ᑲᓇᑕᒥ ᑭᓪᓕᓯᓂᐊᖅᑏᑦ ᖃᐅᔨᓴᖅᐳᑦ ᒐᕙᒪᒃᑯᓐᓂ ᓴᓇᔨᐅᔪᓂ ᓈᒻᒪᒋᔭᐅᓂᖏᓐᓂ

For English version, see Are you happy working for the government? Statistics Canada wants to hear from you

ᑲᓇᑕᒥ ᑭᓪᓕᓯᓂᐊᖅᑏᑦ ᑐᓴᕈᒪᕗᑦ ᐃᓄᐃᑦ ᐊᑐᕐᓂᑯᖏᓐᓂ ᐃᖅᑲᓇᐃᔭᕐᓂᕐᒧᑦ ᓄᓇᕗᒻᒥ ᒐᕙᒪᒃᑯᓐᓄᑦ  ᐊᒻᒪ ᒐᕙᒪᑐᖃᒃᑯᓐᓄᑦ.

ᓄᓇᕗᒻᒥ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᒧᑦ ᖃᐅᔨᓴᕐᓂᖅ, ᐱᖓᔪᖓᓐᓂ ᑕᐃᒪᐃᑦᑑᓂᖓᓂ, ᐃᓚᒋᔭᐅᕗᖅ ᑲᔪᓰᓐᓇᖅᑐᒥ ᐊᒃᓱᕈᕐᓂᐅᔪᒥ ᐊᖏᒡᓕᒋᐊᖅᑎᑦᑎᓇᓱᐊᕐᓂᕐᒥ ᐃᓄᖕᓂ ᐃᖅᑲᓇᐃᔮᖃᕐᓂᖏᓐᓂ ᑕᒪᒃᑭᓂ ᒐᕙᒪᐅᔪᓄᑦ, ᐅᖃᐅᓯᐅᓪᓗᓂ ᑐᓴᐅᒪᔾᔪᑎᒃᓴᓂ ᑲᓇᑕᒥ ᑭᓪᓕᓯᓂᐊᖅᑎᒃᑯᓐᓂ.

ᑕᒪᒃᑭᑦ 7,500−ᐸᓗᖕᓂ ᒫᓐᓇᐅᔪᒥ ᓄᓇᕗᒻᒥ ᒐᕙᒪᒃᑯᓐᓂ ᐊᒻᒪ ᒐᕙᒪᑐᖃᒃᑯᓐᓂ ᐃᖅᑲᓇᐃᔭᖅᑎᓂᑦ ᑐᓂᔭᐅᓯᒪᔪᒥ ᐃᖅᑲᓇᐃᔭᕐᓂᕐᒧᑦ ᐃᓂᖓ ᓄᓇᕗᒻᒥᐅᔪᓂ ᑭᐅᔪᓐᓇᖅᐳᑦ ᖃᐅᔨᓴᕐᓂᕐᒥ. ᑕᒪᓐᓇ ᐃᓚᖃᖅᐳᖅ ᐃᓱᓕᕝᕕᖃᙱᑦᑐᓂ, ᕿᓚᒻᒥᐅᔪᒥ, ᑳᓐᑐᕌᒃᑎᒍᑦ, ᐊᕐᕌᒎᑉ ᐃᓚᖓᓐᓂ, ᐃᖅᑲᓇᐃᔭᓚᐅᑲᒃᑐᓂ ᐅᕝᕙᓘᓐᓃᑦ ᐃᓕᓐᓂᐊᖅᑎᓂ ᐃᖅᑲᓇᐃᔭᖅᑎᓂᑦ.

ᒪᑐᐃᖓᕗᖅ ᐊᐃᑉᕆᓕ 3−ᖑᕋᓱᖕᓂᖓᓂ.

ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ ᑐᕌᖓᓇᓱᐊᖅᐳᖅ ᐃᑲᔪᕐᓂᕐᒥ ᒐᕙᒪᒃᑯᓐᓂᑦ ᐊᒻᒪ ᐃᓄᖕᓄᑦ ᑲᑐᔾᔨᖃᑎᒌᖑᔪᓄᑦ ᑭᐅᓂᖏᓐᓂ ᐱᔭᕆᐊᓕᖏᓐᓂ ᐅᕘᓇ ᑎᑎᕋᖅᓯᒪᓂᓕᒃ 23−ᒥ ᓄᓇᕗᒻᒥ ᐊᖏᕈᑕᐅᔪᒥ, ᐱᔭᕆᐊᖃᖅᑎᑦᑎᓂᕐᒥ ᐃᓄᖕᓂ ᐃᖅᑲᓇᐃᔮᖃᖅᑎᑕᐅᓂᖏᓐᓂ ᒐᕙᒪᒃᑯᓐᓂ ᑭᒡᒐᖅᑐᐃᓂᕐᒥ ᐃᓄᒋᐊᖕᓂᐅᔪᓄᑦ

ᓯᕗᓂᐊᓂ ᖃᐅᔨᓴᕐᓂᖅ, 2021−ᒥ, ᓇᓂᓯᓚᐅᖅᐳᖅ 25,000−ᐸᓗᖕᓂ ᐃᓄᖕᓂ ᐅᑭᐅᓕᖕᓂ 15−ᒥ ᐊᒻᒪ ᐅᖓᑖᓄᑦ ᓄᓇᕗᒻᒥ, 7,200−ᐸᓗᖕᓂ ᑎᒍᒥᐊᓚᐅᖅᐳᑦ ᒐᕙᒪᒃᑯᓐᓂ ᐃᖅᑲᓇᐃᔮᓂᑦ — 6,600−ᐸᓗᖕᓂ ᓄᓇᕗᒻᒥ ᒐᕙᒪᒃᑯᓐᓄᑦ ᐊᒻᒪ 600−ᐸᓗᖕᓂ ᒐᕙᒪᑐᖃᒃᑯᓐᓄᑦ.

ᑕᒪᑐᒪᓂ ᐊᕐᕌᒎᔪᒥ ᐊᐱᖅᑯᑕᐅᔪᑦ ᑕᐅᑐᒃᑕᑐᐊᖃᑲᐃᓐᓇᖅᐳᑦ ᐊᑲᐅᙱᓕᐅᕈᑕᐅᔪᓂ ᓇᓗᓇᐃᖅᓯᒪᔪᒥ ᐃᖅᑲᓇᐃᔭᕐᓂᕐᒥ ᓄᓇᕗᒻᒥ. ᐅᑯᐊ ᐃᓚᖃᖅᐳᑦ ᐃᓄᖕᓂ ᐃᓅᖃᑎᒌᖑᔪᓄᑦ ᐱᒻᒪᕆᐅᒋᔭᐅᔪᓂ, ᐊᑐᕐᓂᕐᒥ ᐃᓄᒃᑐᒻᒥ ᐃᖅᑲᓇᐃᔭᕐᕕᖕᒥ, ᐊᑐᐃᓐᓇᖃᕐᓂᕐᒥ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐃᒡᓗᖁᑎᖏᓐᓂ, ᓱᕈᓯᕐᓂ−ᐸᖅᑭᓂᐅᔪᓂ ᑲᒪᒋᔭᕆᐊᓕᖏᓐᓂ ᐊᒻᒪ ᐊᒡᕕᐊᕈᑕᐅᔪᓂ ᐃᓕᓐᓂᐊᕐᓂᓕᕆᓂᕐᒧᑦ, ᐱᓕᒻᒪᒃᓴᓂᕐᒧᑦ ᐊᒻᒪ ᐃᖅᑲᓇᐃᔮᒥᓂᑦ ᐅᖓᕙᕆᐊᕐᓂᐅᔪᒥ.

ᖃᐅᔨᓴᕐᓂᖅ ᒪᑐᐃᖓᕗᖅ ᐃᓄᖕᓄᑦ ᐊᒻᒪ ᖃᓪᓗᓈᓄᑦ ᐃᖅᑲᓇᐃᔭᖅᑎᓄᑦ, ᐅᖃᓚᐅᖅᐳᖅ ᕌᒃᓵᓐ ᕙᐃᓕᓐᑯᐊᑦ, ᖃᐅᔨᓴᕐᓂᕐᒧᑦ ᐊᐅᓚᑦᑎᔨ, ᓄᓇᕗᒻᒥ ᐃᓄᐃᑦ ᐃᖅᑲᓇᐃᔭᕐᓂᕐᒧᑦ ᖃᐅᔨᓴᐃᓂᐅᔪᒥ ᑲᓇᑕᒥ ᑭᓪᓕᓯᓂᐊᖅᑎᒃᑯᓐᓄᑦ, ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

ᓄᑖᓂ ᐅᖃᐅᓯᐅᔪᓂ ᐃᓚᔭᐅᔪᓂ 2026−ᒧᑦ ᖃᐅᔨᓴᕐᓂᐅᔪᒥ ᐃᓚᖃᖅᐳᖅ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐃᖅᑲᓇᐃᔭᕐᕕᖕᒥ, ᑲᓇᑕᒥ ᑭᓪᓕᓯᓂᐊᖅᑏᑦ ᐅᓂᒃᑳᕆᔭᖓᓂ “ᓴᖅᑭᑉᐸᓪᓕᐊᔪᒥ ᑐᐊᕕᕐᓇᕐᓂᐅᔪᒥ.”

ᐊᐱᖅᑯᑕᐅᔪᑦ ᐱᔾᔪᑎᓕᖕᓂ ᐃᖅᑲᓇᐃᔭᖅᑎᓄᑦ ᐃᒡᓗᖁᑎᖏᓐᓂ ᐊᖏᒡᓕᒋᐊᖅᑕᐅᓯᒪᕗᖅ ᑕᑯᒋᐊᕐᓂᕐᒥ ᐃᒡᓗᖃᖅᑎᑕᐅᓂᖏᓐᓂ ᐃᖅᑲᓇᐃᔮᒥᒍᑦ ᐅᕝᕙᓘᓐᓃᑦ ᐊᓯᐊᒎᖅᑐᒥ, ᓲᕐᓗ ᐊᐃᑉᐸᖓᓄᑦ, ᐊᖓᔪᖅᑳᓄᑦ, ᐱᖃᓐᓇᕆᔭᖏᓐᓂ ᐅᕝᕙᓘᓐᓃᑦ ᐃᒡᓗᒥᐅᖃᑎᓂᑦ.

ᖃᐅᔨᓴᕐᓂᖅ ᒫᓐᓇ ᐊᐱᕆᓕᖅᐳᖅ ᐱᒻᒪᕆᐅᓂᖓᓂ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᓄᑦ ᐃᒡᓗᖁᑎᖏᓐᓂ ᓂᕈᐊᖅᓯᓂᕐᒥ ᐊᒻᒪ ᐃᖅᑲᓇᐃᔭᐃᓐᓇᕐᓂᕐᒧᑦ ᐃᖅᑲᓇᐃᔭᖅᑎᖁᑎᓕᖕᒧᑦ, ᐊᒻᒪ ᐊᒃᑐᐃᓂᐅᔪᓂ ᐊᓯᐅᔨᓂᕐᒥ ᐃᖅᑲᓇᐃᔭᖅᑎᓄᑦ ᐃᒡᓗᖁᑎᖓᓐᓂ ᓄᖅᑲᖅᑎᓪᓗᒋᑦ ᐃᓐᓇᐅᓗᐊᓕᕐᓂᖏᓐᓄᑦ.

ᐱᕙᓪᓕᐊᑎᑕᐅᓚᐅᖅᐳᖅ ᓄᓇᕗᒻᒥ ᑐᙵᕕᒃᑯᓐᓂ.; ᓄᓇᕗᒻᒥ ᒐᕙᒪᒃᑯᓐᓂ; ᐃᖅᑲᓇᐃᔮᖃᕐᓂᕐᒧᑦ ᐊᒻᒪ ᐃᓅᖃᑎᒌᖑᔪᓄᑦ ᐱᕙᓪᓕᐊᑎᑦᑎᓂᕐᒥ ᑲᓇᑕᒥ; ᐱᓕᒻᒪᒃᓴᐃᕕᒃ, ᒐᕙᒪᑐᖃᒃᑯᑦ ᐱᓕᕆᕝᕕᒃ ᐱᐅᓂᖅᐹᓄᑦ ᐃᓄᖕᓄᑦ ᐃᖅᑲᓇᐅᔮᖃᕐᓂᖏᓐᓄᑦ ᓄᓇᕗᒻᒥ; ᐊᒻᒪ ᑲᓇᑕᒥ ᑭᓪᓕᓯᓂᐊᖅᑎᓂᑦ.

ᑭᐅᓂᐅᔪᑦ ᑲᑎᖅᓱᖅᑕᐅᓂᐊᖅᐳᑦ ᖃᕋᓴᐅᔭᑎᒍᑦ ᐃᓄᒃᑎᑐᑦ, ᐃᓄᐃᓐᓇᖅᑐᓐ, ᖃᓪᓗᓈᑎᑐᑦ ᐊᒻᒪ ᐅᐃᕖᑎᑐᑦ.

ᑲᓇᑕᒥ ᑭᓪᓕᓯᓂᐊᖅᑏᑦ ᐸᕐᓇᒃᐳᑦ ᓴᖅᑭᑎᑦᑎᓂᕐᒥ ᖃᓄᐃᓕᖓᓂᐅᔪᓂ 2027−ᒥ.