᕕᒃᑯᓐᓂ ᑭᐅᓚᐅᙱᓚᖅ ᑐᒃᓯᕋᕐᓂᐅᔪᒥ ᐅᖃᐅᓯᒃᓴᓕᐅᕐᓂᕐᒧᑦ ᐆᒧᖓ ᐅᓂᒃᑳᓕᐊᖑᔪᒧᑦ.

ᒫᓐᓇᓕᓴᐅᓂᖅᓴᐅᔪᒥ, ᓄᖅᑲᖓᓕᖅᑐᖅ ᑯᐸᐃᖕᒥ ᐃᖅᑲᖅᑐᐃᔨ ᐋᓐᑐᕋᐃ ᑕᓃ ᑐᕌᖅᑎᑦᑎᓚᐅᖅᐳᖅ ᐅᒃᐱᕐᓂᐅᔪᓂ ᓴᐳᔾᔭᐅᓯᒪᓂᐅᔪᒥ ᑲᑎᒪᔨᐅᔪᓂ. ᓴᖅᑭᑎᑕᐅᓚᐅᖅᐳᖅ ᐅᒃᐱᕐᓂᐅᔪᓂ ᖃᐅᔨᓴᕐᓂᕐᒧᑦ ᖃᓄᖅ ᑐᒃᓯᐊᕐᕕᒃ ᐊᒻᒪ ᑲᓇᑕᒥ ᐸᓖᓯᒃᑯᑦ ᑲᒪᒋᔭᖃᓚᐅᕐᓂᖏᓐᓂ ᐸᓯᔭᒃᓴᐅᓂᐅᔪᓂ ᐱᓕᕆᐊᖑᓚᐅᖅᑐᒥ ᕆᕗᐊᕐᒧᑦ.

ᓴᖅᑭᑎᑕᐅᓚᐅᖅᑎᓪᓗᒍ ᐅᓂᒃᑳᓕᐊᖅ ᑕᖅᑭᓂ−10-ᓂ ᖃᐅᔨᓴᖅᑕᐅᓂᖓᓂ ᑕᖅᑭᐅᓚᐅᖅᑐᒥ, ᑕᓃ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᑕᑯᒃᓴᐅᓂᐅᔪᑦ “ᑕᑯᒃᓴᐅᑎᑦᑎᕐᔪᐊᖅᐳᖅ”ᕆᕗᐊᕐ ᖁᓄᔪᓐᓂᐊᖅᓯᓚᐅᕐᓂᖓᓂ ᑕᓪᓕᒪᓂ ᐃᓄᖕᓂ ᓱᕈᓯᕐᓂ ᒫᓐᓇᐅᔪᒥ ᓄᓇᕘᓕᖅᑐᖅ ᕿᑎᐊᓂ 1968−ᒥ ᐊᒻᒪ 1979−ᒧᑦ.

ᕆᕗᐊᕐ ᓱᓕᒃᑲᓐᓂᖅ ᐱᖏᓐᓂᕋᐃᓚᐅᖅᐳᖅ ᐸᓯᔭᐅᓂᐅᔪᓂ 2023−ᒥ ᐊᐱᖅᓱᖅᑕᐅᓂᐅᔪᒥ ᑕᓃᒧᑦ ᐅᓂᒃᑳᓕᐊᖑᔪᒧᑦ.