ᐹᑕᓖᒨᖅᑐᖅ ᖃᒧᑕᐅᔭᖅ ᓂᐱᖃᙱᖦᖢᓂ ᐃᖏᕐᕋᕙᓪᓕᐊᕗᖅ ᐃᖃᓗᖕᓄᑦ

For English version, see Electric snowmobile quietly makes its way to Iqaluit

ᑭᖕ ᑭᒡᒐᖅᑐᖅᑎᖓ ᑲᓇᑕᒥ ᒥᐊᕆ ᓴᐃᒪᓐ ᐅᖃᐅᓯᖃᖅᑎᓪᓗᒍ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᒪᒃᑯᒃᑐᓂ ᑕᓯᕐᔪᐊᒥ ᒥᕐᙳᐃᖅᓯᕐᕕᖓᓂ ᐃᖃᓗᖕᓂ ᐊᐃᑉᕆᓕ ᐱᒋᐊᕐᓂᖓᓂ, ᐅᐃᖓ ᐅᐃᑦ ᕗᕋᐃᓱᕐ ᐊᖁᓚᐅᖅᐳᖅ ᑲᑎᒪᕝᕕᐅᔪᒧᑦ ᖃᐅᓪᓗᖅᑕᒥ ᖃᒧᑕᐅᔭᕐᒧᑦ.

ᑭᓯᐊᓂ, ᐅᓇ ᖃᒧᑕᐅᔭᖅ ᐊᔾᔨᒋᓚᐅᙱᓚᖓ. ᓂᐱᑭᓐᓂᖅᓴᐅᓚᐅᖅᐳᖅ. ᐊᒻᒪ ᐹᑕᓖᒨᓚᐅᖅᐳᖅ.

“ᓱᖏᐅᓐᓇᙱᖦᖢᓂ ᐃᒃᐱᒍᓱᖕᓂᐅᕗᖅ ᐃᑭᒪᓪᓗᓂ ᑐᓵᓇᑎᑦ ᐊᐅᓚᐅᑎᖓᓂ ᐃᖏᕐᕋᓂᖓᓂ,” ᐅᖃᓚᐅᖅᐳᖅ ᑳᒧᕋᓐ ᑎ ᓛᖕ, ᓄᓇᕗᒻᒥ ᒐᕙᒪᒃᑯᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᑎᑎᕋᖅᑎᐅᑉ ᑎᑎᕋᕐᕕᖓᓂ ᑐᑭᒧᐊᒃᑎᑦᑎᔨ, ᐊᐱᖅᓱᖅᑕᐅᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

ᐹᑕᓖᒨᖅᑐᖅ ᖃᒧᑕᐅᔭᖅ ᕗᕋᐃᓱᕐ ᐊᖁᓚᐅᖅᑕᖓᓂ Taiga Nomad−ᖑᕗᖅ, ᓴᓇᔭᐅᓯᒪᔪᒥ Taiga Motors Inc., ᑲᓇᑕᒥ ᑲᒻᐸᓂᐅᔪᒥ ᓴᓇᓲᖑᔪᓂ ᐹᑕᓖᒧᖅᑐᓄᑦ ᐊᖅᑯᑎᒃᑰᙱᑦᑐᖅ ᓄᓇᓯᐅᑎᓂ, ᐃᓚᖃᖅᑐᒥ ᖃᒧᑕᐅᔭᓂᑦ.

ᖃᒧᑕᐅᔭᖅ ᐃᖃᓗᖕᓃᑉᐳᖅ ᓄᓇᕗᒻᒥ ᒐᕙᒪᒃᑯᑦ ᐊᕙᑎᓕᕆᔨᒃᑯᓐᓂ ᐱᓕᕆᕝᕕᖓᓂ ᖃᐅᔨᓴᖅᑕᐅᓂᖓᓄᑦ ᖃᓄᖅ ᐹᑕᓖᒨᖅᑐᖅ ᖃᒧᑕᐅᔭᖅ ᐱᔪᓐᓇᕋᔭᕐᓂᖓᓂ ᐅᑭᐅᖅᑕᖅᑐᒥ ᓯᓚᐅᔪᓂ.

ᖃᐅᔨᓴᖅᑕᐅᓂᖃᖅᐳᖅ ᑕᓯᕐᔪᐊᒥ ᓄᓇᕗᒻᒥ ᒥᕐᙳᐃᖅᓯᕐᕕᖓᓂ, ᐱᖅᑯᓯᑐᖃᖅᑎᒍᑦ ᖃᐅᔨᒪᔭᐅᔪᒥ ᐃᖃᓗᖕᓂ ᑰᖓᓂ, ᒥᕐᙳᐃᖅᓯᕐᕕᖕᒥ ᓄᓇᕗᒻᒥ ᐃᖅᑲᓇᐃᔭᖅᑎᖏᑦ ᐊᑐᖅᑕᖏᓐᓂ ᖃᐅᑕᒫᒥ ᐊᐅᓚᑕᐅᓂᖏᓐᓂ.

ᐹᑕᓖᒨᖅᑐᖅ ᖃᒧᑕᐅᔭᑦ ᖃᐅᔨᓴᖅᑕᐅᓯᒪᕗᑦ ᓂᒡᓚᓱᒃᑐᒥ ᓯᓚᒥ, ᑭᓯᐊᓂ ᐱᓕᕆᐊᖑᒐᔪᒃᐳᑦ ᖃᓪᓗᓈᑦ ᓄᓇᖓᓐᓂ ᐃᓂᐅᔪᓂ ᓲᕐᓗ ᐋᓐᑎᐊᕆᐅ ᐅᐊᖕᓇᖓᓂ ᐅᕝᕙᓘᓐᓃᑦ ᒫᓂᑑᐸᒥ.

“ᖃᐅᔨᓴᖅᑕᐅᕙᙱᓚᑦ ᐊᕙᑎᐅᔪᓂ ᑕᑯᕙᒃᑐᓂ ᒪᓕᖃᑦᑕᐅᑏᓐᓇᖅᑐᓂ ᐅᓪᓗᓂ -30 C, -40 C−ᖑᔪᓂ,” ᑎ ᓛᖕ ᐅᖃᓚᐅᖅᐳᖅ.

ᓄᓇᕗᒻᒥ ᒐᕙᒪᒃᑯᑦ ᐱᑕᐃᓐᓇᓚᐅᖅᐳᑦ ᐹᑕᓖᒨᖅᑐᖅ ᖃᒧᑕᐅᔭᕐᒥ ᒫᔾᔨᒥ, ᑕᐃᒫᒃ ᐆᓇᓗᐊᖅᓯᒪᖕᒪᑦ ᖃᐅᔨᓴᖅᑕᐅᓪᓚᑦᑖᕐᓂᖓᓄᑦ ᐱᒋᐊᕐᓂᖓᓂ. ᑕᐃᒪᐃᓐᓂᐊᖅᑐᒃᓴᐅᕗᖅ 2024 ᓄᙳᐊᓂ ᐃᖃᓗᐃᑦ ᐅᑭᐅᙳᒃᑲᓐᓂᕈᓂ.

ᐅᓇ ᖃᐅᔨᓴᖅᑕᐅᓂᖓ ᐱᓕᕆᐊᖑᕗᖅ ᑕᐃᒫᒃ ᐱᔪᒪᓂᖃᕈᓂ ᐹᑕᓖᒨᖅᑐᓄᑦ ᖃᒧᑕᐅᔭᕐᓂ ᐅᑭᐅᖅᑕᖅᑐᒥ ᓯᕗᓂᒃᓴᒥ, ᓄᓇᕗᒻᒥ ᒐᕙᒪᒃᑯᑦ ᖃᐅᔨᒪᓂᐊᖅᐳᖅ ᖃᓄᑎᒋ ᐱᓕᕆᑦᑎᐊᕈᓐᓇᕐᓂᖏᓐᓂ ᓂᓛᓱᖕᓂᖅᓴᐅᔪᓂ ᓯᓚᐅᔪᒥ.

ᐅᔾᔨᕐᓇᖅᑐᒥ ᐱᕚᓪᓕᕈᑕᐅᔪᒥ ᐹᑕᓖᒨᖅᑐᒥ ᖃᒧᑕᐅᔭᕐᒥ ᑮᓇᐅᔭᓕᕆᓂᕐᒧᑦ: ᖃᓂᒋᔭᖓᓂ 40 ᓖᑕᓂ ᐅᖅᓱᐊᓗᖕᒥ ᑕᑕᑎᕆᓂᕐᒥ ᖃᑦᑕᖓᓂ ᐅᖅᓱᒧᑦ−ᐊᐅᓚᑕᐅᔪᒥ ᖃᒧᑕᐅᔭᕐᒥ.

ᑎ ᓛᖕ ᖃᐅᔨᓴᓚᐅᖅᐸᖓ ᖃᒧᑕᐅᔭᕐᒥ ᐃᒻᒥᓂᒃ ᒥᕐᙳᐃᖅᓯᕐᕕᒃ ᓄᓇᕗᒻᒥ ᐃᖅᑲᓇᐃᔭᖅᑎᐅᔪᓄᑦ.

ᐅᖃᓚᐅᖅᐳᖅ ᓱᖏᐅᑎᓯᒪᓪᓗᓂ ᓂᐱᐅᔪᒥ ᐃᑯᒪᖃᕐᕕᓕᖕᒥ-ᐊᐅᓚᐅᑎᓕᖕᒥ ᖃᒧᑕᐅᔭᕐᒥ, ᐊᐱᕆᔭᕆᐊᖃᓚᐅᖅᐳᖅ ᖃᒧᑕᐅᔭᖅ ᐃᖏᕐᕋᓱᔪᓐᓇᖅᓯᖕᒪᖔᑦ ᐃᑭᑎᒻᒪᒍ ᓂᐱᑭᓗᐊᒧᑦ.

ᐃᖅᑲᓇᐃᔭᖅᑏᑦ ᓇᓗᓇᐃᖅᓯᓚᐅᖅᐳᑦ ᐹᑕᓖᒨᖅᑐᖅ ᖃᒧᑕᐅᔭᖅ ᐃᖏᕐᕋᔪᓐᓇᖅᓯᓂᖓᓂ.

“ᓱᒃᑲᔪᒻᒪᕆᐊᓗᒃ, ᐊᐅᓚᓂᖓ ᐃᕐᙲᓐᓇᑲᐅᑎᒋᐅᕗᖅ,” ᑎ ᓛᖕ ᐅᖃᓚᐅᖅᐳᖅ.

“ᐊᒃᑐᑐᐊᕈᕕᐅᒃ ᓄᑭᖅᓴᐅᑎᖓ, ᐃᖏᕐᕋᓯᑲᐅᑎᒋᓲᖑᕗᖅ.”

ᐅᓇ ᐆᒃᑑᑎᐅᔪᖅ, Taiga Nomad, ᐊᑐᓲᖑᕗᖅ 120-ᓴᙱᓂᓕᖕᒥ volt ᓄᒃᑭᒃᓴᕈᑎᓕᖕᒥ ᑲᑉᐳᑎᔭᐅᔪᓐᓇᖅᑐᒥ ᑯᑉᐳᕝᕕᑐᐃᓐᓇᐅᔪᒧᑦ

120 ᓴᙱᓂᓕᖕᒥ volts−ᓂ, ᐃᑲᕐᕋᓂ 8-ᓂ 10−ᓄᑦ ᑕᒪᒃᑭᖅᑐᒥ ᓄᒃᑭᒃᓴᕐᓂᖓᓂ ᐹᑕᓖᕈᑎᓯᒪᑎᓪᓗᒍ. ᑎ ᓛᖕ ᐅᖃᓚᐅᖅᐳᖅ ᓂᕈᐊᒐᒃᓴᖅᑕᖃᖅᐳᖅ ᐃᓕᓯᓂᕐᒥ 240-ᓴᙱᓂᓕᖕᒥ volt ᓂᕈᐊᒐᒃᓴᐅᔪᒥ.

ᑕᐃᒪᓐᓇᑎᑐᑦ ᐅᖃᓘᑎᕋᓛᒥ ᐹᑕᓖᖓ ᓄᖑᓴᕋᐃᓐᓂᖅᓴᐅᓂᖓᓂ ᓂᒡᓚᓱᒃᑐᒥ, ᑕᐃᒪᓐᓇᑦᑕᐅᖅ ᐹᑕᓖᒨᖅᑐᖅ ᖃᒧᑕᐅᔭᖅᕐᒥ ᐅᖓᓯᖕᓂᖓᓂ ᓇᑲᓲᖑᕗᖅ ᓇᑉᐸᓪᓗᐊᖓᓂ, ᑎ ᓛᖕ ᐅᖃᓚᐅᖅᐳᖅ. Nomad ᐅᖓᓯᖕᓂᕆᒐᔪᒃᑕᖓ 100 ᑭᓛᒥᑐᐸᓗᖕᓄᑦ ᒥᒃᖠᒋᐊᕋᔭᖅᐳᖅ 50 ᑭᓛᒥᑐᐸᓗᖕᓄᑦ.

ᑕᑯᔾᔮᕋᓱᒋᙱᓚᖅ ᐹᑕᓖᒨᖅᑐᖅ ᖃᒧᑕᐅᔭᕐᓂ ᐊᑐᖅᑕᐅᓵᓕᔾᔮᙱᓐᓂᖏᓐᓂ ᕿᓚᒻᒥᐅᔪᒥ ᐱᖅᑯᓯᑐᖃᕐᓄᑦ ᐊᑐᖅᑕᐅᓂᐅᕙᒃᑐᓄᑦ ᓲᕐᓗ ᓄᓇᓕᐊᕐᓂᕐᒧᑦ ᐊᖑᓇᓱᖕᓂᕐᒧᑦ.

“ᓯᓚᐃᑦᑑᙱᓚᒍᑦ ᐅᖃᕐᓂᕐᒧᑦ ᐅᓇ ᐱᔭᕆᑐᔪᖅ ᒫᓐᓇᐅᔪᒥ ᐃᓇᖏᖅᓯᓂᐊᕐᓂᖓᓂ ᐊᑯᓂᐅᔪᒥ−ᖃᐅᔨᓴᖅᑕᐅᓯᒪᔪᒥ ᐊᑐᖅᑕᐅᓂᑯᓂ ᐃᓗᐊᒍᑦ ᐃᑯᒪᖃᕐᕕᖕᒥ ᐊᐅᓚᐅᑎᓕᖕᓂ ᐅᑭᐅᖅᑕᖅᑐᒥ,” ᑎ ᓛᖕ ᐅᖃᓚᐅᖅᐳᖅ.

ᕿᓚᒻᒥᐅᔪᒥ ᓯᕗᓂᒃᓴᒥ, ᐊᔪᕐᓇᙱᑐᐃᓐᓇᕆᐊᖃᖅᐳᖅ ᑭᓇᑐᐃᓐᓇᒥᒃ ᐊᖁᓐᓂᕐᒥ ᐹᑕᓖᒨᖅᑐᒥ ᖃᒧᑕᐅᔭᕐᒥ ᐃᒡᓗᕋᓛᖏᓐᓄᑦ ᐅᖅᑰᓂᖅᓴᐅᑎᓪᓗᒍ ᓯᓚ, ᐊᒻᒪ ᓄᒃᑭᒃᓴᖅᑕᐅᓗᑎᒃ ᐃᒡᓗᕋᓛᖅ ᐆᒻᒪᖅᑯᑎᖃᕈᓂ ᓯᕿᓂᒃᑯᑦ ᐆᒻᒪᖅᑯᑎᖃᖅᑎᑦᑎᓂᐅᔪᒥ.

ᐊᑯᓂᐅᔪᒥ, ᑎ ᓛᖕ ᐅᖃᓚᐅᖅᐳᖅ ᐊᐅᓪᓛᕐᓂᖅ ᓄᓇᓕᖕᓂ ᓄᓇᓕᖕᓄᑦ ᐹᑕᓖᒨᖅᑐᒥ ᖃᒧᑕᐅᔭᒃᑯᑦ ᐊᔪᕐᓇᕋᔭᙱᑉᐳᖅ ᓈᒻᒪᒃᑐᒥ ᓄᒃᑭᒃᓴᕈᑎᒥ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐊᑐᐃᓐᓇᖃᕈᓂ ᐃᓘᕋᓛᓂ ᑕᐅᕗᙵᖅᐸᓪᓕᐊᑎᓪᓗᒋᑦ.

“ᑕᑯᕙᕋ ᐱᔪᓐᓇᕐᓂᐅᒐᔭᖅᑐᒥ, ᑭᓯᐊᓂ ᐋᒃᑲ ᕿᓚᒻᒥᐅᔪᒥ,” ᐅᖃᓚᐅᖅᐳᖅ.