ᐃᖅᑲᖅᑐᐃᕕᒡᔪᐊᒃᑯᑦ ᑐᓵᕈᒪᙱᑦᑐᑦ ᐃᓄᐃᑦ ᐅᖃᐅᓯᖓᓂ ᐃᖅᑲᖅᑐᐃᕕᒃᑰᕈᑎᐅᔪᒪᔪᒥᒃ

For the English version of this story, please see Supreme Court refuses to hear GN’s case to kill NTI language lawsuit.

ᑲᓇᑕᐅᑉ ᐃᖅᑲᖅᑐᐃᕕᔾᔪᐊᖓ ᐱᓕᕆᐊᖃᔾᔮᙱᑦᑐᑦ ᓄᓇᕗᒥᑦ ᒐᕙᒪᒃᑯᑦ ᓄᖅᑲᖅᑎᑦᑎᔾᔪᑎᒋᓇᓱᒃᑕᖓᓂ ᐊᕐᕌᒍᓂ ᑎᓴᒪᓂ ᐃᖅᑲᖅᑐᐃᕕᒃᑰᕈᑎᒋᔭᐅᔪᒥ ᐅᑯᓇᙵ ᓄᓇᕗᑦ ᑐᙵᕕᒃᑯᓐᓄᑦ ᐃᓄᐃᑦ ᐅᖃᐅᓯᖓᒍᑦ ᐃᓕᓐᓂᐊᖅᑎᑦᑎᓂᕐᒥᒃ.

“ᐃᓱᒪᓕᐊᕆᔭᐅᓂᑯ ᐃᓱᒪᒋᑦᑎᐊᕋᑦᑎᒍᑦ ᐊᒻᒪᓗ ᓯᕗᓂᕐᒧᑦ ᐱᓕᕆᕙᓪᓕᐊᓕᕐᓂᐊᕐᓂᕗᑦ ᓂᕆᐅᒋᓪᓗᑎᒍᑦ,” ᓯᕗᓕᐅᕐᑎ ᐸᐅᓗᓯ ᐊᕿᐊᕈᒃ ᐅᖃᓚᐅᕐᑐᖅ ᑐᓴᒐᒃᓴᓕᐅᖅᑎᓄᑦ ᒪᐃ 29-ᖑᑎᓪᓗᒍ ᒪᓕᒐᓕᕆᕝᕕᒡᔪᐊᒥ ᐅᑯᐊ ᐃᖅᑲᖅᑐᐃᕕᒡᔪᐊᒃᑯᑦ ᐋᖅᑭᒃᓯᓚᐅᖅᖢᑎ ᐃᖅᑲᖅᑐᐃᕕᒃᑰᕈᑎᐅᓇᓱᒃᑐᒥ ᐱᓕᕆᐊᖃᔾᔮᙱᓐᓂᖏᓐᓂᒃ.

ᑲᓇᑕᒥ ᖁᑦᑎᓛᑦ ᐃᖅᑲᖅᑐᐃᕕᒃᑯᑦ ᑭᖑᓪᓕᖅᐹᖑᓚᐅᕐᑐᖅ ᒪᓕᒐᓕᕆᓂᒃᑯᑦ ᐅᑯ ᒐᕙᒪᒃᑯᑦ ᐊᑦᑎᖕᓂᖅᓴᓃᑦᑐᑦ ᐃᖅᑲᓇᐃᕕᖕᓄᑦ ᐃᓱᒪᓕᐊᕆᔭᐅᓚᐅᖅᑐᓂ ᐊᓯᙳᖅᑎᑦᑎᓇᓱᒃᑎᓪᓗᒋᑦ ᑖᒃᑯᐊᓗ ᓄᓇᕗᑦ ᑐᙵᕕᒃᑯᓐᓂ ᐃᑲᔪᖅᑐᐃᓯᒪᓪᓗᑎᒃ.

ᓄᓇᕗᑦ ᑐᙵᕕᒃᑯᑦ, ᑲᑐᔾᔨᖃᑎᒌᑦ ᓄᓇᕗᒥᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ ᓴᐳᔾᔨᔨᐅᔪᑦ, ᐃᖅᑲᖅᑐᐃᕕᒃᑰᖅᑎᑦᑎᓚᐅᕐᓯᒪᖕᒪᑕ ᓄᓇᕗᒥᑦ ᒐᕙᒪᒃᑯᓐᓂ 2021-ᒥ.

ᐃᖅᑲᖅᑐᐃᕕᒃᑰᖅᑎᑦᑎᔾᔪᑎ ᐅᖃᕐᓯᒪᓚᐅᕐᒪᑦ ᒐᕙᒪᒃᑯᑦ ᒪᓕᒃᓯᒪᙱᓐᓂᖓᓂ ᐃᓄᒃᑐᑦ ᐅᖃᐅᓯᒃᑯᑦ ᐃᓕᓐᓂᐊᖅᑎᑦᑎᔭᕆᐊᖃᕐᓂᕐᒥ ᓄᓇᕗᒥᑦ ᐃᓕᓐᓂᐊᕐᕕᖕᓂ.

ᑕᐃᒪᐃᓕᐅᕐᓂᐊᕐᓗᑎᒃ, ᒐᕙᒪᒃᑯᑦ ᓱᕋᐃᓚᐅᕐᒪᑕ “ᒪᓕᒐᖅᑎᒍᑦ ᓴᐳᔾᔭᐅᓯᒪᔪᓂᒃ ᐱᔪᓐᓇᐅᑎᖏᓐᓂ ᓄᓇᕗᒥᑦ ᐃᓄᐃᑦ,” ᓄᓇᕗᑦ ᑐᙵᕕᒃᑯᑦ ᑕᐃᒪᐃᓐᓂᕋᐃᓪᓗᑎᒃ, ᐅᖃᐅᓯᖃᖅᖢᑎᒃ ᐃᓚᖓ 15 ᒪᓕᒐᖅᔪᐊᓃᑦᑐᓂᒃ (Charter of Rights and Freedoms), ᑖᓐᓇᓗ ᐅᖃᐅᓯᕐᒥ ᐱᐅᒃᓴᕆᐊᖃᙱᓐᓂᕐᒨᖓᓪᓗᓂ.

ᐃᖅᑲᖅᑐᐃᕕᒡᔪᐊᒃᑯᑦ ᐃᓱᒪᓕᐊᖓᓄᑦ, ᑖᓐᓇᓗ ᐃᖅᑲᖅᑐᐃᕕᒃᑰᖅᑎᑦᑎᔾᔪᑎ ᑲᔪᓯᑎᑕᐅᓂᐊᓕᕐᑐᖅ, ᐅᓇ ᐊᕿᐊᕈᒃ ᐅᖃᕋᓗᐊᖅᖢᓂ “ᐃᓱᒪᒐᓗᐊᕐᓂᕐᒥᓂ” ᑕᒪᓐᓇ ᐋᕿᒋᐊᖅᑕᐅᔪᓐᓇᕐᓂᐊᕐᓂᖓᓂᒃ.

“ᐃᓱᒪᒐᒪ ᑭᓇᑐᐃᓐᓇᖅ ᐃᖅᑲᖅᑐᐃᕕᒃᒦᑦᑐᒪᓇᔭᙱᓐᓂᖓᓂ,” ᐊᕿᐊᕈᒃ ᐅᖃᕐᑐᖅ.

ᐅᖃᓚᐅᙱᑦᑐᖅ ᖃᓄᐃᓕᐅᕈᓐᓇᕋᔭᕐᓂᖏᓐᓂ ᒐᕙᒪᒃᑯᑦ ᒪᓕᒐᖅᑎᒍ ᑕᒪᓐᓇ ᐃᖅᑲᖅᑐᐃᕕᒃᑯᑦ ᑲᔪᓯᑎᑕᐅᓂᐊᖅᐸᑦ.

“ᑕᒪᓐᓇ ᖁᕕᐊᓲᑎᒋᓗᐊᕆᐊᒃᓴᖅ ᐊᔪᕐᓇᕐᒪᑦ,” ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᔨᐅᕆᒥ ᑑᕐᖔᓗᒃ ᐅᖃᓚᐅᕐᑐᖅ ᐅᖄᓚᐅᑎᒃᑯᑦ ᐊᐱᖅᓱᖅᑕᐅᑎᓪᓗᒍ.

“ᐅᓇ ᐃᖅᑲᖅᑐᐃᕕᒃᑰᖅᑎᑦᑕᐅᓕᒪᔭᕋᓗᐊᕗᑦ. ᑭᓯᐊᓂᓕ ᐱᒻᒪᕆᐊᓘᒻᒪᓐ ᐃᓄᐃᑦ ᐃᓕᓐᓂᐊᖅᑎᑕᐅᓗᑎᒃ ᐅᖃᐅᓯᖏᑦᑎᒍᑦ,” ᐅᖃᕐᑐᖅ, ᐅᖃᒃᑲᓐᓂᖅᖢ ᐅᑯᐊ ᓄᓇᕗᑦ ᑐᙵᕕᒃᑯᑦ ᐱᓕᕆᖃᑎᖃᕋᓱᖕᓂᖏᓐᓂᒃ ᓄᓇᕗᒥᑦ ᒐᕙᒪᒃᑯᓐᓂ ᐃᓕᓐᓂᐊᖅᑐᓕᕆᓂᕐᒧᑦ ᐱᓕᕆᐊᒃᓴᓂ ᑭᓯᐊᓂᓕ ᐃᖅᑲᖅᑐᐃᕕᒃᑰᖅᑎᑦᑎᔾᔪᑎ “ᓱᖁᓯᔾᔮᙱᑦᑐᖅ.”

ᐃᓄᐃᑦ ᑲᑐᔾᔨᖃᑎᒌᖏᑦᑕ ᐃᖅᑲᖅᑐᐃᕕᒃᑰᖅᑎᑦᑎᔾᔪᑎᖓ ᐅᖃᐅᓯᖃᕐᓯᒪᔪᖅ ᐊᕐᕌᒍᓂ ᑕᓪᓕᒪᓂ ᐸᕐᓇᐅᑎᖃᕐᓂᕐᒥ ᐊᑐᓕᖅᑎᑦᑎᓂᕐᒧᑦ ᐃᓄᐃᑦ ᐅᖃᐅᓯᖓᓂ ᐃᓕᓐᓂᐊᖅᑎᑦᑎᓂᕐᒥᒃ ᐃᓕᓐᓂᐊᓕᓵᖅᑐᓂᒃ ᒍᕇᑦ 12-ᒧ.

ᑕᐃᒪᙵᑦ ᐃᖅᑲᖅᑐᐃᕕᒃᑰᕈᑎ ᐱᒋᐊᖅᑕᐅᓕᓚᐅᕐᓯᒪᑎᓪᓗᒍ ᓄᓇᕗᒥᑦ ᒐᕙᒪᒃᑯᑦ ᑕᒪᑐᒥᖓ ᓄᖅᑲᖅᑎᑦᑎᓇᓱᒃᓯᒪᔪᑦ, ᑕᒪᓐᓇᓗ ᐱᓕᕆᐊᕆᔭᐅᓯᒪᓕᖅᖢᓂ ᐊᕐᕌᒎᓕᖅᑐᓂᒃ ᑎᓴᒪᓂᒃ.

ᑕᒪᕐᒥ ᓄᓇᕗᒥᑦ ᐃᖅᑲᖅᑐᐃᔨᒃᑯᑦ ᐊᒻᒪ ᓄᓇᕗᒥᑦ ᐃᖅᑲᖅᑐᐃᔨᒃᑰᕈᑎᐅᓇᓱᒃᑐᓂᒃ ᓄᖅᑲᖅᑎᑦᑎᓇᓱᒃᑎ ᐃᑲᔪᖅᑐᐃᓯᒪᔪᑦ ᓄᓇᕗᑦ ᑐᙵᕕᒃᑯᓐᓂ, ᒐᕙᒪᒃᑯᑦ ᓄᖅᑲᖅᑎᑦᑎᔾᔪᑎᒋᓇᓱᒃᑕᖓᓂ ᑲᒪᒋᔭᖃᙱᖢᑎᒃ.

ᓄᕕᐱᕆᒥ ᓄᓇᕗᒥᑦ ᒐᕙᒪᒃᑯᑦ ᐃᖅᑲᖅᑐᐃᕕᒡᔪᐊᒃᑯᑦ ᐃᓱᒪᓕᐊᕆᔭᐅᔪᒥᒃ ᓄᖅᑲᖅᑎᑦᑎᒋᐊᓚᐅᕐᓯᒪᔪᑦ.

“ᐃᖅᑲᖅᑐᐃᕕᓕᕆᔪᒪᙱᓐᓇᑦᑕ ᐊᕐᕌᒍᒐᓴᖕᓂᑦ,” ᐊᕿᐊᕈᒃ ᐅᖃᕐᑐᖅ ᒐᕙᒪᒃᑯᑦ ᓄᖅᑲᖅᑎᑦᑎᔾᔪᑎᒋᓇᓱᒃᑕᖏᓐᓄᑦ ᐃᖅᑲᖅᑐᐃᕕᒃᑰᖅᑎᑕᐅᓇᓱᖕᓂᖏᓐᓂᒃ.

ᐃᖅᑲᖅᑐᐃᕕᒡᔪᐊᒃᑯᑦ ᖁᑦᑎᓛᖑᓪᓗᑎᒃ, ᑖᒃᑯᐊ ᑐᓵᔪᒪᙱᓐᓂᕋᖅᖢᑎᒃ ᐃᖅᑲᖅᑐᐃᕕᒃᑰᕈᑎᒥ ᓄᖅᑲᖅᑎᑦᑎᔾᔪᑎᐅᓇᓱᒃᑐᒥᒃ, ᑖᒃᑯᐊ ᐃᖅᑲᖅᑐᐃᕕᒡᔪᐊᒃᑯᑦ ᐃᓱᒪᓕᐊᖓ ᑕᐃᒪᐃᓐᓂᐊᖅᑐᖅ ᐊᒻᒪᓗ ᐊᓯᐊᒍᑦ ᓄᖅᑲᖅᑎᑦᑎᓇᓱᒍᓐᓇᐃᓪᓕᓪᓗᑎᒃ, ᐅᖃᕐᓯᒪᓚᐅᕐᑐᖅ ᒪᓕᒐᓕᕆᔨᒃᑯᑦ ᑲᓇᑕᒥ ᖃᕋᓴᐅᔭᒃᑯᑦ ᓴᖅᑭᔮᒐᖓ.

ᐅᖃᐅᓯᕐᒧᑦ ᐃᖅᑲᖅᑐᐃᕕᒃᑰᖅᑎᑦᑎᔾᔪᑎ ᐃᓚᒋᔭᐅᔪᖅ ᑕᓪᓕᒪᓄᑦ ᓄᓇᕗᑦ ᑐᙵᕕᒃᑯᑦ ᐃᖅᑲᖅᑐᐃᕕᒃᑰᕈᑎᒋᔭᖏᓐᓂ ᓄᓇᕗᒧᑦ ᐅᕝᕙᓘᓐᓃᑦ ᒐᕙᒪᑐᖃᒃᑯᓐᓄᑦ ᑕᐃᒪᙵᓂ 2015-ᒥ, ᐅᖃᕐᓯᒪᓚᐅᕐᑐᖅ ᐊᕐᕌᒍᓄᑦ ᑎᓴᒪᓄᑦ ᖃᓄᐃᓕᐅᕈᑎᐅᓇᓱᒃᑐᓄᑦ ᐅᓂᒃᑳᑦ.

ᕕᕝᕗᐊᕆᒥ, ᑑᕐᖔᓗᒃ ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᓄᑖᓂ ᐃᖅᑲᖅᑐᐃᕕᒃᑰᕈᑎᑕᖃᔾᔮᕋᓱᒋᙱᓪᖢᓂᐅᒃ ᒐᕙᒪᒃᑯᓐᓄ.

ᐅᑯᐊ ᐱᓕᕆᐊᑎᒌᑦᑎᐊᕐᓂᕐᓴᐅᓕᖅᑎᑦᓗᒋᑦ ᓄᓇᕗᑦ ᑐᙵᕕᒃᑯᑦ ᐊᒻᒪ ᓄᓇᕗᒥᑦ ᒐᕙᒪᒃᑯᑦ, ᓇᓕᐊᒃ ᐃᖅᑲᖅᑐᐃᕕᒃᑰᕈᑎ ᓄᖅᑲᖅᑎᑕᐅᓚᐅᙱᑦᑐᑦ.

“ᓂᕆᐅᒃᑐᖓ ᐅᖃᓪᓚᖃᑎᖃᒃᑲᓐᓂᕈᒪᔪᓂ ᖃᓄᖅ ᑕᒪᓐᓇ ᐋᖅᑭᒋᐊᒃᑲᓐᓂᕈᓐᓇᕋᔭᕆᐊᒃᓴᖏᓐᓄᑦ ᓄᓇᕗᑦ ᑐᙵᕕᒃᑯᓐᓂ,” ᐊᕿᐊᕈᒃ ᐅᖃᕐᑐᖅ.

“ᐃᓱᒪᒐᒪ ᐊᑕᐅᓯᑦᑕᐃᓐᓇᕐᒥ ᑐᕌᒐᖃᕋᓱᓐᓂᑦᑎᓐᓂ ᑕᒪᓐᓇ ᐱᐊᓂᒃᑕᐅᓗᓂ. ᐊᒻᒪᓗ ᑕᒪᓐᓇ ᓯᕗᓂᑦᑎᐊᑦᑎᓐᓂ ᐱᓕᕆᐊᖑᓂᐊᕐᓂᖓᓂᒃ.”