ᓴᓂᑭᓗᐊᑉ ᓄᓇᓕᖕᓂ ᐱᓕᕆᕝᕕᖓ ᐃᓚᖓᓂ ᐃᒻᒥᓃᖅᑕᐃᓕᒪᑎᑦᑎᓂᐅᕗᖅ

For English version, see ‘It’s suicide prevention’: Sanikiluaq getting ready for new community centre

ᑕᒪᒃᑭᑦ ᐃᓅᓱᒃᑐᑦ, ᐃᒻᒥᓂᒃ ᐅᖃᐅᓯᖃᕈᓐᓇᕆᐊᖃᖅᐳᑦ ᐱᓕᕆᓂᐅᔪᒥ ᐋᓐᓂᖅᓯᓂᖃᙱᑦᑐᒥ ᐅᕝᕙᓘᓐᓃᑦ ᐊᓯᖏᓐᓂ, ᐅᖃᖅᐳᖅ ᐊᐃᓴᒃ ᒥᓐᓴ.

“ᑕᑯᕗᑎᑦ ᒪᒃᑯᒃᑐᐃᑦ, ᐊᒃᓱᕈᕐᓇᖅᑐᒃᑰᖅᑎᓪᓗᒋᑦ, ᐅᖃᓪᓚᓲᖑᙱᓚᑦ ᐅᕝᕙᓘᓐᓃᑦ ᐅᖃᐅᓯᖃᕐᓗᑎᒃ ᐃᒃᐱᒋᔭᒥᓂᑦ ᑭᓇᑐᐃᓐᓇᒧᑦ,” ᐅᖃᓚᐅᖅᐳᖅ.

ᐊᒻᒪ ᖃᐅᔨᒪᓇᔭᖅᐳᖅ. ᒥᓐᓴ ᑐᑭᒧᐊᒃᑎᑦᑎᔨᐅᕗᖅ ᐊᐅᓚᑕᐅᓂᐅᔪᓂ ᐅᑉᓗᕆᐊᖅ ᑲᑐᔾᔨᖃᑎᒌᖑᔪᓄᑦ, ᓴᓂᑭᓗᐊᕐᒥ ᑮᓇᐅᔭᓕᐅᕋᓱᐊᙱᖦᖢᑎᒃ ᑕᐅᑐᒃᑕᑐᐊᖃᑲᐃᓐᓇᖅᑐᒥ ᐃᓕᖅᑯᓯᒧᑦ ᐱᓕᕆᐊᖑᓂᐅᔪᓂ ᒪᒃᑯᒃᑐᓄᑦ ᐊᒻᒪ ᐃᓐᓇᕐᓄᑦ.

ᒥᓐᓴ ᐅᖃᖅᐳᖅ ᐅᒃᐱᕈᓱᖕᓂᖓᓂ ᐱᔪᒪᙱᓐᓂᐅᔪᓂ ᐃᓅᓱᒃᑐᓂ ᒪᑐᐃᕐᓂᕐᒧᑦ ᐱᑎᑦᑎᓂᖓᓂ ᓄᓇᕘᑉ ᒪᒃᑯᒃᑐᖏᓐᓂ ᐃᒻᒥᓃᕐᓂᕐᒧᑦ ᑐᐊᕕᕐᓇᕐᓂᖓᓂ — ᐊᒻᒪ ᑲᑐᔾᔨᖃᑎᒌᖑᔪᑦ ᐋᖅᑭᒐᓱᐊᖅᐸᖓ.

ᐅᑉᓗᕆᐊᑉ 8−ᓂ-ᐃᓚᒋᔭᐅᔪᓂ ᑲᑎᙵᔪᓂ ᐊᐅᓚᑦᑎᕗᑦ ᒥᖅᓱᕐᓂᕐᒥ ᐱᓕᕆᐊᖑᔪᓂᑦ ᐃᓚᐅᖃᑕᐅᔪᑦ ᐱᕕᖃᖅᖢᑎᒃ ᓴᓇᓂᕐᒥ ᐳᐊᓗᖕᓂ ᐊᓐ, ᖁᓕᑦᑕᐅᔭᓂ ᐊᑭᖃᙱᑦᑐᒥ. ᑕᒪᒃᑭᑦ ᐳᓚᕋᖅᑐᑦ ᐱᓕᕆᕝᕕᖕᒧᑦ ᐊᑭᖃᙱᑦᑐᒥ ᑕᖁᐊᖅᑐᖅᑎᑕᐅᕗᑦ ᐅᕝᕙᓘᓐᓃᑦ ᑳᐱᒥᒃ.

ᖃᖓᑦᑎᐊᖑᔪᒥ, ᑭᓯᐊᓂ, ᑲᑎᙵᔪᑦ ᐸᕐᓇᒃᐳᑦ ᐊᖏᒡᓕᒋᐊᖅᓯᓂᕐᒥ ᐱᓕᕆᐊᕆᔭᖏᓐᓂᑦ.

ᖄᖏᖅᓯᒪᔪᒥ ᐊᕐᕌᒍᒥ, ᓄᑖᙳᕆᐊᖅᑎᑦᑎᓯᒪᕗᑦ ᐊᖏᕐᕋᖓᓂ ᒥᑭᖦᖢᓂ ᐊᑕᐅᓯᕐᒥ ᓇᑎᓕᖕᒥ ᐃᒡᓗᕐᔪᐊᖑᔪᒥ ᕼᐋᒻᓚᒃᑯᑦ ᑎᑎᕋᕐᕕᒋᓚᐅᖅᓯᒪᔭᖓᓂ ᓄᓇᓕᖕᓂ 1,000−ᐸᓗᖕᓄᑦ ᐃᓄᖕᓄᑦ. ᓄᑖᙳᕆᐊᖅᑎᑕᐅᓂᖓ ᐱᔭᕇᖅᑕᐅᒃᐸᑦ ᑕᒪᑐᒪᓂ ᑕᖅᑭᐅᔪᒥ, ᓄᓇᓕᖕᓂ ᐱᓕᕆᕝᕕᙳᕐᓂᐊᖅᐳᖅ.

“ᑕᕝᕙᑐᖅ ᑕᑯᔪᓐᓇᖅᐸᐃᑦ ᓯᕗᓂᐊᓂ ᐊᒻᒪ ᑭᖑᓂᐊᒍᑦ — ᐅᒃᐱᕐᓇᙱᑦᑎᐊᖅᑐᖅ,” ᒥᓐᓴ ᐅᖃᓚᐅᖅᐳᖅ.

ᐃᓂᐅᔪᖅ 12−ᐸᓗᖕᓂ ᖃᕋᓴᐅᔭᖃᓕᖅᐳᑦ ᓱᓕ ᐴᖓᓃᑦᑐᓂ, ᑭᒃᑯᓕᒫᑦ ᓄᓇᓕᖕᓂ ᐊᑐᕈᓐᓇᕐᓂᐊᖅᑕᖏᓐᓂ ᓴᖅᑭᑎᑦᑎᓂᕐᒥ ᐅᕝᕙᓘᓐᓃᑦ ᓄᑖᙳᕆᐊᖅᑎᑦᑎᓗᑎᒃ ᐃᖅᑲᓇᐃᔮᕆᓯᒪᔭᖏᓐᓂ ᑎᑎᕋᖅᓯᒪᓂᐅᔪᓂ, ᕿᓂᕐᓗᑎᒃ ᐃᖅᑲᓇᐃᔮᒃᓴᓂ, ᐅᕝᕙᓘᓐᓃᑦ ᐃᓕᑦᑎᓗᑎᒃ ᓄᑖᖑᓂᐅᔪᓂᑦ ᑭᓱᑐᐃᓐᓇᓂᒃ.

ᐱᓕᕆᕝᕕᒃ 3D ᖃᕋᓴᐅᔭᑎᒍᑦ ᑎᑎᕋᕈᓐᓇᕐᓂᖃᕐᓂᐊᖅᐳᖅ ᐊᒻᒪ ᓴᓂᑭᓗᐊᕐ ᓯᕗᓪᓕᖅᐸᐅᔪᒥ ᓂᔾᔮᑎᑦᑎᓂᕐᒥ ᓂᐱᓕᐅᕆᕝᕕᖕᒥ.

“ᐊᓯᐊᒎᖅᑐᒥ ᐅᖃᐅᓯᖃᕐᓂᐅᕗᖅ ᐃᒃᐱᒋᔭᒥᓂᑦ. ᐃᒻᒥᓃᖅᑕᐃᓕᒪᑎᑦᑎᓂᐅᕗᖅ,” ᒥᓐᓴ ᐅᖃᓚᐅᖅᐳᖅ ᓂᐱᓕᐅᕆᕝᕕᖕᒥ.

ᐱᓕᕆᕝᕕᒃ ᑲᒪᒋᔭᖄᓂᒃᐳᖅ ᓄᓇᓕᖕᓂ ᐅᖃᓪᓚᒡᕕᖓᓂ, ᑕᐃᒫᒃ ᐃᙱᐅᓰᑦ ᓄᓇᓕᖕᓂ ᐃᙱᖅᑏᑦ ᐊᒻᒪ ᑎᑕᒃᑎᓂ ᑎᑎᕋᖅᑕᖏᓐᓂ ᐊᒻᒪ ᓂᐱᓕᐅᖅᑕᖏᓐᓂ ᓂᔾᔮᑎᑕᐅᔪᓐᓇᕐᓂᐊᖅᐳᑦ ᓈᓚᐅᑎᒃᑯᑦ.

“ᐊᑕᐅᓯᐅᔪᒥ ᐱᓕᕆᐊᖃᕐᓂᕐᒥ ᐃᒃᐱᒋᔭᕐᓂᑦ ᓄᓇᕐᔪᐊᓕᒫᒥ ᖃᐅᔨᒪᓂᕐᒥ ᑭᓱᓂᒃ ᐊᑐᕐᓂᕆᔭᕐᓂᑦ. ᐊᒻᒪ ᓂᔾᔮᑎᑦᑎᓂᖅ ᐱᓕᕆᓂᐅᕗᖅ ᐱᓕᕆᓂᕐᒧᑦ,” ᒥᓐᓴ ᐅᖃᓚᐅᖅᐳᖅ.

ᖄᒃᑲᓐᓂᐅᔪᒥ ᐱᔨᑦᑎᕋᕐᓂᐅᔪᓂ, ᐱᓕᕆᕝᕕᐅᑉ ᐃᖅᑲᓇᐃᔭᖅᑎᖏᑦ ᐋᖅᑭᒃᓯᒪᕗᑦ ᐱᕈᕐᓂᕐᒥ 14−ᐸᓗᖕᓄᑦ ᐃᓚᒋᔭᐅᔪᓂ ᒫᓐᓇᐅᔪᒥ 8−ᖑᔪᓂ.

ᒥᓐᓴ — ᐅᑉᓗᕆᐊᕐᒦᓯᒪᔪᒥ ᖄᖏᖅᓯᒪᓕᖅᑐᓂ ᐊᕐᕌᒍᓄᑦ ᐱᖓᓱᓄᑦ ᐊᒻᒪ ᓄᓇᖃᓚᐅᖅᓯᒪᒋᓪᓗᓂ ᐃᖃᓗᖕᓂ ᐊᒻᒪ ᐃᖃᓗᒃᑑᑦᑎᐊᕐᒥ — ᐅᒃᐱᕈᓱᒃᐳᖅ ᐊᖏᓂᖅᓴᖅ ᐱᓕᕆᕝᕕᒃ ᐊᐅᓚᑕᐅᓪᓗᐊᕐᓂᖓᓂ ᓄᓇᓕᖕᒥᐅᑕᓄᑦ.

“ᓱᓕᑦᑎᐊᓲᖑᕗᖓ ᐃᓄᖕᓄᑦ ᐅᕙᓂ,” ᐅᖃᓚᐅᖅᐳᖅ.

“ᑕᐅᕗᖓᓕᒫᖅ ᐅᕙᓃᔾᔮᙱᓚᖓ. ᐊᐅᓪᓚᓛᕆᕗᖓ ᖃᔅᓯᐊᕐᔪᖕᓂ ᐊᕐᕌᒍᓂ ᐊᓂᒍᖅᐸᑦ ᐱᓕᕆᓂᕐᒥ ᑕᐃᒪᓐᓇᑦᑕᐃᓐᓇᖅ ᐱᓕᕆᓂᐅᔪᒥ ᐊᓯᖏᓐᓂ ᐃᓚᒋᔭᐅᔪᓂ ᓄᓇᕗᒻᒥ, ᑕᐃᒫᒃ ᓄᓇᓕᐅᔪᖅ ᐊᐅᓚᑦᑎᔭᕆᐊᖃᕐᓂᐊᖅᐳᑦ. ᑎᑭᓐᓇᓱᐊᕐᓂᖓᓂ, ᐱᓕᕆᓂᐊᖅᐳᖓ ᐱᔪᓐᓇᕐᓂᓕᒫᓐᓂ ᐃᑲᔪᕐᓂᕐᒧᑦ.”

ᒥᓐᓴ ᐃᓚᒋᐊᖅᓯᓚᐅᖅᐳᖅ ᓂᕆᐅᖕᓂᖓ ᖃᖓᑭᐊᖅ ᓇᑉᐸᖅᑎᕆᓂᕐᒥ ᐊᖏᓂᖅᓴᒥ ᐃᒡᓗᕐᔪᐊᒥ ᓴᓂᑭᓗᐊᕐᒥ, ᐃᓚᖃᖅᑐᒥᓗ ᐱᓕᕆᐊᖑᔪᓂ, ᑲᒪᒋᔭᖃᕈᓐᓇᕐᓂᕐᒥ ᐅᖅᑯᐊᕐᒥ ᐃᓄᖕᓄᑦ ᐅᐸᒃᑕᐅᔪᓐᓇᖅᑐᒥ ᐱᔭᕆᐊᖃᓕᕌᖓᑕ.