7−ᓂ ᓄᑖᖑᔪᓂ ᖃᑦᑎᕆᔾᔪᑎᓂ ᓄᓇᓯᐅᑎᖏᓐᓂ ᑎᑭᓐᓂᐊᖅᐳᑦ ᓄᓇᕕᖕᒧᑦ 2025−ᒥ

For English version, see Seven new fire trucks coming to Nunavik in 2025

7-ᓂ ᓄᓇᕕᖕᒥ ᓄᓇᓕᐅᔪᑦ ᓂᕆᐅᒃᐳᑦ ᐱᓂᐊᕐᓂᖏᓐᓂ ᓄᑖᓂ ᖃᑦᑎᕆᔾᔪᑎᓂ ᓄᓇᓯᐅᑎᖏᓐᓂ, ᐊᒻᒪ ᖃᔅᓯᒐᓚᐃᑦ ᖃᑦᑎᕆᕝᕕᖏᑦ ᓄᑖᙳᕆᐊᖅᑎᑕᐅᓂᐊᖅᐳᑦ ᑕᒪᑐᒪᓂ ᐊᕐᕌᒎᔪᒥ, ᑲᑎᕕᒃ ᐊᕕᒃᑐᖅᓯᒪᔪᓂ ᒐᕙᒪᖏᑦᑕ ᓴᐳᔾᔨᓯᒪᔪᓐᓇᕐᓂᕐᒥ ᐱᓕᕆᕝᕕᖓ ᐅᖃᐅᓯᒃᓴᓕᐅᓚᐅᖅᐳᑦ ᕕᕗᐊᕆ 24−ᒥ.

ᑰᔾᔪᐊᕐᒥ, ᑕᓯᐅᔭᖅ, ᐊᐅᐸᓗᒃ, ᑲᖏᖅᓱᒃ, ᑲᖏᖅᓱᔾᔪᐊᖅ, ᖁᐊᖅᑕᖅ ᐊᒻᒪ ᐊᑯᓕᕕᒃ ᐱᓂᐊᖅᐳᑦ ᓄᑖᖑᔪᓂ ᓄᓇᓯᐅᑎᓂ ᐅᒥᐊᕐᔪᐊᒃᑯᑦ ᐊᔾᔨᒌᙱᑦᑐᓂ ᖃᖓᐅᓂᖓᓂ ᑕᐃᑲᓂᓗᒃᑖᖅ 2025−ᒥ, ᑯᕋᐃᒡ ᓕᖔᑦ, ᓴᐳᔾᔨᓯᒪᔪᓐᓇᕐᓂᕐᒥ ᑐᑭᒧᐊᒃᑎᑦᑎᔨ ᑲᑎᕕᒃ ᐊᕕᒃᑐᖅᓯᒪᔪᓂ ᒐᕙᒪᖓᓄᑦ, ᐅᖃᐅᔾᔨᓚᐅᖅᐳᖅ ᑲᑎᒪᔨᐅᔪᓂ.

ᐅᖃᓚᐅᖅᐳᖅ ᓄᓇᓕᐅᔪᓂ ᐱᔾᔮᙱᑦᑐᓂ ᓄᑖᓂ ᓄᓇᓯᐅᑎᓂ, ᐱᔾᔪᑎᖃᖅᐳᖅ ᖃᑦᑎᕆᕝᕕᖏᑦ ᓯᕗᓪᓕᕐᒥ ᓄᑖᙳᕆᐊᖅᑎᑕᐅᖅᑳᕆᐊᖃᕐᓂᖏᓐᓂ.

ᓄᑖᙳᕆᐊᖅᑎᑦᑎᓂᕐᒥ ᑰᔾᔪᐊᕐᒥ ᖃᑦᑎᕆᕝᕕᖏᓐᓂᑦ ᑭᖑᕙᕆᐊᖅᓯᒪᕗᑦ ᐱᔾᔪᑎᖃᖅᑐᒥ ᐊᖏᖅᓯᒪᓂᖃᙱᓗᐊᕐᓂᖓᓂ ᓄᓇᒥ ᑎᒍᒥᐊᖅᑎᐅᔪᓂ ᑎᒥᖁᑕᐅᔪᓂ ᐊᒻᒪ ᕼᐋᒻᓚᒃᑯᓐᓂ, ᐅᖃᖅᐳᖅ ᑯᕋᐃᒡ ᓕᖔᑦ, ᓴᐳᔾᔨᓯᒪᔪᓐᓇᕐᓂᕐᒥ ᑐᑭᒧᐊᒃᑎᑦᑎᔨ ᑲᑎᕕᒃ ᐊᕕᒃᑐᖅᓯᒪᔪᓂ ᒐᕙᒪᖓᑦ. (ᓴᑐᕆᒃ ᒐᓛᓐᑦ ᐊᔾᔨᖁᑎᖓ)

“ᓄᓇᓖᑦ ᓱᓕ ᖃᑦᑎᕆᕝᕕᖏᓐᓂ ᓄᑖᙳᕆᐊᖅᑎᑕᐅᔭᕆᐊᖃᖅᐳᑦ ᐊᖏᒡᓕᒋᐊᕐᓂᖃᕆᐊᖃᖅᐳᑦ ᐊᖏᓂᖓ ᓈᒻᒪᒡᓗᓂ ᓄᑖᓄᑦ ᓄᓇᓯᐅᑎᖏᓐᓄᑦ,” ᓕᖔᑦ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᓄᑖᙳᕆᐊᖅᑎᑕᐅᓂᐅᔪᓂ ᐋᖅᑭᒃᓱᖅᑕᐅᓯᒪᕗᑦ ᐊᒻᒪ ᖄᒃᑲᓐᓂᐊᒍᑦ ᑮᓇᐅᔭᖃᖅᑎᑕᐅᓂᕐᒥ ᐱᔭᕆᐊᖃᖅᐳᑦ.

ᓄᑖᙳᕆᐊᖅᑎᑕᐅᓂᐅᔪᓂ ᐱᓕᕆᐊᖑᐊᓂᓚᐅᖅᐳᑦ ᐊᕐᕌᓂᐅᓚᐅᖅᑐᒥ ᖃᑦᑎᕆᕝᕕᖏᓐᓂ ᐳᕕᕐᓂᑐᕐᒥ, ᐃᓄᒃᔪᐊᖅ, ᐊᐅᐸᓗᒃ, ᐊᑯᓕᕕᒃ, ᑲᖏᖅᓱᒃ, ᑕᓯᐅᔭᖅ, ᖁᐊᖅᑕᖅ ᐊᒻᒪ ᑲᖏᖅᓱᔾᔪᐊᕐᒥ.

ᓕᖔᑦ ᐅᖃᓚᐅᖅᐳᖅ ᑳᓐᑐᕌᖑᔪᓂ ᑐᓂᔭᐅᓯᒪᕗᑦ ᓄᑖᙳᕆᐊᖅᑎᑦᑎᓂᕐᒥ ᓴᓪᓗᐃᑦ ᖃᑦᑎᕆᕝᕕᖓᓂ, ᐱᓕᕆᓂᖃᕐᔪᐊᕐᓗᓂ ᐱᒋᐊᕐᓗᓂ ᐅᐱᕐᙶᒥ ᐊᒻᒪ ᐱᔭᕇᖅᑕᐅᓂᖓᓂ ᓂᕆᐅᒋᔭᐅᓪᓗᓂ ᐅᑭᐊᒃᓵᒥ.

“ᖃᑦᑎᕆᕝᕕᕗᑦ ᐊᑐᒐᒃᓴᐃᑦ ᐋᖅᑭᒃᑕᐅᓯᒪᓂᖃᕆᐊᖃᖅᐳᑦ ᓈᒻᒪᒃᑐᒥ ᓇᒥᑐᐃᓐᓇᕐᒥ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᒥᑭᓛᖑᔪᒥ ᒪᕐᕉᖕᓂ ᐃᓯᕐᕕᖃᓪᓗᐊᖅᐳᑦ ᐊᑐᓂ ᖃᑦᑎᕆᕝᕕᓂ ᐊᒻᒪᓗ ᐱᓕᒻᒪᒃᓴᐃᓂᐅᔪᒥ ᐊᒻᒪ ᑎᑎᕋᕐᕕᒃᓴᒥ ᐃᓂᒃᓴᖃᖅᑐᒥ, ᑐᖅᑯᐃᕝᕕᖕᒥ ᐊᒻᒪ ᓈᒻᒪᒃᑐᒥ ᐅᖅᑰᓴᕐᓂᐅᔪᒥ.

ᑰᔾᔪᐊᑉ ᖃᑦᑎᕆᕝᕕᖓ ᐊᑕᐅᓯᐅᓪᓗᓂ ᓄᑖᙳᕆᐊᖅᑎᑕᐅᔭᕆᐊᖃᖅᑐᒥ, ᑭᓯᐊᓂ ᐱᓕᕆᐊᒃᓴᖅ ᓄᖅᑲᖓᑎᑕᐅᓯᒪᕗᖅ ᖃᔅᓯᒐᓚᖕᓄᑦ ᐊᕐᕌᒍᓄᑦ.

“ᑲᔪᓯᔪᓐᓇᕐᓂᕐᒧᑦ ᑕᐃᔅᓱᒧᖓ ᐱᓕᕆᐊᒃᓴᐅᔪᒥ, ᐊᖏᕐᓂᖃᕆᐊᖃᖅᐳᖅ ᑰᔾᔪᐊᑉ ᓄᓇᒥ ᑎᒍᒥᐊᖅᑎᐅᔪᓂ [ᑎᒥᖁᑕᐅᔪᒥ] ᐊᒻᒪ ᕼᐋᒻᓚᒃᑯᓐᓂ,” ᓕᖔᑦ ᐅᖃᓚᐅᖅᐳᖅ.

“ᐊᐃᑦᑖᖑᒐᓗᐊᖅ, ᐱᔪᓐᓇᖅᓯᒪᙱᓚᒍᑦ ᑕᐃᔅᓱᒥᖓ ᐊᖏᖃᑎᒌᖕᓂᐅᔪᒥ ᐊᑯᓂᐸᓗᖕᒥ, ᑭᖑᕙᕆᐊᖅᑎᑦᑎᔪᒥ ᐱᓕᕆᐊᒃᓴᐅᔪᒥ.”

ᑮᓇᐅᔭᖃᖅᑎᑕᐅᓂᐅᔪᒥ ᓄᑖᙳᕆᐊᖅᑎᑦᑎᓂᕐᒥ ᖃᑦᑎᕆᕝᕕᖓᓂ ᐅᕝᕙᓘᓐᓃᑦ ᓴᓇᓗᓂ ᓄᑖᖑᔪᒥ ᓇᓗᓇᐃᖅᑕᐅᓯᒪᔪᖃᖅᐳᖅ ᑭᓯᐊᓂ “ᐊᖏᒡᓕᒋᐊᖅᑕᐅᔭᕆᐊᖃᕋᔭᖅᑐᒃᓴᐅᕗᖅ ᐱᔾᔪᑎᖃᖅᑐᒥ ᑭᖑᕙᕆᐊᖅᑕᐅᓂᐅᔪᓄᑦ,” ᐃᓚᒋᐊᖅᓯᓚᐅᖅᐳᖅ.

ᓕᖔᑦ ᐅᖃᓚᐅᖅᐳᖅ ᑰᔾᔪᐊᖅ ᓯᕗᓪᓕᐅᑎᑕᐅᓇᔭᖅᐳᖅ ᕼᐋᒻᓚᒃᑯᑦ ᐊᒻᒪ ᓄᓇᒥ ᑎᒍᒥᐊᖅᑎᐅᔪᓂ ᐊᖏᖃᑎᒌᒍᓐᓇᕈᑎᒃ.