ᐃᙱᖅᑎ ᐃᓕᓴᐱ ᐅᖃᐅᓯᒃᓴᓕᐅᖅᑎᑦᑎᕗᖅ ᐸᓛᓐᑎ ᖄᖑᔪᒥ

For English version, see Singer Elisapie makes waves with Blondie cover

ᐃᙱᖅᑎ-ᐃᙱᐅᓯᓕᐅᖅᑎ ᐃᓕᓴᐱ ᓈᓚᒃᑎᓪᓗᒍ ᐸᓛᓐᑎᐅᑉ ᐃᙱᐅᓯᖓᓂ Heart of Glass−ᒥ, ᐃᕐᙲᓐᓇᑲᐅᑎᒋ ᐅᑎᖅᐳᖅ ᒧᒥᕐᕕᖕᒧᑦ ᐃᕗᔾᔨᕕᖕᒧᑦ, ᐃᓄᑭᑦᑐᒥ ᓄᓇᓕᒃ ᓴᓪᓗᐃᑦ ᖃᓂᒋᔭᖓᓂ ᐱᕈᖅᓴᕝᕕᒋᓚᐅᖅᑕᖓᓂ.

“ᕿᓚᒥᐊᓗᒃ, ᑐᓴᑐᐊᕋᒃᑯ ᐃᙱᐅᓯᖅ ᐅᑎᖅᑎᑦᑎᑲᐅᑎᒋᓲᖑᕗᖅ ᒧᒥᕐᕕᖕᒧᑦ ᓇᑎᖓᓄᑦ

“ᑐᓴᕐᓈᕐᓂᖅ ᐃᓕᖕᓂ ᐅᑎᖅᑎᑦᑎᔪᓐᓇᑦᑎᐊᖅᐳᖅ ᐃᖅᑲᐅᒪᓂᐅᔪᒧᑦ. ᐃᓛᓐᓂᒃᑯᑦ ᐃᓕᖕᓂ ᐊᔪᕆᖅᓱᐃᔪᓐᓇᖅᐳᖅ ᒪᒥᓴᕆᐊᖃᓕᕌᖓᕕᑦ, ᑕᐃᑯᙵᐅᔭᕆᐊᖃᖅᑎᓪᓗᑎᑦ.”

ᓈᓚᓚᐅᖅᑎᓪᓗᒍ ᐃᙱᖅᑕᐅᔪᓂ ᑐᓂᔭᐅᔪᓂ ᐱᖃᓐᓇᕆᔭᖏᓐᓂ ᐊᒥᓱᓂ ᖃᓂᒻᒪᓐᓇᐅᔪᒥ, ᔫᓅᒥ ᓵᓚᖃᐅᓯᐊᒥᒃ−ᓵᓚᒃᓴᖅᑎᐅᔪᒥ ᐃᙱᖅᑎ ᓇᓂᓯᒃᑲᓐᓂᓚᐅᖅᐳᖅ ᐱᐅᒃᓴᑦᑎᐊᕐᓂᖓᓂ ᐹᑉ ᐃᙱᐅᓯᓂ ᒪᒃᑯᖕᓂᖓᓂ, ᐱᒋᐊᖅᑎᑦᑎᓪᓗᓂ ᐃᓕᓴᐱᒥ ᓂᐱᓕᐅᕆᓂᕐᒥ ᑕᐅᑐᙳᐊᕐᓂᐅᔪᒥ ᐃᙱᕐᓂᐅᔪᒥ Heart of Glass−ᒥ.

ᑭᓯᐊᓂ ᐱᐅᒧᒥ ᖄᖓᓂ 1979−ᒥ ᐹᑉᒥ ᑐᓴᕐᓂᕆᔭᐅᕐᔪᐊᖅᑐᒥ ᐊᔾᔨᐅᙱᓚᖅ ᓄᑖᖑᔪᒥ ᓴᓇᓯᒪᓂᑐᐃᓐᓇᐅᙱᑦᑐᒥ ᐋᖅᑭᒃᑕᐅᓯᒪᓂᖓᓂ, ᑭᓯᐊᓂ ᐅᖃᐅᓯᖏᓐᓂ — ᐃᓕᓴᐱ ᐃᙱᓲᖑᕗᖅ ᐃᓄᒃᑎᑐᓗᒃᑖᖅ.

ᐆᒻᒪᑎ ᐊᑦᑕᓇᖅᓯᒻᒪᑦ (Heart of Glass) ᐊᑕᐅᓯᐅᕗᖅ 25−ᓂ ᐃᙱᐅᓯᓂ ᓄᓇᖃᖅᑳᖅᓯᒪᔪᓄᑦ ᐃᙱᖅᑎᐅᔪᓂ ᑕᑯᒃᓴᐅᑎᑕᐅᓯᒪᔪᓂ ᑕᒪᑐᒪᓂ ᑕᖅᑭᐅᔪᒥ ᔅᐹᑎᕙᐃ ᓄᓇᖃᖅᑳᖅᓯᒪᔪᓄᑦ ᐃᙱᖅᑕᐅᔪᓂ, ᐃᓕᓴᐱ ᐋᖅᑭᒃᓱᐃᓚᐅᖅᐳᖅ ᐱᓗᐊᖅᑐᒥ ᖃᕋᓴᐅᔭᒃᑰᖅᑕᐅᓂᕐᒧᑦ ᐱᔨᑦᑎᕋᕐᓂᐅᔪᒥ.

ᑐᑭᓕᐅᕆᓂᕐᒥ ᐅᖃᐅᓯᖏᓐᓂ ᐃᓄᒃᑎᑐᑦ, ᓂᕆᐅᖕᓂᖃᖅᐳᖅ ᐃᙱᐅᓯᒥ ᐊᑐᐃᓐᓇᐅᓂᖅᓴᐅᓂᐊᕐᓂᖓᓂ ᐃᓄᑐᖃᕐᓄᑦ ᐊᖏᕐᕋᕆᓚᐅᖅᑕᖓᓄᑦ ᓄᓇᕕᖕᒥ ᑐᓴᖅᓯᒪᔪᓂ ᓯᕗᓪᓕᐅᔪᒥ ᐊᒻᒪ ᑐᑭᓯᐅᒪᙱᑐᐃᓐᓇᕆᐊᖃᖅᑕᖓᓂ.

“ᓇᒃᓴᕐᓂᕐᒥ ᐊᖏᔪᐊᓗᖕᒥ ᐃᙱᐅᓯᒥᒃ ᓲᕐᓗ ᐸᓛᓐᑎᒥ, ᐃᙱᐅᓯᖅ ᑐᓴᕐᓂᕆᔭᐅᕐᔪᐊᖅᑐᒥ ᖃᓪᓗᓈᓄᑦ, ᐊᒻᒪ ᐱᓗᒍ ᐊᒻᒪ ᓴᖑᑎᕈᓘᔭᕐᓗᒍ ᐊᒻᒪ ᐃᓄᒃᑎᑐᑦ ᐃᙱᐅᓯᓕᐊᕆᓗᒍ ᖁᕕᐊᓇᕐᔪᐊᖅᐳᖅ ᐅᑯᐊ ᐃᓄᐃᑦ ᖃᐅᔨᒪᔭᕆᐊᖃᕐᒪᑕ ᐃᓚᒋᔭᐅᕐᔪᐊᓚᐅᕐᓂᖏᓐᓂ ᐃᓅᓯᑦᑎᓐᓂ,” ᐅᖃᓚᐅᖅᐳᖅ ᑐᓴᕐᓂᕆᔭᐅᕐᔪᐊᖅᑐᓂ ᐃᙱᐅᓯᓂ 1970−ᖏᓐᓂ ᐊᒻᒪ ’80−ᖏᓐᓂ ᐃᑲᔪᓚᐅᖅᑐᒥ ᐋᖅᑭᒃᓱᐃᓂᖓᓂ ᐃᓅᓯᖓᓂ ᓄᓇᕕᖕᒥ.

“ᐊᒃᓱᕈᕐᓇᕐᔪᐊᖅᐳᖅ ᐃᓅᓪᓗᑕ ᐃᓂᖃᕋᓱᐊᕐᓂᕐᒥ ᐊᒻᒪ ᐱᓗᑕ ᓇᖕᒥᓂᖅ ᐃᓅᓯᕆᔭᑦᑎᓐᓂ ᐃᒃᐱᒋᔭᐅᑦᑎᐊᖅᑐᒥ ᒐᕙᒪᐅᔪᓂ ᐊᒻᒪ ᐃᓕᓐᓂᐊᕐᕕᐅᔪᓂ, ᑭᓯᐊᓂ ᓂᔾᔮᑎᑦᑎᓂᒃᑯᑦ, ᐸᓛᓐᑎ ᑕᐃᑲᓃᓚᐅᖅᐳᖅ ᐱᖃᓐᓇᕆᔭᐅᓂᕐᒧᑦ,” ᐅᖃᓚᐅᖅᐳᖅ.

ᐃᙱᐅᓯᖅ ᐱᓯᒪᕗᖅ ᐱᐅᒃᓴᕐᓂᐅᔪᒥ ᐅᖃᐅᓯᐅᓂᖓᓂ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᒥ — ᐃᓚᖃᖅᑐᒥ ᐸᓛᓐᑎᒥ ᐃᓚᒋᔭᐅᔪᓂ ᓇᖕᒥᓂᖅ. ᑎᑕᒃᑏᑦ ᑕᑯᒃᓴᐅᑎᑦᑎᓚᐅᖅᐳᑦ ᑲᓱᕐᕕᒃᓴᐅᔪᒥ ᐃᙱᐅᓯᒧᑦ ᑐᕕᑐᒃᑯᑦ, ᐊᒻᒪ ᐃᙱᖅᑎᓪᓚᕆᖓ ᑕᐳᕋ ᕼᐃᐊᕆ ᓇᒃᓯᐅᔾᔨᓚᐅᖅᐳᖅ ᖁᔭᓐᓇᒦᖅᑐᒥ ᑎᑎᕋᖅᓯᒪᓂᐅᔪᒥ ᐃᓕᓴᐱᒧᑦ ᐅᖃᖅᖢᓂ ᐱᐅᒋᑦᑎᐊᓚᐅᕐᓂᖓᓂ “ᐱᐅᕐᔪᐊᖅᑐᒥ” ᖄᖓᓂ, ᐃᓕᓴᐱ ᐅᖃᓚᐅᖅᐳᖅ.

“ᖃᐅᔨᒪᓪᓗᖓ ᓇᒃᓴᓚᐅᕐᓂᓐᓂ ᒥᑎᑦᑐᒥ ᖁᕕᐊᓱᖕᓂᐅᔪᒥ ᐊᒻᒪ ᖁᖓᓐᓂᐅᔪᓂ ᐊᒻᒪ ᑕᕐᓂᕐᒥ ᒥᔾᔮᑎᑦᑎᓂᒃᑯᑦ ᐊᓕᐊᓇᐃᕐᔪᐊᖅᐳᖅ, ᑲᒪᓇᖅᑑᕗᖅ,” ᐃᓕᓴᐱ ᐅᖃᓚᐅᖅᐳᖅ.

ᐆᒻᒪᑎ ᐊᑦᑕᓇᖅᓯᒻᒪᑦ ᐊᑕᐅᓯᐅᓪᓗᓂ ᐱᖓᓱᓂ ᐃᙱᐅᓯᐅᔪᓂ ᐃᓕᓴᐱᒧᑦ ᔅᐹᑎᕙᐃ ᓄᓇᖃᖅᑳᖅᓯᒪᔪᓄᑦ ᐃᙱᖅᑕᐅᔪᓂ ᑕᒪᑐᒪᓂ ᑕᖅᑭᐅᔪᒥ, ᓇᑭᙶᕈᓘᔭᖅᑐᓂ ᑲᑎᙵᓂᐅᔪᓂ ᐃᙱᐅᓯᓂ ᓄᓇᖃᖅᑳᖅᓯᒪᔪᓄᑦ ᐃᙱᖅᑎᐅᔪᓂ ᐅᑭᐅᖅᑕᖅᑐᒥ ᐅᐊᖕᓇᖓᓂ ᐃᓚᖃᖅᑐᒥ ᓄᓇᕕᒃ, ᓄᓇᕗᑦ, ᑲᓛᖦᖠᐅᑉ ᓄᓈᓐᓂ, ᓴᐃᐱᐅᕆᐊ ᐊᒻᒪ ᒪᙴᓕᐊᒥ.

ᐃᓕᓴᐱ ᐅᖃᓚᐅᖅᐳᖅ ᓈᓚᒃᑎᐅᔪᓂ ᐃᖏᕐᕋᓂᖃᖁᕙᖏᑦ ᐅᑭᐅᖅᑕᖅᑐᒥ ᐊᒻᒪ ᐅᕘᓇ ᐱᐅᓯᖃᑎᒡᒋᖑᔪᓄᑦ ᑎᑕᒃᑎᓂᑦ, ᓇᓗᓇᐃᖅᓯᔪᒥ ᑭᓱᓕᒫᓂᒃ ᑲᑕᔾᔭᖅᑎᐅᔪᓂ ᐅᑭᐅᖅᑕᖅᑐᒥ ᓂᐱᓕᐊᖑᔪᓂ ᕼᐃᑉ ᕼᐋᑉᒥ ᑕᐃᑯᖓ “ᑲᓛᖦᖠᐅᑉ ᓄᓈᓐᓂ ᓚᓄᖅ ᑰᐃᓐᒥ,” ᕌᔅᒪᔅ ᓚᐃᐴᑦ.

“ᐅᑭᐅᖅᑕᖅᑐᒥ ᓄᓇᖃᖅᑳᖅᓯᒪᔪᓄᑦ ᐃᙱᖅᑏᑦ ᓴᖅᑭᔮᕐᔪᐊᖅᐳᑦ ᐊᕙᑎᕗᑦ ᓴᖅᑭᔮᕐᔪᐊᕐᒪᑦ,” ᐅᖃᓚᐅᖅᐳᖅ.

“ᐱᔪᒪᕐᔪᐊᓚᐅᖅᐳᖓ ᐃᒃᐱᒍᓱᖕᓂᐅᔪᒥ ᑐᐊᕕᕐᓇᕐᓂᖓᓂ, ᓯᕘᕋᓛᖕᓂᐅᔪᒥ.”

ᐃᒡᓗᓕᖕᒥ ᑎᑕᒃᑎᑦ Northern Haze, ᓴᖅᑭᑎᑦᑎᓚᐅᖅᑐᒥ ᓯᕗᓪᓕᖅᐹᑦᑎᐊᖓᓂ ᐃᓄᒃᑎᑐᑦ-ᐅᖃᐅᓯᕐᒥ ᕌᒃᒥ ᓂᐱᓕᐅᕆᓯᒪᔪᒥ 1985−ᒥ, ᑕᑯᒃᓴᐅᑎᑕᐅᕗᑦ ᑎᑎᕋᖅᓯᒪᓂᐅᔪᒥ ᐊᒻᒪᓗᑦᑕᐅᖅ ᐱᓐᓇᕆᔭᐅᕐᔪᐊᖅᑐᓂ ᓄᓇᕕᖕᒥ ᑎᑕᒃᑎᓂ ᓴᓪᓚᒃ, ᐃᓕᔭᐅᓯᒪᓪᓗᓂ ᐃᓕᓴᐱᐅᑉ ᐊᒃᑲᖓᑕ, ᔪᐊᔾ ᑲᑲᔪᖕᒧᑦ.

ᖁᕕᐊᒋᔭᐅᕐᔪᐊᖅᑐᒥ ᐃᓄᒃ ᐃᙱᖅᑎᐅᔪᖅ ᓲᓴᓐ ᐊᒡᓘᒃᑲᖅ ᑕᑯᒃᓴᐅᓂᐊᖅᐳᖅ, ᐃᓚᖃᖅᑐᒥ ᒪᒃᑯᖕᓂᖅᓴᐅᔪᓂ ᐃᙱᖅᑎᓂ ᓲᕐᓗ ᐲᑐᕆᔅ ᑎᐊ ᐊᒻᒪᓗᑦᑕᐅᖅ ᑲᓕ ᕗᕋᐃᓲᓚᐅᖅᑐᒥ.

ᐱᒻᒪᕆᐅᕗᖅ ᑕᑯᒃᓴᐅᑎᑦᑎᓂᕐᒥ ᐱᓕᕆᓂᐅᔪᒥ ᐅᑭᐅᖅᑕᖅᑐᒥ ᓄᓇᖃᖅᑳᖅᓯᒪᔪᓄᑦ ᐃᙱᖅᑎᓂ ᑲᑎᑎᕆᔪᓐᓇᕐᓂᖏᓐᓂ ᒪᕐᕉᔪᓄ ᓄᓇᕐᔪᐊᖑᔪᓂ ᐱᖅᑯᓯᑐᖃᖅᑎᒍᑦ ᓂᔾᔮᑎᑦᑎᓂᐅᔪᒥ ᐊᒻᒪ ᓵᓐᓇᐅᔪᒥ ᓂᔾᔮᑎᑦᑎᓂᐅᔪᒥ, ᐃᓕᓴᐱ ᐅᖃᓚᐅᖅᐳᖅ.

“ᖃᖓᐅᓂᖓᓂᐅᕗᖅ ᑕᑯᓯᒪᔭᑦᑎᓐᓂ ᐃᓱᒪᑐᓪᓗᑕ ᐃᓅᓪᓗᑕ ᐊᒻᒪ ᑕᐅᑦᑐᑐᐊᖑᙱᑦᑐᒥ ᐅᑭᐅᖅᑕᖅᑐᒥ, ᓲᕐᓗ ᖃᐅᓪᓗᕐᓂᖓᓂ, ᓂᒡᓚᓱᕐᔪᐊᕐᓂᖓᓂ ᐊᒻᒪ ᓯᕿᓂᖅ ᓂᐱᓕᖅᑐᖅ, ᐊᒻᒪ ᑕᐃᒃᑯᐊᑐᐊᐸᓗᐃᑦ, [ᑭᓯᐊᓂ] ᑖᓐᓇᐅᙱᓚᖅ,” ᐅᖃᓚᐅᖅᐳᖅ.

“ᐊᔾᔨᒌᙱᕈᓘᔭᖅᐳᖅ, ᐆᒪᕐᔪᐊᖅᐳᖅ, ᐊᓕᐊᓇᐃᑦᑐᒻᒪᕆᐊᓗᒃ, ᐃᓄᓪᓚᕆᐅᕗᑦ. ᐄ, ᐊᒃᓱᕈᕐᓇᖅᑐᐊᓗᑦ…ᑭᓯᐊᓂ ᑕᑖᑦᑎᐊᖅᐳᖅ ᐃᓅᓯᕐᒥ ᐊᒻᒪ ᑕᑖᖅᐳᖅ ᑲᒪᓇᖅᑐᓂ.”