ᓴᒃᑯ, Embassy West ᐱᕗᑦ $150ᒥᓕᐊᓐᓂ ᐊᑯᓂᐅᔪᒥ ᐸᖅᑭᔭᐅᓂᐅᔪᒥ ᑳᓐᑐᕌᖑᔪᒥ

For English version, see Sakku, Embassy West get $150M Rankin Inlet long-term care contract

ᓴᒃᑰᑉ ᐱᕈᐃᔭᖏᓂ ᐊᐅᓚᑦᑎᔩᑦ ᐊᒻᒪ Embassy West ᐃᓄᑐᖃᕐᓄᑦ ᐃᓅᓂᕐᒧᑦ ᐱᓂᐅᕗᑦ $150-ᒥᓕᐊᓐᒥ ᑳᓐᑐᕌᖑᔪᒥ ᐊᐅᓚᑦᑎᓂᕐᒥ ᓄᑖᖑᔪᒥ ᐊᑯᓂᐅᔪᒥ ᐸᖅᑭᔭᐅᓂᐅᔪᒥ ᐊᖏᕐᕋᒃᓴᒥ ᑲᖏᖅᖠᓂᕐᒥ.

24-ᓂ−ᐃᒡᓕᓕᖕᓂ ᐊᖏᕐᕋᐅᔪᖅ, ᓵᙵᓂᖃᖅᓯᒪᔪᒥ ᑭᖑᕙᕆᐊᕐᓂᐅᔪᓂ ᓇᑉᐸᖅᑎᕆᓂᖏᓐᓄᑦ, ᓂᕆᐅᒋᔭᐅᕗᖅ ᐸᕐᓇᒃᓯᒪᓕᕐᓂᐊᕐᓂᖓᓂ ᑕᒪᑐᒪᓂ ᐊᕐᕌᒎᔪᒥ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᑦᑎᖅᓯᓚᐅᖅᐳᑦ ᑳᓐᑐᕌᒃᑎᙳᖅᑐᓂ ᐊᐃᑉᕆᓕ 12−ᒥ ᑐᓴᒐᒃᓴᓕᐊᖑᔪᒥ.

ᐃᓚᒋᔭᐅᓪᓗᓂ ᐊᖏᕈᑕᐅᔪᒥ, ᓴᒃᑯ ᓴᖅᑭᑎᑦᑎᓂᐊᖅᐳᖅ ᓄᑖᖑᔪᒥ “ᐊᓯᐊᒎᖅᑐᒥ ᐃᖅᑲᓇᐃᔭᖅᑎᓄᑦ ᐃᑲᔪᖅᓱᐃᔨᐅᓂᐊᖅᑐᓂ ᓴᓇᔨᓂ ᐃᓂᒃᓴᐅᔪᓂ” ᐃᓚᒋᔭᐅᓗᓂ ᐱᓕᒻᒪᒃᓴᓂᕐᒧᑦ ᑲᑐᔾᔨᖃᑎᒌᖕᓂᐅᔪᒥ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ, ᑐᓴᒐᒃᓴᓕᐊᖅ ᐅᖃᓚᐅᖅᐳᖅ.

ᐊᕐᕌᒍᓄᑦ−10-ᓄᑦ ᑳᓐᑐᕌᖑᔪᖅ $15 ᒥᓕᐊᓐ−ᖑᓂᐊᖅᐳᖅ ᐊᕐᕌᒍᑕᒫᒥ, ᐅᖃᓚᐅᖅᐳᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᖅᑎᖓ ᓇᐃᑏᓐ ᐴᑎ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

ᐊᖏᕈᑕᐅᔪᖅ ᓴᖅᑭᑎᑦᑎᓂᐊᖅᐳᖅ 43−ᓂ ᐃᖅᑲᓇᐃᔮᒃᓴᓂ, ᐅᖃᓚᐅᖅᐳᖅ.

ᓴᒃᑯ ᐊᒻᒪ Embassy West ᑕᐅᑐᒃᑕᑐᐊᖃᑲᐃᓐᓇᖅᐳᑦ ᐊᖏᒡᓕᒋᐊᖅᑎᑦᑎᓂᕐᒥ ᐃᓄᑐᖃᕐᓂ−ᐸᖅᑭᔭᐅᓂᖏᓐᓂ ᐱᔨᑦᑎᕋᕐᓂᐅᔪᒥ ᓄᓇᕗᒻᒥ, ᐅᖃᓚᐅᖅᐳᖅ ᐊᐃᑉᕆᓕ 18−ᒥ ᑐᓴᒐᒃᓴᓕᐊᖑᔪᒥ ᓴᒃᑯᒃᑯᓐᓂ.

ᓄᓇᕗᒻᒥ ᒐᕙᒪᒃᑯᑦ ᐊᒻᒪ ᓴᒃᑯ ᓂᕆᐅᒋᔭᐅᕗᑦ ᐱᓕᕆᓂᖏᓐᓂ ᐊᑎᓕᐅᕆᓂᕐᒥ ᖁᕕᐊᓱᒍᑕᐅᔪᒥ ᐊᖏᕈᑕᐅᔪᒥ ᐊᐃᑉᕆᓕ 30−ᒥ ᑲᖏᖅᖠᓂᕐᒥ.

“[ᓴᒃᑰᑉ] ᐊᐅᓚᑕᐅᓂᖓᓂ ᐃᑲᔪᖅᓱᐃᓂᖓᓂ, ᐊᖏᒡᓕᒋᐊᖅᑎᑦᑎᕗᒍᑦ ᖃᐅᑕᒫᒥ ᐃᓅᓯᐅᔪᒥ, ᖁᕝᕙᕆᐊᖅᑎᑦᑎᓪᓗᑕ ᐃᖅᑲᓇᐃᔮᒃᓴᖃᕐᓂᕐᒥ ᐸᖅᑭᓂᐅᔪᒥ, ᐊᒻᒪ ᐱᒻᒪᕆᐅᓂᖅᓴᐅᔪᒥ, ᐱᔪᓐᓇᖅᑎᑦᑎᓂᕐᒥ ᓄᓇᕗᒻᒥᐅᓂ ᐊᒻᒪ ᐃᓄᑐᖃᕐᓂ ᐸᖅᑭᔭᐅᔭᕆᐊᖃᖅᑐᓂ ᓄᓇᖃᕐᓂᖏᓐᓂ ᖃᓂᓐᓂᖅᓴᐅᔪᒥ ᐃᓚᖏᓐᓄᑦ ᐊᒻᒪ ᓄᓇᓕᖕᓄᑦ,” ᐅᖃᓚᐅᖅᐳᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᔮᓐ ᒪᐃᓐ ᓄᓇᕗᒻᒥ ᒐᕙᒪᒃᑯᑦ ᐊᐃᑉᕆᓕ 12 ᑐᓴᒐᒃᓴᓕᐊᖓᓂ.

Embassy West ᐃᓄᑐᖃᕐᓂ ᐃᓅᓂᕐᒧᑦ ᐊᐅᓚᑦᑎᕙᒃᑭᕗᑦ ᐊᑯᓂᐅᔪᒥ ᐸᖅᑭᔭᐅᓂᐅᔪᒥ ᐃᒡᓗᕐᔪᐊᕐᒥ ᐋᑐᕚᒥ 70−ᐸᓗᖕᓂ ᐃᓄᖕᓂ ᐃᓄᑐᖃᕐᓂ ᐃᒡᓗᖃᖃᑕᐅᓪᓗᑎᒃ.