ᑮᓇᐅᔭᓕᐅᕈᑎᐅᔪᓄᑦ ᓈᒻᒪᙱᓕᐅᕈᑎᒃ ᓴᖅᑭᑕᐅᕗᑦ ᑲᑎᒪᔩᑦ ᑲᑎᒪᑎᓪᓗᒋᑦ

For the English version of this story, please see Disparity between retail worker, CEO salaries come to light in committee meeting.

ᓄᓇᕗᒧᑦ ᒪᓕᒐᓕᐅᖅᑎ ᓘᕆ ᐃᓪᓚᐅᖅ ᓂᓪᓕᐅᑎᖃᓚᐅᕐᑐᖅ ᐅᓇ ᐊᖓᔪᖅᑳᖅ ᐊᐅᓚᑦᑎᔨ ᓂᐅᕕᖅᑎᒃᑯᓐᓄᑦ ᓄᐊᑦ ᕕᐊᔅᑦ ᑲᒻᐸᓂᑯᓐᓄ ᐊᕐᕌᒍᓂ ᑮᓇᐅᔭᓕᐊᕆᕙᒃᑕᖓᓂ ᒪᐃ 8-ᒥ ᑲᑎᒪᔨᕐᔪᐊᑦ House of Commons ᓄᓇᖃᖅᑳᖅᑐᓄᑦ ᐊᒻᒪ ᐅᑭᐅᕐᑕᖅᑐᓕᕆᔨᒃᑯᑦ ᑲᑎᒪᔨᖏ ᑲᑎᒪᑎᓪᓗᒋ ᐅᖃᐅᓯᖃᖅᖢᑎᒃ ᓂᖀᑦ ᐊᑭᑐᓗᐊᕐᓂᖏᓐᓂᒃ ᐅᑭᐅᕐᑕᖅᑐᕐᒥ.

ᐊᖓᔪᖅᑳᕆᔭᐅᔪᑦ ᒪᕐᕉᖕᓂ ᐅᑭᐅᕐᑕᖅᑐᕐᒥ ᖃᖓᑕᓲᓕᕆᔨᓂ ᐊᒻᒪ ᒪᕐᕉᖕᓂ ᓂᐅᕕᕐᕕᖃᖅᑐᓂ ᐅᐸᒍᑎᓚᐅᕐᓯᒪᔪᖅ ᑲᑎᒪᔨᓄᑦ. ᖃᐃᖁᔭᐅᓚᐅᕐᓯᒪᖕᒪᑕ ᐃᓪᓚᐅᖅᒧ ᓇᓗᓇᐃᕆᐊᕐᓗᑎᒃ ᓂᕿᑦᑎᐊᕙᓕᕆᓂᖅᒥ ᐅᑭᐅᕐᑕᖅᑐᕐᒥ ᐱᓕᕆᐊᖑᔫᑉ ᒥᒃᓵᓄᑦ.

ᓂᕿᑦᑎᐊᕙᓕᕆᔨᑦ ᐅᑭᐅᕐᑕᖅᑐᕐᒥ ᒐᕙᒪᑐᖃᒃᑯᓐᓂ ᐱᓕᕆᐊᖑᔪᖅ ᓂᑮᑦ ᐊᑭᓕᒐᓂᕐᓂᖅᑕᐅᑎᓐᓇᓱᒃᖢᒋᑦ ᐅᑭᐅᕐᑕᖅᑐᕐᒥ ᓄᓇᓕᖕᓂ. ᓂᐅᕕᕐᕕᖃᖅᑐᓂᒃ ᐃᑲᔪᕈᑎᐅᔪᖅ ᐊᑭᒋᔭᐅᔪᓄᑦ ᐃᓚᖏᓐᓄᑦ ᓂᕿᑦᑎᐊᕙᖕᓄᑦ ᐊᒻᒪ ᐊᑐᖅᑕᐅᔭᕆᐊᖃᐃᓐᓇᐅᔭᖅᑐᓂᒃ, ᐊᒻᒪᓗ ᑖᓐᓇ ᓂᐅᕕᖃᑦᑕᖅᑐᓂ ᑮᓇᐅᔭᓂ ᐊᑐᙱᓐᓂᖅᓴᐅᔾᔪᑎᐅᓇᓱᒃᖢᓂ.

ᐅᓇ ᐊᑭᒃᖠᒋᐊᕈᑎ ᐋᖅᑭᒃᑕᐅᓯᒪᔪᖅ ᑲᑎᖢᑎᒃ ᐊᑭᒋᔭᐅᔪᓂᒃ ᐱᖁᑎᓂ ᑕᒪᐅᓈᕈᓐᓇᖅᑐᓄᑦ, ᐃᓚᖃᖅᖢᓂ ᓂᐅᕕᕐᓂᕐᒧᑦ ᐊᑭᓕᐅᑎᓄᑦ ᐊᒻᒪ ᑕᑉᐸᐅᙵᕈᑎᐅᔪᓄᑦ.

ᐃᓪᓚᐅᖅ ᐊᐱᕆᓚᐅᕐᑐᖅ ᓄᐊᑦ ᕕᐊᔅᑦ ᑲᒻᐸᓂᒃᑯᑦ ᐊᐅᓚᑦᑎᔨ ᐊᖓᔪᖅᑳᖓᓄᑦ ᑖᓐ ᒪᒃᑳᓄᓪ, ᐊᖓᔪᖅᑳᕆᔭᐅᔪᖅ ᐅᑭᐅᕐᑕᖅᑐᕐᒥ ᐊᒻᒪ ᓄᐊᑦᒫᑦ ᓂᐅᕕᕐᕕᖏᓐᓂ, ᑮᓇᐅᔭᓕᐊᕆᕙᒃᑕᖓᓂ ᐊᒻᒪ ᐊᓯᖏᓐᓂ ᑮᓇᐅᔭᖅᑖᕆᕙᒃᑕᖏᓐᓂ ᑕᐅᑐᒃᖢᒋ ᓂᐅᕕᖅᑎᑦᑎᔨᐅᕙᒃᑐᑦ ᐃᖃᓗᖕᓂ, ᑖᔅᓱᒪᓗ ᐃᓪᓚᐅᖅ ᑮᓇᐅᔭᓕᐅᖃᑦᑕᕐᓂᕋᖅᖢᓂᒋᑦ ᒫᓂ $37,000.00-ᓂ.

ᐅᖃᕐᑎᓪᓗᒍ ᒪᒃᑳᓄᓪ ᑮᓇᐅᔭᓕᐊᖏᑦ ᖃᕋᓴᐅᔭᒃᑯᑦ ᑕᑯᔭᒃᓴᐅᓂᖏᓐᓂᒃ ᐃᓪᓚᐅᖅ ᐊᐱᕆᒃᑲᓐᓂᓚᐅᕐᑐᖅ ᐊᐱᕐᓱᕐᓇᐅᒃᑲᓐᓂᓕᖅᑎᓪᓗᒍ.

“ᑮᓇᐅᔭᓕᐊᕆᕙᒃᑕᕐᓂ ᐅᖃᖅᑕᐃᓕᒪᒐᓗᐊᕈᕕ ᐅᖃᖅᑏᓐᓇᕐᓂᐊᖅᑕᒋᑦ ᑲᑎᒪᔨᓄᑦ,” ᐅᖃᕐᑐᖅ, ᐅᖃᖅᖢᓂ ᒪᒃᑳᓄᓪ ᑮᓇᐅᔭᓕᐊᖏᑦ ᐊᒻᒪ ᐊᓯᖏᓐᓄᑦ ᑮᓇᐅᔭᖅᑖᕆᕙᒃᑕᖏ ᑲᑎᖢᑎ ᒫᓃᓐᓂᖏᓐᓂ $3.91 ᒥᓕᐊᓐ ᑖᓚᓂ.

ᐃᓪᓚᐅᖅ ᐅᖃᐅᓯᖃᓚᐅᕐᑐᖅ ᐅᓂᒃᑳᓕᐊᓂᒃ9ᒃ ᓴᖅᑭᑎᑦᑎᓯᒪᓂᕋᖅᖢᓂᒋᑦ 67 ᓴᓐᔅ ᐅᐊ ᑖᓚᒥ ᐅᖃᐅᓯᐅᑲᑕᖕᓂᕋᖅᖢᓂᒋᑦ ᑮᓇᐅᔭᖅᑖᕆᔭᐅᕙᓪᓕᐊᔪᓂᒃ ᒪᐅᓇ ᐊᑭᑭᓐᓂᖅᓴᐅᑎᑕᐅᔪᑎᒍᑦ, “ᑕᒪᓐᓇᓗ ᓈᒻᒪᙱᓗᐊᖅᖢᓂ.” ᓇᓗᓇᐃᕐᓯᓚᐅᙱᑦᑐᖅ ᓇᓕᐊᓐᓂ ᐅᓂᒃᑳᓂ.

ᒪᒃᑳᓄᓪ ᑭᐅᓚᐅᕐᑐᖅ ᐅᖃᖅᖢᓂ ᑲᒻᐸᓂᐅᔪᖅ “100 ᐳᓴᓐᑎᓂ” ᑮᓇᐅᔭᓕᐊᖏᓐᓂ ᐅᑎᖅᑎᑦᑎᕙᖕᓂᖏᓐᓂ ᐱᔨᑦᑎᕋᖅᑕᖏᓐᓄᑦ.

ᐃᓪᓚᐅᖅ ᑖᔅᓱᒥᖓ ᐊᖏᖃᑎᖃᓚᐅᙱᑦᑐᖅ ᐅᖃᖅᖢᓂ ᖃᖓᑦᑎᐊᓵᖅ ᑭᒥᒃ ᑯᐊᑉᒧᑦ ᐅᐸᒍᑎᓚᐅᕐᓯᒪᓪᓗᓂ ᑕᑯᓚᐅᕐᓯᒪᖕᒪᑦ ᒪᓐᓃᑦ 12-ᓂ ᐃᓗᓕᓖᖅ ᐊᑭᖃᓚᐅᕐᓂᖏᓐᓂᒃ $3.99, ᐅᕙᓂᓕ ᖃᓂᒋᔭᖓᓃᑦᑐᒥ ᓂᐅᕕᖅᑎᒃᑯᑦ ᓂᐅᕕᕐᕕᐊᓂ ᓂᐅᕐᕈᑎᖃᖃᑦᑕᓚᐅᕐᑐᑦ $6.49 12-ᓂ ᒪᓐᓂᖕᓄ. “ᑖᓐᓇ ᑕᐃᒪᓐᓇ ᐊᑐᖅᑕᐅᖃᑦᑕᖅᑐᖅ ᑕᒪᐃᓐᓂ ᓄᓇᓕᐅᔪᓂᒃ,” ᐅᖃᕐᑐᖅ.

ᑳᒻ ᐃᐊ (Calm Air) ᐊᐅᓚᑦᑎᔨ ᐊᖓᔪᖅᑳᖓ ᒋᐅᕆ ᐱᐊᓪ, ᑲᓃᑎᐊᓐ ᓄᐊᑦ ᐊᐅᓚᑦᑎᔨ ᐊᖓᔪᖅᑳᖓ ᓯᐊᓕ ᑎ ᑲᕆᐊ ᐊᒻᒪ ᑭᒥᒃ ᑯᐊᑉ ᐊᐅᓚᑦᑎᔨᒪ ᔮᓐ-ᐱᐊᕐ ᒍᓕ ᐅᖃᓪᓚᓚᐅᕐᒥᔪᑦ ᒪᕐ 8-ᒥ ᑲᑎᒪᔨᓄᑦ.

ᐅᖃᐅᓯᖃᓚᐅᕐᑐᑦ ᐊᑭᑐᓗᐊᕐᓂᖏᓐᓂ ᖃᖓᑕᓲᒃᑰᖅᑎᑦᑎᕙᖕᓂᖅ ᐅᑭᐅᕐᑕᖅᑐᕐᒧᑦ, ᒪᑯᐊ ᓴᖅᑭᑕᐅᓚᐅᕐᒥᔪᖅ ᓯᓚ ᖃᓄᐃᓕᔭᖕᓂᖓ ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐱᓕᕆᐊᖏᑦᑎᒍ. ᐊᒻᒪᓗ ᐱᕕᖃᓗᐊᙱᓐᓂᕐᒥ ᓂᕿᓂ ᐊᐅᓪᓚᖅᑎᑦᑎᕙᖕᓂᕐᒥ ᑭᓯᐊᓂ ᖃᖓᑕᓲᒃᑯᑦ.

ᐅᖄᓚᐅᑎᒃᑯ ᐊᐱᕐᓱᖅᑕᐅᓪᓗᓂ ᒪᐃ 9-ᓂ. ᐃᔾ<ᐅᒻ ᐅᖃ<ᐅᕐᑐᒻᒥ ᐅᖃᖃᑎᖃᓚᐅᕐᓂᖓᓂᒃ ᐊᖓᔪᖅᑳᓄᑦ ᐊᐅᓚᑦᑎᔨᓄᑦ ᐋᑐᕚᒥ ᓲᖃᐃᒻᒪ ᐅᒃᐱᕈᓱᒃᑲᒥ ᑖᒃᑯᐊ ᑲᑎᒪᔨᐅᖃᑕᐅᔪᓄᑦ ᐅᖃᓪᓚᒃᐸᑕ ᐱᐅᓂᖅᐹᖓᓇᔭᕐᓂᖓᓂᒃ ᐅᖃᐅᓯᖃᕐᓗᓂ ᐊᓯᙳᕆᐊᓕᖕᓂ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ.

“ᑲᑎᒪᔨᕋᓛᒃ ᖃᓄᐃᓕᐅᕈᓐᓇᕐᓂᖏᒃ ᐊᒃᑐᐃᓂᖃᒻᒪᕆᒐᔭᖅᑐᖅ ᑲᑎᒪᖃᑎᖃᕈᓐᓇᕈᒪ ᐊᑐᓂ ᐊᐅᓚᑦᑎᔨ ᑐᑭᒧᐊᖅᑎᔨᓂ,” ᐅᖃᕐᑐᖅ.

ᐃᓪᓚᐅᖅ ᐅᖃᓚᕝᕝᐅᕐᑐᖅ ᐊᔾᔨᒌᙱᑦᑐᓂ ᐃᓱᒪᒋᔭᖃᓚᐅᕐᓂᖓᓂᒃ ᖃᓄᖅ ᑲᑎᒪᓂᖅ ᐱᓕᕆᐊᖑᓂᖓᓄᑦ, ᐅᖃᖅᖢᓂ “ᐱᓕᕆᕝᕖᑦ ᐱᔪᒪᓗᐊᖅᑐᐊᓘᓂᖏᑦ” ᓴᐳᔾᔭᐅᓯᒪᓂᖏᓐᓂᒃ ᒐᕙᒪᑐᖃᒃᑯᓐᓄᑦ.

ᑭᓯᐊᓂᓕ, ᐅᒃᐱᕈᓱᒃᑐᖅ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ “ᐊᑐᕈᓐᓇᑦᑎᐊᖅᑐᖅ,” ᐅᖃᖅᖢᓂ ᐅᖃᐅᓯᕆᓂᑯᐊ ᐊᐱᕆᔾᔪᑎᖓᓂ ᐊᑭᒋᔭᐅᔪᑦ ᒪᓐᓃᑦ ᑭᒥᒃ ᑯᐊᑉᒥ ᐊᒻᒪ ᓂᐅᕕᖅᑎᒃᑯᑦ ᓄᐊᑕᓐ ᓂᐅᕕᕐᕕᖓᓂ.

ᐃᓪᓚᐅᖅ ᐅᖃᓚᐅᕐᑐᖅ ᑕᐅᑐᖕᓂᕋᖅᖢᓂ ᑯᐊᐸᒃᑯ ᓂᐅᕕᕐᕕᑦᑎᐊᕙᐅᓛᖑᓂᖏᓐᓂᒃ 100 ᐳᓴᓐᑎᒥ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ ᐃᑲᔫᑎᒃ ᓂᐅᕕᖅᐸᒃᑐᓄᐊᖅᐸᒃᖢᑎᒃ.

ᑲᑎᒪᔩ ᕿᒥᕐᕈᐊᕐᓂᐊᕐᑐᑦ ᑲᑎᑕᐅᕙᓪᓕᐊᓯᒪᔪᓂᒃ ᐅᖃᐅᓯᕐᓂ ᐊᒻᒪᓗ ᐃᓱᒪᓕᐅᕆᓛᖅᖢᑎᒃ ᐱᐅᓯᕚᓪᓕᖅᑎᑦᑎᓇᓱᖕᓂᕐᒥᒃ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ ᐊᒻᒪᓗ ᐃᑲᔪᒃᑲᓐᓂᕈᓐᓇᕐᓂᕐᒥ ᓂᕿᖃᑦᑎᐊᙱᓗᓗᐊᖃᑦᑕᕐᓂᕐᒥᒃ ᐅᑭᐅᕐᑕᖅᑐᕐᒥ.