ᓄᓇᒃᑯᑦ ᓯᐊᕐᕆᔭᐅᑎᑯᑖᖕᒥ ᑲᑎᙵᓂᐅᔪᑦ ᕿᓂᖅᐳᑦ ᐊᖏᕐᕋᕇᓐᓇᕐᓂᐊᖅᑕᖓᓐᓂ

For English version, see Iqaluit cross-country ski club looking for new home

ᐃᖃᓗᖕᓂ ᓄᓇᒃᑯᑦ ᓯᐊᕐᕆᔭᐅᑎᑯᑖᖕᒥ ᑲᑎᙵᓂᐅᔪᑦ ᐃᓂᒌᓐᓇᕐᓂᐊᖅᑕᖓᓂ ᐊᖏᕐᕋᒃᓴᖓᓂ ᑐᙵᕕᑖᕈᒪᕗᑦ ᓄᓇᓕᐅᔪᒥ, ᑭᓯᐊᓂ ᐊᐱᖅᑯᑕᐅᔪᑦ ᓱᓕ ᐱᑕᖃᐃᓐᓇᖅᐳᑦ ᓇᒦᓐᓂᐊᕐᓂᖓᓂ ᐊᒻᒪ ᖃᓄᖅ ᓄᓇᓕᐸᐅᔭᖅ ᐱᓕᕆᓂᐊᕐᓂᖓᓂ ᓄᓇᒥᒃ ᓄᒃᑎᖅᑕᐅᓂᖓᓄᑦ.

ᒫᒃ−ᐋᓐᑐᐊᓐ ᒍᐊᐃ, ᑲᑎᒪᔨᐅᖃᑕᐅᔪᖅ ᐊᓃᕋᔭᒃ ᓯᐊᕐᕆᔭᐅᑎᑯᑖᖕᒥ ᐊᒻᒪ ᖃᓄᐃᓕᐅᕐᓂᐅᔪᒥ ᑲᑎᙵᓂᐅᔪᒥ, ᐅᖃᓪᓚᖃᑎᖃᓚᐅᖅᐳᖅ ᑲᑎᒪᔨᐅᔪᓄᑦ ᐸᕐᓇᐃᓂᕐᒥ ᐊᒻᒪ ᐱᕙᓪᓕᐊᑎᑦᑎᓂᕐᒥ ᑲᑎᒪᔨᕋᓛᖑᔪᓂ ᑲᑎᒪᓂᐅᔪᒥ ᔫᓂ 18−ᒥ ᑲᑐᔾᔨᖃᑎᒌᖑᔪᓂ ᐱᔭᕆᐊᖃᕐᓂᖏᓐᓂ.

ᒫᓐᓇᐅᔪᒥ, ᑲᑎᙵᓂᐅᔪᖅ ᐃᓂᖃᖅᐳᖅ ᐃᒡᓗᖃᕐᕕᐅᔫᑉ ᐊᕙᑖᓂ ᓄᓇᐅᔪᒥ ᖁᑦᑎᖕᓂᖅᓴᒥ ᐃᒡᓕᕋᑯᑖᖕᒥ ᐅᕘᓇ ᓄᓇᒥ-ᐊᑐᕐᓂᕐᒥ ᐱᔪᓐᓇᐅᒻᒥ ᐱᔭᕆᐊᖃᖅᑎᑕᐅᔪᒥ ᓄᑖᙳᕆᐊᖅᑎᑕᐅᒐᔪᒋᐊᖃᖅᑐᒥ. ᑲᑎᙵᓂᐅᔪᖅ ᕿᓂᖅᐳᑦ ᑕᖅᑭᓂ−18-ᓂ ᐱᔪᓐᓇᐅᒻᒥᑦ ᑲᔪᓰᓐᓇᕐᓂᖏᓐᓂ ᑕᐃᑯᖓ ᑲᑎᙵᓂᐅᔪᖅ 2025−ᒧᑦ.

“ᐊᓃᕋᔭᒃ ᑲᑎᙵᓂᐅᔪᖅ — ᑮᓇᐅᔾᔭᒃᓴᕋᓱᐊᙱᑦᑐᖅ ᑲᑐᔾᔨᖃᑎᒌᖑᔪᖅ — ᐱᕙᓪᓕᐊᑎᑦᑎᓯᒪᕗᖅ ᐊᒻᒪ ᐋᖅᑭᐅᒪᑎᑦᑎᓪᓗᓂ ᐱᐅᔪᒥ ᐱᙳᐊᕐᓂᐅᔪᒥ ᐃᒡᓗᖁᑎᖓᓐᓂ ᖄᖏᖅᓯᒪᔪᓂ ᐊᕐᕌᒍᓄᑦ 7−ᓄᑦ ᑭᓯᐊᓂ ᐱᖃᙱᓐᓇᑦᑕ, ᒫᓐᓇᐅᔪᒥ, ᐃᓂᒌᓐᓇᕐᓂᐊᖅᑕᖓᓂ ᐃᒡᓗᖁᑎᑦᑎᓐᓄᑦ,” ᒍᐊᐃ ᐅᖃᓚᐅᖅᐳᖅ.

ᑲᑎᙵᓂᐅᔪᖅ ᐊᒻᒪ ᓄᓇᓕᐸᐅᔭᒥ ᐃᖅᑲᓇᐃᔭᖅᑏᑦ ᑎᑎᕋᖅᑕᐅᒋᐊᙵᕈᓕᐅᓚᐅᖅᐳᑦ ᐱᓇᓱᐊᖃᑎᒌᖕᓂᕐᒧᑦ ᑐᑭᓯᐅᒪᖃᑦᑕᐅᑎᓂᕐᒥ ᐊᖏᕈᒻᒥ ᐅᑕᖅᑭᔪᒥ ᐊᖏᖅᑕᐅᓂᐅᔪᒥ ᓄᓇᓕᐸᐅᔭᒥ ᑲᑎᒪᔨᖏᓐᓂ.

ᐋᖅᑭᒃᑕᐅᓯᒪᔪᑦ ᑎᑎᕋᖅᓯᒪᓂᖏᑎᒍᑦ ᐃᓚᖃᖅᐳᖅ ᑲᑎᙵᓂᐅᔪᖅ ᐊᐅᓚᑦᑏᓐᓇᕐᓂᖏᓐᓂ ᑮᓇᐅᔾᔭᒃᓴᕋᓱᐊᙱᑦᑐᒥ; ᓄᓇᓕᐸᐅᔭᖅ ᓄᑖᙳᕆᐊᖅᑎᑦᑎᓂᖓᓂ ᒫᓐᓇᐅᔪᒥ ᓄᓇᒥ−ᐊᑐᕐᓂᕐᒧᑦ ᐱᔪᓐᓇᐅᒻᒥ ᐊᑭᖃᙱᑦᑐᒥ; ᐊᒻᒪᓗ ᓄᓇᓕᐸᐅᔭᖅ ᐃᑲᔪᖅᓱᐃᓂᖏᓐᓂ ᑲᑎᙵᓂᐅᔪᓂ ᓇᓂᓯᓂᖏᓐᓂ ᓈᒻᒪᒃᑐᒥ ᐃᓂᒌᓐᓇᕐᓂᐊᖅᑕᖓᓂ.

“ᑕᑯᕗᒍᑦ ᐱᓇᓱᐊᖃᑎᒌᖕᓂᕐᒧᑦ ᑐᑭᓯᐅᒪᖃᑦᑕᐅᑎᓂᕐᒥ ᐊᖏᕈᒻᒥ ᐱᒋᐊᕐᓂᖓᓂ ᐱᓕᕆᖃᑎᒌᖕᓂᐅᔪᒥ ᐅᑯᓇᓂ ᓄᓇᓕᐸᐅᔭᕐᒥ ᐊᒻᒪᓗ ᑲᑎᙵᓂᐅᔪᒥ ᐱᕙᓪᓕᐊᑎᑦᑎᓂᕐᒥ ᐱᙳᐊᕐᓂᕐᒧᑦ ᓯᓚᒥ ᖃᓄᐃᓕᐅᕈᑎᒃᓴᓂ ᐃᖃᓗᖕᒥᐅᑕᓕᒫᓄᑦ,” ᒍᐊᐃ ᐅᖃᓚᐅᖅᐳᖅ.

“ᑕᐃᑲᓃᖏᓐᓇᕈᒪᓇᔭᖅᐳᒍᑦ ᒫᓐᓇᐅᔪᒥ ᐃᓂᐅᔪᒥ, ᐃᓱᒪᒋᔭᐅᒍᓂ ᓈᒻᒪᖕᓂᖓᓂ ᓄᓇᓕᐸᐅᔭᕐᒥ ᑲᑎᒪᔨᐅᔪᓄᑦ.”

ᒍᐊᐃ ᐃᓚᒋᐊᖅᓯᓚᐅᖅᐳᖅ ᑲᑎᙵᓂᐅᔪᖅ ᐱᔪᒪᓇᔭᕆᕗᑦ ᐃᒥᖅᑕᖅᑕᐅᓂᕐᒥ ᐱᔨᑦᑎᕋᕐᓂᐅᔪᒥ, ᐱᔪᒥᓇᖅᑐᒥ ᐊᑑᑎᖃᑦᑎᐊᖅᑐᒥ ᒫᓐᓇᐅᔪᒥ ᐃᓂᖓ ᑐᓂᓯᕙᙱᓐᓂᖓᓂ.

ᓄᓇᓕᐸᐅᔭᖅ ᐸᕐᓇᐃᔨ ᒫᑎᐅ ᑖᑦᔅ ᑐᓂᓯᓚᐅᖅᐳᖅ ᑐᒃᓯᕋᕐᓂᐅᔪᒥ ᐃᓱᒪᓕᐊᖑᓂᐅᔪᒥ ᑐᓂᓯᓂᕐᒥ ᐊᓪᓚᕝᕕᓕᕆᔨᐅᔪᓂ ᐱᓇᓱᐊᖃᑎᒌᖕᓂᕐᒧᑦ ᑐᑭᓯᐅᒪᖃᑦᑕᐅᑎᓂᕐᒥ ᐊᖏᕈᒻᒥ ᑲᑎᒪᔨᓄᑦ.

ᖃᔅᓯᒐᓚᖕᓂ ᑲᑎᒪᔨᐅᔪᓂ ᐅᖃᓪᓚᓚᐅᖅᐳᑦ ᐱᓕᕆᓂᑦᑎᐊᕙᐅᔪᓂ ᓯᐊᕐᕆᔭᐅᑎᑯᑖᖕᒥ ᑲᑎᙵᓂᐅᔪᑦ ᐱᓕᕆᓯᒪᓂᖏᓐᓂ, ᐱᓗᐊᖅᑐᒥ ᒪᒃᑯᒃᑐᓄᑦ. ᑭᓯᐊᓂ, ᐃᓚᖏᑦ ᓴᖅᑭᑎᑦᑎᓚᐅᖅᐳᑦ ᐃᓱᒫᓘᑕᐅᔪᓂ.

ᐱᓗᐊᖅᑐᒥ, ᑲᑎᒪᔨᐅᔪᑦ ᕼᐃᐊᕆ ᕙᓛᕈᑎ ᐊᒻᒪ ᐋᒻᐳᕐ ᐊᒡᓘᒃᑲᖅ ᐅᖃᓪᓚᓚᐅᖅᐳᑦ ᐱᓕᕆᖃᑎᖃᕐᓂᐅᔪᓂ ᐅᑯᓇᓂ ᓯᐊᕐᕆᔭᐅᑎᑯᑖᖅᑎᐅᔪᓂ ᐊᒻᒪ ᓄᓇᖃᖅᑎᐅᔪᓂ ᐃᓂᐅᔪᒥ ᕿᒻᒥᖃᖅᑐᓄᑦ.

“ᕿᒻᒥᓂᒃ ᐱᓱᖃᑎᖃᖅᑎᓪᓗᒋᑦ, ᐅᖃᐅᔾᔭᐅᕙᒃᐳᑦ ᑕᐃᑯᖓ ᐃᓂᐊᓄᐊᖁᔭᐅᙱᖦᖢᑎᒃ,” ᕙᓛᕈᑎ ᐅᖃᓚᐅᖅᐳᖅ.

ᐊᒡᓘᒃᑲᖅ ᐅᖃᓚᐅᖅᐳᖅ ᐅᖃᖃᑎᖃᓪᓗᐊᕐᓂᖏᓐᓂ ᓄᓇᖃᖅᑎᐅᔪᓂ ᐊᕙᓗᔭᖓᓂ ᐃᓂᐅᔪᒥ ᓇᒧᑐᐃᓐᓇᖅ ᓄᓇᓕᐸᐅᔭᖅ ᐊᒻᒪ ᓯᐊᕐᕆᔭᐅᑎᑯᑖᖕᒥ ᑲᑎᙵᓂᐅᔪᑦ ᕿᓂᕐᓂᖏᓐᓂ ᐃᓂᒃᓴᐅᔪᒥ.

ᑲᑎᒪᔨ ᕉᒪᐃᓐ ᓯᑏᕙᓐᓴᓐ ᐅᖃᓚᐅᖅᐳᖅ ᐱᓇᓱᐊᖃᑎᒌᖕᓂᕐᒧᑦ ᑐᑭᓯᐅᒪᖃᑦᑕᐅᑎᓂᕐᒥ ᐊᖏᕈᒻᒥ ᑐᓂᔭᐅᓂᖓᓂ ᓇᓗᓇᐃᖅᓯᓂᖃᑦᑎᐊᕆᐊᖃᖅᐳᖅ ᓄᓇᓕᐸᐅᔭᐅᑉ ᐱᔪᓐᓇᕐᓂᖓᓂ ᓂᕈᐊᖅᓯᓂᕐᒥ ᐅᕝᕙᓘᓐᓃᑦ ᐊᖏᖅᓯᓂᕐᒥ ᐃᓂᒃᓴᐅᔪᒥ.

ᐅᖃᐅᓯᖃᓚᐅᖅᐳᖅ ᐃᓂᒃᓴᐅᔪᓐᓇᖅᑐᓂ ᐊᖏᕐᕋᕆᔭᐅᖏᓐᓇᕐᓂᐊᖅᑐᒥ ᑐᙵᕕᐅᔪᒥ ᓯᐊᕐᕆᔭᐅᑎᑯᑖᖕᒥ ᑲᑎᙵᓂᐅᔪᒧᑦ ᓲᕐᓗ ᒥᕐᙳᐃᖅᓯᕐᕕᖕᒥ ᐊᖅᑯᒻᒥ ᓇᒧᙵᐅᓂᖃᙱᑦᑐᒥ.

“ᑐᑭᓯᓇᑦᑎᐊᕆᐊᖃᖅᐳᒍᑦ ᑲᑎᒪᔨᐅᓪᓗᑕ ᒫᓐᓇᐅᔪᒥ ᐊᖏᖃᑎᒌᒐᓚᖕᓂᑦᑎᓐᓂ ᓇᓂᓯᔾᔪᔾᔨᓂᕐᒥ ᐃᓂᐅᔪᒥ, ᐊᒻᒪ ᑐᓂᓗᒍ ᐊᑭᖃᙱᓪᓗᓂ, ᐅᕝᕙᓘᓐᓃᑦ ᓴᙱᔪᒥ ᐃᓱᒪᒃᓴᖅᓯᐅᕆᓂᐅᔪᒥ ᑕᐃᒃᑯᓄᖓ ᐊᑭᖃᙱᓐᓂᐅᔪᒥ. ᑕᒪᒃᑭᑦ ᐅᕙᓐᓄᑦ ᖃᓄᐃᙱᑦᑑᔮᖅᐳᖅ,” ᓯᑏᕙᓐᓴᓐ ᐅᖃᓚᐅᖅᐳᖅ.

“ᑕᐅᑐᙳᐊᙱᓚᖓ ᓄᓇᕐᔪᐊᖑᔪᒥ ᑐᓂᔭᐅᓂᑦᑎᓐᓂ ᐃᒡᓗᖃᕐᕕᐅᔫᑉ ᐊᕙᑖᓂ ᓄᓇᒥ, ᐃᒪᖃᕐᓗᓂ, ᑐᓂᔭᐅᓗᓂ ᐊᑭᖃᙱᓪᓗᓂ.”

ᑲᑎᒪᔨᕋᓛᑦ ᓂᕈᐊᓚᐅᖅᐳᑦ ᓇᒃᓯᐅᔾᔨᓂᕐᒥ ᐱᓇᓱᐊᖃᑎᒌᖕᓂᕐᒧᑦ ᑐᑭᓯᐅᒪᖃᑦᑕᐅᑎᓂᕐᒥ ᐊᖏᕈᒻᒥ ᑕᐃᑯᖓ ᓄᓇᓕᐸᐅᔭᕐᒥ ᐃᖅᑲᓇᐃᔭᖅᑎᓄᑦ ᐊᒻᒪ ᕿᒥᕐᕈᔭᐅᓗᓂ ᓯᕗᓂᒃᓴᒥ ᓄᓇᓕᐸᐅᔭᕐᒥ ᑲᑎᒪᔨᓄᑦ ᑲᑎᒪᓂᐅᔪᒥ.

ᐃᓚᒋᔭᐅᔪᑦ ᓂᕈᐊᓚᐅᕆᕗᑦ ᓄᖅᑲᖓᑎᑦᑎᓚᐅᑲᒡᓗᑎᒃ ᐊᖏᖅᑕᐅᓂᐅᔪᒥ ᑲᑎᙵᓂᐅᔫᑉ ᓄᓇᒥ−ᐊᑐᕐᓂᕐᒧᑦ ᐱᔪᓐᓇᐅᒻᒥ ᑭᓯᐊᓂ ᐱᓇᓱᐊᖃᑎᒌᖕᓂᕐᒧᑦ ᑐᑭᓯᐅᒪᖃᑦᑕᐅᑎᓂᕐᒥ ᐊᖏᕈᑎᖓ ᐊᖏᖅᑕᐅᒍᓂ.

ᐅᖃᓪᓚᖕᓂᐅᔪᒥ ᑲᑎᒪᓂᐅᑉ ᑭᖑᓂᐊᓂ, ᒍᐊᐃ ᐅᖃᓚᐅᖅᐳᖅ ᓯᐊᕐᕆᔭᐅᑎᑯᑖᖕᒥ ᑲᑎᙵᓂᐅᔪᑦ ᐃᓂᖓᓃᖏᓐᓇᕈᒪᕗᑦ ᑭᓯᐊᓂ ᐱᓕᕆᖃᑎᖃᕐᓂᐊᖅᐳᑦ ᓄᓇᓕᐸᐅᔭᕐᒥ ᐃᓱᒪᓕᐅᕆᓂᖏᓐᓂ ᖃᓄᐃᓐᓂᐊᕐᒪᖔᑦ ᒪᓕᒃᑐᒥ.

ᒫᓐᓇᐅᔪᒥ, ᑲᑎᙵᓂᐅᔪᖅ ᐊᐅᓚᑦᑎᕙᒃᐳᑦ ᐅᒥᐊᕐᔪᐊᕐᒥ ᐴᕐᔪᐊᖑᔪᓂ ᒫᓐᓇᐅᔪᒥ ᐃᓂᒋᔭᖓᓂ.