ᐃᓚᖏᑦ ᐃᓄᐃᑦ ᓂᕆᕙᒃᑐᑦ ᐊᑕᐅᓰᑐᐃᓐᓇᖅᖢᑎᒃ ᐅᓪᓗᕐᒥ: ᖃᐅᔨᓴᖅᑎ

For English version, see Some Inuit families eating just one meal a day, researcher says

ᖃᐅᔨᓴᖅᑏ ᖃᐅᔨᓇᓱᒃᑐᑦ ᐊᒃᑐᐃᒍᑎᐅᓂᑯᓂ ᓂᕿᑖᕈᑎᒃᓴᓕᕆᓚᐅᕐᑎᓪᓗᒋᑦ ᓄᓇᕗᒥᑦ ᑐᓴᑲᑕᒃᑐᑦ ᖄᖕᓂᐅᑲᑕᖕᓂᕐᒥᓐ ᓄᓇᕗᒥᑦ.

“ᑐᓴᖃᑦᑕᖅᑐᖓ ᐃᓄᐃᑦ ᐅᖃᕐᑐᑦ. ᓲᕐᓗ ᐃᒪᓐᓇ, ‘ᐊᑕᐅᓰᖅᖢᑕ ᓂᕆᕙᒃᑐᒍᑦ ᐅᓪᓗᕐᒥ.” ᐅᖃᕐᑐᖅ ᖃᐅᔨᓴᖅᑐᓄᑦ ᐊᖓᔪᖅᑳᕆᔭᐅᔪᖅ ᕚᓐᓇ ᓯᓇ

ᖃᐅᔨᓴᑲᑕᓕᕆᐊᓚᐅᕐᓯᒪᔪᖅ ᐊᕐᕌᓂ ᐅᖓᓪᓕᕐᒥ ᐊᒻᒪᓗ ᐊᑭᓕᕐᓱᖅᑕᐅᓪᓗᑎᒃ ᓄᓇᕗᑦ ᑐᙵᕕᒃᑯᓐᓄᑦ. ᐊᐅᓚᑕᐅᔪᑦ ᖁᐸᓄᐊᖅᒧᑦ, ᑖᒃᑯᐊᓕ ᐊᑐᖃᑦᑕᕐᑐᑦ ᐃᓄᐃᑦ ᓱᕈᓯᖏᑦ ᓯᕗᓪᓕᐅᓗᑎᒃ ᐱᓕᕆᐊᒃᓴᒥ ᐃᑲᔫᑎᒃᓴᓂ ᓄᓇᖃᖅᑐᓄᑦ ᓄᓇᕗᒥᑦ ᕿᑭᖅᑖᓘᑉ ᒥᒃᓵᓃᑦᑐᓄᑦ.

ᓯᓇ ᐅᖃᓚᐅᕐᑐᖅ ᐃᓚᖏᑦ ᐊᓈᓇᒋᔭᐅᔪᑦ ᓂᕆᕙᙱᑦᑐᑦ ᕿᑐᕐᖓᖏᑦ ᓂᕆᔭᒃᓴᖃᕐᓂᐊᕐᒪᑕ.

“ᑐᓴᖃᑦᑕᕐᓇᖅᑐᖅ ᐃᒪᓐᓇ, ‘ᖃᓄᐃᙱᑦᑐᖓ ᑳᕕᑐᕈᓐᓇᑐᐊᕈᒪ,’” ᐅᖃᕐᑐᖅ.

ᓄᓇᕐᔪᐊᒥ ᓂᕿᑖᕈᑎᒃᓴᓕᕆᓂᐅᓚᐅᕐᑐᖅ ᐊᐅᓚᑕᐅᓚᐅᕐᑐᖅ ᐊᕐᕌᒍᒥ 2023-24 ᑎᑭᖢᒍ ᒫᔅᓯ 31, 2025.

ᖃᓄᖅ ᐊᐅᓚᑕᐅᓂᖓ ᐊᔾᔨᒌᙱᑦᖢᑎ ᓄᓇᓕᖕᓂ, ᐃᓄᐃᑦ ᐃᓚᒌᑦ ᑐᓂᔭᐅᖃᑦᑕᓚᐅᕐᑐᑦ $500-ᓂ ᑕᕿᕐᒥ ᐊᑕᐅᓯᕐᒧ ᓱᕈᓯᕐᒧ 18-ᓂ ᑐᖔᓄ ᐊᕐᕌᒍᓕᖕᓄ ᓂᕿᑖᕈᑎᒃᓴᓂ ᐊᒻᒪᓗ ᓱᕈᓰᑦ ᐊᕐᕌᒍᓖᑦ ᑎᓴᒪᓂ ᑐᖔᓄᑦ ᑐᓂᔭᒃᑲᓐᓂᕈᑎᐅᖃᑦᑕᖅᖢᑎᒃ $250-ᒥ ᒪᑯᓄᖓ ᖁᐃᖏᓕᓴᕐᓄᑦ ᐊᒻᒪ ᐊᒫᒪᒐᒃᓴᓄᑦ.

ᑮᓇᐅᔭᐃᑦ ᐅᑯᓇᙶᖃᑦᑕᓚᐅᕐᑐᖅ ᐃᓄᐃᑦ ᓱᕈᓯᖏᑦ ᓯᕗᓪᓕᐅᓗᑎᒃ ᐱᓇᓱᐊᒐᕐᒥ, ᑖᒃᑯᐊᓗ ᐃᓅᖃᑎᒌᖕᓂᕐᒧᑦ-ᑮᓇᐅᔭᓕᐅᕈᑎᓂ ᐊᒻᒪ ᐃᓕᓐᓂᐊᕈᑎᒃᓴᓂ ᐃᑲᔫᑎᒃᓴᖃᖅᑎᑦᑎᕙᒃᖢᑎᒃ ᐃᓄᖕᓄᑦ ᐊᕐᕌᒍᓕᖕᓂ 18-ᓂ ᑐᖔᓄᑦ, ᑕᒪᒃᑯᐊᓗ ᐱᓕᕆᐊᒃᓴᐃᑦ ᑲᒪᒋᔭᐅᓪᓗᑎᒃ ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓕᕆᔨᓄᑦ ᑲᓇᑕᒥ.

ᖃᐅᔨᓴᕐᓂᕐᒧᑦ, ᖃᐅᔨᓴᖅᑏᑦ ᐱᓕᕆᐊᒃᓴᖃᖅᑎᑕᐅᓚᐅᕐᑐᑦ ᓯᕗᓪᓕᕐᒥ ᖃᐅᔨᓇᓱᒡᓗᑎᒃ ᐊᒃᑐᐃᓯᒪᔾᔪᑎᖏᓐᓂᒃ ᓄᓇᕐᔪᐊᕐᒥ ᓂᕿᑖᕈᑎᒃᓴᓕᕆᓂᐅᓚᐅᕐᑐᕐᒥ.

“ᑖᓐᓇ ᐃᓱᓕᑎᑕᐅᒃᑳᓪᓚᒃᑎᓪᓗᒍ ᓱᖏᐅᑎᒋᐊᖃᓚᐅᕐᑐᒍᑦ,” ᓯᓇ ᐅᖃᕐᑐᖅ, “ᐊᒻᒪᓗ ᒫᓐᓇ ᐱᓕᕆᐊᖃᓕᖅᖢᑎᒃ ᓂᕿᒧᑦ ᓈᒻᒪᙱᓕᐅᕈᑎᐅᑲᑕᓕᕐᑐᓂᒃ.”

ᓴᐳᕇᓇ ᒪᓐᓂᐊᐱᒃ, ᓂᕿᑖᕈᑎᒃᓴᓕᕆᓂᕐᒧᑦ ᐊᐅᓚᑦᑎᔨᐅᓚᐅᕐᑐᖅ ᐸᓐᓂᕐᑑᒥ ᕼᐋᒻᒪᓚᒃᑯᓐᓄᑦ, ᐅᖃᓚᐅᕐᑐᖅ ᑐᓴᑲᑕᖕᓂᖓᓂᑦᑕᐅᖅ ᐅᖃᑲᑕᒃᑐᓂ ᑳᖃᑦᑕᕐᓂᖏᓐᓂᒃ.

ᐃᓄᐃᑦ ᓱᓕ ᐊᐱᕆᕙᒃᑐᑦ ᑖᔅᓱᒧᖓ ᑖᓐᓇ ᐱᓕᕆᐊᖑᓂᑯ ᐅᑎᕐᑎᑕᐅᓂᐊᕆᐊᒃᓴᖓᓂ.

ᑭᖑᓪᓕᖅᐹᕐᓕ ᖃᐅᔨᓴᕐᓂᖅ ᐱᒋᐊᖅᑕᐅᓚᐅᕐᑐᖅ ᐅᒃᑑᐱᕆᒥ ᐊᒻᒪᓗ ᐱᐊᓂᓪᓗᐊᖅᖢᑎᒃ ᕕᕝᕗᐊᕆᒥ.

ᑭᖑᓪᓕᖅᐹᑦ ᖃᐅᔨᓴᕈᑎᐅᔪᑦ ᓴᖅᑭᑕᐅᓛᕐᑐᑦ ᐅᐱᕐᖔᖑᓕᕐᐸᑦ. ᓄᓇᑦᓯᐊᕐᒥ ᐱᕙᓪᓕᐊᔪᑦ ᓄᓇᕗᑦ ᑐᙵᕕᒃᑯᓐᓄᑦ ᐊᐱᕐᓱᓚᐅᕐᑐᑦ ᖃᐅᔨᓴᕈᑎᐅᔪᖅ ᖃᓄᐃᓕᖓᓕᕐᒪᖔᑕ ᑭᓯᐊᓂᓕ ᑭᐅᔭᐅᓚᐅᙱᑦᑐᑦ.

ᐅᓇ ᓄᓇᕐᔪᐊᕐᒥ ᓂᕿᑖᕈᑎᒃᓴᓕᕆᓂᐅᓚᐅᕐᑐᖅ ᐱᒋᐊᓚᐅᕐᑎᓐᓇᒍ ᐊᑐᓂ ᐃᓚᒌᑦ ᐱᓇᓱᒍᓐᓇᓚᐅᕐᑐᑦ ᐆᒥᖓ “ᓂᕿᑖᕈᑎᓄᑦ ᐃᑲᔫᑎᒃᓴᓂ,” ᓯᓇ ᐅᖃᕐᑐᖅ.

“ᐅᓇ ᑭᖑᕙᓯᒍᑎᐅᔾᔪᑎᐅᓚᐅᕐᑐᖅ ᐊᒻᒪ ᐅᑕᖅᑭᔭᕆᐊᖃᕐᓇᖅᖢᓂ — ᐃᓚᒌᑦ ᐅᑕᖅᑭᖃᑦᑕᓚᐅᕐᑐᖅ ᑕᖅᑭᒐᓴᖕᓂ, ᑕᖅᑭᒐᓴᖕᓂ ᐅᑕᖅᑭᓪᓗᑎᒃ ᑭᐅᔭᐅᔾᔪᑎᖏᓐᓂᒃ,” ᐅᖃᕐᑐᖅ.

ᒫᓐᓇᓕ, ᓄᓇᕐᔪᐊᕐᒥ ᓂᕿᑖᕈᑎᒃᓴᓕᕆᓂᐅᓚᐅᕐᑐᖅ ᐃᓱᓕᑎᓪᓗᒍ, ᐱᔪᒪᔾᔪᑎᒃᓴᐃᑦ ᓄᑖᓄ ᐱᓕᕆᐊᒃᓴᓄᑦ — ᐊᑐᓂᓗ ᐱᓇᓱᒍᑎᒋᔭᐅᔪᑦ ᑲᒪᒋᔭᐅᕙᒃᖢᑎᒃ — ᒪᓕᒍᑎᖃᐅᕈᓘᔭᖅᖢᑎᒃ.

ᐅᑯᐊ “ᐱᐅᙱᓐᓂᕐᓴᐃᑦ [ᑕᐃᔅᓱᒪᓂᐅᓚᐅᕐᑐᒥ],” ᐅᖃᕐᑐᖅ, ᐊᒻᒪᓗ ᐃᑲᔫᑎᒃᓴᑦ ᐊᖏᕐᑕᐅᔭᕆᐊᖃᖅᖢᑎᒃ ᐊᒻᒪ ᐃᓱᖃᖅᑎᑕᐅᔭᖢᑎᒃ.

ᒪᓐᓂᐊᐱᒃ ᑕᒪᑐᒥᖓ ᐊᖏᖃᑕᐅᓚᐅᕐᑐᖅ, ᐅᖃᖅᖢᓂ ᖃᐅᔨᒪᓂᕋᖅᖢᓂ ᐊᑕᐅᓯᐅᑉ ᓱᕈᓯᖓ ᐊᖏᕐᑕᐅᓚᐅᕐᓂᖓᓂ ᑕᖅᑭᕐᒧᑦ ᐊᒻᒪᓗ ᐱᓇᓱᒍᑎᒃᓴᑲᓐᓂᕐᓂ ᐱᓕᕆᔭᕆᐊᖃᒃᑲᓐᓂᓕᖅᖢᓂ.

“ᐅᓇ ᑐᑭᖃᓗᐊᙱᑦᑐᖅ,” ᐅᖃᕐᑐᖅ.

ᒪᓐᓂᐊᐱᒃ ᐅᖃᑲᓐᓂᖅᖢᓂ: “ᑕᐃᒪᑐᖅ ᑭᒃᑯᓕᒫᑦ ᓄᓇᓕᖕᓃᑦᑐᑦ ᓄᓇᕗᒥᑦ ᑐᓴᖅᑕᐅᑲᑕᖕᓂᐊᖅᐳᑦ. ᐅᓇ ᐊᒃᓱᕈᕐᓇᖅᑐᐊᓗᒃ, ᐊᒃᓱᕈᕐᓇᖅᑐᒦᓐᓇᑦᑕ, [ᐃᓄᐃᑦ] ᑳᑲᑕᖕᒪᑕ ᐱᔭᕆᐊᖃᖅᑕᖏᓐᓂᒃ.”