‘ᐊᖏᐸᓗᒃᑐᒥ ᐱᔭᕇᖅᑕᐅᓂᖓᓂ’ ᑲᖏᖅᖠᓂᕐᒥ ᐃᓄᑐᖃᕐᓄᑦ ᐊᖏᕐᕋᒃᓴᖅ ᓂᕆᐅᒋᔭᐅᕗᖅ ᓄᕕᐱᕆᒥ

For the English version of this story, please see ‘Substantial completion’ of Rankin Inlet elders home expected in November.

ᑲᖏᖅᖠᓂᐅᑉ ᐊᑯᓂᐅᔪᒥ ᐸᖅᑭᔭᐅᓂᕐᒧᑦ ᐃᒡᓗᕐᔪᐊᒃᓴᖓ ᓱᓕ ᒪᓕᖕᓂᖃᑦᑎᐊᖅᐳᖅ ᐱᔭᕇᖅᑕᐅᓂᐊᖅᖢᓂ ᑕᒪᑐᒪᓂ ᐊᕐᕌᒎᔪᒥ.

“ᐊᖏᐸᓗᒃᑐᒥ ᐱᔭᕇᖅᑕᐅᓂᖓᓂ” 24-ᓂ ᐃᒡᓕᓕᒃ ᐃᒡᓗᕐᔪᐊᖓ ᓂᕆᐅᒋᔭᐅᕗᖅ ᓄᕕᐱᕆᐅᑉ ᓄᙳᐊᓂ, ᒍᕋᒡ ᐱᓛᓐᔭᐃ, ᐅᖃᖅᑎᐅᔪᖅ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓄᑦ, ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

$59.4-ᒥᓕᐊᓐᑐᖅᑐᒥ ᐱᓕᕆᐊᒃᓴᐅᔪᖅ ᓯᕗᓪᓕᕐᒥ ᐊᖏᖅᑕᐅᓚᐅᖅᓯᒪᕗᖅ ᓄᓇᕗᒻᒥ ᒐᕙᒪᒃᑯᓐᓄᑦ 2019−ᒥ ᐃᓚᒋᔭᐅᓪᓗᓂ ᑐᕌᒐᒃᓴᐅᔪᒥ ᐊᑐᐃᓐᓇᖃᖅᑎᑦᑎᓂᕐᒥ 156−ᓂ ᐅᖓᕙᕆᐊᖅᑕᐅᔪᒥ-ᐸᖅᑭᓂᐅᔪᒥ  ᐃᒡᓕᓂᑦ ᐃᓄᑐᖃᕐᓄᑦ ᓄᓇᕗᒻᒥ 2030−ᖑᕋᓱᖕᓂᖓᓂ: 24  ᐃᒡᓕᓂᑦ ᑭᕙᓪᓕᕐᒥ ᐊᕕᒃᑐᖅᓯᒪᓂᐅᔪᒥ, 24  ᐃᒡᓕᓂᑦ ᕿᑎᕐᒥᐅᓂ ᐊᕕᒃᑐᖅᓯᒪᓂᐅᔪᒥ ᐊᒻᒪ 108  ᐃᒡᓕᓂᑦ ᐃᖃᓗᖕᓂ.

ᐸᕐᓇᐅᑎ ᑭᐅᓂᐅᓚᐅᖅᐳᖅ ᒐᕙᒪᒃᑯᓐᓄᑦ ᖃᐅᔨᓴᐃᓂᐅᔪᒥ “ᐸᖅᑮᓐᓇᕐᓂᐅᔪᒥ ᐱᓕᕆᔾᔪᓯᖓ ᓄᓇᕗᒻᒥ ᐃᓐᓄᒃᑲᓐᓂᕈᓐᓇᙱᓐᓂᖏᓐᓂ ᑕᑕᓗᐊᒧᑦ ᐊᒻᒪ ᑭᐅᒪᙱᓚᖅ ᐱᔭᕆᐊᖃᕐᓂᐅᔪᓂ ᓄᓇᕗᒻᒥᐅᓂ,” ᐅᖃᐅᓯᐅᓪᓗᓂ ᓄᓇᕗᒻᒥ ᒐᕙᒪᒃᑯᑦ ᐸᕐᓇᐃᓂᕐᒧᑦ ᑎᑎᖅᑲᖁᑎᖓᓐᓂ ᑲᖏᖅᖠᓂᕐᒧᑦ ᐱᓕᕆᕝᕕᖕᒧᑦ.

ᐱᓕᕆᕝᕕᒃ ᓯᕗᓪᓕᕐᒥ ᐋᖅᑭᒃᑕᐅᓯᒪᓚᐅᖅᐳᖅ ᐱᔭᕇᖅᑕᐅᔪᒃᓴᐅᑕᐅᓪᓗᓂ 2023−ᒥ. ᑭᓯᐊᓂ ᑕᐃᓐᓇ ᐅᓪᓗᖅ ᐊᔭᒃᑕᐅᓚᐅᖅᐳᖅ 2024−ᒧᑦ ᐱᔾᔪᑎᖃᖅᑐᒥ ᐊᑭᓖᓂᕐᒧᑦ ᐊᑲᐅᙱᓕᐅᕈᑕᐅᔪᒧᑦ ᐅᑯᓇᓂ ᐱᓕᕆᐊᒃᓴᐅᑉ ᑳᓐᑐᕌᒃᑎᖓᓂ ᐊᒻᒪ ᑳᓐᑐᕌᒃᓯᒪᒃᑲᓐᓂᖅᑕᖓᓂ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᐳᓚᕋᓚᐅᖅᐳᑦ ᓇᑉᐸᖅᑎᕆᔭᐅᓂᐅᔪᒥ ᐃᓂᒋᔭᖓᓂ ᐅᒃᑐᐱᕆ 4−ᒥ.

ᐱᓕᕆᐊᒃᓴᐅᔪᖅ ᐱᔭᕇᓕᒑᑦᑎᐊᖅᐳᖅ ᑕᒪᒃᑭᒐᓚᖕᓂ ᐃᒡᓗᒥᐅᑕᖏᓐᓂ ᐊᒻᒪ ᐱᓕᕆᔾᔪᑎᓂ ᐃᓕᓯᒪᓕᖅᖢᑎᒃ, ᐊᑕᐅᓯᐅᔪᒥ ᓴᓇᔨᐅᔪᓂ ᐅᖃᓚᐅᖅᐳᖅ.

ᐱᓕᕆᕝᕕᒃ ᐃᒡᓗᖃᖅᑎᑦᑎᓂᐊᖅᐳᖅ 24−ᓂ ᐃᓄᑐᖃᕐᓂᑦ. ᓄᔭᓕᕆᕝᕕᖃᕐᓂᐊᖅᐳᖅ, ᑐᒃᓯᐊᕐᕕᒃᓴᒥ ᐃᒡᓗᕈᓯᕐᒥ, ᓴᓇᙳᐊᕐᕕᒃᓴᒥ ᐃᒡᓗᕈᓯᕐᒥ ᐊᒻᒪ ᖃᔅᓯᒐᓚᖕᓂ ᐱᙳᐊᕐᕕᐅᔪᓂ ᐊᒻᒪ ᑲᑎᕝᕕᒃᓴᓂ ᐃᓂᒃᓴᓂ.

ᐃᒡᓗᕐᔪᐊᖅ ᐱᔨᑦᑎᕋᕐᓂᐊᖅᐳᖅ ᐃᓄᖕᓂ ᐱᔭᕆᐊᓕᖕᓂ ᐊᔾᔨᒌᙱᑦᑐᓂ ᑭᒡᓕᐅᔪᓂ ᐃᑲᔪᖅᓯᖅᑕᐅᓂᕐᒧᑦ. ᒪᑐᐃᖓᓂᐊᖅᐳᖅ ᑕᒪᒃᑭᓄᑦ ᑕᐃᒃᑯᓄᖓ ᐱᔭᕆᐊᖃᑐᐃᓐᓇᖅᑐᓂ “ᒥᑭᓛᖓᓂ ᕿᑎᖅᐸᓯᐊᓄᑦ ᖃᐅᑕᒫᒥ ᐃᑲᔪᖅᓯᖅᑕᐅᔭᕆᐊᓕᖕᓂ” ᐊᒻᒪ ᑕᐃᒃᑯᓄᖓ ᐱᔭᕆᐊᓕᖕᓂ ᐃᑲᕐᕋᓂ−24-ᓂ ᓇᐅᑦᑎᖅᓱᖅᑕᐅᔭᕆᐊᓕᖕᓂ ᐊᒻᒪ ᐸᖅᑭᔭᐅᓂᖓᓂ, ᐅᖃᐅᓯᐅᓪᓗᓂ ᓄᓇᕗᒻᒥ ᒐᕙᒪᒃᑯᑦ ᐸᕐᓇᐅᑎᖓᓂ.
ᐃᒡᓗᕐᔪᐊᖅ ᓇᑉᐸᖅᑎᔭᐅᕗᖅ ᒥᑭᒻ ᓇᑉᐸᖅᑎᕆᔨᐅᔪᓄᑦ ᓕᒥᑎᑦᑯᓐᓂ ᐊᒻᒪ ᑲᑐᔾᔭᐅᓗᓂ ᑲᒪᒋᔭᐅᓗᓂ ᓴᒃᑰᑉ ᐱᕈᐃᔭᖏᓂ ᐊᐅᓚᑦᑎᔨᖏᓐᓂᑦ ᐊᒻᒪ ᐃᐊᒻᐸᓯ ᐱᓇᖕᓇᕐᒥ ᐃᓄᑐᖃᕐᓄᑦ ᐆᒪᓂᖏᓐᓂ.

ᓴᒃᑯ ᐊᒻᒪ ᐃᐊᒻᐸᓯ ᐱᓇᖕᓇᕐᒥ ᐱᓚᐅᖅᐳᑦ $150-ᒥᓕᐊᓐᓂ, ᐊᕐᕌᒍᓄᑦ−10-ᓄᑦ ᑳᓐᑐᕌᖕᒥ ᓄᓇᕗᒻᒥ ᒐᕙᒪᒃᑯᓐᓂ ᐊᐅᓚᑦᑎᓂᕐᒧᑦ ᐸᖅᑭᔭᐅᕕᖕᒥ.

ᑳᓐᑐᕌᒃ ᐊᑭᖃᓪᓗᐊᕐᓂᐊᖅᐳᖅ $15 ᒥᓕᐊᓐᓂ ᐊᕐᕌᒍᑕᒫᒥ ᐊᒻᒪ ᓴᖅᑭᑎᑦᑎᓂᐊᖅᐳᖅ 43−ᓂ ᐃᖅᑲᓇᐃᔮᒃᓴᓂ.