‘ᒫᓐᓇ’ ᖃᓄᐃᓕᐅᕐᓇᖅ ᐅᑭᐅᕐᑕᖅᑐᕐᒥ ᐊᑐᒃᑲᓐᓂᕈᑎᐅᔭᕆᐊᓕᒃ, ᐅᐱᐊᑦ ᐅᖃᕐᑐᖅ

For English version, see ‘Spicy’ times call for big increase in Arctic investments, Obed says

“ᒫᓐᓇ ᖃᓄᐃᓕᐅᕐᓇᖅ” ᓄᓇᕐᔪᐊᕐᒥ ᑲᓇᑕᐅᑉ ᐅᑭᐅᕐᑕᖅᑐᖓᓂ ᐃᑲᔫᑎᖃᕆᐊᖃᕐᓇᖅᑐᖅ, ᐅᖃᕐᑐᖅ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᐃᑕᓐ ᐅᐱᐊᑦ.

ᐅᐱᐊᑦ ᑕᐃᒪᐃᓕᓚᐅᕐᑐᖅ ᑲᑎᒪᖃᑕᐅᑎᓪᓗᒍ ᐃᖏᐅᓕᒃ ᓄᓇᕗᒥᑦ ᐅᒥᐊᕐᔪᐊᓕᕆᓂᕐᒧᑦ ᑲᑎᒪᓂᕐᔪᐊᕐᒥ ᐊᖅᓴᕐᓃᑦ ᑐᔪᕐᒥᕕᒃᒥ ᐃᖃᓗᖕᓂ ᔭᓄᐊᕆ 13-ᖑᑎᓪᓗᒍ.

ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᐅᖃᓪᓚᒃᑎᐅᓚᐅᕐᑐᖅ ᐊᐃᑉᐸᖓᓂ ᐅᓪᓗᕐᓂ ᑎᓴᒪᓂ ᑲᑎᒪᑎᓪᓗᒋᑦ ᓄᓇᕗᑦ ᑐᙵᕕᒃᑯᓐᓄᑦ ᐋᖅᑭᒃᑕᐅᓯᒪᔪᒥᑦ, ᑖᓐᓇᓗ ᑲᑎᒪᕕᒡᔪᐊᕐᓇᖅ ᐅᐸᒃᑕᐅᓚᐅᖅᖢᓂ ᑲᓇᑕᒥ ᐅᑭᐅᕐᑕᖅᑐᕐᒥᐅᑕᓂ, ᐊᓛᔅᑲᒥ ᐊᒻᒪ ᑲᖥᓪᖡᑦ ᓄᓇᖓᓂ.

“ᐅᓇ ᓈᒻᒪᙱᓗᐊᕐᒪᑦ 51 ᐃᓄᐃᑦ ᓄᓇᓕᖏᑦ ᐱᔨᑦᑎᕋᖅᑕᐅᖃᑦᑕᙱᓗᐊᕐᓂᖏᑦ ᑕᕆᐅᕐᒥᐅᑕᓕᕆᓂᒃᑯᑦ,” ᐅᐱᐊᑦ ᐅᖃᕐᑐᖅ, ᐅᖃᐅᓯᖃᖅᖢᓂ ᑲᓃᑎᐊᓐ ᐅᓇᑕᕐᑐᒃᓴᙳᐊᑦ ᐃᓂᖃᕆᐊᖃᕐᓂᖏᓐᓂ ᐱᓕᕆᐊᖃᕈᓐᓇᕐᓂᐊᕐᒪᑕ ᖃᐅᔨᓴᖃᑦᑕᕐᓂᕐᒥ ᐊᒻᒪ ᐅᒥᐊᕐᔪᐊᓂ ᐱᓕᕆᐊᖃᕐᑐᓂ ᐅᓯᔭᖏᓐᓂ ᐅᓯᒌᑦᑎᐊᒃᑲᓐᓂᕈᓐᓇᑎᒃᓴᖏᓐᓂᓪᓗ.

“ᐱᓕᕆᒃᑲᓐᓂᕆᐊᖃᕋᑦᑕ ᐊᒻᒪᓗ ᐱᓕᕆᖃᑎᖃᕈᓐᓇᕐᓗᑕ ᑲᓇᑕᒥ ᒐᕙᒪᒃᑯᓐᓂ ᐊᒻᒪᓗ ᐱᔪᓐᓇᕐᓂᖃᕐᑎᑕᐅᓗᑕ ᑕᒪᑐᒧᖓ.”

ᐅᐱᐊᑦ ᐅᖃᐅᓯᖃᓚᐅᕐᑐᖅ ᐃᓱᒫᓘᑎᒋᔭᐅᔪᓂ ᒪᑯᓂᖓ ᐊᒥᐊᓕᑲᒥᐅᑕᑦ ᐊᒻᒪ ᐊᓯᖏᑦ ᓄᓇᓕᖕᔪᐊᑦ ᐅᑭᐅᕐᑕᖅᑐᕐᒥ ᐃᒪᕐᓂ ᐊᐅᓚᑦᑎᒃᑲᓐᓂᕈᒪᓂᖏᓐᓂᒃ.

ᐃᓱᒪᙱᓐᓂᕐᓴᐅᓪᓗᓂ ᐊᒥᐊᓕᑲᒥᐅᑕᑦ ᐊᖓᔪᖅᑳᖓᑕ ᑖᓄᑦ ᑐᕋᒻᑉ ᐅᓗᕆᐊᕐᓵᕈᑎᒋᔭᖏᓐᓂ ᐊᒻᒪ ᐊᓯᖏᓐᓄ ᐊᒥᐊᓕᑲᒥ ᐱᓕᕆᔨᓄ ᑲᖥᓪᖡᑦ ᓄᓇᖓᓂ, ᐅᐱᐊᑦ ᐅᖃᐅᓯᖃᓚᐅᕐᑐᖅ ᐊᒥᐊᓕᑲᒥᐅᑕᑦ ᖃᓄᐃᓕᖓᓂᖏᓐᓂ ᐆᒧᖓ ᓱᓪᓗᐊᓗᒃ ᐅᐊᓕᓂᖅᒥ ᕿᑭᖅᑖᓗᒃᒧ ᑕᕆᐅᒃᑯᑦ ᐊᖅᑯᑎᒥ ᑭᒃᑯᑐᐃᓐᓇᕐᓄᑦ ᐃᒪᕆᔭᐅᓂᖓᓂ.

ᐅᐱᐊᑦ ᐅᖃᓚᐅᕐᑐᖅ ᐃᓄᐃᑦ ᑕᐱᕇᑦ ᑲᓇᑕᒥ ᐃᓱᒪᒋᔭᖃᕐᓂᖓᓂ ᐅᓇ ᓱᓪᓗᐊᓗᒃ ᐅᐊᓕᓂᖅᒥ ᕿᑭᖅᑖᓗᒃᒧ ᑕᕆᐅᒃᑯᑦ ᐊᖅᑯᑎ ᑲᓇᑕᒧ ᓇᖕᒥᓂᕆᔭᐅᓂᖓᓂ ᐊᒻᒪᓗ ᐃᓄᐃᑦ ᓄᓇᖓᒎᕐᓯᒪᓂᖓᓂ. ᑲᓇᑕᒥ ᒐᕙᒪᒃᑯᑦ ᑖᔅᓱᒥᖓᑦᑕᐅᖅ ᐃᓱᒪᒋᔭᖃᕐᑐᖅ ᑲᓇᑕᒧᑦ ᓇᖕᒥᓂᕆᔭᐅᓂᖓᓂ.

“ᖃᓄᐃᓕᐅᕋᓱᒃᑐᓄᑦ ᐃᓚᒋᔭᐅᑐᐃᓐᓇᕆᐊᖃᕐᑐᒍᑦ ᐃᓱᒪᒋᔭᕆᐊᖃᓗᐊᙱᑦᑐᒃᑯᑦ,” ᐅᖃᕐᑐᖅ.

“ᐅᒥᐊᕐᔪᐊᓕᕆᓂᕐᒧᑦ ᐊᑐᐊᒐᕗᑦ, ᑕᕆᐅᕐᒥᐅᑕᓕᕆᓂᕐᒧᑦ ᐊᑐᐊᒐᕗᑦ, ᐊᒻᒪᓗ ᐋᖅᑭᒃᑕᐅᔪᓐᓇᖅᖢᑎ ᒫᓐᓇᐅᓕᕐᑐᖅ — ᐊᓯᖏᑦ ᐅᖃᐅᓯᐅᓕᕐᑐ ᐊᑐᓕᓚᐅᕐᑎᓐᓴᒋᑦ — ᑕᒪᒃᑯᐊᓗ ᐊᓂᒍᖅᑎᑐᐃᓐᓇᕆᐊᖃᙱᖢᑎᒍᑦ.”

ᐅᖃᓪᓛᓂᒃᑎᓪᓗᒍ ᐅᐱᐊᑦ ᐅᖃᓚᐅᕐᑐᖅ ᑐᓴᒐᒃᓴᓕᐅᕐᑎᓄᑦ ᑐᕋᒻᑉ ᐅᓗᕆᐊᒃᓵᕈᑎᖏᑦ ᐊᒻᒪ ᐅᖃᐅᓯᕆᑲᑕᒃᑕᖏᑦ ᑲᖥᓪᖡᑦ ᓄᓇᖓᑕ ᒥᒃᓵᓄᑦ ᐃᓱᒫᓗᒋᐊᖃᕐᓇᕐᓂᖏᓐᓂᒃ.

“ᑐᓵᖃᑦᑕᕈᕕᐅᒃ ᐊᖓᔪᖅᑳᖅ ᑐᕋᒻᑉ ᐅᖃᐅᓯᖏᓐᓂ, ᐃᓚᖓ ᐅᖃᕐᓯᒪᔭᖓ ᓈᒻᒪᒃᓴᖏᓕᐅᕈᑎᖃᕐᓂᖓᓂ ᑲᖥᓪᖡᑦ ᓄᓇᖓᑕ ᒥᒃᓵᓄᑦ ᑮᓇᐅᔭᓕᐅᕈᑎᖃᙱᓗᐊᕐᓂᖏᓐᓂᒃ ᓄᓇᖓᓂ. ᑕᐃᒪᓐᓇᓗ ᐊᓯᖏᓐᓄᑦ ᓄᓇᓕᕐᔪᐊᒧᑦ ᐃᖃᐅᓯᐅᓗᓂ ᑭᓱᖃᙱᓗᐊᕐᓂᖓᓂ ᑕᐃᒪᓕ ᐃᓱᒫᓘᑎᖃᕆᕗᖓ ᖃᓄᐃᓕᐅᕋᔭᕆᐊᒃᓴᖓᓂ ᐃᓄᐃᑦ ᓄᓇᖓᓂ ᑲᓇᑕᒥ,” ᐅᐱᐊᑦ ᐅᖃᕐᑐᖅ.

“ᒫᓐᓇᐅᔪᕐᓕ ᑐᕌᒐᖃᕐᓂᕐᓴᐅᔭᕆᐊᖃᕋᑦᑕ ᓄᓇᓕᖕᓂ ᓴᙱᒃᑎᑦᑎᕚᓪᓕᓂᕐᒥ, ᐱᖃᕐᓂᕗᑦ ᓴᙱᒃᑎᒃᑲᓐᓂᕐᓗᒍ, ᐊᒻᒪᓗ … ᐱᓕᕆᖃᑎᒌᒃᑎᑕᐅᓗᑎ ᐃᓄᐃᑦ ᐊᒻᒪ ᑲᓇᑕᒥᐅᑕ ᐊᒻᒪᓗ ᑲᓇᑕᒥ ᐊᒻᒪ ᓄᓇᕐᔪᐊᕐᒥ.”

ᐅᐱᐊᑦ ᐅᖃᓚᐅᕐᑐᖅ “ᖃᓄᐃᓕᖓᕈᓘᔭᓗᐊᕐᒪᑦ” ᐊᒻᒪ “ᓇᓗᓈᕿᓐᓇᖅᖢᓂ” ᒫᓐᓇᐅᔪᖅ, ᑭᓯᐊᓂᓕ ᐃᓄᐃᑦ ᑲᓇᑕᒥ ᐊᓯᐊᓃᑦᑐᓪᓗ ᐱᓕᕆᖃᑎᒌᒃᑲᓐᓂᕆᐊᖃᕐᓂᖏᓐᓂᒃ. ᐅᖃᖅᖢᓂ ᑲᑎᖃᑎᖃᕈᒪᓇᔭᕐᓂᖓᓂ ᓄᓇᕐᔪᐊᕐᒥ ᑲᑎᒪᔭᕐᑐᕐᓂᐊᖅᑐᓂ ᑕᒪᓐᓇ ᓇᓗᓇᐃᒃᑲᓐᓂᕈᒪᓪᓗᓂᐅᒃ.

“ᐱᓇᓱᑦᑎᐊᕆᐊᖃᕐᑐᒍᑦ ᖃᓄᐃᓕᐅᖃᑎᒋᔪᓐᓇᕐᓗᑎᒍᑦ ᐃᑲᔪᖅᑎᒋᕙᒃᑕᕗᑦ,” ᐅᐱᐊᑦ ᐅᖃᕐᑐᖅ, “ᐊᐅᓚᑦᑎᓂᐅᔪᖅ ᓴᙱᒃᑎᑉᐹᓪᓕᕐᓗᓂ ᐊᒻᒪᓗ ᐱᓕᕆᖃᑎᒋᔭᕗᑦ ᑲᒪᒋᔭᖃᕐᓂᕐᓴᐅᑎᑦᑕᐃᓕᓗᒋᑦ ᓄᓇᒋᔭᐅᔪᓂᒃ ᐊᒻᒪ ᐃᑲᔫᑎᐅᔪᓐᓇᕐᑐᓂᒃ.”