ᐅᒥᐊᕐᔪᐊᓄᑦ ᑲᒻᐸᓂᐅᔪᑦ ᐅᑎᖅᑎᑦᑎᕗᑦ ᐴᖑᔪᓂ ᐊᓯᐅᔨᔭᐅᔪᓂ ᑕᕆᐅᕐᒥ

For English version, see Sealift company retrieves containers lost in 2023 Iqaluit accident

ᑲᑎᙵᓂᐅᔪᓂ ᐊᖅᑲᐅᒪᔨᐅᔪᓂ, ᓄᓇᓕᖕᓂ ᓴᓇᔨᓂᑦ ᐊᒻᒪ ᐳᒃᑕᓛᖅᑐᒥ ᐊᒧᓕᐅᒻᒥ ᑎᑭᑎᑕᐅᓯᒪᕗᑦ NEAS ᐅᓯᑲᑦᑕᖅᑏᑦ ᑲᑎᙵᓂᐅᔪᓂ ᑎᒥᖁᑕᐅᔪᓂᑦ ᐅᑎᖅᑎᕆᓂᕐᒥ 7−ᖑᔪᓂ ᐅᒥᐊᕐᒧᐊᖅᑰᖅᑎᑕᐅᕙᒃᑐᓂ ᐴᕐᔪᐊᖑᔪᓂ ᑭᕕᓚᐅᖅᑐᓂ ᐃᒃᐱᐊᕐᔫᑉ ᐃᖅᑲᖓᓄᑦ ᐃᖃᓗᐃᑦ ᖃᓂᒋᔭᖓᓂ ᐊᕐᕌᓂᐅᓚᐅᖅᑐᒥ.

“ᐱᔾᔪᑎᖓ ᐆᒥᖓ ᓲᖃᐃᒻᒪ ᐃᒃᐱᐊᕐᔪᖓ ᐊᑦᑕᓇᔾᔭᐃᖅᓯᓯᒪᓂᕐᒧᑦ,” ᐅᖃᓚᐅᖅᐳᖅ ᑖᓂᐅᓪ ᑕᒋᓇᐃ, ᐊᖓᔪᖅᑳᖅ ᐊᒻᒪ ᐊᐅᓚᑦᑎᔨᒻᒪᕆᒃ ᐅᒥᐊᕐᔪᐊᒃᑰᖅᑎᑦᑎᓂᕐᒥ ᑲᒻᐸᓂᐅᔪᒥ, ᐊᐱᖅᓱᖅᑕᐅᓂᐅᔪᒥ ᓯᑎᐱᕆ 19−ᒥ ᐅᓗᕆᐊᓇᕈᑕᐅᔪᒥ ᐊᓯᐅᔨᔭᐅᔪᓂ ᐅᒥᐊᕐᔪᐊᒃᑰᖅᑕᐅᕙᒃᑐᓂ ᐴᕐᔪᐊᖑᔪᓂ ᓴᖅᑭᑎᑦᑎᓂᖓᓂ ᐅᒥᐊᕐᔪᐊᓄᑦ ᐊᒻᒪ ᐊᕙᑎᖓᓄᑦ.

7−ᖑᔪᑦ ᐴᕐᔪᐊᖑᔪᑦ ᐃᓚᒋᔭᐅᓚᐅᖅᐳᑦ 23−ᖑᔪᓂ ᑲᑕᓚᐅᖅᑐᓂ ᕗᕉᐱᓴ ᐃᒃᐱᐊᕐᔪᖓᓄᑦ ᐅᓐᓄᖓᓂ ᐅᒃᑐᐱᕆ 27, 2023−ᖑᑎᓪᓗᒍ.

NEAS ᐅᓯᑲᑦᑕᖅᑎᓄᑦ ᓴᓇᔨᐅᔪᒥ ᐃᓅᓕᓴᖅᑕᐅᓚᐅᖅᐳᖅ ᐋᓐᓂᕐᓂᐅᔪᓄᑦ ᒪᓕᒃᑐᒥ ᖃᓄᐃᓐᓂᐅᔪᒥ, ᓱᓕ ᖃᐅᔨᓴᖅᑕᐅᔪᒥ ᐅᓯᑲᑦᑕᖅᑎᒃᑯᓐᓂ ᐊᑦᑕᓇᔾᔭᐃᖅᓯᓯᒪᓂᕐᒧᑦ ᑲᑎᒪᔨᐅᔪᓂ ᑲᓇᑕᒥ.

ᐊᒥᓱᑦ ᐴᕐᔪᐊᖑᔪᑦ ᐳᒃᑕᓛᓚᐅᖅᐳᑦ ᐊᒡᒐᐅᒻᒥ ᓂᐊᖁᙴᒥ, ᐃᓚᖏᓐᓂ ᓄᓇᖃᖅᑎᐅᔪᓂ ᐱᓱᒃᖢᑎᒃ ᑎᓂᙵᑎᓪᓗᒍ ᐊᒻᒪ ᐃᓯᓚᐅᖅᐳᑦ ᐅᒥᐊᕐᔪᐊᒃᑰᖅᑕᐅᕙᒃᑐᓂ ᐴᕐᔪᐊᖑᔪᓄᑦ.

NEAS ᐅᓯᑲᑦᑕᖅᑏᑦ ᑲᑎᙵᓂᐅᔪᓂ ᑎᒥᖁᑕᐅᔪᑦ ᐊᐅᓚᑦᑎᔨᒻᒪᕆᖓ ᑖᓂᐅᓪ ᑕᒋᓇᐃ ᐅᖃᖅᐳᖅ ᓂᕆᐅᖕᓂᖓᓂ ᑕᒪᒃᑭᓂ 7−ᖑᔪᓂ ᑭᕕᓯᒪᔪᓂ ᐅᒥᐊᕐᔪᐊᒃᑯᑦ ᐴᕐᔪᐊᖏᓐᓂ ᐊᓯᐅᔨᔭᐅᔪᓂ ᐅᒃᑐᐱᕆ 2023−ᒥ ᖃᓄᐃᓐᓂᐅᔪᒥ ᐅᑎᖅᑎᑕᐅᓂᖏᓐᓂ ᑕᒪᑐᒪᓂ ᐱᓇᓱᐊᕈᓯᐅᔪᒥ. (ᔨᐊᕝ ᐱᓚᑦᑎᐊᐃ ᐊᔾᔨᓕᐅᖅᑕᖓ)

ᑕᒋᓇᐃ ᐅᖃᓚᐅᖅᐳᖅ ᐅᒥᐊᕐᔪᐊᒃᑰᖅᑕᐅᕙᒃᑐᓂ ᐴᕐᔪᐊᖑᔪᑦ “ᐃᒪᐃᒐᔪᒃᐳᑦ” ᑭᓯᐊᓂ “ᐃᓱᐊᓄᓕᒫᖅ” ᐃᒻᒥᖅᑕᖅᑑᙱᓚᑦ. ᒪᑐᓯᒪᒐᓗᐊᖅᑎᓪᓗᒋᑦ ᕿᓪᓚᔪᑭᐊᕐᒧᑦ ᓯᒥᖃᕐᓂᐅᔪᒥ, ᐃᒻᒥᕈᓐᓇᖅᐳᑦ ᐊᒻᒪ ᑭᕕᓗᑎᒃ .

ᐱᓕᕆᓂᐅᔪᒥ ᓇᓂᓯᓂᕐᒥ ᐊᓯᐅᔨᔭᐅᔪᓂ ᐴᕐᔪᐊᖑᔪᓂ ᐱᒋᐊᓚᐅᖅᐳᖅ ᐊᐅᔭᒃᑯᑦ ᓯᑯᐃᖅᑎᓪᓗᒍ. NEAS ᐅᓯᑲᑦᑕᖅᑏᑦ ᐃᖅᑲᓇᐃᔭᖅᑎᑦᑎᓚᐅᖅᐳᑦ ᐃᖃᓗᖕᓂ ᑲᒻᐸᓂᐅᔪᒥ Sedna ROV−ᒥ, ᐱᓕᕆᕙᒃᑐᓂ ᐅᖓᓯᒃᑐᒥ ᐊᐅᓚᑕᐅᔪᓂ ᐃᖏᕐᕋᔾᔪᑎᓂ, ᖃᐅᔨᓴᕐᓂᕐᒧᑦ ᐃᒪᕐᓂ ᓂᐱᒧᑦ ᐱᓕᕆᔾᔪᑎᓄᑦ ᓇᓗᓇᐃᖅᓯᓂᕐᒥ “ᐃᓂᐅᔪᓂ ᐱᔪᒥᓇᖅᑐᓂ,” ᑕᒋᓇᐃ ᐅᖃᓚᐅᖅᐳᖅ.

ᐊᓯᐅᔨᔭᐅᔪᑦ ᐴᕐᔪᐊᖑᔪᑦ ᓄᖅᑲᓚᐅᖅᐳᑦ ᐃᑎᓂᐅᔪᓂ ᕿᑎᐊᓂ 9−ᓂ ᐊᒻᒪ 45 ᒦᑕᓄᑦ, ᐅᖃᓚᐅᖅᐳᖅ.

ᐱᓕᕆᕙᓪᓕᐊᓕᓚᐅᖅᐳᑦ ᓯᑎᐱᕆ 15−ᒥ ᐊᒧᓕᐅᒻᒥ ᐊᒻᒪ ᐸᖅᓴᐃᔨᓄᑦ ᐊᖅᑲᐅᒪᔨᓂ ᑎᑭᑎᑕᐅᓚᐅᖅᑐᓂ.

ᐱᒋᐊᓚᐅᖅᐳᒍᑦ ᐅᑎᖅᑎᕆᓂᐅᔪᒥ ᐊᐅᓚᑕᐅᓂᐅᔪᒥ ᐃᓂᖓᓄᑦ ᐅᑎᖅᖢᑕ, ᓇᓂᓪᓗᑎᒍᑦ ᐴᕐᔪᐊᖑᔪᓂ, ᐃᓪᓕᕆᓪᓗᒍ ᐳᕕᒑᓗᖕᓂ ᐴᖑᔪᓄᑦ ᐴᕐᔪᐊᖑᔪᑦ ᐳᒃᑕᓛᕈᓐᓇᕐᓂᖅᓴᐅᖁᓪᓗᒋᑦ, ᐊᒻᒪ ᐅᑎᖅᑎᖦᖢᒍ ᐴᕐᔪᐊᖑᔪᑦ ᖄᖓᓄᑦ, ᐊᒻᒪ ᐊᒡᔭᖅᑕᐅᓪᓗᓂ ᑕᐃᑯᖓ [ᑐᓚᒃᑕᕐᕕᖕᒧᑦ],” ᑕᒋᓇᐃ ᐅᖃᓚᐅᖅᐳᖅ.

“ᐃᓂᒋᔭᖓ ᐴᕐᔪᐊᖑᔪᒥ ᐃᑎᔪᐊᓘᒍᓂ, ᐊᖅᑲᐅᒪᓂᕐᒧᑦ ᐊᑯᓂᐅᓂᖓ ᐅᕝᕙᓘᓐᓃᑦ ᑲᑎᓕᒫᕐᓗᒍ ᐊᖅᑲᐅᒪᓂᕐᒥ ᐊᑯᓂᐅᓂᖓᓂ ᐊᑦᑎᕐᔪᐊᖅᐳᖅ, ᑕᐃᒫᒃ ᐱᕕᒃᓴᖃᖅᐳᒍᑦ ᖃᔅᓯᐊᕐᔪᖕᓂ ᐃᑲᕐᕋᓂ ᐱᓕᕆᓪᓚᕆᖕᓂᕐᒧᑦ.”

ᐊᑕᐅᓯᕐᒥ ᐴᕐᔪᐊᖑᔪᒥ ᐲᖅᑕᐅᓚᐅᖅᐳᖅ ᓯᑎᐱᕆ 18−ᒥ ᐊᒻᒪ ᒪᕐᕉᒃᑲᓐᓂᕐᓂ ᓂᕆᐅᒋᔭᐅᓚᐅᖅᐳᑦ ᐲᖅᑕᐅᓂᖏᓐᓂ ᓯᑎᐱᕆ 19−ᒥ. ᑕᒋᓇᐃ ᐅᖃᓚᐅᖅᐳᖅ ᓂᕆᐅᒃᐳᖅ ᐊᒥᐊᒃᑯᔪᑦ ᑎᓴᒪᐃᑦ ᐱᔭᐅᓂᐊᖅᐳᑦ ᐱᓇᓱᐊᕈᓯᐅᑉ ᓄᙳᐊᓂ.

ᒪᕐᕉᖕᓂ ᒐᕙᒪᑐᖃᒃᑯᓐᓂ ᑲᑐᔾᔨᖃᑎᒌᖑᔪᓂ — ᑲᓇᑕᒥ ᐃᒪᓕᕆᓂᕐᒧᑦ ᐱᔨᑦᑎᕋᕐᓂᕐᒥ ᐊᒻᒪ ᑲᓇᑕᐅᑉ ᐃᒪᖓᓂ ᒥᐊᓂᖅᓯᔩᑦ — ᐃᓚᐅᖃᑕᐅᒋᕗᑦ, ᑕᒋᓇᐃ ᐅᖃᓚᐅᖅᐳᖅ.

“ᑲᓇᑕᐅᑉ ᐃᒪᖓᓂ ᒥᐊᓂᖅᓯᔩᑦ ᑲᑐᔾᔨᖃᑎᒌᒃᐳᑦ ᑲᒪᒋᔭᖃᖅᑐᒥ ᐱᓕᕆᔪᓂᑦ ᐊᒻᒪ ᓇᐅᑦᑎᖅᓱᐃᓐᓇᖅᐳᑦ ᑭᐅᓂᐅᔪᒥ,” ᓵᒻ ᑎ ᓗᐊᕆᓐᓱ, ᐃᒪᖓᓂ ᒥᐊᓂᖅᓯᔩᑦ ᐅᖃᖅᑎᐅᔪᒥ, ᓇᓗᓇᐃᖅᓯᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

ᒪᕐᕉᖕᓂ ᑲᓇᑕᒥ ᐸᓖᓯᐅᔪᓂ ᐱᓱᒃᐳᑦ ᑎᓂᙵᔪᒥ ᐅᒃᑐᐱᕆ 28, 2023−ᒥ, ᒪᓕᒃᑐᒥ ᐅᒥᐊᕐᔪᐊᒥ ᓯᑲᐅᖓᓂ ᖃᓄᐃᓐᓂᐅᔪᒥ ᐅᓐᓄᒋᓚᐅᖅᑕᖓᓂ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ ᔨᐊᕝ ᐱᓚᑦᑎᐊᐃᒧᑦ)

ᐃᓗᓕᖏᑦ ᐴᕐᔪᐊᖑᒧᓂ, ᒪᕐᕉᒃ ᑕᑖᖅᐳᑦ ᐱᐊᓂ ᐊᒻᒪ ᐊᓯᖏᑦ ᓄᓇᓯᐅᑎᓄᑦ ᐊᒃᓴᓗᐊᓕᖕᓂ ᐊᒻᒪ ᓂᕿᓂ ᓲᕐᓗ ᐸᑏᑎᓂ ᐊᒻᒪ ᑯᑯᖕᓂ.

ᑕᒋᓇᐃ ᐅᖃᓚᐅᖅᐳᖅ ᓂᕆᐅᒃᐳᖅ ᐱᐊ ᐊᒻᒪ ᓂᕿᓂᑦ ᐃᒋᑕᐅᓂᐊᕐᓂᖏᓐᓂ ᑭᓯᐊᓂ ᐊᒃᓴᓗᐊᑦ ᐊᑐᖅᑕᐅᒃᑲᓐᓂᑐᐃᓐᓇᕆᐊᖃᖅᐳᑦ ᑕᖅᑭᑲᓴᖕᓂ 11−ᓂ ᐃᒪᐅᑉ ᐊᑖᓃᖦᖢᑎᒃ.

“ᐃᓚᖏᑦ ᐱᖁᑎᑦ ᓇᓗᓇᙱᓚᖅ ᐃᒋᑕᐅᓂᐊᕐᓂᖏᓐᓂ ᓂᐅᕕᐊᒃᓴᐅᓂᕐᒧᑦ ᐱᔪᓐᓇᔾᔮᙱᒻᒪᑕ, ᑭᓯᐊᓂ ᐊᓯᐊᒍᑦ ᓴᐳᔾᔨᓇᓱᐊᕐᓂᐊᖅᐳᒍᑦ ᑭᓱᑐᐃᓐᓇᓂ ᓴᐳᔾᔭᐅᔪᓐᓴᖅᑐᓂ,” ᐅᖃᓚᐅᖅᐳᖅ.

ᒪᓕᒃᑐᒥ ᐊᕐᕌᓂᐅᓚᐅᖅᑐᒥ ᖃᓄᐃᓐᓂᐅᔪᒥ, ᑕᒋᓇᐃ ᐅᖃᓚᐅᖅᐳᖅ NEAS ᐅᓯᑲᑦᑕᖅᑏᑦ ᐱᐅᓯᒋᐊᖅᑎᑦᑎᓯᒪᕗᑦ ᐊᑦᑕᓇᔾᔭᐃᖅᓯᒪᓂᕐᒥ ᐱᓕᕆᔾᔪᓯᖏᓐᓂ ᐊᒻᒪ ᐱᓕᕆᔾᔪᑎᖏᓐᓄᑦ.

ᐃᑎᒪᓚᐅᖅᐳᖅ NEAS ᐅᓯᑲᑦᑕᖅᑏᑦ ᐅᓯᑲᑦᑕᕐᓂᕐᒧᑦ ᐅᒥᐊᕐᔪᐊᕐᒥ ᑭᓴᖅᓯᒪᓚᐅᖅᑐᒥ ᐃᒃᐱᐊᕐᔪᖓᓂ ᖃᓄᐃᓐᓂᐅᓂᖃᖅᑎᓪᓗᒍ, ᐊᒻᒪ ᑕᑯᓚᐅᖅᐳᖅ ᓱᒃᑲᔪᒥ ᑭᐅᓂᐅᔪᒥ ᐊᖑᓇᓱᒃᑎᓂ, ᐅᒥᐊᖅᑐᖅᑎᐅᔪᓂ ᐊᒻᒪ ᓄᓇᓕᐸᐅᔭᐅᑉ ᑐᐊᕕᕐᓇᖅᑐᒥ ᐱᔨᑦᑎᕋᕐᓂᕐᒧᑦ “ᐊᖑᒻᒥ ᐃᒫᖅᑐᒥ” ᐅᖃᐅᓯᖃᕐᓂᐅᔪᒥ ᑐᓂᔭᐅᑎᓪᓗᒍ.

“ᐅᒃᐱᕈᓱᒃᐳᒍᑦ 2024−ᒥ ᐊᕐᕌᒎᑉ ᐃᓚᖓᓐᓂ ᐊᑦᑕᓇᙱᓐᓂᖅᓴᕐᔪᐊᖑᕗᖅ 2023−ᒥ ᐃᓕᑦᑎᓯᒪᒐᑦᑕ ᐊᒻᒪ ᐱᕈᖅᐹᓪᓕᖅᖢᑕ ᑕᐃᑲᙵᑦ ᖃᓄᐃᓐᓂᐅᔪᒥ,” ᑕᒋᓇᐃ ᐅᖃᓚᐅᖅᐳᖅ.