ᓴᓂᑭᐊᕐᒥ ᐊᓄᕆᑦᑎᐅᑎ ᐱᓕᕆᐊᖑᔪᖅ $6.7 ᒥᓕᐊᓐᓂ ᐊᑐᖅᑐᐊᕈᑎᐅᕗᖅ

For the English version of this story, please see Sanikiluaq wind turbine gets $6.7M loan from infrastructure bank.

ᐊᓄᕆᑦᑎᐅᑎ ᐆᒻᒪᖅᑯᑎᐅᓇᓱᒃᑐᖅ ᓴᓂᑭᓗᐊᕐᒥ ᐊᑐᕐᑐᐊᕈᑎᐅᓂᐊᕐᑐᖅ $6.7 ᒥᓕᐊᓐᓂ ᑲᓇᑕᒥ ᐱᖁᑎᒃᓴᓄᑦ ᑮᓇᐅᔭᒃᑯᕕᒃᒥᑦ

ᐅᓇ ᑮᓇᐅᔭᒃᑯᕕᐅᑉ ᓯᕗᓪᓕᖅᐹᖅ ᐱᓕᕆᖃᑎᒋᔾᔪᑎᒋᔭᖓ ᓄᓇᕗᒥᑦ ᑖᒃᑯᐊ ᓄᓇᕗᒻᒥᐅᑕᑦ “ᐊᖏᔫᑎᓂᒃ ᐱᕈᕈᑎᒃᓴᓂ” ᓴᓇᕙᓪᓕᐊᑎᓪᓗᒋᑦ ᐊᒻᒪᓗ ᑮᓇᐅᔭᒃᑯᕕᖕᒧᑦ ᐃᑲᔪᖅᑕᐅᔭᕆᐊᖃᖅᖢᓂ, ᐅᖃᕐᑐᖅ ᕼᐊᓗᕆ ᑖᑦᓱ, ᑮᓇᐅᔭᒃᑯᕕᒃᒧᑦ ᐊᐅᓚᑦᑎᔨ ᑐᑭᒧᐊᖅᑎᑦᑎᔨ ᓄᓇᖃᖅᑳᖅᑐᓄᑦ ᐊᒻᒪ ᐅᑭᐅᕐᑕᖅᑐᕐᒥ ᐱᖁᑎᑖᖅᑎᑦᑎᓂᕐᒧᑦ.

ᐅᓇ ᒫᓂ ᐊᑭᖃᓪᓗᐊᕐᑐᖅ $20 ᒥᓕᐊᓐᓂ ᐊᓄᕆᑦᑎᐅᑎ ᐱᓕᕆᐊᒃᓴᖅ, ᐅᖃᐅᓯᐅᓕᕐᓂᑯ 2015-ᒥ, ᒥᑭᓐᓂᕐᓴᐅᔪᖅ ᑕᐃᒪᑦᑐᕆᔭᐅᕙᒃᑐᓂ ᐊᒻᒪᓗ “ᓯᕗᒧᑦ ᐱᒋᐊᕈᑎᐅᑐᐃᓐᓇᕆᐊᖃᖅᓯᒪᓪᓗᓂ,” ᐅᖃᕐᑐᖅ.

ᐸᕐᓇᐅᑎᒋᔭᐅᓚᐅᕐᓯᒪᔪᖅ ᓴᓇᔪᒪᓂᕐᒥ ᐊᓄᕆᑦᑎᐅᑎᒥ ᓴᓂᑭᓗᐊᕐᒥ ᒫᓐᓇ “ᐱᐊᓂᒃᑕᐅᕙᓪᓕᐊᓕᕐᑐᖅ,” ᐅᖃᕐᑐᖅ ᕼᐃᐅᕆ ᕕᓕᐅᕋᑎ, ᐊᖓᔪᖅᑳᖅ ᐊᒻᒪ ᐊᐅᓚᑦᑎᔨ ᐅᑯᓄᖓ ᓄᓇᕗᑦ ᓄᒃᑭᒃᓴᐅᑏᑦ ᑯᐊᐳᕇᓴᓐᑯᓐᓂ, ᑖᒃᑯᐊ ᓴᓇᔨᐅᓪᓗᑎᒃ ᑖᔅᓱᒥᖓ.

ᐅᓇ ᐱᓕᕆᐊᒃᓴᖅ, ᐊᑕᐅᓯᕐᒥ ᐊᓄᕆᑦᑎᐅᑎᓕᒃ, ᐆᒻᒪᖅᑯᑎᖃᖅᑎᑦᑎᔪᓐᓇᕐᓂᐊᕋᓱᒋᔭᐅᔪᖅ ᐊᑐᕈᓐᓃᖅᑎᑦᑎᓂᕐᓴᐅᓗᓂ ᐅᖅᓱᐊᓗᒃᒥ ᑏᓱᒥ ᐊᑐᖅᑕᐅᕙᒃᑐᓂ ᓴᓂᑭᓗᐊᕐᒥ, ᑖᓐᓇᓗ ᐃᓄᖃᖅᖢᓂ ᒫᓂ   1,010-ᓂ ᐊᒻᒪᓗ ᐅᖅᓱᐊᓗᒃᒥ ᑭᓯᐊᓂ ᒫᓐᓇ ᐊᑐᕆᐊᖃᓪᓚᕆᒃᖢᑎᒃ ᑎᑭᑎᑕᐅᕙᒃᑐᒥ ᓄᓇᓖᑦ ᐊᓯᐊᓂᒃ.

“ᑕᐃᒪᓕ ᑕᒪᑦᑎᓐᓄᑦ ᓵᓚᒃᓴᕈᑎᐅᕗᖅ ᐊᒻᒪᓗ ᓄᓇᕗᒥᑦ ᑕᐃᒪᐃᑦᑐᑐᐊᖓᓪᓗᓂ,” ᕕᓕᐅᕋᑎ ᐅᖃᕐᑐᖅ.

ᐅᓇ ᐊᓄᕆᑦᑎᐅᑎ ᐱᐊᓂᒃᑕᐅᓂᐊᕋᓱᒋᔭᐅᔪᖅ ᐅᑭᐊᒃᓵᖅ ᐅᑭᐅᕐᓘᓐᓃᑦ ᐱᒋᐊᓕᕐᐸᑦ, ᐅᖃᕐᑐᖅ, ᐅᖃᒃᑲᓐᓂᖅᖢᓂ ᐊᖅᑯᑎ ᑕᕝᕗᙵᐅᔪᖅ ᐱᐊᓂᒃᑕᐅᓯᒪᓕᕐᓂᖓᓂᒃ ᐊᒻᒪᓗ ᐊᓄᕆᑦᑎᐅᑎᒧᑦ ᐃᓚᒃᓴᕆᔭᐅᔪᑦ ᐊᒻᒪᓗ ᐹᑕᕇᖃᕐᕕᒋᓂᐊᖅᑕᖏᑦ.

ᐅᓇ ᐊᑐᖅᑐᐊᖅᑕᐅᓯᒪᔪᖅ ᓄᒃᑭᒃᓴᐅᑏᑦ ᑯᐊᐳᕇᓴᓐᑯᓐᓄᑦ ᐊᑭᓕᖅᓱᖅᑕᐅᕙᓪᓕᐊᓂᐊᖅᑐᖅ ᐊᕐᕌᒍᓂ 24-ᓂ ᐊᒻᒪ 1%-ᒥ ᕿᑐᕐᖏᐅᕈᑎᖃᕐᓗᓂ, ᕕᓕᐅᕋᑎ ᐅᖃᕐᑐᖅ.

ᐅᓇ ᑲᓇᑕᒥ ᐱᖁᑎᒃᓴᓄᑦ ᑮᓇᐅᔭᒃᑯᕕᑦ ᒐᕙᒪᑐᖃᒃᑯᓐᓄᑦ ᐱᓕᕆᐊᖓᔪᖅ ᐊᖏᖅᑎᑦᑎᔨᐅᕙᒃᖢᑎᒃ ᐊᑐᖅᑐᐊᖅᑕᐅᔪᒪᔪᓂᒃ ᑲᓇᑕᒥ ᑮᓇᐅᔭᓕᐅᕈᑎᐅᔪᓐᓇᕐᓂᐊᖅᑐᓄᑦ ᐱᖁᑎᒃᓴᓄᑦ ᐱᓕᕆᐊᒃᓴᓂ ᐃᓄᖕᓂ ᐊᑐᖅᑕᐅᔪᓐᓇᖅᑐᓂᒃ.

ᐅᓇ “ᐊᒃᑐᐃᓂᕐᒧᑦ ᐃᑲᔫᑎᐅᔪᖅ,” ᑖᑦᓱ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᓴᓂᑭᓗᐊᖅᒥ ᐱᓕᕆᐊᖑᔪᖅ ᐊᒃᑐᐃᔾᔪᑎᖓ ᑐᑭᓯᔭᐅᓯᒪᖕᒪᑦ ᑮᓇᐅᔭᒃᑯᕕᖕᒧᑦ.

ᐅᓇ $6.7 ᒥᓕᐊᓐ “ᐊᑦᑎᖕᓂᕐᓴᒦᓂᕋᖅᑕᐅᔪᖅ” ᑮᓇᐅᔭᒃᑯᕕᐅᑉ ᑮᓇᐅᔭᖃᖅᑎᑦᑎᔾᔪᑎᐊᓂᒃ, ᐅᖃᕐᑐᖅ. ᑮᓇᐅᔭᒃᑯᕕᑦ ᐅᓄᕐᓂᕐᓴᓂᒃ ᑐᓂᓯᑐᐃᓐᓇᕆᐊᖃᕋᓱᒋᔭᐅᔪᖅ ᐱᓕᕆᐊᓄᑦ ᐅᕙᓂ ᒍᕇᔅ ᐸᐃ ᐊᖅᑯᑎᐊᓄᑦ ᐊᒻᒪ ᑐᓚᒃᑕᕐᕕᒃᒧᑦ, ᑖᓐᓇᓗ ᐃᓱᒪᒋᔭᐅᓪᓗᓂ ᐊᑭᖃᕐᓂᖓᓂ ᒫᓂ $1 ᐱᓕᐊᓐᓂᒃ; ᐅᓇᓕ ᑭᕙᓪᓕᖅᒥ ᕼᐃᑐᕈ-ᕙᐃᐳ ᐊᑦᑕᑕᐅᑎᒃᓴᖅ ᒫᓂᓗ ᐊᑭᖃᓪᓗᐊᖅᖢᓂ $3.39 ᐱᓕᐊᓐᓂ; ᐊᒻᒪᓗ ᐆᒻᒪᖅᑯᑎᒃᓴᓕᕆᓂᖅ ᐃᒪᕐᒧᑦ ᐱᓕᕆᐊᕆᔭᐅᓂᐊᖅᑐᒥ ᐃᖃᓗᖕᓂ ᓱᓕᓕ ᐊᑭᒋᓇᔭᖅᑕᖓ ᖃᐅᔨᒪᔭᐅᙱᖢᓂ.

“ᑐᓂᔭᐅᒃᐸᑕ ᐱᓕᕆᖃᑎᖃᑲᑕᖕᓂᐊᖅᑐᒍᑦ ᓄᓇᕗᒥᑦ ᐊᒻᒪᓗ ᐱᓕᕆᐊᓂᒃ ᐱᓕᕆᐊᖃᖅᑐᓂᒃ ᐊᒻᒪ ᐋᖅᑭᒃᓱᐃᔨᓂᒃ ᐊᒻᒪᓗ ᒐᕙᒪᑐᖃᒃᑯᓐᓂ ᑕᒪᒃᑯᐊ ᐱᓕᕆᐊᒃᓴᐃᑦ ᐱᓕᕆᐊᕆᔭᐅᑎᒃᑲᓐᓂᕋᓱᒡᓗᒋᑦ,” ᑖᑦᓱ ᐅᖃᕐᑐᖅ.