ᐃᓕᓐᓂᐊᕐᓂᖅ ᑲᔪᓯᕗᖅ ᓄᓇᕕᖕᒥ 77−ᓂ ᐃᓄᖃᙱᑦᑐᓂ ᐃᓕᓴᐃᔨᒃᓴᓄᑦ ᐃᓂᒃᓴᐅᔪᖃᕋᓗᐊᖅᑎᓪᓗᒍ

ᐊᑭᖓ ᐆᒪᓂᕐᒧᑦ, ᐅᖓᓯᖕᓂᖓᓂ ᐅᑭᐅᖅᑕᖅᑐᒥ ᓄᓇᓕᐅᔪᓂ ᐊᒡᕕᐊᕈᑕᐅᕗᑦ ᐃᖅᑲᓇᐃᔭᖅᑎᑖᕋᓱᐊᕐᓂᕐᒥ, ᐅᖃᖅᐳᖅ ᐃᓕᓐᓂᐊᕐᕕᖕᒥ ᑲᑎᒪᔨᓄᑦ ᐊᖓᔪᖅᑳᖓ

ᓯᐊᕋ ᐊᓘᐸ, ᐊᖓᔪᖅᑳᖅ ᑲᑎᕕᒃ ᐃᓕᓴᕐᓂᓕᕆᓂᖅ, ᑕᑯᒃᓴᐅᔪᖅ ᒪᐃ 2022−ᒥ ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓᓂ, ᐅᖃᖅᐳᖅ ᐃᖅᑲᓇᐃᔭᖅᑎᑖᕐᓂᕐᒥ ᐊᒻᒪ ᐸᐸᑦᑏᓐᓇᕐᓂᕐᒥ ᐃᓕᓴᐃᔨᓂ ᐊᒃᓱᕈᐃᓐᓇᕐᓇᖅᐳᖅ, ᐃᓕᓐᓂᐊᕐᓂᕐᒧᑦ ᐊᕐᕌᒍᖓ ᐱᒋᐊᓚᐅᖅᐳᖅ ᐱᓇᓱᐊᕈᓯᐅᓚᐅᖅᑐᒥ 77−ᓂ ᐃᓂᒃᓴᐅᔪᓂ ᐃᓄᖃᙱᑦᑐᓂ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ ᔨᐊᕝ ᐱᓕᑦᑎᐊᐃᒧᑦ)

By ᔨᐊᕝ ᐱᓕᑦᑎᐊᐃᒧᑦ

For English version, see School resumes in Nunavik despite 77 teaching vacancies

ᐃᓕᓐᓂᐊᕐᓂᖅ ᑲᔪᓯᕗᖅ ᐱᒋᐊᕐᕕᒃᓴᖓᓂ ᐋᒍᔅᑎ 15−ᒥ ᓄᓇᕕᐅᑉ 18−ᖑᔪᓂ ᐃᓄᓕᒫᓄᑦ ᐃᓕᓐᓂᐊᕐᕕᖏᓐᓂ, ᐃᓕᓴᐃᔨᒃᓴᓂ ᐃᖅᑲᓇᐃᔭᖅᑎᑭᒃᓴᕋᓗᐊᖅᑎᓪᓗᒋᑦ.

@body: ᑲᑎᕕᒃ ᐃᓕᓴᕐᓂᓕᕆᓂᕐᒧᑦ ᐃᓕᓐᓂᐊᕐᕕᖏᑕ ᑲᑎᒪᔨᖏᑦ ᓱᓕ ᕿᓂᖅᐳᑦ ᐃᓐᓄᒃᓯᓂᖏᓐᓂ 77−ᓂ ᐃᓄᖃᙱᑦᑐᓂ ᐃᓕᓴᐃᓂᕐᒧᑦ ᐃᓂᒃᓴᐅᔪᓂ, ᐅᖃᐅᓯᐅᓪᓗᓂ ᔭᐃᑦ ᐱᕐᓂᐊᐃᒧᑦ, ᐅᖃᖅᑎᐅᔪᖅ ᐃᓕᓐᓂᐊᕐᕕᐅᑉ ᑲᑎᒪᔨᖏᓐᓂ.

ᐅᑯᓇᓂ ᐃᓂᒃᓴᐅᔪᓂ, 63−ᓂ ᐃᓄᖃᙱᑦᑐᓂ ᒪᕐᕈᖓᓄᑦ-ᐅᖃᐅᓯᐅᔪᒥ (ᖃᓪᓗᓈᑎᑐᑦ ᐅᐃᕖᑎᑐᓪᓘᓐᓃᑦ) ᐃᓕᓴᐃᔨᐅᔪᓄᑦ, 29−ᖑᔪᑦ ᐱᒋᐊᕐᕕᖓᓂ ᐅᓪᓗᕐᒥ ᐃᓕᓴᐃᒡᐅᓇᔭᖅᖢᑎᒃ. 14−ᓂᑦᑕᐅᖅ ᐃᓄᖃᙱᑦᑐᓂ ᐃᓄᒃᑎᑐᑦ ᐃᓂᒃᓴᐅᓇᔭᖅᑐᓄᑦ.

ᐃᓕᓐᓂᐊᕐᕕᒃ ᐃᖅᑲᓇᐃᔭᖅᑎᑦᑎᕗᑦ 530−ᓂ ᐃᓕᓴᐃᔨᓂ.

ᐅᓄᕐᓂᐅᔪᓂ ᐃᓄᖃᙱᑦᑐᓂ ᐱᒋᐊᕐᓂᖓᓂ ᐊᑐᓂ ᐃᓕᓐᓂᐊᕐᓂᕐᒧᑦ ᐊᕐᕌᒍᖓᓂ ᐊᔾᔨᒌᙱᑉᐸᒃᐳᑦ. 37−ᓂ ᐃᓄᖃᙱᑦᑐᖃᓚᐅᖅᐳᖅ 2018−ᒥ, ᐊᕐᕌᒍᓄᑦ-ᑕᓪᓕᒪᓄᑦ ᖁᑦᑎᖕᓂᐅᔪᒥ 84−ᓂ 2019−ᒥ, ᐊᕐᕌᒍᓄᑦ-ᑕᓪᓕᒪᓄᑦ ᐊᑦᑎᖕᓂᐅᔪᒥ 12−ᓂ 2020−ᒥ, ᐊᒻᒪ ᐊᓱᐃᓛᒃ 51−ᓂ 2021−ᒥ.

ᓯᐊᕋ ᐊᓘᐸ, ᐊᖓᒧᖅᑳᖑᔪᖅ ᑲᑎᕕᒃ ᐃᓕᓴᕐᓂᓕᕆᓂᕐᒥ, ᐅᖃᓚᐅᖅᐳᖅ ᖃᔅᓯᒐᓚᖕᓂ ᐱᔾᔪᑎᑕᖃᖅᐳᖅ ᑐᕌᖅᑎᑦᑎᔪᒥ ᐃᓕᓴᐃᔨᒃᓴᓄᑦ ᐃᖅᑲᓇᐃᔭᖅᑎᑖᕐᓂᕐᒥ ᐊᒻᒪ ᐸᐸᑦᑏᓐᓇᕐᓂᕐᒥ ᐊᒃᓱᕈᕈᑕᐅᔪᓂ, ᐃᓚᖃᖅᑐᒥ ᖁᑦᑎᒃᑐᐊᓗᖕᒥ ᐆᒪᓇᓱᐊᕐᓂᕐᒥ, ᑭᒡᓕᖃᖅᑐᒥ ᐃᒡᓗᒃᓴᖏᒻᒧᑦ ᓂᕈᐊᒐᒃᓴᐅᔪᓂ ᐊᒻᒪ ᐅᖓᓯᖕᓂᖓᓂ ᓄᑖᖑᔪᒥ, ᐅᖓᓯᖕᓂᖅᓴᐅᔪᒥ ᐊᕙᑎᐅᔪᒥ.

“ᐃᓚᖏᑦ ᑎᑭᑉᐸᒃᐳᑦ ᐊᒻᒪ ᐃᓕᖅᑯᓯᖓᓂ ᖁᐊᖅᓵᕐᓂᖃᓲᖑᕗᑦ, ᐊᒻᒪ ᖃᐅᑎᓪᓗᒍ ᐊᖏᕐᕋᕈᒪᓕᖅᖢᑎᒃ,” ᐅᖃᓚᐅᖅᐳᖅ.

ᑲᑎᕕᒃ ᐃᓕᓴᕐᓂᓕᕆᓂᖅ ᓱᓕ ᐃᖅᑲᓇᐃᔭᖅᑎᒃᓴᖅᓯᐅᖅᐳᑦ ᐃᓕᓴᐃᔨᓂ ᑕᒪᑐᒧᖓ ᐃᓕᓐᓂᐊᕐᓂᕐᒥ ᐊᕐᕌᒍᖓᓂ. ᐃᓕᓐᓂᐊᕐᕕᐅᑉ ᑲᑎᒪᔨᖏᑦ ᒫᓐᓇᓕᓴᐅᔪᒥ ᓴᖅᑭᑎᑦᑎᓚᐅᖅᐳᑦ ᑎᑎᕋᖅᓯᒪᓂᐅᔪᒥ ᐃᓄᖃᙱᑦᑐᓂ ᐃᓂᐅᔪᓂ ᐃᓐᓄᒃᓯᓇᓱᐊᖅᑕᖏᓐᓂ, ᐃᓚᖃᖅᑐᒥ ᐃᓕᓴᐃᔨᓄᑦ ᐊᖓᔪᖅᑳᖏᑕ ᑐᒡᓕᖏᓐᓂ ᐃᓚᖏᓐᓂ ᐃᓕᓐᓂᐊᕐᕕᐅᔪᓂ.

ᐊᓘᐸ ᐅᖃᓚᐅᖅᐳᖅ ᐃᓕᓐᓂᐊᕐᕕᐅᑉ ᑲᑎᒪᔨᖏᑦ ᐊᑐᐃᓐᓇᖃᖅᑎᑦᑎᕗᑦ ᐱᕚᓪᓕᕈᑕᐅᔪᓂ ᐃᒡᓗᖃᖅᑎᑕᐅᓂᖏᓐᓂ, ᐊᐅᓪᓛᕐᓂᖓᓄᑦ, ᐅᓯᔭᐅᓂᐅᔪᓂ ᐊᒻᒪ ᐸᐸᑦᑏᓐᓇᕐᓂᕐᒥ ᐊᕐᕌᒍᑕᒫᒥ ᐃᓚᒋᐊᖅᑕᐅᒃᑲᓐᓂᕐᓂᐅᔪᒥ ᐱᓕᕆᑦᑎᐊᕐᓂᖏᓐᓄᑦ. ᐅᑯᐊ ᐱᕚᓪᓕᕈᑎᑦ ᐅᖓᕙᕆᐊᖅᑕᐅᓚᐅᖅᐳᑦ ᐃᓚᖃᕐᓂᕐᒥ ᓄᓇᓕᖕᓂ ᐃᖅᑲᓇᐃᔮᖅᑖᕆᔭᐅᔪᓄᑦ ᐃᓄᖕᓂ ᐃᖅᑲᓇᐃᔭᖅᑎᓂ ᔫᓂᐊᓐᑯᑦ ᐊᒻᒪ ᐃᓕᓐᓂᐊᕐᕕᐅᑉ ᑲᑎᒪᔨᖏᑦ ᑎᑭᐅᑎᓚᐅᖅᑎᓪᓗᒋᑦ ᓄᑖᒥ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑐᓄᑦ ᐊᖏᕈᑕᐅᔪᒥ.

“ᐱᐅᔪᐊᓗᖕᒥ ᐊᑐᐃᓐᓇᖃᖅᑎᑦᑎᕗᒍᑦ ᐃᓕᓴᐃᔨᓄᑦ ᑎᑭᑉᐸᒃᑐᓂ ᐃᓕᓐᓂᐊᖅᑎᑦᑎᔭᖅᑐᖅᖢᑎᒃ ᒪᕐᕈᖓᓂ ᐅᖃᐅᓯᐅᔪᒥ,” ᐊᓘᐸ ᐅᖃᓚᐅᖅᐳᖅ, ᐅᖃᐅᓯᖃᖅᖢᓂ ᐃᓕᓴᐃᔨᓄᑦ ᐃᓕᓐᓂᐊᖅᑎᑦᑎᕙᒃᑐᓂ ᖃᓪᓗᓈᑎᑐᒃ ᐅᐃᕖᑎᑐᓪᓘᓐᓃᑦ. “ᖃᓄᐃᓕᐅᕐᓂᖃᕐᔪᐊᖅᐳᒍᑦ ᖃᓪᓗᓈᓂ ᐱᓇᓱᐊᕐᓂᖏᓐᓂ ᐃᓕᓐᓂᐊᕐᕕᑦᑎᓐᓄᑦ.”

ᐊᐅᓚᑦᑎᓂᕐᒥ ᐊᒥᒐᓗᐊᕐᓂᖏᓐᓂ, ᓄᓇᕕᖕᒥ ᐃᓕᓐᓂᐊᕐᕖᑦ ᐃᖅᑲᓇᐃᔭᖅᑎᑖᖅᓯᒪᕗᑦ ᓄᓇᓕᖕᒥᐅᑕᓂ ᐃᓇᖏᖅᓯᓚᐅᑲᒃᑐᒥ ᐃᓕᓴᐃᔨᐅᓂᐊᖅᑐᓂ, ᑲᑎᑎᕆᓪᓗᑎᒃ ᐃᓕᓐᓂᐊᕐᕕᐊᕈᓯᕐᓂ ᐱᔪᓐᓇᕌᖓᑕ, ᐊᑐᐃᓐᓇᖃᖅᑎᑦᑎᓂᕐᒥ ᐃᓕᓴᐃᔨᐅᔪᓄᑦ ᐊᑐᖅᐸᒃᑕᖏᓐᓂ ᐃᓕᖅᑯᓯᓕᕆᓂᕐᒥ ᐱᓕᕆᔨᐅᔪᓄᑦ ᐊᒻᒪ ᐃᓕᓴᐃᔨᓄᑦ ᐃᓕᓐᓂᐊᖅᐸᓪᓕᐊᔪᓄᑦ, ᐊᒻᒪ ᐊᐱᕆᓪᓗᑎᒃ ᓄᖅᑲᖅᓯᒪᓕᖅᑐᓂ ᐊᒻᒪ ᐃᓕᓴᐃᔨᐅᓚᐅᖅᑐᓂᒃ ᐱᔪᒪᓇᔭᕐᒪᖔᑕ ᐃᓐᓄᒃᓯᓂᖏᓐᓂ ᕿᓚᒻᒥᐅᔪᒥ ᑐᙵᕕᓕᖕᒥ.

ᑕᒪᐃᑎᒍᑦ, ᐊᓘᐸ ᐅᒃᐱᕈᓱᖕᓂᖃᖅᐳᖅ ᐱᐅᔪᒥ ᐃᓕᓐᓂᐊᕐᓂᕐᒥ ᐊᕐᖄᒎᓂᐊᖅᑐᒥ, ᐃᓱᒪᒋᓇᒍ ᐃᓄᖃᙱᑦᑐᓂ. ᑭᖑᕙᕆᐊᕐᓂᖃᓚᐅᙱᓚᖅ ᐃᓕᓐᓂᐊᕐᕕᓂᑦ ᒪᑐᐃᖅᓯᓂᖏᓐᓂ, ᐊᒻᒪ ᐊᐅᔭᒃᑯᑦ ᓄᑖᙳᕆᐊᖅᑎᑕᐅᓂᖏᓐᓂ ᐱᓕᕆᐊᖑᔪᓂ ᐃᓕᓐᓂᐊᕐᕕᓂ ᓴᓪᓗᐃᑦᓂ, ᐳᕙᕐᓂᖅᑐᖅ ᐊᒻᒪ ᐃᓄᒃᔪᐊᕐᒥ ᐱᔭᕇᖅᑕᐅᓚᐅᖅᐳᑦ ᐱᔭᕇᖅᓯᒪᔭᕆᐊᖃᕐᓂᖏᓐᓂ ᐊᐅᔭᐅᔪᒥ.

ᐱᔾᔪᑎᖃᖅᑐᒥ ᓄᕙᒡᔪᐊᕐᓇᖅ-19−ᒧᑦ, ᒪᑐᐊᑦ ᐊᑐᖅᑕᐅᔭᕆᐊᖃᕈᓐᓃᓚᐅᖅᐳᑦ, ᑭᓯᐊᓂ ᐊᓘᐸ ᐅᖃᓚᐅᖅᐳᖅ ᐃᓕᓐᓂᐊᖅᑏᑦ ᓱᓕ ᐊᔭᐅᕆᔭᐅᕗᑦ ᓈᓚᖕᓂᕐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐅᖃᐅᔾᔨᓂᐅᔪᒥ, ᒪᑐᐊᖅᓯᒪᓗᑎᒃ ᐊᒻᒪ ᐊᑐᖅᐸᒡᓗᑎᒃ ᐃᓅᖃᑎᒥᓂ ᐅᖓᓯᒌᒋᐊᖃᕐᓂᐅᔪᒥ.

ᐊᓘᐸ ᐱᓕᕆᓚᐅᕆᕗᖅ ᐱᒋᐊᕐᓂᖓᓂ ᐊᕐᕌᒍᒥ ᐅᖃᐅᓯᒃᓴᓕᐅᕐᓂᕐᒥ ᐊᖓᔪᖅᑳᓄᑦ ᐊᒻᒪ ᐃᓕᓐᓂᐊᖅᑎᓄᑦ.

ᐊᖓᔪᖅᑳᖑᔪᓄᑦ: ᐳᓚᕋᕐᓗᓯ ᓄᓇᓕᖕᓂ ᐃᓕᓐᓂᐊᕐᕕᓄᑦ, ᑲᑎᖃᑎᒋᓗᒋᑦ ᐃᓕᓴᐃᔨᓂᒃ ᐊᒻᒪ ᐃᑲᒧᖅᓱᐃᓗᓯ ᕿᑐᕐᙵᔅᓯᓐᓂ ᐱᔭᒃᓴᖃᕐᔪᐊᖅᑐᒥ ᐃᓕᓐᓂᐊᕐᓂᕐᒧᑦ ᐊᕐᕌᒍᖓᓂ.

ᐊᒻᒪᓗ ᐃᓕᓐᓂᐊᖅᑎᓄᑦ: ᐊᐱᕆᓗᑎᒃ ᐃᓕᓴᐃᔨᓂᒃ ᐊᐱᖅᑯᑎᒃᓴᕐᓂᑦ ᐃᑲᔪᖅᑕᐅᔭᕆᐊᖃᕈᕕᑦ ᑭᓱᑐᐃᓐᓇᕐᒧᑦ.

“ᐊᐱᖅᓱᖃᑦᑕᕐᓂᕐᒥ ᑭᐅᓂᐅᕗᖅ ᑕᒪᒃᑭᓄᑦ ᐊᑲᐅᙱᓕᐅᕈᑕᐅᔪᓄᑦ,” ᐊᓘᐸ ᐅᖃᓚᐅᖅᐳᖅ.

Share This Story

(0) Comments

Join the Conversation

Your email address will not be published. Required fields are marked *

*