ᓴᕿᔪᖅ ᖁᕕᐊᓱᒍᑎᖃᖅᐳᖅ ᓅᓐᓂᐅᔪᒥ ᓄᑖᒧᑦ ᐳᕕᕐᓂᑐᕐᒥ ᑎᑎᕋᕐᕕᖓᓂ

For English version, see Saqijuq celebrates move to new Puvirnituq office

ᐃᓕᖅᑯᓯᒧᑦ ᐊᒻᒪ ᐱᖅᑯᓯᑐᖃᖅᑎᒍᑦ ᐱᓕᕆᐊᖑᓂᐅᔪᓂ ᑲᑐᔾᔨᖃᑎᒌᖑᔪᒥ ᐳᕕᕐᓂᑐᒥ ᒪᑐᐃᖅᓯᕗᑦ ᓄᑖᖑᔪᒥ ᑎᑎᕋᕐᕕᖕᒥ ᐱᔪᓐᓇᖅᑎᑦᑎᓂᐊᖅᑐᒥ ᐊᖏᒡᓕᒋᐊᖅᓯᓂᖏᓐᓂ ᐱᔨᑦᑎᕋᕐᓂᖏᓐᓂ.

ᓴᕿᔪᖅ ᑐᓂᓯᕗᖅ ᒪᕐᕉᖕᓂ ᖃᓄᐃᑦᑑᓂᖏᓐᓂ ᐃᑲᔪᖅᓱᐃᓂᐅᔪᓂ. ᐊᐅᓚᑦᑎᓲᖑᕗᖅ ᐃᖏᕐᕋᕙᒃᑐᓂ ᓄᖅᑲᖅᑎᑦᑎᓂᕐᒧᑦ ᑲᑎᙵᓂᐅᔪᓂ ᑰᔾᔪᐊᕐᒥ ᐊᒻᒪ ᐳᕕᕐᓂᑑᒥ ᓄᓇᓕᖕᒥᐅᑕᓄᑦ ᑐᐊᕕᕐᓇᖅᑐᒥ ᖃᓄᐃᓐᓂᕐᓃᑦᑐᓂ ᑐᕌᒐᖃᖅᖢᓂ ᒥᒃᖠᒋᐊᖅᑎᑦᑎᓂᕐᒥ ᐱᔭᕆᐊᖃᕐᓂᐅᔪᒥ ᐸᓖᓯᒃᑯᓐᓂ ᓄᖅᑲᖅᑎᑕᐅᓂᐅᔪᓂ. ᒪᕐᕈᖓ ᓄᓇᒥ ᐃᓕᖅᑯᓯᒧᑦ ᐊᒻᒪ ᐱᖅᑯᓯᑐᖃᖅᑎᒍᑦ ᐱᓕᕆᐊᖑᓂᐅᔪᓂ.

ᑎᑎᕋᕐᕕᖄᓂᒃᑐᑦ ᑕᒪᒃᑭᓂ 14−ᖑᔪᓂ ᓄᓇᕕᐅᑉ ᐅᐊᖕᓇᖓᓂ ᓄᓇᓕᐅᔪᓂᑦ, ᑭᓯᐊᓂ ᓄᑖᖅ ᐃᓂᐅᔪᖅ ᐳᕕᕐᓂᑐᒥ — ᐅᕙᓂ 1061 ᓂᐊᓕᑦᑕᓕᒃ ᐊᖅᑯᒻᒥ — ᐊᑲᐅᓂᖅᓴᐅᕗᖅ ᑲᑐᔾᔨᖃᑎᒌᖑᔪᒥ ᐱᔭᕆᐊᓕᖏᓐᓂ, ᐅᖃᓚᐅᖅᐳᖅ ᓵᑦ−ᐃᒪᓕ ᑐᕉᓚᐃ, ᓴᕿᔪᕐᒧᑦ ᐱᓕᕆᐊᖑᔪᒥ ᐱᕙᓪᓕᐊᑎᑕᐅᓂᖓᓂ ᑐᑭᒧᐊᒃᑎᑦᑎᔨ.

“ᓇᖕᒥᓂᖅ ᐃᓂᖃᓪᓚᕆᓕᖅᐳᒍᑦ, ᓇᖕᒥᓂᖅᓱᕈᓐᓇᕐᓂᖃᖅᖢᖅᑕ ᐃᑲᕐᕋᓂᑦ ᒪᑐᐃᖅᓯᒪᔪᓐᓇᕐᓂᑦᑎᓐᓂ ᐊᒻᒪ ᖃᓄᐃᕈᑎᓂᑦ ᐊᑐᐃᓐᓇᖃᕈᓐᓇᕐᓂᑦᑎᓐᓂ,” ᐅᖃᓚᐅᖅᐳᖅ.

“ᑕᒪᓐᓇ ᑐᕌᒐᓪᓗᐊᑕᕆᕙᕗᑦ ᓇᖕᒥᓂᖅ ᑎᑎᕋᕐᕕᖃᕐᓂᑦᑎᓐᓂ. [ᓄᓇᒥ] ᑲᑎᙵᓂᐅᔪᑦ ᐊᖑᓇᓱᒋᐊᕈᑎᒃ ᐊᒻᒪ ᐃᖃᓪᓕᐊᕆᐊᕈᑎᒃ, ᓂᕿᓕᐅᕈᓐᓇᕐᓂᐊᖅᐳᑦ ᑭᖑᓂᐊᓂ ᐊᒻᒪ ᑐᓂᓯᓗᑎᒃ ᑭᓱᑐᐃᓐᓇᒥᒃ ᐊᖑᓇᓱᒃᑕᐅᓚᐅᖅᑐᓂ ᓄᓇᓕᖕᒥᐅᑕᓄᑦ.”

ᑲᑐᔾᔨᖃᑎᒌᖑᔪᑦ ᓄᑕᐅᙱᑦᑐᖅ ᑎᑎᕋᕐᕕᒋᓚᐅᖅᑕᖓ ᐃᓂᖃᓚᐅᖅᐳᖅ ᒪᕐᕈᖓᓂ ᓇᑎᖓᓂ ᑯᐊᐸᒃᑯᑦ ᓂᐅᕕᕐᕕᖓᓂ, ᑐᑭᖃᓚᐅᖅᑐᒥ ᒪᑐᐃᖓᑐᐃᓐᓇᕈᓐᓇᕐᓂᖓᓂ ᓂᐅᕕᕐᕕᐅᑉ ᐱᓕᕆᓂᕐᒧᑦ ᐃᑲᕐᕋᖏᓐᓂ. ᐳᓚᕋᖅᑏᑦ ᓂᐅᕕᕐᕕᒃᑰᕆᐊᖃᓚᐅᖅᐳᑦ ᑎᑎᕋᕐᕕᓕᐊᕋᓱᐊᕐᓂᕐᒧᑦ ᒪᕐᕈᖓᓂ ᓇᑎᖓᓄᑦ.

ᓄᑖᖑᔪᖅ ᐃᓂᒃᓴᖅ ᐃᓚᖃᕆᕗᖅ ᐃᓗᓕᖃᑦᑎᐊᖅᑐᒥ ᓂᕿᓕᐅᕐᕕᖕᒥ, ᑎᑎᕋᕐᕕᖕᒥ ᐃᓂᒃᓴᐅᔪᒥ, ᐊᓇᕐᕕᖕᒥ ᐊᒻᒪ ᒪᑐᐃᖓᓂᐅᔪᒥ ᐃᓂᐅᔪᒥᑦ.

ᓴᕿᔪᖅ ᐊᕿᑦᑐᒥ ᒪᑐᐃᕐᓂᖃᓚᐅᖅᐳᖅ ᔭᓄᐊᕆᐅᑉ ᕿᑎᖅᐸᓯᐊᓂ, ᑭᓯᐊᓂ ᒪᑐᐃᓪᓚᕆᒃᑕᐅᓂᖓ ᕕᕗᐊᕆ 17−ᖑᓚᐅᖅᐳᖅ. ᓯᓂᒃᓴᒥ ᑭᔾᔭᖅᓯᓚᐅᖅᑎᓪᓗᒋᑦ, ᓄᓇᓕᖕᒥᐅᑕᐃᑦ ᐳᓚᕋᖅᑎᑕᐅᓚᐅᖅᐳᑦ ᓄᑖᖑᔪᒥ ᐃᒡᓗᕐᔪᐊᒥ ᕼᐊᓐᓇᓚᖏᓐᓂ ᓵᓚᖃᕋᓱᐊᖅᑐᒥ ᑎᑭᑦᓂ ᑐᓂᐅᖅᑲᖅᑕᐅᑎᓪᓗᒋᑦ. ᖁᕕᐊᓱᖕᓂᓪᓚᕆᒃ ᐱᒋᐊᓚᐅᖅᐳᖅ ᐅᓪᓗᕈᒻᒥᑕᖃᕐᓂᕐᒥ ᓵᓚᖃᐅᓯᐊᒥᒃ ᑐᓐᓂᖅᓴᐃᓂᐅᔪᒥ ᐊᒻᒪ ᖁᕕᐊᓱᒍᑎᖃᕐᓂᕐᒥ ᓵᑦᑑᒪᕕᒃ ᐃᖃᐃᓕᓴᕐᕕᖓᓂ.

ᑐᕉᓚᐃ ᐅᖃᓚᐅᖅᐳᖅ 500−ᐸᓗᖕᓂ ᐃᓄᖕᓂ ᖁᕕᐊᓱᒋᐊᖃᑕᐅᓚᐅᖅᐳᑦ.

ᑲᑎᓪᓗᒋᑦ 6−ᖑᔪᓂ ᐅᓪᓗᓕᒫᖅᓯᐅᑎᓂ ᐃᓕᓴᐃᔨᐅᔪᓂ ᐋᖅᑭᒃᓱᐃᓯᒪᕗᖅ ᑲᑐᔾᔨᖃᑎᒌᖑᔪᒥ ᓄᓇᒥ ᑲᑎᙵᓂᐅᔪᒥ. ᐊᑐᐃᓐᓇᖃᖅᑎᑦᑎᕗᖅ ᐱᒻᑯᓯᑐᖃᖅᑎᒍᑦ ᐊᒻᒪ ᐃᓕᖅᑯᓯᒧᑦ ᖃᓄᐃᓕᐅᕈᑕᐅᔪᓂ ᖁᕝᕙᖅᓴᐃᓂᕐᒥ ᐃᓕᖅᑯᓯᒧᑦ ᒪᒥᓴᕐᓂᕐᒥ.

“ᑭᓇᑐᐃᓐᓇᖅ ᓄᓇᓕᖕᒥᐅᑕᖅ ᐃᓚᐅᖃᑕᐅᔪᓐᓇᖅᐳᖅ ᖃᓄᐃᓕᐅᕈᑎᑦᑎᓐᓂ,” ᐅᖃᓚᐅᖅᐳᖅ ᑐᕉᓚᐃ.

“ᒪᑐᐃᖓᓪᓚᕆᒃᐳᖅ ᑭᓇᑐᐃᓐᓇᒧᑦ ᐃᓕᑦᑎᒃᑲᓐᓂᕈᒪᔪᒥ, ᐃᒃᐱᒍᓱᖕᓂᕐᒥ ᐃᑲᔪᖅᓯᖅᑕᐅᓂᖏᓐᓂ ᐊᒻᒪ ᐃᓚᒋᔭᐅᓗᓂ ᑐᙵᓇᖅᑐᒥ ᐊᒻᒪ ᐊᑦᑕᓇᙱᑦᑐᒥ ᐊᕙᑎᐅᔪᒥ.”