ᐊᓇᐅᓕᒑᖅᑏᑦ ᐱᔪᒪᔾᔪᑎᖏᑦ ᖃᐅᒻᒪᖅᑯᑎᓂ ᓄᓇᓕᐸᐅᔭᐃᑦ ᑲᑎᒪᔨᖏᓐᓄᑦ ᐊᖏᖅᑕᐅᕗᖅ

For English version, see Softball league’s pitch for lights scores with Iqaluit city council

ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏ ᐃᑲᔪᖅᑐᐃᓚᐅᕐᑐᑦ ᐊᓇᐅᓕᒑᖅᑏᑦ ᖃᐅᒻᒪᖅᑯᑎᓂ ᐋᖅᑭᒃᓱᐃᔪᒪᑎᓪᓗᒋ ᐃᖃᓗᐃᑦ ᐊᓇᐅᓕᒑᖅᕕᖓᓂ ᐊᐅᔭᐅᔪᖅ.

ᑎᐅᕋᓐ ᐸᓂ, ᐊᖓᔪᖅᑳᒧᑦ ᑐᒡᓕᕆᔭᐅᔪᖅ ᐃᖃᓗᐃᑦ ᐊᓇᐅᓕᒑᖅᑎᖏᓐᓄᑦ, ᑖᒃᑯᐊ ᐊᓇᐅᓕᒑᖅᑏᑦ ᑐᒃᓯᕋᐅᑎᓕᐊᖓᓂ ᑐᓂᓯᓚᐅᕐᑐᖅ ᐋᖅᑭᒃᓱᐃᔪᒪᔾᔪᑎᓂ ᖁᓕᓂ ᖃᐅᒻᒪᖅᑯᑎᖃᕐᕕᐅᓂᐊᖅᑐᓂ ᓄᓇᓕᐸᐅᔭᐃᑦ ᐊᓇᐅᓕᒑᖅᕕᖓᓂ ᔪᓂ 11-ᒥ ᑲᑎᒪᑎᓪᓗᒋᑦ.

ᐊᑭᖏ ᖃᐅᒻᒪᖅᑯᑎᑦ (LED ᖃᐅᒻᒪᖅᑯᑎᑦ) ᐊᑭᓕᖅᑕᐅᓂᐊᖅᑐᑦ ᐊᓇᐅᓕᒑᖅᑏᑦ ᐃᓚᒋᔭᐅᔾᔪᑎᓄᑦ ᐊᑭᓕᐅᑎᐅᕙᒃᑐᓂ ᐊᒻᒪ ᐃᑲᔫᓯᐊᖅᑖᕆᓯᒪᔭᖏᓐᓂ, ᐸᓂ ᐅᖃᕐᑐᖅ.

ᑏᓐ ᑖᒥᓂᒃᔅ, ᐊᖓᔪᖅᑳᖅ ᐊᓇᐅᓕᒑᖅᑎᓄᑦ, ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᖃᐅᒻᒪᖅᑯᑎᓂ ᓂᐅᕕᕋᔭᕐᓂᖏᓐᓂ ᐊᑭᖃᖅᑐᓂᒃ ᒫᓂ $10,000-ᓂ $13,000-ᓄ.

ᐊᓇᐅᓕᒑᖅᑏᑦ ᐊᑭᓖᔭᕆᐊᖃᕐᓂᐊᕋᓱᒋᔪᑦ ᑲᑎᓪᓗᑎᒃ $20,000-ᓂ, ᐃᓱᒪᒋᔭᐅᒋᓪᓗᓂ ᖃᖓᑕᓲᒃᑰᕈᑎᐅᑉ ᐊᑭᒋᓇᔭᖅᑕᖓ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑐᓂᓯᓂᐊᖅᑐᑦ ᖃᐅᒻᒪᖅᑯᑎᓄᑦ ᓇᐸᕝᕕᒃᓴᐅᓂᐊᖅᑐᓂᒃ ᐊᒻᒪᓗ ᑳᓇᑐᕆᐊᓪ ᓕᒥᑎᑦ ᐋᖅᑭᒃᓱᐃᓂᐊᕈᒪᓪᓗᑎᒃ ᐊᑭᓕᖅᑕᐅᙱᓪᓗᑎᒃ ᐊᓇᐅᓕᒑᖅᑎᓄᑦ, ᐸᓂ ᐅᖃᕐᑐᖅ.

ᐊᓇᐅᓕᒑᖅᑏᑦ ᐊᓯᖏᓐᓂ ᐊᑭᓕᕆᐊᓕᖕᓂ ᐊᑭᓕᕐᓱᐃᔪᓐᓇᕐᓂᐊᖅᑐᑦ ᐊᑭᓕᕐᓯᔭᕆᐊᖃᓕᖅᐸᑕ, ᐅᖃᒃᑲᓐᓂᕐᑐᖅ.

ᐱᓕᕆᐊᖑᓕᕐᓂᐊᕋᓱᒋᔭᐅᔪᖅ ᑕᕝᕙᓂ ᑕᖅᑭᕐᒥ.

ᑎᐅᕋᓐ ᐸᓂ, ᐊᖓᔪᖅᑳᑉ ᑐᒡᓕᖓ ᐃᖃᓗᐃᑦ ᐊᓇᐅᓕᒑᖅᑐᓄᑦ, ᐃᑲᔪᖅᑐᖅᑕᐅᑦᑎᐊᓚᐅᕐᑐᖅ ᑲᑎᒪᔨᓂ ᑖᒃᑯᐊ ᐊᓇᐅᓕᒑᖅᑏᑦ ᖃᐅᒻᒪᖅᑯᑎᑖᖅᑎᑦᑎᔪᒪᑎᓪᓗᒋ ᓄᓇᓕᐸᐅᔭᐃᑦ ᐊᓇᐅᓕᒑᖅᐱᖓᓂ. (ᐊᔾᔨᓕᐅᕆᔨ ᔨᐊᕝ ᐱᐊᑦᓯᐄ)

ᐸᓂ ᐅᖃᐅᓯᖃᓚᐅᕐᒥᔪᖅ ᐱᔾᔪᑎᒋᔭᐅᔪᓂᒃ ᖃᓄᐃᒻᒪ ᐊᓇᐅᓕᒑᖅᕕᒃ ᖃᐅᒻᒪᖅᑯᑎᖃᕆᐊᖃᕐᓂᖓᓂᒃ.

ᐅᖃᓚᐅᕐᑐᖅ ᐊᓇᐅᓕᒑᖅᑏᑦ 18-ᓂ ᐃᓚᒌᒃᑑᑎᖃᕐᒪᑕ ᐊᒻᒪᓗ 440 ᐅᖓᑖᓂ ᐱᙳᐊᖅᑎᖃᖅᖢᑎᒃ, ᑖᓐᓇᓗ ᐱᙳᐊᕈᓯᖅ ᓄᓇᓕᖕᓄᑦ ᐱᐅᑎᓪᓗᒍ ᐊᓇᐅᓕᒑᖅᑎᓄᑦ ᐊᒻᒪᑦᑕᐅᖅ ᐊᒃᓱᕈᕐᓇᖅᑐᖃᖃᑦᑕᕐᒥᔪᖅ.

ᐅᓐᓄᓕᖅᑎᓪᓗᒍ ᐊᓇᐅᓕᒑᖅᑐᑦ ᓄᖅᑲᕆᐊᖃᓕᖃᑦᑕᕐᒪᑕ ᑖᕐᓯᓗᐊᓕᕌᖓᑦ, ᐅᖃᕐᑐᖅ, ᐊᒻᒪᓗ ᑕᒃᓯᑲᑕᓕᕌᖓᑦ ᖁᐊᕐᓵᕐᓇᖅᓯᕙᒃᖢᓂ ᐱᙳᐊᖅᑎᓄᑦ.

“ᖃᐅᒻᒪᖅᑯᑏᑦ ᐊᖅᑭᒃᑕᐅᒃᐸᑕ ᑖᒃᑯᐊ ᓈᒻᒪᙱᓕᐅᕈᑎᐅᔪᑦ ᐋᖅᑭᒐᔭᖅᑐᑦ,” ᐸᓂ ᐅᖃᕐᑐᖅ.

“ᐊᓇᐅᓕᒑᖅᕕᒃ ᐊᓯᖏᓐᓄᑦᑕᐅᖅ ᐱᙳᐊᖅᑎᓄᑦ ᐊᑐᖅᑕᐅᖃᑦᑕᕐᒥᖕᒪᑦ ᐊᒻᒪᓗ ᖃᐅᒻᒪᖅᑯᑎᖃᓕᕈᓂ ᐊᑐᕐᑕᐅᓂᕐᓴᐅᓇᔭᖅᖢᓂ. ᐊᒻᒪ, ᖁᙱᐊᕆᐊᕈᒪᔪᐃᑦ ᐅᓄᕐᓯᕚᓪᓕᕋᔭᖅᖢᑎᒃ ᐅᓐᓄᒃᑯᑦ ᐱᙳᐊᖅᑐᓂᒃ.”

ᐊᓇᐅᓕᒑᖅᑏᑦ ᑐᒃᓯᕋᐅᑎᖏᑦ ᐅᖃᕐᓯᒪᖕᒥᔪᑦ ᐱᓕᕆᖃᑎᖃᕆᐊᖃᕐᓂᐊᕐᓂᖏᓐᓂᒃ ᓄᓇᓕᐸᐅᔭᐃᑦ ᐃᖅᑲᓇᐃᔭᖅᑎᖏᓐᓂ ᑖᒃᑯᐊ ᖃᐅᒻᒪᖅᑯᑎᑦ ᓴᓇᔭᐅᔪᑦ ᒪᓕᒐᖅᑎᒎᖓᑎᑕᐅᓇᓱᒡᓗᑎᒃ.

ᑲᑎᒪᔨᒐᓚᐅᑦ ᑖᔅᓱᒥᖓ ᐱᐅᒃᓴᕐᓂᖏᓐᓂᒃ ᑐᒃᓯᕋᐅᑎᒥ ᐅᖃᓚᐅᕐᒥᔪᑦ.

ᑲᑎᒪᔨ ᐋᒻᐳᕐ ᐊᒡᓘᒃᑲᖅ, ᐊᓇᐅᓕᒑᖃᑕᐅᖃᑦᑕᕐᓯᒪᔪᖅ ᐊᕐᕌᒎᓕᖅᑐᓂᒃ 15-ᓂ, ᐅᖃᓚᐅᕐᑐᖅ ᖃᐅᒻᒪᖅᑯᑎᖃᕐᓂᖓ ᖃᔅᓯᒐᓴᖕᓄ ᑲᑐᔾᔨᖃᑎᒌᓄᑦ ᐊᑐᖅᑕᐅᖃᑦᑕᕐᓂᐊᕐᓂᖓᓂ ᐱᓗᐊᖅᑐᒥ ᑖᖅᓯᔭᕌᖓᑦ ᐊᒻᒪ ᑕᒃᓯᖅᑎᓪᓗᒍ.

“ᐅᔾᔨᕆᓕᓚᐅᕐᓯᒪᒐᒪ ᐊᓇᐅᓕᒑᖅᕕᐅᑉ ᕿᑎᐊᓃᖢᖓ ᖃᖓᑲᓪᓛᕐᔫᓕᖅᑐᖅ, ᐊᖁᕕᓯᒪᔪᖓ ᑕᒃᓯᓗᐊᕐᓂᖓᓄᑦ, ᖃᐅᔨᒪᙱᓗᐊᒧᑦ ᐊᕐᓴᖅ ᓇᒧᙵᐅᓂᐊᕋᓗᐊᕐᒪᖔ,” ᐅᖃᕐᑐᖅ.

“ᐃᓱᒪᔪᖓᓕ ᑖᒃᑯᐊ ᖃᐅᒻᒪᖅᑯᑦ ᐃᑲᔪᒻᒪᕆᖕᓂᐊᕐᓂᖏᓐᓂᒃ ᐊᓇᐅᓕᒑᖅᑎᓄᑦ.”

ᒪᐃᔭ ᓵᓚᒪᓐ ᐊᕙ ᐅᖃᓚᐅᕐᒥᔪᖅ ᑖᒃᑯᐊ ᖃᐅᒻᒪᖅᑯᑎᑦ ᐊᕐᕌᒍᓕᒫᖅ ᐊᑐᖅᑕᐅᔪᓐᓇᕋᔭᕆᐊᒃᓴᖏᓐᓂᒃ. ᐊᒻᒪᓗ ᑲᑎᒪᔨ ᕼᐃᐅᕆ ᕕᓕᐅᕋᑎ, ᐃᒃᓯᕙᐅᑕᕆᔭᐅᔪᖅ ᑲᑎᒪᑎᓪᓗᒋᑦ, ᐃᑲᔪᖅᑐᐃᓚᐅᕐᒥᔪᖅ ᐊᑯᓂᕈᓗᒃᑕᐅᖅ ᐊᑐᖃᑦᑕᖅᓯᒪᒐᒥᐅᒃ ᐊᓇᐅᓕᒑᖅᕕᒃ.

“ᖁᕕᐊᓱᑦᑎᐊᖅᑐᖓ ᐃᓄᐃᑦ ᑖᔅᓱᒥᖓ ᐃᓱᒪᒋᔭᖃᑦᑎᐊᕐᓂᖏᓐᓂᒃ ᐊᒻᒪ ᑲᔪᓯᑎᑦᑎᔪᒪᔪᓂᒃ, ᐊᒻᒪᓗ ᐊᐅᓚᐅᑎᓕᕆᓂᕐᒥ ᐃᖅᑲᓇᐃᔭᖅᑎᕗᑦ ᐃᑲᔪᕐᓂᐊᖅᖢᑎᒃ ᐃᓕᔅᓯᓐᓂ ᑖᓐᓇ ᑲᔪᓯᑎᓐᓇᓱᒡᓗᒍ ᖃᓂᑦᑐᒃᑯᑦ,” ᕕᓕᐅᕋᑎ ᐅᖃᕐᑐᖅ.

ᑲᑎᒪᔩᑦ ᓂᕈᐊᓚᐅᕐᑐᑦ ᐃᑲᔪᖅᑐᐃᔪᒪᓪᓗᑎ ᐊᓇᐅᓕᒑᖅᑏᑦ ᑐᒃᓯᕋᐅᑎᖓᓂ.

“ᑕᐃᒪᓕ ᓄᓇᓕᐸᐅᔭᑦ ᑲᑎᒪᔨᖏᓐᓄᑦ ᐊᖏᖅᑕᐅᒐᑦᑕ, ᐅᑯᓄᖓ ᓄᓇᓕᐸᐅᔭᐃᑦ ᐊᐅᓚᐅᑎᓕᕆᓂᕐᒧᑦ ᐱᓕᕆᔨᖏᑦ ᖃᐅᔨᒪᔨᐅᓂᐊᖅᑐᑦ ᑭᓱᓕᒫᑦ ᐱᓕᕆᐊᖑᔭᕆᐊᓖᑦ ᐱᓕᕆᐊᕆᔭᐅᓂᖏᑦᑎᒍᑦ ᐊᒻᒪ ᑕᒻᒪᖅᑕᖅᓯᒪᙱᑦᑐᒃᑯᑦ, ᑭᖑᓂᐊᒍᓪᓕ ᐃᓕᐅᖅᑲᐃᓕᕋᔭᖅᖢᑎᒃ ᖃᐅᒻᒪᖅᑯᑎᓂᒃ,” ᐸᓂ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑲᑎᒫᓂᒃᑎᓪᓗᒋᑦ.

“ᐃᓱᒪᓇᖅᑐᖅ ᐊᐅᔭᖅ ᖃᐅᒻᒪᖅᑯᑎᓕᖕᒥ ᐊᓇᐅᓕᒑᖃᑦᑕᕐᓂᐊᕆᐊᒃᓴᑦᑎᓐᓂ.”