ᑲᖏᖅᖠᓂᖅᒥ ᓄᓇᖃᖅᑐᑦ ᖁᕕᐊᓲᑎᖃᓚᐅᕐᑐᑦ ᐊᓂᒍᐃᑦᑎᐊᖅᑐᓂᒃ ᐃᒡᓗᓕᐅᕐᓂᕐᒧᑦ ᐱᓕᕆᔨᑖᕋᓱᖕᓂᕐᒥ ᐅᑯᓂᖓ ᓄᑖᓂ ᐃᒡᓗᓕᐅᖅᑕᐅᔪᓂᒃ ᐃᓕᓐᓂᐊᖅᑎᓄᑦ ᐅᕙᓂ ᓴᓇᑐᓕᖅᓴᕐᕕᒃ ᓄᓇᕗᒥᑦ ᐃᖅᑲᓇᐃᔮᓄᑦ ᐱᓕᒻᒪᒃᓴᐃᓂᕐᒧᑦ ᐱᓕᕆᐊᒃᓴᒥ ᑲᖏᖅᖠᓂᖅᒥ. (ᐊᔾᔨᙳᐊᖁᑎᒋᔭᐅᔪᖅ)

ᐃᓕᓐᓂᐊᖅᑏᑦ ᐃᒡᓗᒥ ᓴᓇᔪᑦ ᐃᓚᒋᔭᐅᓪᓗᓂ ᓄᓇᕗᑦ 3000 ᖃᓄᐃᓕᐅᕈᑎᓄᑦ

ᐱᓕᕆᖃᑎᖃᓚᐅᕐᑐᑦ ᓯᓚᑦᑐᖅᓴᕐᕕᒃᒥ ᐃᖅᑲᓇᐃᔭᖅᑎᑦ ᐃᒡᓗᓕᐅᖅᑎᓂᒃ

By ᓖᕕᑎ ᐊᑕᒍᔪᒃ

For English version, see Students turn over house as part of Nunavut 3000 strategy

ᓄᓇᕗᒥᑦ ᐊᑕᐅᓯᕐᒥ ᐃᒡᓗᒥ ᐱᐊᓂᒃᓯᕗ ᑐᕌᒐᖃᖅᑎᓪᓗᒋᑦ 3,000ᓂ ᓄᑖᓂ ᐃᒡᓗᓕᐅᕋᓱᒃᖢᑎᒃ ᐊᕐᕌᒍᑦ ᖁᓕᑦ ᐃᓗᐊᓂ.

ᐃᓕᓐᓂᐊᖅᑎᐅᔪᑦ ᓴᓇᑐᓕᖅᓴᕐᕕᒃ ᓄᓇᕗᒥᑦ ᐃᖅᑲᓇᐃᔮᓄᑦ ᐱᓕᒻᒪᒃᓴᐃᓂᕐᒧᑦ ᐃᓕᓐᓂᐊᕐᕕᒃᒥ ᐊᔪᕈᓐᓃᖅᑕᖏᓐᓂ ᐊᑐᖅᖢᑎ ᓴᓇᓚᐅᕐᑐᑦ ᓄᑖᒥ ᐃᒡᓗᒥ ᑲᖏᖅᖠᓂᖅᒥ.

ᖁᕕᐊᓲᑎᖃᓚᐅᕐᑐᑦ ᑎᓯᐱᕆ 19ᒥ ᑖᓐᓇ ᐃᒡᓗ ᐱᐊᓂᒃᑕᐅᔪᖅ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᓐᓄᑦ ᑐᓂᔭᐅᓪᓗᓂ ᓂᕆᓪᓗᑎᒡᓗ ᓄᓇᕗᑦ ᓯᓚᑦᑐᖅᓴᕐᕕᐅᑉ ᓴᓇᑐᓕᖅᓴᕐᕕᖓᓂᒃ.

“ᓄᓇᕗᑦ ᓯᓚᑦᑐᖅᓴᕐᕕᒃ ᖁᕕᐊᓱᒻᒪᕆᒃᑐᑦ ᐃᓚᒋᔭᐅᔪᓐᓇᕐᒪᑕ ᐱᓇᓱᐊᖅᑕᐅᔪᒥᒃ,” ᓯᓚᑦᑐᖅᓴᕐᕕᒃᒧᑦ ᐊᖓᔪᖅᑳᖅ ᐅᓖᐱᑲ ᒥᐅᓐᔅ ᐅᖃᓚᐅᕐᑐᖅ ᑐᓴᒐᒃᓴᓕᐅᖅᖢᑎᒃ.

“ᒫᓂ 40-ᖏᓐᓃᑦᑐᐃᑦ ᐃᓕᓐᓂᐊᖅᑏᑦ ᐱᓕᕆᖃᑕᐅᓚᐅᕐᑐᑦ ᐃᒡᓗᓕᐅᕐᓂᕐᒥᒃ ᐱᒋᐊᕐᓂᖓᓂᒃ ᐱᐊᓂᒃᑕᐅᓂᖓᓄᑦ. ᐃᓕᓐᓂᐊᖅᑎᑕᕗᑦ ᓴᓇᓚᐅᕐᑐᑦ ᓄᑖᒥ ᐱᖓᓱᓂ ᐃᒡᓗᕈᓯᓕᖕᒥ ᐃᒡᓗᒥ ᐃᓚᒌᓄᑦ ᐃᒡᓗᒋᔭᐅᓂᐊᖅᖢᓂ ᐃᒡᓗᒃᓴᒥ ᐅᑕᖅᑭᔪᓂᒃ.”

ᑭᒡᒐᖅᑐᐃᔨᐅᔪᑦ ᓯᓚᑦᑐᖅᓴᕐᕕᒃᒥ, ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᓐᓂᑦ ᐊᒻᒪᓗ ᓄᓇᕗᒥᑦ ᒐᕙᒪᒃᑯᑦ ᐃᓄᓕᕆᔨᑯᖏᓐᓂ ᐃᖅᑲᓇᐃᔮᒃᓴᓂ ᐱᕙᓪᓕᐊᔪᓕᕆᔨᒃᑯᑦ ᐱᓕᕆᖃᑎᖃᓚᐅᕐᒪᑕ ᓴᒃᑰᑉ ᐱᕈᐃᔭᖏᓐᓂ ᐊᐅᓚᑦᑎᔨᓂᒃ, ᑖᓐᓇᓗ ᐅᖃᐅᓯᐅᓯᒪᓪᓗᓂ “ᐃᖅᑲᓇᐃᔭᓕᖅᑎᑦᑎᕙᓪᓕᐊᓂᕐᒧᑦ ᐱᓕᕆᐊᒃᓴᖅᒥᑦ” ᑐᓴᒐᒃᓴᑎᒍᑦ.

ᐅᓇ ᐱᒋᐊᕈᑎᖃᓚᐅᕐᓯᒪᔪᖅ ᑐᑭᓯᖃᑎᒌᒍᑎᒧᑦ ᐅᕘᓇ ᐃᒡᓗᓕᐅᖃᑎᒌᖕᓂᖅ ᓄᓇᕗᑦ 3000 ᐱᓕᕆᐊᒃᓴᑎᒍ, ᐅᑯᓇᙵ ᓄᓇᕗᒥᑦ ᒐᕙᒪᒃᑯᓐᓂ ᓴᖅᑭᑕᐅᓚᐅᕐᓯᒪᔪᖅ ᐅᒃᑑᐱᕆ 2022ᒥ 3,000ᓂ ᓄᑖᓂ ᐃᒡᓗᓂ ᓴᓇᓂᐊᕈᒪᓪᓗᑎ ᐊᕐᕌᒍᑦ ᖁᓕᑦ ᐃᓗᖓᓂ ᐱᔾᔪᑎᐅᓪᓗᓂ ᓄᓇᕗᒥᑦ ᐃᒡᓗᑭᒃᓴᖃᑦᑕᓗᐊᕐᓂᕐᒥᒃ.

ᑖᔅᓱᒧᖓ ᐱᓕᕆᐊᒃᓴᒧᑦ, ᓯᓚᑦᑐᖅᓴᕐᕕᒃ ᐃᓕᓐᓂᐊᖅᑐᓂᒃ ᐃᖅᑲᓇᐃᔭᖅᑎᑦᑎᓚᐅᕐᓯᒪᔪᑦ ᐊᓂᒍᐃᓚᐅᖅᑐᓂᒃ ᔫᓂᐅᑎᓪᓗᒍ ᓴᓇᓂᐊᕐᓗᑎ ᐊᐅᔭᐅᓂᖓᓂᒃ ᐊᒻᒪᓗ ᐃᓕᓐᓂᐊᕐᕕᐊᓗᒃᒥ ᐃᓕᓐᓂᐊᖅᑐᑦ ᐃᓚᐅᔪᓐᓇᖅᑎᑕᐅᓚᐅᕐᒥᔪᑦ. ᐊᒻᒪᓗ ᓯᓚᑦᑐᖅᓴᕐᕕᒃᒥ ᐃᓕᓴᐃᔩᑦ 6-ᓂ ᐃᖅᑲᓇᐃᔮᓪᓚᕆᖕᓄ ᐃᓚᐅᓪᓗᑎᒃ ᐊᒻᒪᓗ 6 ᐊᐅᓚᑦᑎᔨᓄᑦ ᐃᖅᑲᓇᐃᔭᖅᑎᐅᖕᒥᔪᑦ.

ᐃᒡᓗᓕᐅᕈᓐᓇᕐᓂᕐᒥ ᐊᔪᕈᓐᓃᕐᓴᖅᖢᑎᒃ ᑖᒃᑯᐊ ᐃᓕᓐᓂᐊᖅᑏᑦ ᐊᔪᕈᓐᓃᕐᓴᓚᐅᕐᒥᔪᑦ ᐸᕐᓇᐅᑎᓕᐅᕐᓂᕐᒥᒃ ᐊᒻᒪᓗ ᖃᐅᑕᒫᓐ ᐱᓕᕆᐊᖑᓂᐊᖅᑐᓂ ᐋᖅᑭᒃᓱᐃᓂᕐᒥᒃ.

ᐅᖃᐅᓯᕆᓪᓗᒍ ᐃᒡᓗᓕᐅᕐᓂᖅ “ᐱᒻᒪᕆᒃ ᐱᓕᕆᐊᖃᕐᓂᖅ” ᓄᓇᕗᒥᑦ, ᖁᐊᓴ ᑯᓱᒐᖅ, ᓄᓇᕗᒥᑦ ᒐᕙᒪᒃᑯᓐᓂ ᒥᓂᔅᑕ ᑲᒪᒋᔭᖃᕐᑐᖅ ᐃᒡᓗᓕᕆᔨᕐᔪᐊᒃᑯᓐᓂ ᐅᖃᓚᐅᕐᑐᖅ “ᐅᓄᕈᓐᓃᖅᐹᓪᓕᖅᑎᑦᑎᔾᔪᑎᐅᓂᖓᓂ ᐃᖅᑲᓇᐃᔭᖅᑎᓂᒃ ᑎᑭᑎᑕᐅᕙᒃᑐᓂᒃ ᓄᓇᕗᒧᑦ ᐊᒻᒪᓗ ᑕᒫᓂ ᐃᖅᑲᓇᐃᔭᕈᓐᓇᖅᓯᑎᑦᑎᒃᑲᓐᓂᕈᑎ ᑕᐃᒪᓕ ᐃᒡᓗᓕᐅᕐᓂᕐᒧᑦ ᐊᑭᓕᐅᑕᐅᕙᒃᑐᑦ ᐊᐅᓚᑕᐅᒃᑲᓐᓂᕈᓐᓇᕋᔭᖅᖢᑎᒃ.

“ᐱᒻᒪᕆᐅᓛᕐᓕ ᐃᓄᐃᑦ ᐱᓕᒻᒪᒃᓴᕆᐊᖃᕐᓂᖏᑦ ᐊᒻᒪᓗ ᐅᑭᐅᕐᑕᖅᑐᕐᒥ ᐃᖅᑲᓇᐃᔭᕆᐊᖃᕐᓂᖏ ᓯᕗᓪᓕᐅᑎᑦᑕᕆᐊᖃᕐᒪᑕ” ᐃᒡᓗᓕᕆᔨᕐᔪᐊᒃᑯᓐᓄᑦ.

Share This Story

(0) Comments