ᐃᖃᓗᖕᓂ ᐃᒡᓗᓕᕆᔨᒃᑯᑦ, ᐃᖅᑲᓇᐃᔭᕈᒪᙱᓐᓂᐅᔪᒥ ᔫᓂᐊᓐᑯᑦ ᑲᑎᒪᕗᑦ ᓯᕗᓪᓕᖅᐹᒥ ᑕᖅᑭᓂᑦ ᑎᓴᒪᓂᑦ

ᐃᖃᓗᖕᓂ ᐃᒡᓗᓕᕆᔨᒃᑯᑦ ᐊᒻᒪ ᑭᒡᒐᖅᑐᐃᔨᐅᔪᑦ ᐃᖅᑲᓇᐃᔭᕈᒪᙱᓐᓂᐅᔪᒥ ᓴᓇᔨᐅᔪᓂ ᑲᑎᒪᖃᑎᒌᓚᐅᖅᐳᑦ ᓯᕗᓪᓕᖅᐹᒥ ᑕᖅᑭᓂᑦ ᑎᓴᒪᓂᑦ ᔪᓚᐃ 21−ᒥ ᐋᖅᑭᒃᓯᓇᓱᐊᕐᓂᐅᔪᒥ ᐃᖅᑲᓇᐃᔭᕈᒪᙱᓐᓂᐅᔪᒥ ᐊᑲᐅᒃᓴᙱᓐᓂᕐᒧᑦ ᐱᒋᐊᓚᐅᖅᑐᒥ ᒫᔾᔨᒥ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓂ.ᒪᕐᕉᖕᓂ ᐃᓚᒋᔭᐅᔪᓂ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓂ ᐋᔩᖃᑎᒌᒃᑎᐅᔪᓂ ᑲᑎᙵᓂᐅᔪᓂ ᐊᒻᒪ ᑭᒡᒐᖅᑐᐃᔨᐅᔪᒥ ᐃᒡᓗᓕᕆᔨᒃᑯᓐᓂ ᑲᑎᒪᔪᒃᑕᐅᓴᐅᑕᐅᓚᐅᖅᐳᑦ ᒐᕙᒪᑐᖃᒃᑯᓐᓂ ᑎᒃᑯᐊᖅᑕᐅᔪᒥ ᐊᖏᖃᑎᒌᙱᑎᓪᓗᒋᑦ ᕿᑎᐊᓃᖦᖢᓂ ᐃᑲᔪᕋᓱᐊᕐᓂᕐᒥ ᐋᑐᕚᒥ ᔪᓚᐃ 21−ᒥ, ᐅᖃᐅᓯᐅᓪᓗᓂ ᑐᓴᒐᒃᓴᓕᐊᖑᔪᒥ ᔫᓂᐊᓐ ᑐᓂᓯᓚᐅᕐᓂᖓᓂ ᐃᑉᐸᒃᓴᖓᓂ.ᓯᕗᓪᓕᖅᐹᖑᓪᓗᓂ ᑕᒪᒃᑭᑦ ᐋᔩᖃᑎᒌᒃᑐᓂ ᐃᖅᑲᓇᐃᔭᕈᒪᙱᓐᓂᐅᔪᒥ ᐊᑲᐅᒃᓴᙱᓐᓂᕐᒧᑦ ᑲᑎᓴᖃᑎᒌᒃᓯᒪᕗᑦ ᐅᐸᒃᓯᒪᓪᓗᑎᒃ ᑕᐃᒪᙵᓂ ᐃᖅᑲᓇᐃᔭᕈᒪᙱᓐᓂᐅᔪᒥ ᐊᑲᐅᒃᓴᙱᓐᓂᕐᒧᑦ ᐱᒋᐊᓚᐅᕐᓂᖓᓂ.

ᐅᖃᓪᓚᖕᓂᐅᔪᑦ ᑐᕌᖓᔪᓂ ᐋᔩᖃᑎᒌᖕᓂᐅᔪᒥ ᓄᑖᖑᔪᒥ ᑳᓐᑐᕌᖑᔪᒥ ᑕᐃᒪᙵᓂ ᔫᓂ 30, 2020−ᒥ.

13−ᖑᔪᑦ 23−ᖑᔪᓂ ᐃᒡᓗᓕᕆᔨᒃᑯᓐᓂ ᓴᓇᔨᐅᔪᓂ ᐃᖅᑲᓇᐃᔭᕈᒪᙱᓐᓂᖃᓚᐅᖅᐳᑦ ᒫᔾᔨ 17−ᒥ ᐱᐅᓯᒋᐊᖅᑐᓄᑦ ᖃᓄᐃᓕᖓᓂᐅᔪᓄᑦ ᐃᓚᖃᖅᑐᒥ ᑮᓇᐅᔾᔭᒃᓴᓂᐅᔪᒥ ᐊᖑᒻᒪᑎᔪᓂ ᓱᓇᑐᐃᓐᓇᐃᑦ ᐊᑭᑦᑐᖅᐸᓪᓕᐊᓂᖏᓐᓄᑦ, ᐊᒻᒪ ᐃᒡᓗᖃᕐᓂᕐᒧᑦ ᐱᕚᓪᓕᕈᑕᐅᔪᓄᑦ. ᖃᐅᑎᓪᓗᒍ ᐃᖅᑲᓇᐃᔭᕈᒪᙱᓐᓂᐅᔪᒥ ᐊᑲᐅᒃᓴᙱᓐᓂᕐᒧᑦ ᐱᒋᐊᓚᐅᕐᓂᖓᓂ, ᐃᒡᓗᓕᕆᔨᒃᑯᑦ ᓴᓇᔨᓂ ᐃᓯᖅᑎᑦᑕᐃᓕᒪᓕᓚᐅᖅᐳᑦ.

ᔫᓂᐊᓐᑯᑦ ᐊᖓᔪᖅᑳᖓ ᔭᐃᓴᓐ ᕉᓵᓐ, ᐃᖅᑲᓇᐃᔭᙱᓐᓂᐅᔪᒥ ᐱᓱᖃᑕᐅᓚᐅᖅᑐᒥ ᓴᓇᔨᓂ ᐃᖃᓗᖕᓂ ᔪᓚᐃ 21−ᒥ, ᐅᖃᓚᐅᖅᐳᖅ “ᓂᕆᐅᖕᓂᖃᑦᑎᐊᖅᐳᖅ” ᑲᑎᒪᓂᐅᔪᒥ ᐋᑐᕚᒥ, ᐱᓗᐊᖅᑐᒥ ᔫᓂᐊᓐ ᐋᔩᖃᑎᒌᒃᓯᒪᖕᒪᑕ ᓄᑖᖑᔪᒥ ᐃᖅᑲᓇᐃᔭᖅᑐᓄᑦ ᐊᖏᕈᑕᐅᓯᒪᔪᒥ ᓄᓇᓕᖕᓂ ᓴᓇᔨᐅᔪᓄᑦ ᐊᓯᖏᓐᓂ ᓄᓇᓕᐅᔪᓂ ᓲᕐᓗ ᖃᒪᓂᑦᑐᐊᕐᒥ ᐊᒻᒪ ᐊᕐᕕᐊᓂ ᖄᖏᖅᓯᒪᔪᒥ ᑕᖅᑭᓂᑦ ᑎᓴᒪᓂ.

“ᐊᖏᙱᓐᓂᖃᕐᔪᐊᖅᓯᒪᕗᖅ [ᐃᖃᓗᖕᓂ ᐃᒡᓗᓕᕆᔨᒃᑯᑦ] ᐊᒻᒪ ᑭᒃᑯᓕᒫᑦ ᖃᐅᔨᒪᕗᑦ ᔫᓂᐊᓐ ᐱᔪᒪᓂᖃᖅᓯᒪᓂᖏᓐᓂ ᐱᓕᕆᓂᖅᑖᕈᒪᓂᖏᓐᓂ ᐅᓪᓗᖓᓂ ᓯᕗᓪᓕᖅᐹᖑᔪᒥ,” ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

“ᐃᓱᒪᕗᖓ ᐅᓪᓗᒥ ᐱᒋᐊᕐᓂᑦᑎᐊᕙᐅᕗᖅ …[ᔫᓂᐊᓐᕗᑦ] ᐱᓕᕆᓯᒪᕗᑦ ᐱᔭᕆᐊᖃᖅᑐᓕᒫᓂ, ᒫᓐᓇ ᐃᖅᑲᓇᐃᔭᖅᑐᖁᑎᓕᒃ ᑕᑯᒃᓴᐅᑎᑦᑎᔭᕆᐊᖃᖅᐳᖅ ᓇᒡᓕᒍᓱᖕᓂᖏᓐᓂ ᐊᒻᒪ ᐊᖏᖅᓯᒪᓗᑎᒃ ᐱᐅᔪᒥ ᐱᓕᕆᓂᐊᕐᓂᖏᓐᓂ.”

ᐃᖃᓗᖕᓂ ᐃᒡᓗᓕᕆᔨᒃᑯᑦ ᑭᐅᓚᐅᙱᓚᑦ ᔪᓚᐃ 21−ᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᑐᒃᓯᕋᕐᓂᖓᓂ ᐅᖃᐅᓯᒃᓴᓕᐊᖑᔪᓂ ᑲᑎᒪᓂᐅᔪᒥ.

ᐃᓚᒋᔭᐅᓪᓗᓂ ᐊᖏᖃᑎᒌᙱᑎᓪᓗᒋᑦ ᕿᑎᐊᓃᖦᖢᓂ ᐃᑲᔪᕋᓱᐊᕐᓂᐅᔪᒥ, ᕉᓵᓐ ᐅᖃᓚᐅᖅᐳᖅ ᔫᓂᐊᓐ ᒫᓐᓇ ᐊᐱᕆᓇᓱᐊᖅᐳᑦ 2.5 ᐳᓴᓐᑎᒥ ᐊᖏᒡᓕᒋᐊᖅᑕᐅᓂᖓᓂ ᑮᓴᐅᔾᔭᒃᓴᓂᐅᔪᓂ ᐅᑎᖅᑕᐅᔪᒥ ᑭᖑᓂᖓᒍᑦ ᐃᓱᒪᒋᓪᓗᒍ “ᖁᑦᑎᒃᑐᒥ ᓱᓇᑐᐃᓐᓇᐃᑦ ᐊᑭᑦᑐᖅᐸᓪᓕᐊᓂᖏᓐᓂ ᓄᓇᕗᒻᒥ ᑲᔪᓯᑎᓪᓗᒍ.”

ᐊᒻᒪᓗᑦᑕᐅᖅ,  ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓂ ᕿᓂᖅᐳᑦ ᐃᓚᐅᑎᑦᑎᓂᐅᔪᒥ ᐃᓄᒃᑎᑐᒻᒥ ᑮᓴᐅᔾᔭᒃᓴᓂᐅᔫᑉ ᖄᖓᓂ ᑐᓂᔭᐅᓂᖓᓂ ᒪᕐᕉᖕᓂ ᐅᖃᐅᓯᓕᖕᓂ ᐃᖅᑲᓇᐃᔭᖅᑎᐅᔪᓄᑦ, ᕉᓵᓐ ᐅᖃᓚᐅᖅᐳᖅ ᐱᔭᕆᐊᖃᖅᐳᖅ ᐃᓱᒪᒋᓪᓗᒍ ᐊᒥᓱᓂ ᐃᓐᓇᐅᓂᖅᓴᓂ ᐊᑐᖅᑐᐊᖅᑎᐅᔪᓂ ᐃᒡᓗᓂ ᐃᒡᓗᓕᕆᔨᒃᑯᑦ ᐱᔨᑦᑎᕋᖅᐸᒃᑕᖏᓐᓂ ᖁᔭᓕᓂᖃᓲᖑᕗᑦ ᐅᖃᖃᑎᖃᕐᓂᕐᒥ ᐃᓄᒃᑎᑐᑦ−ᐅᖃᓪᓚᖕᓂᕐᒥ ᐃᖅᑲᓇᐃᔭᖅᑎᐅᔪᓄᑦ.

“ᐱᐅᕐᔪᐊᖅᐳᖅ ᓄᓇᖃᖅᑳᖅᓯᒪᔪᓂ ᐅᖃᐅᓰᑦ ᐊᑐᖅᑕᐅᑎᓪᓗᒋᑦ ᐃᖅᑲᓇᐃᔭᕐᕕᐅᔪᓂ ᐃᓄᖕᓂ ᑕᑯᔭᐅᕙᖕᒪᑕ,” ᕉᓵᓐ ᐅᖃᓚᐅᖅᐳᖅ.

“ᓴᓇᔨᐅᔪᑦ ᐱᓐᓇᕆᔭᐅᓪᓗᐊᖅᐳᑦ ᐊᒻᒪ ᑕᐃᒪᓐᓇᑦᑕᐃᓐᓇᖅ ᐱᓕᕆᐊᖑᕙᒡᓗᑎᒃ ᐊᑐᕐᓂᕐᒥ ᐅᖃᐅᓯᕐᒥᓂᑦ. ᑲᑉᐱᐊᓱᓪᓗᐊᙱᑉᐳᒍᑦ ᐅᑎᖅᑎᕆᓂᕐᒥ ᐃᓄᖕᓂ ᐅᖃᓪᓚᖕᓂᕐᒧᑦ ᐃᓄᒃᑎᑐᒻᒥ.”

ᔩᓚ ᖃᙳ, ᐊᑕᐅᓯᐅᔪᒥ ᓴᓇᔨᐅᔪᖅ ᐃᖅᑲᓇᐃᔭᕈᒪᙱᓐᓂᖃᖅᓯᒪᔪᒥ ᑕᐃᒪᙵᓂ ᒫᔾᔨᒥ, ᐅᖃᓚᐅᖅᐳᖅ “ᖁᕕᐊᑉᐳᖅ ᐊᒻᒪ ᐅᑕᖅᑭᔪᓐᓇᐃᓪᓕᕗᖅ ᑐᓴᕐᓂᕐᒥ ᖃᓄᐃᓕᖓᓂᐅᔪᒥ ᑲᑎᒪᓂᐅᔪᒥ” ᐋᑐᕚᒥ.

ᖃᙳ, ᐊᑐᖅᑐᐊᖅᑐᓂ ᐃᒡᓗᓂ ᐱᔨᕆᔨᐅᔪᖅ ᐃᒡᓗᓕᕆᔨᒃᑯᓐᓂ, ᐅᖃᓚᐅᖅᐳᖅ ᑕᐃᒪᑐᖅ ᑐᕌᖅᑎᑦᑎᓂᐊᕐᓂᖓᓂ ᓈᒻᒪᒃᑐᓂ ᑮᓴᐅᔾᔭᒃᓴᓂᐅᔪᓂ ᐊᒻᒪ ᓇᓕᒧᑦᑐᓂ ᐱᕚᓪᓕᕈᑕᐅᔪᓂ ᓴᓇᔨᐅᔪᓄᑦ ᐃᖃᓗᖕᓂ.

“ᑭᓯᐊᓂ, ᓄᓇᓕᖕᒥᐅᑕᐅᔪᐃᓐᓇᐅᕗᒍᑦ,” ᐅᖃᓚᐅᖅᐳᖅ.

“ᐊᒻᒪᓗ ᓄᒫᓇᕐᔪᐊᖅᐳᖅ ᐱᔪᓐᓇᙱᓐᓇᑦᑕ ᐱᕚᓪᓕᕈᑎᓂ ᐊᓯᓕᒫᑦ ᐱᕙᖕᓂᖏᓐᓂ — ᖃᓪᓗᓈᑦ [ᖃᓪᓗᓈᑦ ᓄᓇᖓᓐᓂ].”

ᑲᓂ ᐃᓄᐊᕋᖅ, ᐊᕐᕌᒍᖓᓂ−ᒪᕐᕈᖓᓂ ᐃᓕᓐᓂᐊᖅᐸᓪᓕᐊᓪᓗᓂ ᐃᖅᑲᓇᐃᔮᖅᑖᕋᓱᐊᖅᑐᒥ ᐃᒡᓗᓕᕆᔨᒃᑯᓐᓄᑦ, ᐅᖃᓚᐅᖅᐳᖅ “ᓂᕆᐅᖕᓂᖃᙱᓚᖅ ᑭᓱᑐᐃᓐᓇᒥᒃ” ᑲᑎᒪᓂᐅᔪᒥ ᐋᑐᕚᒥ, ᑭᓯᐊᓂ ᖃᙳᖅᑎᑐᑦ, ᑕᐃᒪᑐᖅ ᐃᒡᓗᓕᕆᔨᒃᑯᑦ ᐃᓕᓴᖅᓯᓂᖃᕐᓂᐊᖅᐳᑦ ᐃᓄᖕᓂ ᓴᓇᔨᐅᔪᓂ ᐊᒻᒪ ᐅᑎᖅᑎᕝᕕᐅᓗᑎᒃ ᓈᒻᒪᒃᑐᒥ ᐱᓕᕆᓂᖏᓐᓄᑦ.

“[ᐃᒡᓗᓕᕆᔨᒃᑯᑦ] ᒪᓂᓴᐃᓲᖑᕗᑦ ᐃᖅᑲᓇᐃᔮᒃᓴᓂ ᖃᕋᓴᐅᔭᑎᒍᑦ ᖃᓪᓗᓈᓄᑦ ᓄᓇᖓᓐᓄᑦ ᐊᒻᒪ ᐱᕚᓪᓕᕈᑎᑦ ᐊᓯᔾᔨᖅᐳᖅ−ᖃᓪᓗᓈᓂ ᓄᓇᖓᓐᓂᕐᒥᐅᑕᐃᑦ ᐱᓲᖑᕗᑦ ᕿᑲᕐᓂᕐᒧᑦ ᐊᐅᓪᓛᕈᑎᒃᓴᓂ ᐊᒻᒪ ᐃᒡᓗᖃᖅᑎᑕᐅᓪᓗᑎᒃ,” ᐅᖃᓚᐅᖅᐳᖅ.

“ᐃᒡᓗᓕᕆᔨᒃᑯᑦ ᑕᐃᒪᐃᓪᓗᐊᕆᕗᑦ ᓄᓇᓕᖕᒥᐅᑕᐅᔪᓄᑦᑕᐅᖅ … ᑕᐃᒪᓐᓇᑦᑕᐃᓐᓇᖅ ᐸᐃᑉᐹᖃᖅᑎᑕᐅᓂᐅᔪᓂ, ᑕᐃᒪᓐᓇᑦᑕᐃᓐᓇᖅ ᐃᓕᓐᓂᐊᕐᓂᖃᖅᑐᓂ ᑕᐃᔅᓱᒥᖓᑦᑕᐃᓐᓇᖅ ᐃᖅᑲᓇᐃᔮᖃᓲᖑᕗᒍᑦ ᐅᕙᓂ.”

ᕉᓵᓐ, ᐅᖃᓚᐅᖅᐳᖅ ᐅᔾᔨᕈᓱᖕᓂᖓᓂ ᐃᒡᓗᓕᕆᔨᒃᑯᑦ ᐊᑐᐃᓐᓇᕐᓂᖏᓐᓂ ᐃᓇᖏᖅᓯᔨᐅᔪᓂ ᓴᓇᔨᐅᔪᓂ ᑲᑎᒪᓂᖃᖅᑎᓪᓗᒍ ᐋᑐᕚᒥ, ᓂᕆᐅᖕᓂᖃᖅᐳᖅ ᐃᖅᑲᓇᐃᔭᖅᑎᖁᑎᓕᒃ “ᐱᐅᔪᒥ ᐱᓕᕆᑦᑎᐊᕐᓂᐊᖅᐳᑦᑐᖅᑕᐅᖅ.”

“ᓄᓵᓇᕐᔪᐊᖅᐳᖅ ᐊᔭᐅᕆᔭᕆᐊᖃᕐᓂᑦᑎᓐᓂ ᐃᓄᖕᓂ ᓇᒡᓕᒍᓱᖕᓂᕐᒧᑦ ᐊᒻᒪ ᐊᔭᐅᕆᔭᕆᐊᖃᖅᐳᖑᑦ [ᐃᒡᓗᓕᕆᔨᒃᑯᓐᓂ] ᐱᐅᒧᒥ ᐱᓕᕆᓂᖏᓐᓂ,” ᐅᖃᓚᐅᖅᐳᖅ.

“ᐊᒥᓱᐊᓗᖕᓂ ᐃᖅᑲᓇᐃᔭᖅᑎᑕᖃᖅᐳᖅ [ᓄᓇᕗᒻᒥ] ᐱᓕᕆᑦᑎᐊᒃᑲᓐᓂᕆᐊᓕᖕᓂ.”