ᖃᐅᔨᓴᕐᓗᒋᑦ ᓄᓇᕗᓕᐊᖅᑐᓂ ᑐᔫᓯᐊᓂ ᐃᒥᐊᓗᖕᒧᑦ, ᓱᐴᖅᑐᒐᕐᓂ ᓱᓐᓂᕈᑕᐅᓲᓂ, ᐅᖃᖅᐳᑦ ᓯᕗᓕᐅᖅᑎᑦ

For English version, see Screen Nunavut-bound parcels for alcohol, drugs, say leaders

ᓄᓇᕗᒻᒥ ᐊᒻᒪ ᓄᓇᓕᖕᓂ ᓯᕗᓕᐅᖅᑎᐅᔪᑦ ᐊᐱᕆᕗᑦ ᑲᓇᑕᒥ ᑎᑎᖅᑲᕐᓂᐊᕐᕕᖓᓂ ᐊᖏᒡᓕᒋᐊᖅᓯᓂᕐᒥ ᖃᐅᔨᓴᖅᑕᐅᓂᐅᔪᓂ ᑐᔫᓯᐊᖑᔪᓂ ᐅᓇᑕᕐᓂᕐᒧᑦ ᓇᒃᓯᐅᔾᔨᓂᐅᔪᒥ ᐃᒥᐊᓗᖕᓂ ᐊᒻᒪ ᓱᐴᖅᑐᒐᕐᓂ ᓱᓐᓂᕈᑕᐅᓲᓂ.

ᑐᒃᓯᕋᕐᓂᐅᔪᖅ ᐊᑕᐅᓯᐅᓪᓗᓂ 21−ᖑᔪᓂ ᐊᑐᓕᖅᑎᑕᐅᔪᒃᓴᓂ ᐃᑲᔪᖅᓯᖅᑕᐅᓪᓗᓂ ᓄᕕᐱᕆ 7−ᒥ ᑕᒪᒃᑭᒐᓚᖕᓂᓄᓇᕗᒻᒥ ᒪᐃᔭᓂᑦ ᐊᕐᕌᒍᑕᒫᒥ ᑕᒪᐃᑎᒍᑦ ᑲᑎᒪᓂᐅᔪᒥ ᓄᓇᕗᒻᒥ ᕼᐋᒻᓚᒃᑯᑦ ᑲᑐᔾᔨᖃᑎᒌᖑᔪᓂ ᐃᖃᓗᖕᓂ.

“ᑲᓇᑕᒥ ᑎᑎᖅᑲᕐᓂᐊᕐᕕᖓᓂ ᓇᒃᓯᐅᔾᔭᐅᓂᐅᔪᓂ ᖃᓪᓗᓈᑦ ᓄᓇᖓᓐᓂ ᐊᕕᒃᑐᖅᓯᒪᓂᐅᔪᓂ ᐊᑐᖅᑕᐅᒐᔪᒃᐳᑦ ᐱᓕᕆᓂᐅᓪᓗᓂ ᓅᑎᕆᓂᕐᒥ ᐃᒥᐊᓗᖕᓂ ᑭᒡᓕᖃᖅᑎᑕᐅᔪᓄᑦ ᐊᒻᒪ ᐊᒃᑐᖅᑕᐅᓴᕋᐃᑦᑐᓄᑦ ᓄᓇᓕᐅᔪᓄᑦ,” ᐊᑐᓕᖅᑎᑕᐅᔪᒃᓴᒥ ᐅᖃᖅᓯᒪᕗᖅ.

ᐊᐱᕆᕗᖅ ᑲᓇᑕᒥ ᑎᑎᖅᑲᕐᓂᐊᕐᕕᖓᓂ ᖃᐅᔨᓴᖅᑕᐅᓗᑎᒃ ᑕᒪᒃᑭᓂ ᑐᔫᓯᐊᖑᔪᓂ ᓄᓇᕗᓕᐊᖅᑐᓂ.

ᕼᐋᒻᓚᐅᔪᑦ ᓄᓇᕗᒻᒥ ᐱᔪᓐᓇᕐᓂᖃᖅᐳᑦ ᐊᔪᖅᑎᑦᑎᓂᕐᒥ ᐅᕝᕙᓘᓐᓃᑦ ᑭᒡᓕᖃᖅᑎᑦᑎᓗᓂ ᐊᑐᐃᓐᓇᖃᕐᓂᕐᒥ  ᐃᒥᐊᓗᖕᓂ ᓂᕈᐊᕐᔪᐊᖅᑎᑦᑎᓂᒃᑯᑦ. 6−ᓂ ᓄᓇᓕᖕᓂ ᐊᔪᖅᑎᑦᑎᕗᑦ ᐃᒥᐊᓗᖕᓂ: ᐊᕐᕕᐊᑦ, ᓴᓪᓖᑦ, ᐅᖅᓱᖅᑑᖅ, ᑰᒑᕐᔪᒃ, ᐸᖕᓂᖅᑑᖅ ᐊᒻᒪ ᓴᓂᑭᓗᐊᖅ.

12−ᓂ ᑭᒡᓕᖃᖅᑎᑦᑎᕗᑦ ᐃᒥᐊᓗᖕᓂ: ᐃᒃᐱᐊᕐᔪᒃ, ᑭᙵᐃᑦ, ᐃᒡᓗᓕᒑᕐᔪᒃ, ᑲᖏᖅᑐᒑᐱᒃ, ᓴᓂᕋᔭᒃ, ᐃᒡᓗᓕᒃ, ᑭᒻᒥᕈᑦ, ᓇᐅᔮᑦ, ᒥᑦᑎᒪᑕᓕᒃ, ᕿᑭᖅᑕᕐᔪᐊᖅ, ᖃᐅᓱᐃᑦᑐᖅ ᐊᒻᒪ ᑎᑭᕋᕐᔪᐊᖅ.

ᐊᒥᐊᒃᑯᖓ — ᖃᒪᓂᑦᑐᐊᖅ, ᐃᖃᓗᒃᑑᑦᑎᐊᖅ, ᑲᖏᖅᖠᓂᖅ, ᐃᖃᓗᐃᑦ, ᐊᐅᓱᐃᑦᑐᖅ, ᖁᕐᓗᖅᑐᖅ ᐊᒻᒪ ᑕᓗᕐᔪᐊᖅ — ᑭᒡᓕᖃᖅᑎᑕᐅᙱᓚᑦ.

ᐅᖃᐅᓯᐅᔪᖅ ᓴᖅᑭᓚᐅᖅᐳᖅ ᐅᒃᑐᐱᕆ 29−ᒥ ᒪᓕᒐᓕᐅᕐᕕᖕᒥᑦᑕᐅᖅ, ᒪᓕᒐᓕᕆᔨᒃᑯᑦ ᒥᓂᔅᑕᖓ ᑕᐃᕕᑦ ᐊᕿᐊᕈᖅ ᑭᐅᒐᒥ ᐊᐱᖅᑯᑕᐅᔪᒥ ᐅᖅᑯᕐᒥᐅᑦ ᒪᓕᒐᓕᐅᖅᑎᖓᓂ ᒥᐊᕆ ᕿᓕᖅᑎᒧᑦ ᑭᓱᓂ ᐱᓕᕆᓂᖃᕐᓂᖏᓐᓂ ᒥᒃᖠᒋᐊᖅᑎᑦᑎᓂᕐᒥ ᐅᓄᕐᓂᐅᔪᓂ ᐃᒥᐊᓗᖕᒧᑦ-ᐱᔾᔪᑎᓕᖕᓂ ᐱᕋᔭᖕᓂᐅᔪᓂ ᓄᓇᕗᒻᒥ.

ᐊᕿᐊᕈᖅ ᐅᖃᓚᐅᖅᐳᖅ ᐃᒻᒥᓂᒃ ᐊᒻᒪ ᓄᓇᕗᒻᒥ ᑲᓇᑕᒥ ᐸᓖᓯᒃᑯᑦ ᑎᑎᕋᖅᓯᒪᓂᖏᓐᓂ ᑲᓇᑕᒥ ᑎᑎᖅᑲᕐᓂᐊᕐᕕᖓᓄᑦ ᐊᑲᐅᙱᓕᐅᕈᑕᐅᔪᒧᑦ.

“ᐱᓕᕆᔾᔪᑎᒃᓴᖃᖅᐳᑦ,” ᐊᕿᐊᕈᖅ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ, ᐃᓚᒋᐊᖅᓯᓪᓗᓂ ᓯᕗᓪᓕᖅᐹᒥ ᐱᓕᕆᐊᖃᓚᐅᖅᐳᑦ ᓄᓇᕕᖕᒥ ᑕᑯᒃᓴᐅᑎᑦᑎᓚᐅᖅᑐᒥ ᐊᑑᑎᖃᑦᑎᐊᕐᓂᖓᓂ ᖃᐅᔨᓴᖅᑕᐅᓂᑯᑦ ᑐᔫᓯᐊᓂ ᐃᓯᖅᑐᓂ ᐊᕕᒃᑐᖅᓯᒪᓂᐅᔪᒧᑦ.

2019−ᒥ, ᑲᓇᑕᒥ ᑎᑎᖅᑲᕐᓂᐊᕐᕕᖓ ᑲᑎᙵᖃᑎᖃᓚᐅᖅᐳᑦ ᐅᑭᐅᖅᑕᖅᑐᒥ ᐊᒻᒪ ᖃᓪᓗᓈᑦ ᓄᓇᖓᓐᓂ ᐸᓖᓯᒃᑯᓐᓂ ᐱᔨᑦᑎᕋᖅᑎᓂ ᐊᐅᓚᑕᐅᓂᐅᔪᒥ ᓄᖅᑲᖅᑎᑦᑎᓚᐅᖅᑐᒥ $1.8 ᒥᓕᐊᓐᑲᓴᖕᓂ ᐱᕋᔭᖕᓂᒃᑯᑦ ᐋᖓᔮᕐᓇᖅᑐᓂ ᑎᑭᙱᓐᓂᖏᓐᓂ ᓄᓇᕕᖕᒧᑦ ᐊᑯᓂᐅᓂᐅᔪᒥ ᑕᖅᑭᓂᑦ ᒪᕐᕉᖕᓂ.

ᐊᕿᐊᕈᖅ ᐅᖃᓚᐅᖅᐳᖅ ᐱᓕᕆᕝᕕᖓ ᐊᖏᖅᓯᒪᕗᑦ ᐃᑲᔪᖅᓱᐃᓂᕐᒥ ᑲᓇᑕᒥ ᑎᑎᖅᑲᕐᓂᐊᕐᕕᖓᓂ ᐃᑲᔪᕈᑎᒃᓴᓂ ᐱᔭᕆᐊᖃᖅᐸᑕ ᐊᔾᔨᐸᓗᐊᓂ ᐱᓕᕆᓂᕐᒧᑦ ᓄᓇᕗᒻᒥ ᐃᓕᓯᒪᐃᓐᓇᕐᓂᐊᖅᑐᒥ.

ᑲᓇᑕᒥ ᑎᑎᖅᑲᕐᓂᐊᕐᕕᖓ ᖃᔅᓯᒐᓚᖕᓂ ᒥᐊᓂᖅᓯᔨᐅᔪᓂ, ᖃᐅᔨᓴᕐᓂᕐᒥ ᐊᒻᒪ ᐊᑦᑕᓇᔾᔭᐃᖅᓯᓯᒪᓂᕐᒥ ᒪᓕᒋᐊᓕᖕᓂ ᐃᑲᔪᕐᓂᕐᒧᑦ ᓇᓗᓇᐃᖅᓯᓂᕐᒥ ᐸᓴᒋᔭᐅᔪᓂ ᐱᖁᑎᓂᑦ, ᑭᓯᐊᓂ “ᐱᑦᑕᐃᓕᒪᓂᕐᒧᑦ ᒥᒃᖠᒋᐊᖅᑎᑦᑎᓂᕐᒥ ᐊᑑᑎᖃᑦᑎᐊᕐᓂᖓᓂ” ᑐᕌᒐᕆᔭᐅᔪᒥ ᑎᒥᖁᑕᐅᔪᑦ ᐅᖃᐅᓯᕆᕙᙱᓚᖏᑦ ᐃᓄᓕᒫᓄᑦ, ᓖᓴ ᓕᐅ, ᐅᖃᖅᑎᐅᔪᖅ ᑲᓇᑕᒥ ᑎᑎᖅᑲᕐᓂᐊᕐᕕᖓᓂ, ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

ᓇᓗᓇᐃᖅᓯᓚᐅᙱᓚᖅ ᑎᒥᖁᑕᐅᔪᑦ ᐱᓯᒪᓂᖓᓂ ᑐᒃᓯᕋᕐᓂᐅᔪᒥ ᐊᕿᐊᕈᕐᒥ ᐅᕝᕙᓘᓐᓃᑦ ᐱᓕᕆᐊᖑᔭᖁᔭᐅᓇᔭᖅᑐᓂ ᐃᓱᒪᒋᔭᐅᓇᔭᕐᒪᖔᑕ.

ᑎᑎᖅᑲᕐᓂᐊᕐᕕᖕᒥ ᖃᐅᔨᓴᖅᑏᑦ ᐱᔪᓐᓇᕐᓂᖃᖅᐳᑦ ᖃᐅᔨᓴᕐᓂᕐᒥ ᑎᑎᖅᑲᓂᑦ ᐊᒻᒪ ᐃᓚᐅᑎᑦᑎᓗᓂ ᒪᓕᒐᕐᒥ ᐊᑐᖅᑎᑦᑎᕙᒃᑐᓂ ᐱᓕᕆᓂᕐᒥ “ᓇᓂᓯᓂᕐᒥ ᐊᒻᒪ ᐲᖅᓯᓂᐅᔪᒥ” ᑐᔫᓯᐊᓂ ᐃᓗᓕᖃᖅᑐᓂ ᐃᒥᐊᓗᖕᓂ ᐅᕝᕙᓘᓐᓃᑦ ᓱᐴᖅᑐᒐᕐᓂ ᓱᓐᓂᕈᑕᐅᓲᓂ, ᓕᐅ ᐅᖃᓚᐅᖅᐳᖅ.

2023−ᒥ, ᑲᓇᑕᒥ ᑎᑎᖅᑲᕐᓂᐊᕐᕕᖓ ᓇᓗᓇᐃᖅᓯᓚᐅᖅᐳᑦ ᐊᒻᒪ ᐲᖅᓯᓪᓗᑎᒃ 3,191−ᓂ ᐱᖁᑎᓂ ᐸᓴᒋᔭᐅᔪᓂ ᐃᓗᓕᖃᕐᓂᖓᓂ “ᒪᓕᒐᑎᒍᑦ ᐊᔪᖅᑎᑕᐅᔪᓂ ᐃᓗᓕᓕᖕᓂ” ᓇᓚᐅᑦᑖᕆᔭᐅᔪᒥ ᐊᖅᑯᒻᒥ ᐊᑭᓪᓗᐊᖃᖅᑐᒥ $4.4 ᒥᓕᐊᓐᓂ ᐊᐅᓪᓚᖅᑎᑕᐅᔪᓂ ᓄᓇᖃᖅᑳᖅᓯᒪᔪᓄᑦ ᐊᒻᒪ ᐅᑭᐅᖅᑕᖅᑐᒥ ᓄᓇᓕᐅᔪᓄᑦ, ᐅᖃᐅᓯᐅᓪᓗᓂ ᑭᖕᒧᑦ ᑎᒥᖁᑕᐅᔪᒥ 2023−ᒥ ᒪᑭᒪᔾᔪᑕᐅᔪᒥ ᐅᓂᒃᑳᓕᐊᒥ.

“ᑐᑭᓯᐅᒪᕗᒍᑦ ᐅᓇ ᐱᓪᓚᕆᐅᓪᓗᓂ ᐊᑲᐅᙱᓕᐅᕈᑕᐅᓂᖓᓂ ᐊᒻᒪ ᕿᓃᓐᓇᐅᔭᖅᐳᒍᑦ ᓇᓂᓯᓂᕐᒥ ᐱᓕᕆᓂᐅᔪᓂ ᐱᐅᓯᒋᐊᖅᑎᑦᑎᓂᕐᒥ ᐱᓕᕆᓂᑦᑎᓐᓂ ᐊᒻᒪ ᖁᔭᓕᕗᒍᑦ ᐅᖃᐅᓯᒃᓴᓕᐊᖑᔪᓂ ᐊᒻᒪ ᐊᑐᖁᔭᐅᓇᔭᖅᑐᓂ ᐱᓕᕆᖃᑎᖃᐃᓐᓇᖅᑎᓪᓗᑕ ᐸᓖᓯᒃᑯᓐᓂ ᐊᒻᒪ ᐊᓯᖏᓐᓂ ᓄᓇᓕᖕᓂ ᐱᓕᕆᔨᕐᔪᐊᖑᔪᓂ,” ᓕᐅ ᐅᖃᓚᐅᖅᐳᖅ.