ᒪᕐᕉᔪᑦ ᐊᐅᓪᓛᖅᐳᑦ ᑕᓯᐅᔭᕐᔪᐊᑉ ᓯᒡᔭᖅᐸᓯᖓᓂ ᐃᓕᓐᓂᐊᖅᑎᑦᑎᓪᓗᑎᒃ ᐃᒻᒥᓂᒃ−ᓴᐳᔾᔨᓯᒪᓂᕐᒥ ᐊᕐᓇᓄᑦ

For the English version of this story, please see Duo travels the Hudson coast teaching self defence to women.

ᐅᓇᑕᕐᓂᑐᐃᓐᓇᕐᓂ ᐊᔪᙱᓐᓂᐅᔪᒥ ᐊᖏᓂᖅᓴᐅᕗᖅ ᐃᒻᒥᓂᒃ ᓴᐳᔾᔨᔪᓐᓇᕐᓂᕐᒥ ᐹᖅᑕᐅᓂᐅᔪᒥ, ᐅᖃᐅᓯᐅᓪᓗᓂ ᓯᓐᑎ ᔨᕌᑦ ᐊᒻᒪ ᔩᓐ−ᕗᕌᓐᓱᐊ−ᐃᐊᕆᒃ ᐃᓴᐱᐅᓪ.

ᐱᔭᕆᐊᖃᕆᕗᖅ ᐃᒻᒥᓂᒃ−ᐅᒃᐱᕈᓱᖕᓂᖃᕐᓂᕐᒥ.

ᐊᐃᑉᐸᕇᒃ ᐋᖅᑭᒃᓯᓚᐅᖅᐳᑦ ᐊᓕᒥ – Autodéfense ᐱᓕᕆᓂᐅᓪᓗᓂ ᐃᓕᓐᓂᐊᖅᑎᑦᑎᓂᕐᒥ ᑖᔅᓱᒥᖓ ᐊᕐᓇᓄᒃ ᐊᒻᒪ ᓂᕕᐊᖅᓵᓄᑦ, ᐊᒻᒪ ᐃᓛᓐᓂᒃᑯᑦ ᐊᖑᑎᓄᑦ. ᑭᖑᓪᓕᖅᐹᖅ ᓄᖅᑲᕐᓂᐅᒧᒥ ᓴᓪᓗᓂᐅᓚᐅᖅᐳᖅ, ᑭᓯᐊᓂ ᑕᐃᒪᙵᓂ ᒪᐃᒥ ᐳᓚᕋᖅᓯᒪᕗᑦ ᓄᓇᕕᖕᒥ ᓄᓇᓕᐅᔪᓂ ᑕᐅᕘᓇ ᑕᓯᐅᔭᕐᒧᐊᑉ ᓯᒡᔭᖅᐸᓯᖓᓐᓂ ᑳᓐᑐᕌᒃᑕᐅᓯᒪᓪᓗᑎᒃ ᐃᓅᓕᑦᓯᕕᒃ ᐋᓐᓂᐊᕕᖓᓐᓂ.

ᐃᓴᐱᐅᓪ ᐅᖃᓚᐅᖅᐳᑦ ᒪᕐᕉᔪᑦ ᑲᒪᓚᐅᖅᐳᑦ ᓯᕗᓪᓕᕐᒥ ᐅᖃᓗᒡᕕᐅᓂᕐᒥ.

“ᑭᓯᐊᓂᑦᑕᐅᖅ, ᑕᐃᒪᐃᒃᑲᓐᓂᙱᑐᐃᓐᓇᕆᐊᖃᕆᕗᖅ, ᑕᐃᒫᒃ ᖁᕕᐊᓚᐅᖅᐳᒍᑦ ᐅᐸᖕᓂᕐᒧᑦ,” ᐅᖃᓚᐅᖅᐳᑦ.

ᐃᓴᐱᐅᓪ ᐱᓕᒻᒪᒃᓯᒪᕐᔪᐊᖅᑎᓪᓗᒍ ᖃᖦᓯᒐᓚᖕᓂ ᑎᒥᒧᑦ ᐅᓇᑕᕈᓐᓇᕐᓂᐅᔪᒥ, ᐊᑐᐃᓐᓇᖃᖅᑎᑦᑎᕗᖅ ᐃᓕᓐᓂᐊᕐᓂᐅᔪᒥ ᑭᓇᑐᐃᓐᓇᐸᓗᖕᒥ ᐃᓕᑦᑎᔪᓐᓇᖅᑕᖓᓂ ᖃᔅᓯᐊᕐᔪᖕᓂ ᐃᑲᕐᕋᓂᑦ.

“ᑭᓱᓕᒫᑦ ᐱᓕᕆᔭᑦᑎᓐᓂ ᐊᔪᕐᓇᙱᑦᑑᔭᕆᐊᖃᖅᐳᖅ ᐊᒻᒪ ᐊᑐᐃᓐᓇᐅᓗᓂ,” ᐅᖃᓚᐅᖅᐳᑦ. “ᐱᓕᕆᔾᔪᔾᔨᕙᒃᑕᕗᑦ ᐅᕙᙶᕈᓐᓇᖅᐳᑦ ᑕᓪᓕᒪᓂᒃ−ᐅᑭᐅᓕᖕᓂ ᓂᕕᐊᖅᓵᓂ 76-ᓂ-ᐅᑭᐅᓕᖕᒥ ᐊᕐᓇᒧᑦ ᐊᔭᐅᑉᐱᐊᓕᖕᒥ.”

ᔨᕌᑦ, ᐊᓯᐊᒎᖅᑐᒥ, ᐊᑐᐃᓐᓇᖃᖅᑎᑦᑎᕗᖅ ᐊᕐᓇᒥ−ᐊᕐᓇᒧᑦ ᐅᒃᐱᕈᓱᒃᑎᑦᑎᓂᐅᔪᒥ ᐊᒻᒪ ᐱᓕᒻᒪᒃᓴᓂᕐᒥ ᐃᑲᔪᕐᓂᕐᒧᑦ ᐊᑐᕐᓂᕐᒥ ᑖᒃᑯᓂᖓ ᐃᓴᐱᐅᓪ ᐃᓕᓐᓂᐊᖅᑎᑉᐸᒃᑕᖏᓐᓂ.

“ᐊᕐᓇᐃᑦ ᐃᓱᒪᒐᔪᒃᐳᑦ ᓴᙲᓐᓂᖅᓴᐅᓂᖏᓐᓂ, ᐊᔪᕐᓂᖅᓴᐅᓂᖏᓐᓂ,” ᐅᖃᓚᐅᖅᐳᑦ, ᐃᓚᒋᐊᖅᓯᓪᓗᓂ ᐊᐃᑉᐸᕇᒃ ᐱᒋᐊᖅᑎᑦᑎᓲᖑᕗᑦ ᐃᒻᒥᓂᒃ ᐅᒃᐱᕆᔭᖃᕐᓂᕐᒥ ᓴᓇᓂᐅᔪᒥ.

ᐊᓱᐊᓛᒃ, ᐊᕐᓇᐃᑦ ᖃᐅᔨᒐᒥᒃ ᐃᒻᒥᓂᒃ ᓴᐳᔾᔨᓯᒪᔪᓐᓇᕐᓂᖏᓐᓂ, “ᐃᒻᒥᓂᒃ ᐅᐱᒋᕐᔪᐊᓲᖑᕗᑦ ᑖᔅᓱᒥᖓ,” ᐅᖃᓚᐅᖅᐳᑦ ᔨᕌᑦ.

ᒪᕐᕉᒃ ᐊᔪᕆᖅᓱᐃᕙᒃᑐᑦ ᐃᒃᐱᒍᓱᒃᐳᑦ ᐅᑯᐊ ᐆᒻᒪᕆᖕᓂᐅᔪᒥ ᐃᓂᒃᓴᐅᔪᒥ ᑐᙵᓇᕐᓂᖅᑎᑦᑎᒃᑲᓐᓂᕐᓂᖓᓂ ᐊᕐᓇᓄᑦ.

“ᐃᓚᖏᓐᓂ ᐊᕐᓇᓂ ᐊᔪᕈᔪᓚᐅᖅᐳᑦ ᐃᓯᑐᐃᓐᓇᕐᓂᕐᒥ ᐃᒡᓗᕈᓯᕐᒧᑦ [ᐃᓴᐱᐅᓪ] ᑕᐃᑲᓃᑎᓪᓗᒍ,” ᐅᖃᓚᐅᖅᐳᑦ ᔨᕌᑦ. “ᑭᓯᐊᓂ ᑕᐃᑲᓃᑦᑐᓐᓇᖅᐳᖓ ᐊᒻᒪ ᑎᑭᐅᑎᓗᒋᑦ, ᐱᓕᕆᖃᑎᒋᓗᒋᑦ.”

ᐱᓕᒻᒪᒃᓴᓂᖅ ᓱᒃᑲᒧᒻᒪᕆᐅᓲᖑᕗᖅ, ᐅᖃᓚᐅᖅᐳᑦ, ᐱᔭᕇᖅᖢᓂ ᐊᑕᐅᓯᑐᐊᒥᒃ ᐅᓪᓗᒥᒃ.

ᖃᓄᐃᒋᔭᐅᓂᖓᓂ ᐳᓚᕋᕐᓂᖏᓐᓄᑦ ᓄᓇᕕᖕᒥ ᓄᓇᓕᐅᔪᓄᑦ ᐱᐅᓯᒪᕗᖅ, ᐅᖃᖅᐳᑦ.

“ᐊᑕᐅᓯᕐᒥ ᐊᕐᓇᒥᒃ, ᐱᖓᔪᒋᓪᓗᑎᒍᑦ ᓴᓪᓗᓕᐊᖅᖢᑕ ᐊᒻᒪ ᐱᖓᓱᐃᖅᓱᖅᖢᓂ ᐊᑎᓕᐅᖃᑕᐅᓯᒪᕗᖅ,” ᐅᖃᓚᐅᖅᐳᑦ ᔨᕌᑦ.

ᐃᓕᓐᓂᐊᖅᑎᑦᑎᓂᖏᓐᓂ, ᐊᐃᑉᐸᕇᒃ ᑕᐅᑐᒃᑕᑐᐊᖃᑲᐃᓐᓇᖅᐳᑦ ᓄᓇᓪᓚᕆᐅᔪᒥ ᐆᒃᑑᑎᐅᔪᓂ ᐹᖅᓯᓂᐅᔪᓂ ᐱᓕᕆᔾᔪᔾᔭᐅᕙᒃᑐᓂ ᓵᙵᑐᐃᓐᓇᕆᐊᖃᕐᓂᖏᓐᓂ ᐊᒻᒪ ᐱᓕᕆᓪᓗᑎᒃ ᐃᑲᔪᕐᓂᖏᓐᓂ ᐃᓕᑦᑎᓂᕐᒥ ᖃᓄᖅ ᑲᒪᒋᓇᔭᕐᓂᖏᓐᓂ.

ᑕᐅᑐᒃᑕᑐᐊᖃᑲᐃᓐᓇᖅᐳᑦ ᐱᕙᓪᓕᐊᑎᑦᑎᓂᕐᒥ ᖃᓄᐃᓐᓇᔭᕐᓂᖏᓐᓂ, ᐅᖃᓚᐅᖅᐳᑦ ᔨᕌᑦ, ᐅᑯᐊ ᖃᓄᐃᓐᓂᐅᔪᓂ ᐃᓄᐃᑦ ᐱᕕᖃᙱᓚᑦ ᐃᓱᒪᓂᕐᒧᑦ ᖃᓄᐃᓕᐅᕐᓂᖏᓐᓂ.

“ᖃᐅᔨᒪᕗᒍᑦ ᐊᐅᓚᔾᔭᐃᔪᑦ ᐆᒻᒪᑎᐅᑉ ᑎᓪᓕᕐᓂᖓᓂ ᐱᒋᐊᓲᖑᕗᖅ, ᐊᑕᐅᓯᑦᑕᐃᓐᓇᕐᒥ ᑕᐅᑐᒃᑕᑐᐊᖃᑲᐃᓐᓇᕐᓂᕐᒥ ᐱᓕᕆᓲᖑᕗᖅ ᐊᒻᒪ ᐊᐅᓚᑦᑎᐊᕐᓂᐅᔪᒥ ᐊᔪᙱᓐᓂᐅᔪᓂ ᐊᓂᐊᑲᐅᑎᒋᓪᓗᑎᒃ,” ᐅᖃᓚᐅᖅᐳᑦ.

ᑕᒪᒃᑭᒐᓚᑦ ᐋᓐᓂᖅᓯᕆᓂᐅᔪᓂ ᐱᓕᕆᐊᖑᕙᖕᓂᖏᓐᓂ ᐃᓂᐅᔪᒥ ᐃᓄᖕᒥ ᓱᖏᐅᑎᓯᒪᔭᖓᓐᓂ, ᑕᐅᑐᒃᑕᑐᐊᖃᑲᐃᓐᓇᖅᐳᑦ ᐃᓕᓐᓂᐊᖅᑎᑦᑎᓂᕐᒥ ᐃᒻᒥᓂᒃ−ᓴᐳᔾᔨᓯᒪᓂᕐᒥ ᐋᖅᑭᒃᓯᒪᓂᐅᔪᓂ ᓲᕐᓗ ᐊᖏᕐᕋᖏᓐᓂ ᐅᕝᕙᓘᓐᓃᑦ ᐃᖅᑲᓇᐃᔭᕆᐊᖅᐸᓪᓕᐊᑎᓪᓗᒋᑦ.

“ᐅᑯᐊ ᐊᕙᑎᐅᔪᑦ ᑭᐳᖃᖅᐳᑦ, ᓇᓚᕈᕐᕕᑦ, ᐃᒃᓯᔭᐅᑕᑦ, ᓵᖑᔪᓂ — ᐅᑯᐊ ᓴᖅᑭᑎᑦᑎᔪᓐᓇᖅᐳᑦ ᐋᓐᓂᖅᓯᕐᔪᐊᕐᓂᐅᔪᓂ,” ᐱᓗᐊᖅᑐᒥ ᐅᓇᑕᖅᑐᖃᖅᐸᑦ, ᐃᓴᐱᐅᓪ ᐅᖃᓚᐅᖅᐳᑦ.

“ᓇᓗᓇᐃᖅᓯᓂᐅᕗᖅ ᐊᑦᑕᓇᖅᑐᒦᑦᑕᐃᓕᓂᕐᒥ, ᐊᒻᒪ ᐊᖏᕐᕋᐅᔪᓐᓇᕐᓂᕐᒧᑦ ᐃᓄᖕᓄᑦ ᓇᒡᓕᒋᔭᑦᑎᓐᓄᑦ.”

ᑕᒪᒃᑭᑦ ᐃᓕᓴᐃᔨᐅᔪᑦ ᐅᓪᓗᓕᒫᖅᓯᐅᑎᓂ ᐃᖅᑲᓇᐃᔮᖃᖅᐳᑦ ᑐᕋᒪᓐᕕᐅᓪ, ᑯᐸᐃᖕᒥ, ᐃᒡᓗᒥᐅᖃᑎᖃᖅᖢᑎᒃ ᕿᑐᕐᙵᖏᓐᓂ ᐊᒻᒪ ᕿᒻᒥᖏᓐᓂ.

ᒪᓕᒃᑐᓂ ᖃᔅᓯᐊᕐᔪᖕᓂ ᑕᖅᑭᐅᔪᓂ, ᐊᐃᑉᐸᕇᑦ ᐊᐅᓪᓛᖏᓐᓇᕐᓂᐊᖅᐳᑦ ᑕᓯᐅᔭᕐᔪᐊᑉ ᓯᒡᔭᖅᐸᓯᖓᓐᓂ ᐊᒻᒪ ᐱᔭᕇᖅᓯᓗᑎᒃ ᑳᓐᑐᕌᖏᓐᓂ ᐊᐅᔭᒃᑯᑦ. ᐱᓇᓱᐊᕈᓯᐅᔪᒥ, ᐅᑎᕐᓂᐊᖅᐳᑦ ᐳᕕᖕᓂᖅᑑᒧᑦ.

“ᐊᓕᐊᓇᐃᒋᑦᑎᐊᖅᐸᕗᑦ ᐅᑭᐅᖅᑕᖅᑐᓕᐊᕐᓂᕐᒧᑦ,” ᐅᖃᓚᐅᖅᐳᑦ ᔨᕌᑦ. “ᖃᐃᖁᔭᐅᒍᑦᑕ ᐊᓯᐊᓄᑦ ᓄᓇᓕᐅᔪᒧᑦ, ᐊᓕᐊᓇᐃᒍᓱᑦᑎᐊᕋᔭᖅᐳᒍᑦ ᐅᐸᖕᓂᕐᒧᑦ.”