ᓴᓂᕋᔭᒃ ᐃᓕᓐᓂᐊᕐᕕᐅᑉ ᑎᒻᒥᖔᓲᖏᑦ ᓴᓇᔭᐅᓯᒪᓕᖅᑐᑦ ᐊᕐᕌᒍᐸᓗᒻᒥ ᐱᔪᓐᓇᓚᐅᓐᖏᑦᑐᑦ

For English version, see Sanirajak school sprinkler system fixed after nearly a year

ᐅᐊᑦᑎᔭᐅᖃᑦᑕᓚᐅᕐᖓᑕ ᐃᑲᕐᕋᓄᑦ 24−ᓄᑦ ᐊᕐᕌᒍᐸᓗᒻᒪᕆᒻᒥᑦ, ᓴᓂᕋᔭᐅᑉ ᐃᓕᓐᓂᐊᕐᕕᖓ ᒫᓐᓇ ᑎᒻᒥᑳᓲᖏᑦ ᐱᔪᓐᓇᖅᓯᔪᑦ.

ᐊᕐᓇᕐᔪᐊᖅ ᐃᓕᓐᓂᐊᕐᕕᖓᑦᑕ ᑎᒻᒥᖔᓲᖏᑦ ᓴᓇᔭᐅᓚᐅᖅᑐᑦ ᒫᔾᔨ 30−ᒥ ᓄᑖᕐᒥᑦ ᓱᓪᓗᓕᒻᒥ ᐋᖅᑮᒻᒪᑕ ᐱᔪᓐᓇᖅᓯᔪᑦ ᒫᓐᓇ, ᐃᓕᓐᓂᐊᖅᑐᓕᕆᔨᒃᑯᑦ ᐅᖃᖅᑎᖓ ᑯᕆᔅᑕ ᐊᐃᒥ ᐅᖃᓚᐅᖅᑐᖅ ᐱᓇᓱᐊᕈᓯᕆᓚᐅᖅᑕᑎᓐᓂ.

ᐃᓕᓐᓂᐊᕐᕕᑦ ᑎᒻᒥᑳᓲᖃᓚᐅᓐᖏᑦᑐᑦ ᒪᐃᒥ ᐊᕐᕌᓂᓂᑦ. ᐃᓇᖏᖅᑕᐅᓪᓗᑎᑦ, ᐃᑲᕐᕋᓄᑦ 24−ᓄᑦ ᐅᐊᑦᑎᓯᔭᐅᓪᓗᑎᑦ 21−ᓄᑦ ᐃᓄᓐᓄᑦ ᐃᖅᑲᓇᐃᔭᐃᓐᓇᕐᓂᐊᖅᑐᓄᑦ, ᐃᖅᑲᓇᐃᔭᑲᐃᓐᓇᕐᓂᐊᖅᑐᓄᓪᓗ ᐃᓇᖐᕙᑦᑐᓂᓪᓗ ᓇᓪᓕᑭᑕᐅᑎᖃᑦᑕᓚᐅᖅᑐᑦ ᐅᔾᔨᓱᖃᑦᑕᖅᑐᑎᑦ ᐃᓕᓐᓂᐊᕕᒻᒥᑦ.

ᑎᒻᒥᖔᓲᖓ ᓴᓇᔭᐅᒋᐊᖃᓚᐅᖅᓯᒪᔪᖅ ᓅᕕᑉᐱᕆᒥ, ᑭᓯᐊᓂᓕ ᐊᓯᐊᓂ ᐃᓚᔅᓴᑦᑖᕆᐊᖃᓚᐅᖅᓯᒪᔪᖅ ᑭᖑᕙᕆᐊᒃᑲᓂᖅᑐᓂᓗ ᑕᖅᑭᒐᓚᓐᓄᑦ.

ᐊᕐᓇᕐᔪᐊᖅ ᐃᓕᓐᓂᐊᕐᕕᑐᐊᖅ ᓄᓇᓕᓐᓂ 900−ᓂᒃ ᐃᓄᖃᓲᖅ.

ᑲᑎᑦᑐᒋᑦ ᐅᐊᑦᑎᔭᐅᓂᖓᓐᓂ ᐃᑭᓕᓐᖏᒃᑲᓗᐊᕐᒪᖔᖅ ᐊᑭᖃᓚᐅᖅᑐᖅ $204,000−ᓂᑦ, ᓄᓇᓕᓐᓂᑦ ᐃᓕᓐᓂᐊᖅᑐᓕᕆᔨᒃᑯᓐᓃᓐᖔᕐᓂᐊᖅᑐᖅ. ᑭᓯᐊᓂᓕ, ᐊᒥᓲᓂᖓᓂ ᐅᑎᖅᑎᑦᑎᕕᐅᒐᔭᖅᑐᑦ ᐃᓕᓐᓂᐊᖅᑐᓕᕆᔨᒃᑯᓐᓂ, ᐊᐃᒥ ᐅᖃᖅᑐᓂ.

ᐊᑭᖏᑦ ᐃᓚᔅᓴᐅᑉ ᐃᖅᑲᓇᐃᔭᖅᑏᓪᓗ ᒥᔅᓴᐅᓴᑦᑕᐅᓚᐅᖅᑐᖅ ᑕᒫᓂᖃᐃ $90,000 ᑏᓰᑉᐱᕆᒥᓂᑦ.

ᐊᒥᑦᑐᕐᒧᑦ ᒪᓕᒐᓕᐅᖅᑎ ᔪᐃᓕ ᖃᐅᕐᓂᖅ ᐅᖃᓚᐅᖅᑐᖅ ᐃᕐᖐᕐᓈᖅᑕᐅᑎᒃᑯᑦ ᑎᑎᕋᖅᒻᑕᒥᓂᕐᒥᓂᒃ ᐱᓕᕆᐊᖑᔭᕆᐊᓖᑦ ᓱᓕ ᑲᒪᒋᔭᐅᓂᐊᖅᑐᔅᓴᐅᒐᓗᐊᖅᑯᑦ ᐃᓕᓐᓂᐊᕕᒻᒥ ᓲᕐᓗ ᐃᓄᒋᐊᓗᐊᖃᑦᑕᕐᓂᖏᓐᓂ ᐊᒻᒪᓗ ᓱᓪᓗᓕᕐᓗᖃᑦᑕᕐᓂᖏᓐᓄᑦ.