ᐱᖏᖕᓇᖅᑐᓕᕆᔩᑦ ᓇᓂᓯᕗᑦ ᑎᑭᙱᓕᖅᑐᓂᒃ ᖃᒧᑕᐅᔭᖅᑐᓂᒃ ᐳᕕᕐᓂᑐᖅᒥᑦ

For English version, see Search team finds missing snowmobilers from Puvirnituq

ᐱᖏᖕᓇᖅᑐᓕᕆᔨᒃᑯᑦ ᐊᐃᑉᐸᕇᖕᓂᒃ ᑎᑭᙲᓐᓇᖅᑐᓂᒃ ᐳᕕᕐᓂᑐᕐᒥᙶᕐᓂᑯᓂᒃ ᕕᕝᕗᐊᕆ 4-ᒥ ᕿᓂᖅᑐᐃᑦ ᖁᕕᐊᓇᖅᑐᒃᑯᑦ ᐃᓱᓕᑦᑎᓕᓚᐅᕐᑐᑦ ᐅᓪᓗᐃ ᑎᓴᒪᑦ ᐊᓂᒍᖅᑎᓪᓗᒋᑦ ᑖᒃᑯᐊ ᓇᓂᓯᑎᓪᓗᒋᑦ ᖃᓄᐃᙱᑦᑐᓂᒃ.

ᓇᓂᔭᐅᓚᐅᕐᓯᒪᔫᒃ ᐅᓪᓛᓱᖓᖓᓂ 12:00-ᒧᐊᓚᐅᖅᑎᓐᓇᒍ, ᓇᓗᓇᐃᓚᐅᕐᑐᖅ ᓄᓇᕕᒃᒥᑦ ᐸᓖᓯᓄᑦ ᐊᖓᔪᖅᑳᖅ ᐊᐅᓚᑕᐅᔪᓄᑦ ᔮᓐ-ᕗᕌᓐᓱᐊ ᒨᕆᓐ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

18-ᓂ ᐊᕐᕌᒍᓕᒃ ᐊᕐᓇᖅ, ᕙᐃᐅᓚ ᓄᕙᓕᙵ, ᐊᒻᒪ 19-ᓂ ᐊᕐᕌᒍᓕᒃ ᕗᐃᓕ ᐅᓇᓗᒃ ᐊᐅᓪᓚᓚᐅᖅᓯᒪᖕᒪᑎᒃ ᐊᑯᓕᕕᒃᒥ ᐅᖓᓯᖕᓂᖃᖅᑐᖅ ᒫᓂ 100 ᑭᓛᒥᑕᓂ ᓈᑦᑎᖑᔭᐅᑎᓪᓗᒍ ᐅᓐᓄᒃᑯᑦ ᖃᒧᑕᐅᔭᖓᓗ ᐅᕐᓱᐃᖅᖢᓂ

“ᐊᓯᐅᓚᐅᕐᒪᑎᒃ ᐊᑯᓕᕕᒃᒥᙶᖅᖢᑎᒃ ᐊᒻᒪᓗ ᓇᓗᓕᕋᒥ ᐅᐃᔾᔮᑐᐃᓐᓇᖅᖢᑎᒃ,” ᒨᕆᓐ ᐅᖃᕐᑐᖅ. “ᐊᑯᓕᕕᒃᓕᐊᖅᖢᑎᒃ ᐊᑐᖅᑕᐅᕙᓗᐊᙱᑦᑐᒃᑰᓚᐅᕐᒪᑎᒃ, ᑕᐃᒪᓐᓇᓗ ᓇᓂᔭᒃᓴᐅᓚᐅᙱᖢᑎᒃ.”

ᒨᕆᓐ ᐅᖃᓚᐅᕐᑐᖅ ᒫᓂ 11:20 ᐅᓪᓛᒃᑯᑦ ᕕᕝᕗᐊᕆ 8-ᒥ ᑖᒃᑯᐊ ᑕᑯᓕᓚᐅᕐᑐᑦ ᐅᓇᓗᒃ ᐃᓄᑑᔪᖅ, ᑐᒥᖏᓐᓂᒃ ᐅᑎᒧᑦ ᒪᓕᒐᓱᒃᑐᖅ ᐳᕕᕐᓂᑑᖅᒧᑦ. ᐊᐃᑉᐸᕇᒃ ᐊᕕᓚᐅᕐᒪᑎᒃ ᑖᓐᓇ ᐃᑲᔪᖅᑎᒃᓴᖅᓯᐅᕆᐊᖅᑎᓪᓗᒍ.

ᑖᔅᓱᒪ ᕿᓂᖅᑐᐃᑦ ᓄᕙᓕᙵᐅᑉ ᒥᒃᓵᓄᑦ ᕿᓂᕆᐊᖅᑎᓕᓚᐅᖅᑕᖏᑦ. 11:50 ᐅᓪᓛᓱᖓᒃᑯᑦ ᐱᙱᖕᓇᖅᑐᓕᕆᔩᑦ ᓇᓂᓯᓕᓚᐅᕐᑐᑦ ᑖᔅᓱᒥᖓ ᑖᒃᑯᐊᒃ ᐊᐃᑉᐸᕇᒃ ᓄᖃᕐᕕᒋᓚᐅᕐᓯᒪᔭᖓᓂᒃ ᐅᓪᓗ ᑎᓴᒪᑦ ᓯᕗᓂᐊᓂ.

ᐳᕕᕐᓂᑑᑉ ᒪᐃᔭᖓ ᐸᐅᓗᓯ ᐊᖏᔪ ᐅᖃᓚᐅᕐᑐᖅ ᑖᒃᑯᐊᒃ ᐊᐃᑉᐸᕇᒃ ᓄᓇᓕᖕᓄᑦ ᖃᓂᓐᓂᖅᓴᐅᓚᐅᖅᑑᒃ ᐱᙱᖕᓇᖅᑐᓕᕆᔨᒃᑯᑦ ᕿᓂᕐᕕᒋᔭᖓᑦᑕ ᑐᖔᓂ.

“ᑕᒪᑦᑕᑦᑎᐊᖅ ᖁᕕᐊᓱᑦᑎᐊᓚᐅᖅᑐᒍ ᓇᓂᔭᐅᖕᒪᑎᒃ,” ᐅᖃᕐᑐᖅ ᐊᖏᔪ. “ᖃᐅᔨᓪᓗᑕ ᖃᓄᐃᙱᑦᑑᒃ ᐅᓪᓗᐃᑦ ᑎᓴᒪᑦ ᓄᓇᐃᓐᓇᕐᒦᓚᐅᖅᖢᑎᒃ ᓯᓚᒥ ᓯᓂᒃᐸᒃᖢᑎᒃ, ᓂᕆᔭᒃᓴᖃᙱᖢᑎᒡᓗ ᐊᒃᓱᐊᓗ ᖁᕕᐊᓇᓚᐅᕐᑐᖅ.”

ᐅᓇᓗᒃ ᐋᓐᓂᐊᕐᕕᓕᐊᕈᔾᔭᐅᓚᐅᕐᑐᖅ ᕿᕿᓯᒪᓂᕐᒧᑦ, ᒨᕆᓐ ᐅᖃᕐᑐᖅ. ᓄᕙᓕᙵ ᖃᐅᔨᓴᖅᑕᐅᓚᐅᕐᒥᔪᖅ ᐋᓐᓂᐊᕕᐊᓗᒃᒥᑦ.

“ᐅᓪᓗᓂ ᑎᓴᒪᓂ ᓯᓂᖃᑦᑕᓚᐅᕐᑑᒃ ᓯᓚᐃᓐᓇᕐᒥ ᐊᒻᒪᓗ ᐊᐳᑎᑐᑲᑕᒃᖢᑎᒃ,” ᒨᕆᓐ ᐅᖃᕐᑐᖅ. “ᑕᐃᒪᓐᓇ ᐸᓂᕈᔾᔨᓗᐊᓚᐅᙱᑦᑑᒃ ᐃᖕᒥᖕᓂ.”

ᑭᓯᐊᓂᓕ, ᐅᖃᒃᑲᓐᓂᖅᖢᓂ, ᑖᓐᓇ ᖃᐅᔨᓴᐅᑎ ᐃᖏᕐᕋᐃᓐᓇᓚᐅᕐᒪᑦ ᑖᒃᑯᓄᖓ. ᐊᑯᓂᒃᑲᓐᓂᖅ ᐊᓃᕐᓂᕈᑎᒃ ᐅᓗᕆᐊᓇᖅᑐᒦᓪᓚᕆᒐᔭᓚᐅᖅᑑᒃ.

“ᖃᓄ ᐊᑯᓂᐅᑎᒋᓂᖏ ᐊᓃᕐᓂᖏᑦ ᐃᓱᒫᓗᖕᓇᓗᐊᓚᐅᕐᒪᑦ ᐊᒻᒪᓗ ᐊᔪᓕᑐᐃᓐᓇᕆᐊᖃᓕᖅᖢᑎᒃ,” ᒨᕆᓐ ᐅᖃᕐᑐᖅ. “ᑕᐃᒪᓕ ᓇᓂᔭᕆᐊᖃᓪᓚᕆᓕᓚᐅᖅᑕᕗᑦ.”

“ᑕᐃᒪᑐᖅ ᑕᐃᒪᐃᑦᑐᖃᒃᑲᓐᓂᖅᑕᐃᓕᓕ,” ᐊᖏᔪ ᐅᖃᕐᑐᖅ.

ᐅᓄᕈᓘᔭᓕᕐᒪᑕ ᐱᖁᑎᒃ ᒪᑯᓂᖓ ᖁᒻᒧᒃᑎᑕᐅᓯᒪᔪᒃᑯᑦ ᐅᖄᓚᐅᑎᑦ, ᑕᒻᒪᕇᒃᑯᑎᒃ ᐊᒻᒪᓗ ᐅᖄᓚᐅᑎᕋᓛᑦ ᐊᑐᐃᓐᓇᐅᔪᑦ ᐃᓄᐃᑦ ᐊᓯᐅᔭᔾᔮᙱᒻᒪᑕ ᐊᖅᑯᑎᖏᓐᓂᒃ.

“ᑕᐃᒪᓕ ᑭᓇᑐᐃᓐᓇᖅ ᐊᐅᓪᓚᕐᓂᐊᖅᑐᖅ ᑖᒃᑯᓂᖓ ᓇᓕᐊᓐᓂ ᐱᓯᒪᔭᕆᐊᖃᐃᓐᓇᐅᔭᕆᐊᓕᒃ,” ᐅᖃᕐᑐᖅ.