ᓴᐃᒪᓐ ᐅᖃᐅᓯᖃᖅᑐᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᓄᓇᕗᒥᑦ ᐃᓅᓱᒃᑐᓄᑦ

For English version, see Simon talks climate change and the future with Nunavut youths

ᐅᓘᖕᓂ ᒪᕐᕉᖕᓂ ᓯᕗᓂᐊᓂ ᐃᖃᓗᐃᑦ ᐅᖅᑰᓂᖅᓴᐅᑎᓪᓗᒍ, ᖃᐅᓯᕐᓇᕐᓂᖅᓴᐅᑎᓪᓗᒍ ᐊᒻᒪ ᐃᒪᕐᓲᑲᑕᖕᓂᖅᓴᐅᑎᓪᓗᒍ ᐊᐃᕆᓕ ᐱᒋᐊᓕᓵᖅᑎᓪᓗᒍ, ᒐᕙᓇ ᔭᓄᕈᓪ ᒥᐊᓕ ᓴᐃᒪᓐ ᐅᖃᐅᓯᖃᖅᑐᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᐃᓅᓱᒃᑐᓄᑦ ᐊᐃᕆᓕ 3ᒥ.

ᐃᖃᓗᐃᑦ ᐃᓕᖅᑯᓯᖃᖃᑦᑕᖅᑐᖅ ᓯᓚᖓ ᐊᐃᕆᓕ 1ᒥ ᐊᒻᒪ ᐊᐃᕆᓕ 2ᒥ ᓂᒡᓚᓱᖕᓂᖃᖅᐸᒃᖢᓂ ᒫᓂ -14 C (ᓯᐊᓯᐊᔅ), ᐅᑯᑎᒎᓇᕐᓕ ᐊᕙᑎᓕᕆᔨᒃᑯᑦ ᐊᒻᒪ ᓯᓚᐅᑉ ᐊᓯᔾᔨᖅᐹᓪᓕᐊᓂᖓ ᑲᓇᑕᒥᑦ.

ᑖᒃᑯᓇᓂᓕ ᐅᓪᓗᕐᓂ ᐱᓇᓱᐊᕈᓯᐅᓚᐅᖅᑐᒥ ᓯᓚᐅᑉ ᓂᒡᓚᓱᖕᓂᖓ ᒫᓃᑲᑕᓚᐅᖅᑐᖅ 0 C, ᐊᐳᑎᓗ ᐊᐅᒃᐸᓪᓕᐊᓪᓗᓂ ᐊᒻᒪ ᐃᒪᕐᓱᒐᓚᐅᓪᓗᓂ ᓄᓇᓕᐸᐅᔭᐃᑦ.

“ᐅᓇ ᐃᒃᐱᖕᓇᖅᑐᐊᓗᒃ,” ᓴᐃᒪᓐ ᐅᖃᖅᑐᖅ ᓄᓇᓕᐸᐅᔭᐃᑦ ᐅᖅᑰᑲᑕᖕᓂᖅᓴᐅᓂᖓᓂᒃ.

ᓴᐃᒪᓐ ᑲᑎᖃᑎᖃᓚᐅᕐᒪᑦ ᐃᑲᕐᕋᓕᒫᒥ ᖃᐅᔨᒪᔭᐅᓕᖅᑐᓂᒃ ᑐᓴᖃᑦᑕᐅᑎᑲᑕᒃᖢᑎᒃ ᓯᐊᕕᐊ ᒍᕆᓄᓪ ᓄᓇᕗᒥᑦ ᒥᕐᖑᐃᖅᓯᕕᒃᒥᑦ ᐃᖃᓗᖕᓂ ᐅᑯᓂᖓ ᓄᓇᕗᒥᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐃᓅᓱᒃᑐᓂᒃ ᑲᑎᒪᔨᓂ, ᐊᒻᒪ ᐊᐃᑉᐸᖓᓂ ᐊᕐᕌᒍᒥ ᐃᓕᓐᓂᐊᖅᑎᓂᒃ ᓄᓇᕗᒥᑦ ᓯᓚᑦᑐᖅᓴᕐᕕᒃᒥ ᐊᕙᑎᓕᕆᓂᕐᒧᑦ ᐃᓕᓐᓂᐊᖅᑐᓂᒃ ᐊᒻᒪᓗ ᐃᓚᒋᔭᐅᔪᓂᒃ ᐃᓄᒃᓱᒃ ᐃᓕᓐᓂᐊᖅᕕᐊᓗᒃᒥᑦ ᒍᕇᓐ ᑲᑐᔾᔨᖃᑎᒌᓂᒃ.

ᐅᓇ ᐱᓕᕆᐊᖑᔪᖅ ᐃᓚᒋᔭᐅᓚᕐᑐᖅ ᖃᓄᐃᓕᐅᒐᒃᓴᖏᓐᓂ ᐅᓪᓗᓂ ᑎᓴᒪᓂᒃ ᓄᓇᕗᒥᑦ ᐳᓛᖅᑎᓪᓗᒍ.

ᑭᖑᓂᐊᒍᑦ ᔭᓂᕗ ᑭᓚᐸᒃ, ᐃᓅᓱᒃᑐᓂ ᑲᑎᒪᔨᐅᖃᑕᐅᔪᖅ ᐅᖃᓚᐅᖅᑐᖅ ᐅᖃᐅᓯᖃᓚᐅᕐᓂᖏᓐᓂᒃ ᐊᓯᔾᔨᖅᐸᓪᓕᐊᔪᓂᒃ ᓄᓇᕗᑦ ᓯᓚᖓᓂᒃ ᐊᒻᒪᓗ ᖃᓄᖅ ᐱᓕᕆᐊᖃᕈᓐᓇᕐᓂᖏᓐᓂᒃ ᐊᓯᔾᔨᖅᐸᓪᓕᐊᔪᓂᒃ ᐊᒻᒪᓗ ᖃᓄᖅ ᓱᖏᐅᑎᔪᓐᓇᕐᒪᖔᑕ.

ᐅᖃᓚᐅᕐᑐᖅ ᐅᓪᓗᖅ ᐅᖅᑰᓇᕈᔪᖅᑰᔨᒐᓗᐊᖅᑎᓪᓗᒍ ᑕᐃᒪᓕ ᓈᒻᒪᙱᑦᑐᓂᒃ ᐊᒃᑐᐃᔾᔪᑎᖃᑐᐃᓐᓇᕆᐊᓕᒃ ᓄᓇᒥ, ᐅᖃᖅᖢᓂ ᐊᐳᑎ ᐊᐅᒃᓵᓕᓂᖓ ᐸᓂᕈᑎᐅᓂᕐᓴᐅᑐᐃᓐᓇᕆᐊᖃᕐᓂᖓᓂᒃ ᐊᕙᑎᒋᔭᒥ, ᐊᒻᒪᓗ ᐊᒃᑐᐃᓂᖃᓕᕐᓗᓂ ᐸᐅᕐᖓᓂ ᐊᕝᕗᕆᐊᕐᓇᐅᓛᖅᑐᒥ.

“ᑕᒪᒃᑯᓂᖓ ᐊᓯᔾᔨᖅᓂᐅᔪᓂᒃ ᑕᑯᓪᓗᓂ ᐃᓱᒪᔪᖓ ᓯᕗᓂᑦᑎᓐᓂ ᐊᒃᑐᐃᓂᐅᓂᐊᖅᑐᓂᒃ,” ᑭᓚᐸᒃ ᐅᖃᕐᑐᖅ.

ᐊᐱᕐᓱᖅᑕᐅᑎᓪᓗᒍ ᓴᐃᒪᓐ ᑕᒪᑐᒥᖓ ᑕᐃᒪᐃᓐᓂᕋᐃᓚᐅᕐᒥᔪᖅ ᐅᖃᒃᑲᓐᓂᖅᖢᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᓱᖏᐅᑎᔭᒃᓴᑐᐃᓐᓇᐅᙱᓐᓂᕋᖅᖢᓂᐅᒃ ᑭᓯᐊᓂᓕ ᐅᔾᔨᕈᓱᒍᑎᐅᓪᓗᓂ ᓯᕗᓂᑦᑎᓐᓂ ᐃᓄᐃᑦ ᐃᓅᓯᖏᓐᓂ ᐊᒃᑐᐃᓂᖃᕐᓂᐊᕐᓂᖓᓂᒃ ᓲᕐᓗ ᐸᐅᕐᖓᖅᑕᕆᐊᓇᒥᑦ.

ᐅᖃᓚᐅᕐᒥᔪᖅ ᐊᖑᓇᓱᒃᑎᐅᔪᑦ ᓯᑯᒥ ᐊᑐᒻᒪᕆᖕᓂᖏᓐᓂ ᐊᖑᓇᓱᒃᖢᑎᒃ ᑭᓯᐊᓂᓕ ᑕᒪᓐᓇ ᐊᔪᕐᓇᖅᓯᕙᓪᓕᐊᔪᖅ ᓯᓚ ᐅᖅᑰᓯᕚᓪᓕᖅᓯᒪᓂᖓᓄᑦ.

ᓴᐃᒪᓐ ᐅᖃᓚᐅᕐᑐᖅ ᒐᕙᓇ ᔭᓄᕉᓪᓗᓂ ᑲᒪᒋᔭᒃᓴᖃᕐᓂᖓᓂ ᐃᓅᓱᒃᑐᓂ ᓄᓇᕗᒻᒥᐅᓂ ᑐᓵᔭᕆᐊᖃᕐᓂᖅᒥᒃ ᐊᒻᒪᓗ ᐃᓱᒫᓘᑎᒋᔭᖏᑦ ᐱᓕᕆᔨᒻᒪᕆᖕᓄᑦ ᑐᓴᐅᒪᔭᐅᑎᑉᐸᒡᓗᓂᒋᑦ.

“ᑕᐃᒪᐃᓕᐅᖃᑦᑕᖅᑐᖓ ᐊᔾᔨᒌᙱᑦᑐᓂᒃ ᐃᓱᒫᓘᑎᒋᔭᐅᔪᓂᒃ ᐊᒻᒪᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐃᓱᒫᓘᑎᐅᖃᑕᐅᖕᒥᖕᒪᑦ,” ᐅᖃᕐᑐᖅ.

“ᐅᓇ ᖃᓄᐃᓕᐅᖅᐸᓪᓕᐊᓂᖅ. ᐅᓇ ᐊᓯᔾᓕᔨᕈᑎᐅᕙᓪᓕᐊᖏᑦᑐᖅ ᐃᒪᓐᓇᑲᐅᑎᒋ, ᑕᒪᓐᓇ ᑕᐃᒪᐃᑉᐸᓪᓕᐊᔪᖅ ᐊᒻᒪᓗ ᐅᖃᐅᓯᖃᕈᓘᔭᕆᐊᖃᖅᖢᑎᒃ ᐃᖕᒥᖕᓂ ᑐᑭᓯᖃᑦᑕᐅᑎᓯᒪᓗᑎᒃ.”

ᑭᓚᐸᒃ ᐅᖃᓚᐅᖅᑐᖅ ᓴᐃᒪᓐ ᐳᓛᕐᓂᖓ ᐃᓅᓱᒃᑐᓄᑦ ᐃᑲᔫᑎᐅᓂᐊᖅᑐᖅ ᒪᑐᒥᖓ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᖃᓄᐃᓕᐅᕈᑎᒃᓴᓄᑦ.

“ᐅᓇ ᓴᖅᑭᑎᑦᑎᔾᔪᑎᒻᒪᕆᐅᔪᖅ ᐊᒻᒪᓗ ᐃᓚᐅᔪᒪᔾᔪᑎᒋᓪᓗᑎᒍᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐅᖃᐅᓯᐅᑲᑕᒃᑎᓪᓗᒍ ᓇᓕᐊᒃᑯᓕᒫᖅ ᒐᕙᒪᓕᕆᓂᖅᑎᒍᑦ,” ᐅᖃᕐᑐᖅ.

ᓴᐃᒪᓐ ᐅᖃᓚᐅᕐᑐᖅ ᑕᒪᑐᒧᖓ ᓈᒻᒪᒐᔭᕐᓂᖓᓂᖅ ᐃᓅᓱᒃᑐᑦ ᐃᓚᐅᑎᑕᐅᓂᕐᓴᐅᕙᒡᓗᑎᒃ ᐅᑯᑎᑐᓇᖅ ᐃᖃᓗᖕᓂ ᑲᑎᖃᑎᒋᓚᐅᖅᑕᖏᑦᑎᑐᑦ ᐅᖃᐅᓯᖃᕈᒪᔪᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ.

“ᐃᒪᓐᓇ ᐅᖃᕈᓐᓇᕐᓗᑎᒃ, ‘ᓈᒻᒪᙱᓕᐅᕈᑎᑕᖃᕐᒪᑦ ᐊᒻᒪᓗ ᖃᐅᔨᓇᓱᒋᐊᖃᖅᖢᑕ ᖃᓄᖅ ᐱᓕᕆᐊᕆᔭᕆᐊᖃᕐᓂᖓᓂᒃ,” ᓴᐃᒪᓐ ᐅᖃᕐᑐᖅ. “ᑖᓐᓇ ᑐᓴᓚᐅᖅᑕᕋ ᐃᓅᓱᒃᑐᓂᒃ ᐅᓪᓗᒥ.”